Yõaannẽ 17 - ꞌBuuk cĩ Thõõth cĩ Nyekuci

Alaõ Yeesu

¹ Ma baa ẽdẽcaak Yeesu thõõth ꞌcĩ aduhaak nuyyiook cĩgĩnnĩg ko, ikia ĩcĩnõõthĩ hẽẽtkujjieen nẽ alaõ ĩĩ, “Baaba, õdõlan kõrra ꞌcĩ abulꞌthĩ nii Ngeeruni, hátĩ hubuluthii Ngeeruni nganiit buúk.

² Hĩnĩngĩtĩ baa aaꞌnyĩhuu nii ĩnõõnnõ makaaꞌthĩt ꞌcĩ aggamĩ eet vẽlẽk, hátĩ haaꞌnyĩk rũgẽt ꞌcĩ aalla ũdũt, eet baag aaꞌnyihi nii ĩnõõnnõ.

³ Nẽẽthĩ ꞌyioko, rũgẽt ꞌcĩ aalla ooo cieeni, hátĩ hagayyi nẽẽg nganiit Nyekuc hõdẽẽthõng ꞌcĩ ĩĩnĩ dĩdĩ, hĩ Yeesu Krĩstõ baa ĩꞌthõõa niina.

⁴ Baa haꞌnyahaahii naa nganiit bulẽẽnĩt loota nĩnga, ngaatĩ hẽdẽcaakĩ dtiic baa aaꞌnyaa nii hidticanõ.

⁵ Nẽẽthĩ ꞌyioko Baaba, buluthaa nganĩĩt muumaa cunni bulẽẽttaa baa haꞌnyak naag hĩ nganiit, baa nga heteheꞌnyiaa lõõcĩ.

Alaiini Yeesu nuyyiook cĩgĩnnĩg

⁶ “Heteretheehii naa nganiit eet baag aaꞌnyaa nii nganĩĩt loota nĩnga. Baa ĩĩn nẽẽg eet cugunnig, baag aaꞌnyaa nii nganĩĩta nẽ uꞌthuutti nẽẽg thõõth cunni.

⁷ Nẽ ꞌyioko, agaacõ nẽẽg ĩĩtõ, ꞌgii vẽlẽk baa aaꞌnyaa nii nganĩĩta, aku hĩ nganiita.

⁸ Hĩnĩngĩtĩ baa huduhaaha naa ĩhõõggõ thooꞌthiok baag aduhaakaa nii nganĩĩt nẽ elemita. Baa agaacõ nẽẽg dĩdĩ ngaatĩ hakuuni naa hĩ nganiita nẽ elemit ngaatĩ ĩꞌthõõanna nii nganĩĩta.

⁹ Halaiini naa ĩhõõggõ. Hõllõngaa halaiini eet cĩg looc nicci. Nẽẽthĩ, halaiini eet baag aaꞌnyaa nii nganĩĩt, hĩnĩngĩtĩ ĩĩn nẽẽg eet cugunnig.

¹⁰ Nẽ eeta vẽlẽk ꞌcĩg haꞌnyahi naana, ĩĩn cugunnig nẽ ꞌcĩg aꞌnyahi niina, ĩĩn cĩgannĩg. Nẽ ikia bulẽẽnĩtĩ hĩ nganĩĩt, hĩnĩngĩtĩ ĩhõõggõ.

¹¹ Iittiõõ hatĩ naa hõllõngaa haalla loota nĩnga, nẽẽthĩ, nga aalla nẽẽg looccaa nĩĩcĩ, nẽẽthĩ ꞌyioko, hikia naa hĩ nganiita. Baaba ꞌcĩ Ẽllẽẽmĩthĩ, ꞌthũũtĩ ĩhõõggõ ꞌtirriaanaa cĩ ꞌthaar cugunnig, ꞌthaar baag aaꞌnyaa nii nganĩĩta, hátĩ hũrũmtĩ nẽẽg hõdẽĩ hĩcĩ harũmĩ naag hĩ nganiita.

¹² Baa nga harũmeenna naag hĩ ĩhõõggõ, baa haꞌthũũnnĩ ĩhõõggõ jurrung ꞌthaarĩĩ baag aaꞌnyaa nii nganĩĩta. Nga hudhuheek umwa tuu, hõdẽẽthõng diooni baa aduhoothĩk daahĩtha, hátĩ hikia hĩĩ thõõth cĩ ꞌBuuk cĩ Nyekuci dĩdĩ.

¹³ “Hikia ꞌyioko naa hĩ nganiita, nẽẽthĩ, haduha thooꞌthiok iccig nga haaĩ loota nĩnga, hátĩ haꞌnyahit nẽẽg taliinit caannĩ vẽlẽk hõrggẽẽnaa cĩnĩĩng.

¹⁴ Baa huduhaaha naa ĩhõõggõ thõõth cunni, aaburreek hinnia eeta cĩg looc nicci ĩhõõggõ thõng, hĩnĩngĩtĩ iittiõõ nẽẽg hõllõngaa ĩĩn eet cĩg looc nicci tarĩ hĩ naana.

¹⁵ Baaba, aitiõõ laiiniti caannĩ hõllõngaa ꞌcĩ hanneeki bĩtĩ ĩhõõggõ battaalaa cĩ looc nicci, nẽẽthĩ, hanneekii ꞌthũũtĩ ĩhõõggõ, hĩnĩngĩtĩ ꞌThĩttaan.

¹⁶ Aitiõõ nẽẽg hõllõngaa ĩĩn eet cĩg looc nicci, hĩcĩ hõllõngaa hĩĩnĩ naa eet cĩ looc nicci ho.

¹⁷ Ĩĩn thõõth cunni thõõth ꞌcĩ ĩĩn dĩdĩ. Nẽ aꞌnyĩĩk thõõth cunni ꞌcĩ ĩĩn dĩdĩ ho, haaꞌnyĩk ĩhõõggõ hĩĩtõ eet cugunnig.

¹⁸ Hĩcĩ ĩꞌthõõannaa nii nganĩĩt hikia loota nĩnga, hĩꞌthõ naa buúk nuyyiook hõõt looccaa nĩĩcĩ.

¹⁹ Hẽlẽmanaa naa ẽlẽ caannĩ, hĩnĩngĩtĩ ĩhõõggõ, hátĩ hĩĩtõ nẽẽg ooo eet cĩg thõõth ꞌcĩ ĩĩn dĩdĩ.

Alaiini Yeesu lemmiook vẽlẽk

²⁰ “Hõllõngaa halaiini naa nuyyiook iccig diooni. Halaiini naa eet vẽlẽk ꞌcĩg hatĩ ẽlẽmma nganĩĩt, hĩnĩngĩtĩ nyeemuut ꞌcĩ hatĩ alliman nẽẽgĩ.

²¹ Baaba, hadiimi naa lemmiook vẽlẽk hũrũmtĩ hõdẽĩ, hĩcĩ harũmĩ naag hĩ nganĩĩta. Hadiimi naa ĩhõõggõ buúk haauto hõdẽĩ hĩ ngagĩĩta. Hatĩ helemit eeta cĩg looc nicci ngaatĩ ĩꞌthõõannaa nii nganĩĩta.

²² Haaꞌnyĩha naa ĩhõõggõ bulẽẽnĩt baa aaꞌnyaa nii nganĩĩta, hátĩ hũrũmtĩ nẽẽg hõdẽĩ hĩcĩ harũmĩ naag hĩ nganiita.

²³ Haaĩ naa hĩ ĩhõõggõ nẽ aau nii hĩ nganĩĩta. Ĩĩn occa hatĩ nẽẽg hõdẽẽthõng nuun, haanytĩk looc nicci haga ngaatĩ ĩꞌthõõannaa nii nganĩĩta, nẽ ĩmmĩnanuu ĩhõõggõ haau hĩcĩ ammĩnannaa nii nganĩĩt ko.

²⁴ “Baaba, hadiimi naa eet vẽlẽk baag aaꞌnyaa nii hũrũmteea hĩ nganĩĩt ngaatĩ haayyi naana, hátĩ hĩcĩnĩt nẽẽg bulẽẽnĩt caannĩ, bulẽẽnĩt baa aaꞌnyaa nii nganĩĩta, hĩnĩngĩtĩ ammĩnannaa nii nganĩĩt baa nga heteheꞌnyiaa lõõcĩ.

²⁵ “Baaba ꞌcĩ abũnnaa, hõllõngaa agayyi eeta cĩg looc nicci nganiita. Nẽẽthĩ, hagayyii naana nẽ agaacõ nuyyiooha cĩgannĩg ĩĩtõ, baa ĩꞌthõõannaa nii nganĩĩta.

²⁶ Haaꞌnyĩha naa ĩhõõggõ hagayyi nganiita nẽ aalla hatĩ haaꞌnyihi ĩhõõggõ hagayyi nganiit, hátĩ haau mĩnnanĩ ꞌcĩ aꞌnyaheekaa nii nganĩĩt hĩ ĩhõõggõ nẽ hátĩ haau naa buúk hĩ ĩhõõggõ.”