ꞌThianaattõ 3 - ꞌBuuk cĩ Thõõth cĩ Nyekuci

ꞌThẽccan cĩ Aadamĩ hĩcĩ Ẽẽvva

¹ Nẽ baa ĩĩn hũkaat ꞌgeeꞌnyiahit ꞌcĩ ĩllõõan idiꞌngwa vẽlẽk baag ẽhẽnyta Makayyioohiti Nyekuci. Ma baa kõr umwa, ikia ijin hũkaat ngaa ĩĩnnĩk, “Anneekuung nẽẽꞌthẽk baa Nyekuci ngagiit, ‘Ma haduku hẽẽn ꞌcĩg abbiiri manatõõ tõõ ho’ dĩdĩ?”

² Ẽdẽcĩ Ẽẽvva anneek “Anneekeet nẽẽꞌthẽk Nyekuci, ‘Uduhit hẽẽn cĩg manu ho,

³ nẽẽthĩ, ma haduku hẽẽt ꞌcĩ aaĩ hõrggẽẽnaa cĩ manu hata, hode nẽẽ ahummu haaga. Má uhumtu dẽẽdẽ, adaaknu hatĩnĩ!’ ”

⁴ Ẽdẽcĩ hũkaat anneek, “Iggoolluung ngagiit Nyekuci thõng! Aitiõõ hatĩ hõllõngaa adaaknu.

⁵ Õthõõth Nyekuci hoti, hĩnĩngĩtĩ aga aĩ, má uduktu, abbuuhi hatĩ hẽbẽrĩ cugguung nẽ agayyu thooꞌthiok ꞌcĩg abũnnaa hĩ ꞌcĩg abathĩ aaut hĩ nẽẽnĩ.”

⁶ Nĩngĩtĩ acĩnĩ ngaa ngaatĩ ẽllẽẽmmĩ hẽẽt ngaatĩ hacĩnĩ hĩ ngaatĩ haduhi nẽ tarĩ ummuk ngaatĩ occa ẽggẽẽꞌnyĩ haau hĩ Nyekuci. Ma ho, ũdũũca hẽẽt nẽ uduha nẽ ẽꞌngẽraak maac cĩnnĩ umwa huduk nĩngĩtĩ aduhi.

⁷ Ma aduk nẽẽg hẽẽt nicci hoti ho, iita iiyyiellia nẽẽg aĩ, ĩko gõõng aattĩg ngũtũtũũny. Nĩngĩtĩ arĩhanaanĩ bõllõõk cĩg ꞌmũũnĩcaak hummutti eleeti.

⁸ Ma ꞌjiaatĩn niccia, ĩthĩhĩt nẽẽg Makayyioohit Nyekuc ngaatĩ õvvõõĩ manatõõ tõõ nẽ itieelli ĩnõõnnõ gẽrrẽẽt, nĩngĩtĩ õõ aguꞌthẽẽnĩ hẽẽnĩtõõ.

⁹ Ma ho, ũtũvvũ Makayyioohiti Nyekuci Aadam ĩĩnnĩk, “Aadam! Aaĩ nii ngaana?”

¹⁰ Ẽdẽcĩ Aadamĩ aĩ, “Hathiknii naa nganiit ngaatĩ õvvõõĩ manatõõ tõõ nẽ hitingoleeiina nĩngĩtĩ haguꞌthẽẽnĩ, hĩnĩngĩtĩ haaĩ ngũtũtũũny.”

¹¹ Ẽdẽcĩ Nyekuci ĩnõõnnõ anneek, “Nganĩ ꞌcĩ anneeki nganiit aaĩ ngũtũtũũny ko? Uduhu hatĩ nii hẽẽt baa hanneekii naa ma haduhi ho?”

¹² Ẽdẽcĩ Aadamĩ anneek, “Ngaa baa aaꞌnyaa nii ꞌcĩ aaꞌnya ho, nĩngĩtĩ haduhi.”

¹³ Ma ho, ijin Makayyioohiti Nyekuci ngaa ĩĩnnĩk, “Ne hatĩ ciee ĩdĩmanuu nii ho?” Ẽdẽcĩ ngaa Nyekuc anneek, “Iyyia alũllũũmaneeka hũkaat, nĩngĩtĩ haduhi.”

Ĩccĩĩnõ Nyekuci

¹⁴ Nĩngĩtĩ accĩĩnĩ Makayyioohiti Nyekuci hũkaat annẽẽkĩ, “Hĩ ꞌyioko ĩdĩmanuu nii hoti ho, hacciinnii naa nganiit hõrggẽẽnaa cĩ idiꞌngwaanu vẽlẽk loota nĩnga. Iꞌthianaanĩ kõr nicci, ogoliti hatĩ gõõng loota nẽ uduhu ꞌthẽẽm ooo.

¹⁵ Haaꞌnyuung hatĩ naa ĩĩtõ mĩrõk hĩ ngaa ĩꞌthõng ittirriaak lõhõlĩ cugguung. Õhõdaanni hatĩ ngeerĩnĩ nganiit õõ nẽ etengeduu nii ĩnõõnnõ tiitinyooc cĩnnĩ.”

¹⁶ Nẽ ĩccĩĩn Nyekuci ngaa ĩĩnnĩk, “Hittoori hatĩ naa huciith hatĩ ũũkca loholeec nẽ hatĩ gõõng ũtũhũa nii lõhõlĩ huciitha. Abũraneehi hatĩ gõõng nii maac cunni nẽ ĩnõõnnõ hatĩ gõõng ꞌcĩ ĩĩn makayyioohit cunni.”

¹⁷ Nẽ ĩĩnnĩk Nyekuci Aadam, “Hĩ ꞌyioko hatĩ ithihu nii thõõth cĩ ngaa cunni ho nẽ uduhu hẽẽt baa hanneekii naa ma haduhi ho, “Hĩccĩĩna naa ꞌthẽẽm, hĩnĩngĩtĩ thõõth ꞌcĩ ẽꞌthẽcani nii ho. Ammũda hatĩ gõõng nii ꞌgẽẽn cunni vẽlẽk mũlũhĩ waathinnioohĩĩ cĩg rũgẽt cunni.

¹⁸ Ẽhẽc hatĩ gõõng ꞌdwaanĩ mana cunni, hĩnĩngĩtĩ ꞌthẽccan cunni ho nẽ hatĩ gõõng uduhu nii haal cĩgĩnnĩg.

¹⁹ Ammũda hatĩ gõõng ꞌgẽẽn cunni vẽlẽk mũlũhĩ ĩꞌthõng daahõ. Baa ẽhẽnyta nii ꞌthẽẽmĩ, nẽ õbõdõõthĩ hatĩ ꞌthẽẽmĩ tarĩ.”

²⁰ Nĩngĩtĩ akannẽẽkĩ Aadamĩ ngaa cĩnnĩ ꞌthaar ꞌcĩg haĩ Ẽẽvva, hĩnĩngĩtĩ aku hatĩ ĩĩn nẽẽ aattĩ eet vẽlẽk ꞌcĩg hatĩ arũgĩ.

²¹ Ma ho, ũttũũba Makayyioohiti Nyekuci ceremwa cĩg idiꞌngwaanu nẽ aaꞌnyĩk Aadam hĩ Ẽẽvva hitihimit.

²² Nẽ ummuk Makayyioohiti Nyekuci ĩĩ, “Eggeenyito eeta cieeg aauto hĩ naaga, agaacõ thõõth ꞌcĩ abũnnaa hĩcĩ abathĩ. Hetedeyyieehi ĩhõõggõ ngaatĩ aduhi hẽẽt cĩ rũgẽtõ buúk, hátĩ hiittiõõ hõllõngaa arũgĩ ũdũt.”

²³ Nĩngĩtĩ iiggiaĩ Makayyioohiti Nyekuci ĩhõõggõ manatõõ cĩ Ẽẽdẽnĩ ho, hõõt battaala nẽ aaꞌnyĩk ĩhõõggõ hakatit ꞌthẽẽm baag ẽhẽnytaanĩ nẽẽgĩ.

²⁴ Ma baa iiggia Makayyioohiti Nyekuci ĩhõõggõ manaa cĩ Ẽẽdẽnĩ ho, ikia uduhaak aajĩlẽẽt ũgĩ hebehit mana nicci nẽ eꞌngeyyiõõĩ nyetuboot ꞌcĩ alanyĩt, halaamtĩ eet ꞌcĩg au adiim aduk hẽẽt ꞌcĩ rũgẽtõ ho.