Yõaannẽ 15 - ꞌBuuk cĩ Thõõth cĩ Nyekuci

Ĩĩn Yeesu hẽẽt cĩ viinoo ꞌcĩ ĩĩn dĩdĩ

¹ Baa aduhaak Yeesu nuyyiook cĩgĩnnĩg anneek, “Hĩĩnĩ naa hẽẽt cĩ viinoo ꞌcĩ ĩĩn dĩdĩ nẽ ĩĩ Baaba baattĩ manu.

² Eꞌngeddeek nẽẽ taba ꞌcĩg uwwatan ẽllaa caannĩ tuu nẽ ũkũman taba ꞌcĩg õddõngõt, hátĩ hoddongotit jurrung.

³ Iittu niig tẽllĩg ẽlẽk, hĩnĩngĩtĩ thõõth aa huduhaahuung naa ngagiita.

⁴ Aallattia hĩ nganĩĩta nẽ hatĩ haala naa hĩ ngagiita. Aitiõõ tabaac ꞌcĩ occa õddõngõt ẽmmẽn tõõ, adiim aalla hẽẽtaa cĩ viinoo. Nẽẽthĩ, occa hõllõngaa oddongottu niig, hatĩ hõllõngaa aallannu hĩ nganĩĩta.

⁵ “Haaĩ naa hĩ hẽẽt cĩ viinoo nẽ aauttu niig hĩ tabana cĩgĩnnẽẽgĩ. Má aalla ẽẽtĩ hĩ nganĩĩta nẽ haau naa hĩ ĩnõõnnõ, õddõngõt hatĩ nẽẽ jurrung. Nẽẽthĩ, má haitiõõ naa hĩ ngagiit tõõ, aitiõõ ꞌgii ꞌcĩ occa adĩmannu niig tõõ.

⁶ Má hõllõngaa aaĩ ẽẽtĩ umwaa hĩ nganĩĩta, aaĩ nẽẽ hĩ tabaac ꞌcĩ adhuhoothĩk tuu nẽ õdõhõha. Aluttiaa tabana ꞌcĩg aattĩg noho nẽ udhuktoothĩk ꞌgwoyyiatõõ hutuuꞌthi.

⁷ Má aallannu niig hĩ nganĩĩta nẽ aallattia thooꞌthioha cĩgannĩg hĩ ngagiita, ijinit ꞌgii vẽlẽk ꞌcĩ adiimmu nẽ hatĩ aaꞌnyĩhoothĩhuung ngagiita.

⁸ Ĩĩn thõõth ciee bulẽẽnĩt hĩ Baaba ngaatĩ hatĩ oddongottu jurrung nẽ etereꞌthiaau eleeti cugguung, ngaatĩ iiginnu nuyyiook cĩgannĩg.

⁹ “Hammĩnannuung naa ngagiit haau hĩcĩ ammĩnannaa Baaba nganĩĩta. Uꞌthuutti mĩnnan caannĩ haala hĩ ngagiita.

¹⁰ Má aꞌthuunnu niig thõõth ꞌcĩ haduha naana, aallannu hatĩ mĩnnaanaa caannĩ, hĩcĩ haꞌthũũnnĩ naa thõõth ꞌcĩ aduha Baaba nẽ haala mĩnnaanaa cĩnnĩ.

¹¹ Haduhaakuung naa ngagiit thõõth icci, hátĩ haau taliiniti caannĩ hĩ ngagiita nẽ hátĩ hũttũbanoothĩk taliiniti cunuung.

¹² Aaĩ thõõth ꞌcĩ haduha naa hoti. Ĩmmĩnanit ꞌgoonogu haau hĩcĩ hammĩnannuung naa ngagiita.

¹³ Aitiõõ mĩnnanĩ ꞌcĩ ĩllõõan thõõth ꞌcĩ occa adaaknĩ ẽẽtĩ, hĩnĩngĩtĩ ꞌgõõnõgĩ tõõ.

¹⁴ Iiginnu niig ꞌgoonoga hatĩ adĩmannu thõõth ꞌcĩ haduhaakuung naana.

¹⁵ Iittiõõ naa hõllõngaa hauyyuung ngagiit hanneekuung dticcianniook, hĩnĩngĩtĩ aitiõõ dticciannioohiti hõllõngaa aga dtiic cĩ makayyioohit cĩnnĩ. Nẽẽthĩ ꞌyioko, hutuvvuung naa ngagiit hiinnihuung ꞌgoonoga, hĩnĩngĩtĩ heteretheehuung naa ngagiit hẽlẽggĩ vẽlẽk baag aduhaaka nganĩĩt Baaba.

¹⁶ “Baa hõllõngaa ẽbẽrannaangu niig nganĩĩta, nganĩĩt ꞌcĩ baa hẽbẽraannuung ngagiita nẽ hĩꞌthooung õõt ĩꞌthaattĩk nyeemuut caannĩ looc. Nẽẽthĩ hatĩ aaꞌnyuung Baaba ꞌgii ꞌcĩ ajinnu niig ĩnõõnnõ ꞌthaarĩĩ cĩgannĩg.

¹⁷ Nẽ thõõth ꞌcĩ haduhaakuung naa cieeni. Ĩmmĩnanit eleeti cugguung.”

Aaburreek eeta nuyyiook

¹⁸ “Má aaburreekuung eeta cĩg looc nicci ngagiita, agayyiooth ĩĩtõ, baa aaburrieeha nẽẽg nganĩĩt buúk ĩĩcĩ oou.

¹⁹ Má baa ĩĩtõ niig eet cĩg looc nicci, occa ꞌyioko ammĩnannuung eeta cĩg looc nicci ngagiita. Nẽẽthĩ, iittiõõ niig hõllõngaa iiginnu eet cĩg looc nicci. Baa hẽbẽraauung naa ngagiit, hátĩ ũtũngteek thooꞌthiok cĩg looc nicci. Ĩnõõ ꞌyioko ꞌcĩ aaburreekuung eeta cĩg looc nicci ho.

²⁰ Ummuhuttooth thõõth baa haduhaakuung naa hanneekuung, ‘Aitiõõ dticciannioohiti ꞌcĩ maka hĩllõõan makayyioohit cĩnnĩ tõõ.’ Má baa adĩmannaa nganĩĩt eeta ꞌbuth, adĩmannuung hatĩ ngagiit buúk ꞌbuth. Má baa athĩhĩ nẽẽg ꞌlimman caannĩ, athĩhĩ hatĩ cunuung buúk.

²¹ “Adĩmannuung hatĩ nẽẽg buúk ngagiit ꞌbuth, hĩnĩngĩtĩ nganĩĩta, nẽẽthĩ, baa aitiõõ nẽẽg hõllõngaa aga Eet baa ĩꞌthõõannaa nganĩĩta.

²² Má baa hiittiõõ naa hõllõngaa hakuu haduhaahi ĩhõõggõ, occa ꞌyioko baa hõllõngaa aga nẽẽg ꞌthẽccanẽẽt cĩggĩĩng. Nẽẽthĩ ꞌyioko, iittiõõ ꞌgõõl ꞌcĩ nga alĩĩtanĩ nẽẽg ꞌthẽccanẽẽt tõõ.

²³ Ẽẽtĩ ꞌcĩ aaburreeka nganĩĩta, aaburreek nẽẽ Baaba buúk.

²⁴ Ma baa hiittiõõ ngaatĩ hadĩmanĩĩ naa thooꞌthiok ꞌcĩg ĩnaat eeta hõrggẽẽnaa cĩnĩĩng, ꞌcĩg nga hĩdĩman eet umwaa ũdũt ko, occa ꞌyioko nga hagaacõ nẽẽg ꞌthẽccanẽẽt cĩggĩĩng. Nẽẽthĩ ꞌyioko, hĩcĩ ĩcĩnĩt nẽẽg thooꞌthiok ꞌcĩg ĩnaat eeta ho, aalla hinnia nga aaburreeka nẽẽg nganĩĩt hĩ Baaba noho.

²⁵ Ĩnõõ ꞌcĩ aduhaanĩ ꞌBuuhi cĩ Nyekuci thõõth ꞌcĩ eheeddi nyattaalaa cĩnĩĩng aĩnnĩ, ‘Aaburreeka eeta nganĩĩt haaga, nga hẽꞌthẽcan thõõth umwa buúk.’

²⁶ “Ma ikia Tilooyyiohiti ꞌcĩ hatĩ hĩꞌthõõakuung naa hĩ Baaba, Lori ꞌcĩ Thõõth ꞌcĩ ĩĩn dĩdĩ ꞌcĩ aku hĩ Baaba, aku hatĩ etereꞌthuung ngagiit thõõth caannĩ.

²⁷ Adiim aduhaaku niig buúk eet thõõth caannĩ, hĩnĩngĩtĩ baa hũrũmtĩ naag hĩ ngagiit baa ĩĩcĩ oou.