Tiito 1 - ꞌBuuk cĩ Thõõth cĩ Nyekuci

Hĩꞌthaayyio Tiito

¹ Waraga ꞌcĩ hẽhẽẽdakii naa Paaulo nganiit cieeni. Nganĩĩt appahaca cĩ Nyekuci nẽ hĩĩnĩ ꞌthooyyiahit cĩ Yeesu Krĩstõ. Baa hĩꞌthooyyia naa hikia hẽẽl eet baag ẽbẽra Nyekuci lemiitta hĩ ꞌgẽẽnyĩthaa cĩ thõõth ꞌcĩ ĩĩn dĩdĩ, hátĩ hiita haauto nẽẽg hĩ Nyekuci,

² ĩĩn ciee lemiinit hĩ ꞌgẽẽnyĩth ꞌcĩ aaĩ muhẽẽttaa ꞌcĩ abũnnaa ĩĩcĩ rũgẽt ꞌcĩ aalla ooo, baa aduha Nyekuci baangaani. Aitiõõ Nyekuci hõllõngaa õõlõngĩ.

³ Ma kõr baa ẽbẽraanna nẽẽ nganĩĩta, ikia uppulanaaha Nyekuci Ellioohiti cĩnaac nyeemuut icci, ꞌlimmaanaa baa aaꞌnyĩhoothĩkaa nganĩĩta.

⁴ Ẽlẽ Tiito, hẽhẽẽdakii naa nganiit waraga icci, aau nii hĩ loholeec caannẽẽnĩ, hĩnĩngĩtĩ helemit naag hĩ nganiit thõõth cĩ Nyekuci hõdẽĩ. Aꞌnyĩĩk Nyekuc Baangeet cĩnaac hĩ Makayyioohit Ellioohit cĩnaac Yeesu Krĩstõ, haanyti bũnnai nẽ aau lõꞌngõõc.

Dtiic cĩ Tiito dtuungaa cĩ Kerete

⁵ Baa huunnikii naa nganiit dtuungaa cĩ Kerete, haĩ dẽcaak dtiic baa nga idionganĩ nẽ ẽbẽra makayyiook cĩg lemmioohu ꞌtaaũnnioohĩ vẽlẽk.

⁶ Abũnnaa ĩĩn makayyioohiti cĩ lothippit cĩ lemmioohu, eet ꞌcĩ aitiõõ thooꞌthioha ꞌcĩg abathĩ tõõ nẽ aꞌnyak ngaa hõdẽẽthõng nẽ abũnnaa ĩĩn lohollia cĩgĩnnĩg buúk lemmiook ꞌcĩg abũnnaa, ꞌcĩg hõllõngaa aꞌnyaha ngaaoni hĩ ꞌriiring nẽ ĩthĩhĩt thõõth cĩ maacõnĩ hĩ aatĩnĩĩng.

⁷ Hĩnĩngĩtĩ aaꞌnyĩk Nyekuci makayyioohit cobbi cĩ lothippit cĩ lemmioohu, hidticanoothĩk ĩnõõnnõ. Abũnnaa ĩĩn eet ꞌcĩ aitiõõ thõõth ꞌcĩ abathĩ tõõ. Abũnnaa hõllõngaa ĩĩn eet ꞌcĩ athĩngõõnyanĩ, abũnnaa ĩĩn eet ꞌcĩ hõllõngaa aaburii ꞌthĩnĩt. Abũnnaa ĩĩn eet ꞌcĩ hõllõngaa ĩĩn duuttiahit, hode aangal jora, hode adiim ꞌrabbẽẽt ꞌcĩg mẽẽlĩg ꞌgõõlaa ꞌcĩ abathĩ.

⁸ Abũnnaa ĩĩn eet cĩ eetu ꞌcĩ ammĩnan thõõth ꞌcĩ abũnnaa. Abũnnaa ĩĩn eet ꞌcĩ aꞌnyak muhẽẽnĩt ꞌcĩ abũnnaa nẽ ĩĩ eet ꞌcĩ aꞌthũũnnĩ ẽlẽ, ꞌcĩ ẽllẽẽmĩthĩ.

⁹ Aꞌnyĩĩk hũꞌthũũtĩ thõõth baa ĩĩn dĩdĩ baa allimanoothĩk ĩnõõnnõ, hátĩ hẽẽl ꞌlimmanĩ cĩnnĩ ꞌcĩ ĩĩn dĩdĩ ho ꞌgõõnõgĩ nẽ itilo eet ꞌcĩg adiim abũrĩ thõõth icci.

¹⁰ Hĩnĩngĩtĩ nga mẽẽlĩg eeta ꞌcĩg abũrĩ thõõth cĩ Nyekuci, ĩggõõl ꞌgõõnõgĩ ꞌgõõlaa ꞌcĩ õthõõthĩ thooꞌthiok ꞌcĩg ĩĩn õlõng, ettebehini eet baag ẽlẽmĩ nyattal cĩ Mũũꞌtha ꞌgõõlaa ꞌcĩ ẽttẽẽdĩ eleeti cĩggĩĩng.

¹¹ Bĩlĩ ꞌlimman cĩnĩĩng abathĩ ho, hĩnĩngĩtĩ accanan ꞌlimmanĩ cĩnĩĩng ko halaꞌngiook ꞌcĩg mẽẽlĩg nẽ aduha nẽẽg õlõng cĩnĩĩng ko, hátĩ hummuddia ꞌrabbẽẽta.

¹² Baa aduha põrõvẽtaacĩ umwaa cĩnĩĩng dẽẽdẽ aĩ, “Ĩĩn eeta cĩg Kerete hõdõõkõthĩ oloꞌngiaak nẽ ĩĩn eet ꞌcĩg abathĩ gẽrrẽẽt, ĩĩn lobolobbiaak nẽ ĩĩtõ nyamuttiook buúk.”

¹³ Ĩĩn ciee thõõth ꞌcĩ ĩĩn dĩdĩ, nẽẽthĩ, ꞌgerenyeek ĩhõõggõ gẽrrẽẽt, hátĩ helemit Nyekuc ꞌgõõlaa ꞌcĩ attiranĩ,

¹⁴ nẽ ũtũngteek nyeemuꞌnya ꞌcĩg hõllõngaa ĩĩn dĩdĩ cĩg eet cĩg ꞌJudeei, hĩ tilooinit cĩ eet ꞌcĩg ũtũbũrĩt thõõth ꞌcĩ ĩĩn dĩdĩ.

¹⁵ Tẽlla thõõth vẽlẽk hĩ eet ꞌcĩg tẽllĩg ꞌthinneeti. Nẽẽthĩ, eetinii ꞌcĩg ẽꞌngẽjĩ ooti nẽ ũtũbũrĩt thõõth cĩ Nyekuci, aitiõõ thõõth ꞌcĩ abũnnaa tõõ, hĩnĩngĩtĩ ẽꞌthẽcattĩ ĩhõõggõ ooti hĩ muhẽẽnĩt cĩnĩĩng vẽlẽk.

¹⁶ Õõlõng eeta ꞌcĩg aattĩg noho ho aĩ, hagayya Nyekuc nẽ nẽẽ aduha thooꞌthioha ꞌcĩg adtican nẽẽg ko aĩ, hõllõngaa aga nẽẽg Nyekuc dĩdĩ. Aꞌnyak nẽẽg mẽdẽr ꞌthinneetinitõõ cĩggĩĩng hĩ thõõth ꞌcĩ abũrrĩ thõõth cĩ makayyioohu. Hõllõngaa occa adtican nẽẽg thõõth ꞌcĩ abũnnaa.