ꞌThianaattõ 9 - ꞌBuuk cĩ Thõõth cĩ Nyekuci

Lõhõt cĩ Nyekuci hĩ Nõõa

¹ Baa aggatan Nyekuci Nõõa hĩ buul cĩgĩnnĩg anneek, “Aꞌnyahit lõhõlĩ ꞌcĩg mẽẽlĩg ꞌrĩng. Aꞌnyĩĩk lõhõlĩ cugguung buúk hiita haꞌnyahit lõhõlĩ ꞌcĩg mẽẽlĩg, hátĩ hĩbbĩtĩt looc nicci vẽlẽk.

² Au hatĩ itieelinnii idiꞌngwaana hĩ hĩbaallĩ hĩ hẽlẽggĩ ꞌcĩg õgõlĩt loota hĩ ulugo vẽlẽk nganiita. Aattĩg hatĩ nẽẽg vẽlẽk attiaa cunni.

³ Haaꞌnyuung naa ngagiit ĩhõõggõ hĩĩtõ ꞌgẽẽn cunuung hĩ baa haaꞌnyuung haal hĩ ꞌdiaatĩna.

⁴ “Nẽẽthĩ, ꞌgii hõdẽẽthõng ꞌcĩ haduhaakuung naa cieeni, ma hadaku iding ꞌcĩ nga aꞌnyak biyyi cĩg rũgẽtaak.

⁵ Nẽ ẽẽtĩ ꞌcĩ aruk eet, aruhi hatĩ ẽẽtĩ tĩho buúk. Nẽ má aruk idingi eet, aruhi hatĩ idingi tĩho buúk, hĩnĩngĩtĩ baa hẽhẽnyta naa eet haau hĩ naana.

⁶ “Ma aruk eet umwaa ꞌgõõnĩ, aruk hatĩ eet tĩho buúk ẽẽtĩ umwaanĩ; hĩnĩngĩtĩ baa ẽhẽnyta Nyekuci eet haau hĩ nẽẽnĩ.

⁷ Nẽẽthĩ, hadiimmuung naa ngagiit aꞌnyahit lõhõlĩ ꞌcĩg mẽẽlĩg ꞌrĩng, hátĩ hiita hõlõmanit lohollia cĩg lõhõlĩ cugguung looc nicci vẽlẽk.”

⁸ Nẽ tarĩ uduhaak Nyekuci Nõõa hĩ buul cĩgĩnnĩg ĩĩnnĩk,

⁹ “Kõr nicci, hadak naag lõhõt hĩ ngagiit hĩ eet vẽlẽk ꞌcĩg hatĩ au urutaa cunuung,

¹⁰ hĩ hẽlẽggĩ ꞌcĩg arũgĩ vẽlẽk, idiꞌngwa hĩ hĩbaallĩ baag auunnu hĩ ngagiit haahũlatõõ hõdẽĩ.

¹¹ Dĩdĩ, hadak naag hĩ ngagiit lõhõt. Iittiõõ hatĩ naa hõllõngaa hĩꞌthõõa tawan hikia hũcũda hẽlẽggĩ ꞌcĩg arũgĩ tarĩ.”

¹² Nẽ õthõõth Nyekuci tarĩ ĩĩ, “Ĩĩn ciee terethiinit cĩ lõhõt ꞌcĩ hadak naag hĩ ngagiit hĩ hẽlẽggĩ vẽlẽk ꞌcĩg arũgĩ. Lõhõt cĩ lõhõlĩ ꞌcĩg nga au horumwa irkiꞌnyiaannĩ.

¹³ Hõhõrraneeha naa toolongeec caannĩ diiꞌthiohĩtõõ nẽ hatĩ ĩĩ ciee terethiinit cĩ lõhõt ꞌcĩ hadahi naa hĩ hẽlẽggĩ vẽlẽk ꞌcĩg arũgĩ cĩg lootu.

¹⁴ Ma haarihi hatĩ gõõng naa diiꞌthiok lokora hũmmũtĩt looc nẽ edeeꞌnyia tõõlõngẽẽcĩ,

¹⁵ hammuhunoothi hatĩ naa lõhõt baa hadak hĩ nganiit baa haini, ‘Iittiõõ hatĩ hõllõngaa hacũda naa eet hĩ hẽlẽggĩ ꞌcĩg arũgĩ vẽlẽk loota nĩnga tarĩ.’

¹⁶ Thõõth caannĩ nicciaani. Ma ꞌthẽk hĩcĩna toolongeec õhõõrranĩ diitha, hammuhunoothi ꞌthẽk hatĩ gõõng lõhõt baa hadahi naa Nyekuci hĩ eet hĩ hẽlẽggĩ ꞌcĩg arũgĩ loota nĩnga vẽlẽk.”

¹⁷ Nĩngĩtĩ annẽẽkĩ Nyekuci Nõõa, “Terethiinit cĩ lõhõt ꞌcĩ hakumanẽẽkĩ naa hẽlẽggĩ ꞌcĩg arũgĩ vẽlẽk loota nĩnga ho cieeni.”

Buul cĩg Nõõa

¹⁸ Baa lõhõlĩ cĩg Nõõa ꞌcĩg au haahũlatõõ cieegi: ꞌThẽm hĩ Haam hĩ ꞌJavẽth. Ĩĩn Haamĩ maaꞌnyĩ Kanaanĩ.

¹⁹ Au eeta vẽlẽk loota nĩnga hattũũgẽtĩĩ cĩg lõhõlĩ ꞌcĩg ĩĩn iyyio cĩg Nõõa ho.

²⁰ Ma baa urutaa cĩ tawaanõ, baa Nõõa ꞌcĩ iꞌthianaanĩ ngaatĩ akannĩ mana cĩ viinoo.

²¹ Ma baa kõr umwa, ũhũd Nõõa mẽrtĩ cĩ viinoo gẽrrẽẽt, nĩngĩtĩ adũũnnĩ hatangu ngũtũtũũny ꞌcieethaa cĩnnĩ.

²² Ma baa aku Haamĩ maaꞌnyĩ Kanaanĩ ho, ikia ũmmũdeek maaꞌnyĩ Nõõa atangu ngũtũtũũny, nĩngĩtĩ õkõ aduhaakĩ ꞌgõtõõnõgĩ battaala.

²³ Ma nĩngaata, aꞌnyakta ꞌgotoonoggia ꞌThẽmĩ hĩ ꞌJavẽth ngĩtõõga nẽ otooyyiaĩ ĩĩcĩ bahucciinnu aĩ, hátĩ hiittiõõ hõllõngaa acĩn maaꞌnyĩ. Nĩngĩtĩ adukni nẽẽg ꞌcieetõõ nẽ ubungit maaꞌnyĩ.

²⁴ Ma baa ikia ammanyanĩ Nõõa dũũtĩthĩ, ikia ĩthĩk aĩ udtuuha ngeerĩnĩ ꞌcĩ horggeeno ĩnõõnnõ ngaatĩ aayyi ngũtũtũũny.

²⁵ Nĩngĩtĩ alĩĩllĩ gẽrrẽẽt ĩꞌthõng hĩccĩĩn Kanaan ngeertĩ Haamĩ anneek, “Aku hatĩ ĩĩnĩ nii appahaca ꞌcĩ adticanoothihi ꞌgotoonogu.”

²⁶ Nẽ tarĩ ĩĩ, “Aꞌnyĩĩk Makayyioohit Nyekuc cĩ ꞌThẽmĩ hubuluthi nẽ aꞌnyĩĩk Kanaan hĩĩ appahaca cĩnnĩ.

²⁷ Hala naa Nyekuc hĩttõõrĩhĩ ꞌJavẽth looc ꞌcĩ maka nẽ aaꞌnyĩk ĩnõõnnõ hotholit baliinit hĩ ꞌThẽm. Aꞌnyĩĩk ĩnõõnnõ haaꞌnyĩk Kanaan hĩĩ appahaca cĩ ꞌJavẽthĩ.”

²⁸ Ma baa urutaa cĩ tawaanõ, ikia aau Nõõa hĩĩtõ irkiꞌnyia ꞌmiiaꞌnya iyyio hĩ hẽẽn ꞌtur (350) tarĩ.

²⁹ Nĩngĩtĩ adaaknĩ nẽẽ baa ĩĩtõ irkiꞌnyia ꞌmiiaꞌnya tũrkũwwec hĩ hẽẽn ꞌtur (950).