ꞌThianaattõ 2 - ꞌBuuk cĩ Thõõth cĩ Nyekuci

¹ Nẽ ꞌgõõlaa cĩ, ikia ẽdẽcaak Nyekuci ngaatĩ ẽhẽnytaanĩ hẽẽtkujjieen hĩ looc hĩ hẽlẽggĩ vẽlẽk.

² Ma kõr ꞌcĩ ĩĩn tũrkĩramma, baa ẽdẽcaak Nyekuci dtiic, ikia iyyioman nẽẽ dtiicaa cĩnnĩ.

³ Nẽ ikia aggatan Nyekuci kõr ꞌcĩ ĩĩn tũrkĩramma nẽ aaꞌnyĩk hĩĩ kõr ꞌcĩ aꞌngirannii ꞌcĩ ẽllẽẽmĩthĩ, hĩnĩngĩtĩ baa ikia iyyioman nẽẽ dtiicaa cĩnnĩ.

⁴ ꞌGõõl ꞌcĩ baa ẽhẽnytaanĩ Nyekuci looc ko cieeni. Baa ẽhẽnyta Makayyioohiti Nyekuci hẽẽtkujjieen hĩ looc,

Aadam hĩ Ẽẽvva

⁵ baa nga aitiõõ hẽẽna hĩ artĩ hĩ haal ꞌcĩg abũtha loota nĩnga tõõ, hĩnĩngĩtĩ baa nga haaꞌnyĩk Makayyioohiti Nyekuci tammu hĩtĩĩl nẽ baa nga aitiõõ eeta ꞌcĩg akatĩ looc buúk tõõ.

⁶ Nẽ baa aaꞌnyĩk Nyekuci maam ꞌcĩg au ꞌthẽẽmĩtõõ hocohit looc hĩĩ cooni.

⁷ Nĩngĩtĩ õꞌngõnyaanĩ Makayyioohiti Nyekuci doob nẽ ẽtẽhẽnyaaĩ eet ꞌcĩ maacĩ nẽ ũtũbbeek ꞌlaũk hikia hũrũg.

⁸ Nĩngĩtĩ ẽhẽnytaanĩ Makayyioohiti Nyekuci mana umwa ĩcĩ uruto, ngaatĩ haĩ Ẽẽdẽn nẽ aarĩk eet ꞌcĩ ẽhẽnyta ho nĩngaata.

⁹ Baa nẽ ẽtẽhẽnya Makayyioohiti Nyekuci hẽẽn vẽlẽk ꞌcĩg abũnnaa gẽrrẽẽt ngaatĩ hacĩnĩ hĩ ngaatĩ haduhi. Nẽ hõrggẽẽnaa cĩ manu, baa aattĩg hẽẽna ꞌramma, hẽẽt cĩ rũgẽtõ hĩ hẽẽt ꞌcĩ hagaĩ thõõth ꞌcĩ abũnnaa hĩ ꞌcĩ abathĩ.

¹⁰ Baa arik hidiaa umwaa manatõõ tõõ cĩ Ẽẽdẽnĩ ho nẽ aaꞌnyĩk mana hĩĩ cũlak. Ma baa arik hidiaa nicciee ho, ikia ẽꞌngẽrĩ ĩĩ ꞌgoolliok ꞌwec.

¹¹ Haĩ hidioo ꞌcĩ oou Pithon, arik nẽẽ awanĩt looc ꞌcĩ haĩ Havvila,

¹² looc ꞌcĩ ammuddiaanĩ ꞌdaabĩ ꞌcĩ tẽllĩ, hĩ hẽlẽggĩ ꞌcĩg õꞌngõlĩ ẽmmẽdĩ, hĩ biyyiẽẽn ꞌcĩg attalĩthĩ.

¹³ Haĩ hidioo ꞌcĩ ĩĩn ꞌramma ꞌGiihõn, arik nẽẽ awanĩt looc ꞌcĩ haĩ Kuuth.

¹⁴ Haĩ hidioo ꞌcĩ ĩĩn iyyio ꞌTigirith, arik nẽẽ õkõ ĩcĩ uruto cĩ looc ꞌcĩ haĩ Athiiria. Haĩ hidioo ꞌcĩ ĩĩn ꞌwec Euvaratẽth.

¹⁵ Ma baa ho, ũũhĩ Makayyioohiti Nyekuci eet baa ẽhẽnyta nẽẽ ho manatõõ cĩ Ẽẽdẽnĩ, hũũk hakatõ nẽ ẽbẽk mana.

¹⁶ Nĩngĩtĩ aduhaakĩ Makayyioohiti Nyekuci ĩnõõnnõ annẽẽkĩ, “Duuk hẽẽn ꞌcĩg abbiiri ꞌcĩg aattĩg manatõõ nĩĩcĩ ho vẽlẽk,

¹⁷ nẽẽthĩ, ma haduhi hẽẽt ꞌcĩ aaꞌnyi nganiit gaa thõõth ꞌcĩ abũnnaa hĩ ꞌcĩ abathĩ hata. Má uduhu dẽẽdẽ, adaahi hatĩ kõr tĩho noho!”

¹⁸ Ma nĩngaata, õthõõth Makayyioohiti Nyekuci ĩĩ, “Hõllõngaa abũnnaa ngaatĩ aayyi ẽẽtĩ ꞌcĩ maacĩ ẽmmẽn, ĩꞌnya hẽtẽhẽnyaak ngaa hẽẽl ĩnõõnnõ.”

¹⁹ Ma hĩdĩĩkoothong õꞌngõnya Makayyioohiti Nyekuci doob nẽ ẽtẽhẽnya idiꞌngwa ꞌcĩg aattĩg cũũmõ cũũmõ, hĩ hĩbaallĩ ꞌcĩg aattĩg cũũmõ cũũmõ nẽ aꞌnyahaak Aadam hakateek ꞌthaarriok.

²⁰ Nĩngĩtĩ akannẽẽkĩ Aadamĩ hẽlẽggĩ ꞌcĩg arũgĩ cĩg olu hĩ hĩbaallĩ hĩ idiꞌngwa vẽlẽk ꞌcĩg aattĩg mõrõtõõ tõõ ꞌthaarriok. Nẽẽthĩ, baa nga aitiõõ Aadam ngaa ꞌcĩ occa ẽẽl ĩnõõnnõ tõõ.

²¹ Nĩngĩtĩ aaꞌnyĩkĩ Makayyioohiti Nyekuci Aadam hohoddia ũꞌnyaaha nẽ avvahana onyiit cĩnnĩ hõdẽĩ nẽ ĩdĩĩt nĩngĩtĩ avvahanaanĩ onyiit ko idiinga.

²² Nẽ ittiha Makayyioohiti Nyekuci onyiit nicci ẽtẽhẽnyaaĩ ngaa ꞌcĩ ngayyi nẽ aꞌnyahaak Aadam.

²³ Nĩngĩtĩ õthõõthĩ Aadamĩ aĩnnĩ, “Eet aattĩ ꞌcĩ aaĩ hĩ naa cieeni, ꞌcĩ ẽhẽnytaa onyiitaa caannĩ! Haĩ ꞌthaar cĩgĩnnĩg ‘Ngaa,’ hĩnĩngĩtĩ baa ẽhẽnytaa nẽẽ onyiitaa caannĩ.”

²⁴ Hĩnĩngĩtĩ thõõth icci, ũũnnĩk hatĩ ẽẽtĩ õlõ cĩ maacõnĩ hĩcĩ aattĩnnĩ nẽ ũũk ũꞌthũwanõõ nẽ õõt ũrũmtĩ hĩ ngaa cĩnnĩ hĩĩtõ ẽlẽ hõdẽẽthõng.

²⁵ Baa aattĩg ẽẽtĩ hĩ ngaa cĩnnĩ ho ngũtũtũũny nẽ hõllõngaa aꞌngaõnĩ.