ꞌThianaattõ 7 - ꞌBuuk cĩ Thõõth cĩ Nyekuci

Ũcũda Nyekuci eet maamĩ

¹ Ma ho, uduhaak Makayyioohiti Nõõa ĩĩnnĩk, “Nganiit dioo ꞌcĩ hammũdaannii loota nĩnga vẽlẽk ngaatĩ ĩĩnnĩ eet ꞌcĩ abũnnaa. Uduhunit haahũlatõõ hĩ õlõ cunni vẽlẽk.

² Bĩtĩ idiꞌngwa ꞌcĩg tẽllĩg ꞌcĩg occa ĩĩn ꞌgaarriẽẽn, hĩ ꞌramma hĩ ꞌramma tabattĩ tũkĩramma, hõkõõcan thõng, ꞌcĩ ngayyi hĩ ꞌcĩ maacĩ. Nẽ ũũhĩ idiꞌngwa hĩ ꞌramma hĩ ꞌramma idiꞌngwaanĩĩ ꞌcĩg hõllõngaa tẽllĩg, ꞌcĩ ngayyi hĩ ꞌcĩ maacĩ.

³ Nẽ tarĩ, bẽra hĩbaallĩ õmmõtõ hĩ ꞌwec ꞌcĩg aattĩg cũũmõ cũũmõ, ꞌcĩg ngayyig hĩ ꞌcĩg maacĩg. Dĩman hĩcĩ haduhaakii naa ho, hátĩ hiita hittirit idiꞌngwaana cieeg urutaa ꞌcĩ ũmmũlũũnyattĩ maama looc.

⁴ Hĩꞌthõõa hatĩ naa tammu ꞌcĩ maka gẽrrẽẽt urutaa cĩ waathinniook tũrkĩramma, ꞌcĩ hatĩ aku atĩĩlĩ waathĩn hĩ baalin waathinniook hẽẽn ꞌwec, ĩꞌthõng hũcũda hẽlẽggĩ baag hẽhẽnyta naa loota nĩnga vẽlẽk hĩĩ ꞌthĩĩ.”

⁵ Nĩngĩtĩ adticanĩ Nõõa thõõth ꞌcĩ aduhaak Makayyioohiti ho vẽlẽk jurrung.

⁶ Baa ĩĩn Nõõa irkiꞌnyia ꞌmiiaꞌnya tõrkõnõn (600) baa aku ammũlũũnyan tawanĩ looc.

⁷ Nẽ baa Nõõa dioo hĩ ngaa cĩnnĩ hĩ buul cĩgĩnnĩg hĩ ngaaĩ cĩggĩĩng, ꞌcĩg baag aduhun haahũlatõõ, hátĩ hĩlĩĩttia tawan.

⁸ Nĩngĩtĩ adukni idiꞌngwaana ꞌcĩg tẽllĩg hĩ ꞌcĩg hõllõngaa tẽllĩg, hĩbaallĩ hĩ hẽlẽggĩ ꞌcĩg õvvõ loota haahũlatõõ.

⁹ Baa aduhun nẽẽg haahũlatõõ hĩ ꞌramma hĩ ꞌramma, ꞌcĩ ngayyi hĩ ꞌcĩ maacĩ, ꞌgõõlaa ĩbaa aduhaakĩ Nyekuci Nõõa.

¹⁰ Ma urutaa cĩ waathinniook tũrkĩramma, ikia tawanĩ ꞌcĩ ammũlũũnyan looc hĩĩ ꞌthĩĩ.

¹¹ Nẽ baa ĩĩn Nõõa irkiꞌnyia ꞌmiiaꞌnya tõrkõnõn (600) baa iꞌthianaanĩ tammu. Ma baa ĩĩtõ waathinniooha õmmõtõ hĩ tũrkĩramma, nyĩlõk ꞌcĩ ꞌramma irkit niccia, iita ubbuukti ũꞌngĩ cĩg hidiowweenu nẽ ulubta maama nẽ iꞌthianaaĩ ĩtĩĩl tammu cobbi gẽrrẽẽt buúk.

¹² Baa atĩĩlĩ tammu baalin hĩ waathĩn, waathinniook hẽẽn ꞌwec habath lõõcĩ dtẽc.

¹³ Ma kõr niccia, iita uduhunit Nõõa hĩ ngaa cĩnnĩ hĩ buul cĩgĩnnĩg ꞌcĩg ĩĩn iyyio ho, ꞌThẽm hĩ Haam hĩ ꞌJavẽth hĩ ngaaĩ cĩggĩĩng haahũlatõõ.

¹⁴ Baa aꞌngĩdeek nẽẽg idiꞌngwa cĩg olu hĩ cĩg moru hĩ hĩbaallĩ hĩ hẽlẽggĩ ꞌcĩg õgõlĩt loota vẽlẽk, baag ẽbẽra nẽẽ ho haahũlatõõ buúk.

¹⁵ Nĩngĩtĩ aduknõõthĩkĩ idiꞌngwaana Nõõa hõdẽĩ hõdẽĩ, ꞌcĩ ngayyi hĩ ꞌcĩ maacĩ haahũlatõõ.

¹⁶ Ma baa uduhunit idiꞌngwaana haahũlatõõ hĩ baa aduhaak Nyekuci Nõõa, ikia ũꞌnyũũg Makayyioohiti Nyekuci hattũũg cĩ haahũlõ.

¹⁷ Baa atĩĩlĩ tammu waathinniook ꞌcĩg ĩĩn hẽẽn ꞌwec ko, baalin hĩ waathĩn ĩꞌthõng hĩbbĩtĩt maama looc, hataadĩ haahũlĩ lokora.

¹⁸ Ma baa iita ittoorri maama loota gẽrrẽẽt, ikia ataadĩ haahũlĩ maamĩ lokora.

¹⁹ Ma baa uruta, iita ũmmũlũũnyanit maama muurriok vẽlẽk,

²⁰ nẽ aalla õtõd noho ĩꞌthõng hĩttĩmattĩ hõdõlanit ꞌthoo hẽẽn ꞌramma muurriõhĩ hujjieen.

²¹ Nĩngĩtĩ acũdaanĩ maama nicciag eet vẽlẽk hĩ idiꞌngwa cĩg moru hĩ hẽlẽggĩ cĩg olu hĩ hĩbaallĩ hĩ hẽlẽggĩ ꞌcĩg õvvõ loota vẽlẽk hĩĩ lõõcĩ ꞌthĩĩ.

²² Nĩngĩtĩ adaaknĩ hẽlẽggĩ vẽlẽk baag abbeek Nyekuci ꞌlaũk habath dtẽc.

²³ Ma nĩngaata ikia ũcũda Nyekuci hẽlẽggĩ baag ẽhẽnyta nẽẽ vẽlẽk, nĩngĩtĩ ũũnnĩkĩ Nõõa dioo hĩ õlõ cĩnnĩ hĩ idiꞌngwa hĩ hĩbaallĩ baag õkõõĩ nẽẽ haahũlatõõ.

²⁴ Baa aalla maama ꞌcĩg ammũlũũnyan looc ko waathinniook ꞌmiia hõdẽĩ hĩ hẽẽn ꞌtur (150).