ꞌThianaattõ 8 - ꞌBuuk cĩ Thõõth cĩ Nyekuci

Õdõhõk lõõcĩ

¹ Baa ammuha Nyekuci Nõõa hĩ eet cĩg õlõ cĩnnĩ hĩ idiꞌngwa baag aꞌngĩdeek nẽẽ haahũlatõõ vẽlẽk waathinnioohĩĩ baag ammũlũũnyanĩ tawanĩ looc, nĩngĩtĩ aaꞌnyĩkĩ ngõõt huuhan looc hõdõhõk.

² Ma ho, ikia ũꞌnyũũg Nyekuci ũꞌngĩ cĩg hidiowwẽẽn baag arihaanĩ maama loota nẽ ĩbĩlĩ tammu buúk.

³ Nĩngĩtĩ arritaniini maama hĩdĩĩc hĩdĩĩc waathinnioohĩĩ ꞌcĩg ĩĩn ꞌmiia hõdẽĩ hĩ hẽẽn ꞌtur (150).

⁴ Ma baa nyĩlõk cĩ tũrkĩramma, baa ĩĩn õmmõtõ hĩ tũrkĩramma irkit niccia, ikia ĩbĩl haahũlĩ muurriõhĩĩ ꞌcĩg haĩ Ararat.

⁵ Nẽ baa aalla arritanni maama noho ĩꞌthõng nyĩlõk cĩ õmmõtõ. Ma kõr ꞌcĩ oou cĩ nyĩlõk cĩ õmmõtõ, iita ẽdẽẽnyta ooti cĩg muurriohu.

⁶ Ma urutaa cĩ waathinniook hẽẽn ꞌwec, ubbuuk Nõõa hutuli cĩ haahũlõ,

⁷ nĩngĩtĩ ĩꞌthõõĩ hũrrũũk hũũk hĩcĩn looc. Õkõ hinnia awanĩt hũrrũũk nicciee ĩꞌthõng hõdõhõk lõõcĩ hĩĩ vẽr nẽ hõllõngaa õbõda buúk.

⁸ Ma ho, ĩꞌthõ Nõõa ngabuuthi hũũk hĩcĩn hatĩ õdõhõk lõõcĩ.

⁹ Ammũdoothĩk hinnia ngabuuthi nicciee maam nga abbĩꞌthĩĩ looc vẽlẽk, nĩngĩtĩ alilliaananĩ õbõdaanĩ haahũlatõõ tarĩ nẽ aggam Nõõa ĩnõõnnõ õbõdĩ ĩĩttõõ.

¹⁰ Ma ho, ẽrẽẽõ Nõõa waathinniook tũrkĩramma, nĩngĩtĩ ĩꞌthõõĩ ngabuuthi tarĩ.

¹¹ Ma baa ꞌjiaat, õbõda ngabuuthi nicciee aꞌnyaha bolloohinit cĩ hẽẽt ꞌcĩ haĩ oliv ũtũũgaa cĩnnĩ. Nĩngĩtĩ agaĩ Nõõa aĩnnĩ, õdõhõk lõõcĩ.

¹² Ma ho, ẽrẽẽõ Nõõa waathinniook tũrkĩramma tarĩ nẽ ĩꞌthõ ngabuuthi umwa. Ma kõr niccia, iittiõõ aattĩ hõllõngaa õbõda ngabuuthi tarĩ.

¹³ Ma abbuuk Nõõa hutuli cĩ haahũlõ ho, adtuuha hinnia hiꞌthihi tawan hode nẽẽ maam ꞌcĩg oorĩk buúk. Nẽ kõr niccia, nyĩlõk ꞌcĩ hõdẽĩ baa ĩĩn hõdẽĩ, iita õdõlanit irkiꞌnyia cĩg Nõõa ꞌcĩg aayyi loota nĩnga ĩĩtõ ꞌmiiaꞌnya tõrkõnõn hĩ hõdẽĩ (601).

¹⁴ Ma baa nyĩlõk ꞌcĩ ꞌramma, baa ĩĩn hẽẽn ꞌramma hĩ tũrkĩramma, ikia õdõhõk lõõcĩ vẽlẽk ĩĩ vẽr.

¹⁵ Ma ho, uduhaak Nyekuci Nõõa ĩĩnnĩk,

¹⁶ “Uduhutta battaala hĩ ngaa cunni hĩ lõhõlĩ cugunnig hĩ ngaaĩ cĩggĩĩng vẽlẽk.

¹⁷ Aꞌnyĩĩk idiꞌngwa buúk hĩ hĩbaallĩ hĩ hẽlẽggĩ ꞌcĩg õvvõ loota, baag aꞌngĩdeehi nii haahũlatõõ hiita battaala, hátĩ hiita hittirit nẽ ĩꞌthaattothoothĩk looc vẽlẽk.”

¹⁸ Ma baa uduhutta Nõõa hĩ ngaa cĩnnĩ hĩ lõhõlĩ cĩgĩnnĩg hĩ ngaaĩ cĩg lõhõlĩ cĩgĩnnĩg battaala,

¹⁹ iita uduhutta idiꞌngwaana buúk hĩ hĩbaallĩ hĩ hẽlẽggĩ ꞌcĩg õgõlĩt loota vẽlẽk battaala cũũmõ cũũmõ.

Ĩbboorĩk Nõõa Nyekuc ꞌgaarrieenit

²⁰ Ikia ẽtẽhẽnya Nõõa nĩngĩtĩ ĩbbõõrĩkĩ Makayyioohit ꞌgaarrieenit nẽ ẽbẽra idiꞌngwa hõdẽĩ hõdẽĩ ꞌcĩg tẽllĩg ꞌcĩg occa ĩĩn ꞌgaarriẽẽn hĩ hĩbaallĩ buúk noho, nĩngĩtĩ ĩwaadĩ idiꞌngwa niccig hĩĩtõ ꞌgaarriẽẽn ꞌcĩg aaꞌnyĩk Makayyioohit.

²¹ Ma baa õdõlan muyuuhĩ cĩ mẽdĩĩth cĩ idiꞌngwaanu Nyekuc ko, ikia atal Nyekuci, nĩngĩtĩ abũtanĩ aĩnnĩ, “Iittiõõ hatĩ naa hõllõngaa hacciini looc tarĩ, hĩnĩngĩtĩ ꞌthẽccanẽẽt cĩg eetuk. Tananga ammuk nẽẽg thooꞌthiok ꞌcĩg abathĩ ngaanĩngĩtĩ hĩdĩꞌthẽẽtõ, iittiõõ ꞌthẽk hatĩ naa hõllõngaa hacũda eet hĩ hẽlẽggĩ ꞌcĩg arũgĩ tarĩ.”

²² “Nẽ ma ꞌthẽk nga aaĩ lõõcĩ cieeni, aattĩg ꞌthẽk hatĩ gõõng waathinniooha cĩg kanniittak hĩ cĩg janiittak. Nẽ aalla ꞌthẽk hatĩ lalĩĩthĩ hĩ abuurꞌthet buúk ũdũt. Nẽ tarĩ aalla ꞌthẽk hatĩ gõõng ũrraatĩ buúk hĩ tagĩĩth hĩ baalin hĩ waathĩn vẽlẽk ũdũt.”