ꞌThianaattõ 4 - ꞌBuuk cĩ Thõõth cĩ Nyekuci

Uruk Kaiino Abeele

¹ Nẽẽthĩ ꞌyioko, iita atagguutho Aadamĩ hĩ ngaa cĩnnĩ Ẽẽvva, nĩngĩtĩ aku aꞌnyahiini nẽẽnĩ. Ma baa ittira nẽẽ Kaiino, ikia õthõõth ĩĩ, “Eliittaa cĩ Makayyiookto, hittira eet ꞌcĩ maacĩ!”

² Ma uruta, ikia ũtũhũa loholeec umwa tarĩ ꞌcĩ haĩ Abeele. Baa ĩĩn Abeele tũhayyioohit nẽ ĩĩ Kaiino kattioohit.

³ Ma kõr umwa, ẽbẽra Kaiino haal ũgĩ nẽ ikia aaꞌnyĩk Nyekuc hĩĩ ꞌbaaninit.

⁴ Nẽ baa aꞌnyaha Abeele aꞌtheet ꞌcĩ anyũttĩĩ, nĩngĩtĩ acuhanĩ nẽ ẽbẽra iding ꞌcĩ adĩhĩ nẽ aaꞌnyĩk Makayyioohit hĩĩ ꞌbaaninit. Baa atalĩ Makayyioohiti ꞌbaaninit cĩ Abeele ho gẽrrẽẽt,

⁵ nẽ ahareek cĩ Kaiino ho. Ma ho, ikia ĩlĩĩlĩ Kaiino gẽrrẽẽt.

⁶ Nĩngĩtĩ ajini Makayyioohiti ĩnõõnnõ annẽẽkĩ, “Ẽlẽ Kaiino, alĩĩlĩ inni? Aꞌngurruunyi muum cunni gẽrrẽẽt noho inni?

⁷ Má baa hĩĩ ꞌcĩ adticanĩ nii ꞌgii ꞌcĩ abũnnaa, occa ꞌyioko hõllõngaa accamanoothihi? Nẽẽthĩ, hĩnĩngĩtĩ baa idticanuu nii thõõth ꞌcĩ abathĩ, õtõgõlaahi nganiit ꞌthẽccanĩ hattũũgaa cunni, adiim aggammi nganiita, ma hẽlẽmaakĩ hĩllõõaniina.”

⁸ Ma nĩngaata, uduhaak Kaiino ꞌgõtõnĩ ĩĩnnĩk, “Hõõt da hotooyyi mana.” Ĩko nẽẽ allab Kaiino ꞌgõtõnĩ thõng. Ma baa õõ õvvõõĩ nẽẽg mana ho, ũtũhũoothĩk Kaiino ꞌgõtõnĩ, nĩngĩtĩ aruhi ĩnõõnnõ hadaak.

⁹ Ma ho, ikia ijin Makayyioohiti Kaiino ĩĩnnĩk, “Aaĩ ꞌgotonu Abeele ngaana?” Ẽtẽẽtha hinnia Kaiino Nyekuc anneek, “Hõllõngaa haga naana. Nganĩĩt ꞌthẽk gõõng ꞌcĩ hĩĩnĩ bekioohit cĩnnĩ?”

¹⁰ Nẽ othoothĩk Makayyioohiti Kaiino ĩĩnnĩk, “Ne ꞌyioko ꞌthẽk ꞌcĩ adĩmani nii noho ho? Allweeka nganĩĩt biyyieeta cĩg ꞌgotonoonu loota.

¹¹ Nẽẽthĩ hoti ho, hicciinii naa nganiit, hĩnĩngĩtĩ uruhu nii Abeele nẽ aaꞌnyĩhuu biyyi cĩgĩnnĩg hirihit loota, iittiõõ hatĩ hõllõngaa akati mana loota nĩnga tarĩ.

¹² Ma hatĩ aĩ kaat mana, aitiõõ hatĩ hõllõngaa abbiiri buúk nẽ iinu hatĩ eet ꞌcĩ õvvõ ꞌjieena haaga looccaa nĩĩcĩ.”

¹³ Ẽdẽcĩ Kaiino Makayyioohit anneek, “Maka ꞌcĩĩnẽnĩtĩ ciee hĩ nganĩĩt gẽrrẽẽt nẽ occa aꞌnyamannaa ngaatĩ hẽhẽẽlĩ.

¹⁴ Itiggiawaa ꞌyioko looccaa ĩbaa haayyi ho hĩ ngaatĩ aayyi niina, hikia hatĩ hĩĩna eet umwa ꞌcĩ hõvvõ ꞌjieena nẽ huruhi hatĩ ꞌgoolliohĩ haaga.”

¹⁵ Ẽdẽcĩ Makayyioohiti Kaiino anneek, “Aitiõõ, má uruhi ẽẽtĩ umwaanĩ, huuki hatĩ naa eet tĩho buúk tabattĩ tũrkĩramma hĩllõõan ukẽẽnĩt cunni ho.” Nĩngĩtĩ aarĩkĩ Makayyioohiti Nyekuci nyamacaar ẽllaa cĩ Kaiino, hátĩ hiittiõõ hõllõngaa aruk eet umwaa ĩnõõnnõ hatĩ õmmõtõõ.

¹⁶ Nĩngĩtĩ ũũnnĩkĩ Kaiino Makayyioohit nẽ ũũk aau looccaa ꞌcĩ haĩ Nood, looc ꞌcĩ aaĩ ĩĩcĩ uruto cĩ Ẽẽdẽnĩ.

Hattũũg cĩ õlõ cĩ Kaiino

¹⁷ Iita aꞌnyahit Kaiino hĩ ngaa cĩnnĩ loholeec ꞌcĩ maacĩ ꞌcĩ haĩ Ẽẽnõk. Nĩngĩtĩ ẽhẽnytĩ Kaiino ꞌtaaũn umwa cobbi nẽ akateek ꞌthaar cĩg ngeerĩnĩ.

¹⁸ Nẽ ikia ittira Ẽẽnõhĩ ngeerĩnĩ ꞌcĩ haĩ Ĩrad. Ma urutaa cĩnnĩ, ikia ittira Iradĩ buúk ngeerĩnĩ ꞌcĩ haĩ Mehujaẽl. Ma baa urutaa cĩ irkiꞌnyia ũgĩ, ikia Mehujaẽlĩ ĩĩ maaꞌnyĩ Methuthaẽlĩ nẽ ikia ĩĩ Methuthaẽlĩ maaꞌnyĩ nyahaappan ꞌcĩ haĩ Lamẽk.

¹⁹ Baa aꞌnyak Lamẽhĩ ngaaĩ ꞌramma. Haĩ cobbi Aada nẽ hĩĩtõ ꞌcĩ hidici ꞌThĩĩlla.

²⁰ Ikia ittira Aada loholeec ꞌcĩ maacĩ ꞌcĩ haĩ ꞌJabal, ꞌcĩ baa aku ĩĩn maaꞌnyĩ eet ꞌcĩg baag abal hẽlẽggĩ nẽ õlõmanit ꞌcieethinii ꞌcĩg ĩĩn tuggẽẽta.

²¹ Nẽ baa aꞌnyak nẽẽ ꞌgõtõnĩ ꞌcĩ haĩ ꞌJũbaal ꞌcĩ baa aku ĩĩn maaꞌnyĩ eet ꞌcĩg ĩĩn benniook nẽ akũman ngaatĩ aruhi bohollwa hĩ ngaatĩ adtahĩ loboruẽẽta.

²² Ma ho, ittira ꞌThĩĩlla loholeec ꞌcĩ maacĩ buúk ꞌcĩ haĩ Tubal Kaiino, ꞌcĩ baa aku ĩĩn eet ꞌcĩ attura hõllẽẽn hĩ meleekwa hĩ dĩlaꞌnya hĩ ijjio ũgĩ ꞌthẽk vẽlẽk ꞌcĩg adĩmanniaa ꞌthĩĩhĩ. Nẽ baa aꞌnyak nẽẽ ngõõnĩ ꞌcĩ haĩ Naama.

²³ Ma kõr umwa, uduhaak Lamẽhĩ ngaaĩ cĩgĩnnĩg ĩĩnnĩk, “Niiga Aada hĩ ꞌThĩĩlla, niiga ngaaĩ cĩg Lamẽhĩ, ĩthĩktaangu da nõõnĩ. Haruhi hatĩ naa eet ꞌcĩ haruhoonna hĩ nganĩĩta, occa haruhi nyahaappan ꞌcĩ õhõdaanna nganĩĩta.

²⁴ Má aruhi eeta tũrkĩramma, hĩnĩngĩtĩ daahĩth cĩ Kaiino, aruhi hatĩ eeta hẽẽn tũrkĩramma hĩ tũrkĩramma, hĩnĩngĩtĩ daahĩth cĩ Lamẽhĩ.”

²⁵ Baa oogin Aadamĩ hĩ ngaa cĩnnĩ tarĩ, nẽ ikia ittira nẽẽ loholeec umwa ꞌcĩ maacĩ tarĩ. Ikia akateek nẽẽ ĩnõõnnõ ꞌthaar ꞌcĩg haĩ Thẽth, nẽ ĩĩ, “Aaꞌnya Nyekuci loholeec ꞌcĩ maacĩ umwa tarĩ, hirigith Abeele baa aruk Kaiino.”

²⁶ Ma baa uruta, ikia ittira Thẽthĩ loholeec ꞌcĩ maacĩ, nẽ akateek ꞌthaar ꞌcĩg haĩ Ẽnõth. Nẽ korrioohĩĩ ĩĩcĩg, iita iꞌthiattaaĩ alaacõ eeta Makayyioohit.