Terethiinit 2 - ꞌBuuk cĩ Thõõth cĩ Nyekuci

Waraga hĩ lemmiook cĩg Eevvetho

¹ Nẽ ĩnnĩhaa Yeesu nẽẽ, “Teheedĩk waraga aajĩlõ cĩ lothippit cĩ lemmioohu ꞌtaaũnaa cĩ Eevvetho. “Duhaak anneek, aku nyeemuut nicciaa hĩ eet ꞌcĩ aggam mũnyũny tũkĩramma attiaa cobbi, nẽ õtõ hõrggẽẽnaa cĩ ꞌthĩĩk tũkĩramma ꞌcĩg ĩĩn ꞌdaab, ꞌcĩg aꞌnyak ꞌlõõmẽẽt.

² “Haga naa hẽlẽggĩ vẽlẽk ꞌcĩg adĩmannu niiga nẽ hĩcĩna ngaatĩ adticaniinnu gẽrrẽẽt, hĩ ngaatĩ emmeeꞌthu thooꞌthiok. Nẽ tarĩ, hagawa ngaatĩ hõllõngaa anuꞌthaannu eet ꞌcĩg abathĩ. Ittiamattu niig eet ꞌcĩg õõlõng aĩ, hĩĩgĩnna ꞌthooyyiak nẽ ĩko nẽẽ hõllõngaa ĩĩn ꞌthooyyiak dĩdĩ. Ummuddiaau niig dĩdĩ, ngaatĩ ĩĩnnĩ nẽẽg oloꞌngiaak.

³ Baa emmeeꞌthu niig thooꞌthiok nẽ accanatteeu gẽrrẽẽt, hĩnĩngĩtĩ nganĩĩta nẽ aalla nga ippiirria ũdũt.

⁴ “Nẽ aaĩ ꞌgii hõdẽẽthõng ꞌcĩ nga abaccu niiga. Iittiõõ niig hõllõngaa ammĩnannaangu nganĩĩt hode ꞌgoonogu haau hĩ baa ꞌrẽẽna.

⁵ Ĩcĩnĩt nõõ, ĩĩ ꞌrẽẽn nĩngĩtĩ adhukiaannu niig gẽrrẽẽt! Oboddia hĩ nganĩĩta nẽ ĩdĩmattu thooꞌthiok baag adĩmannu baa ĩĩcĩ oou. Má hõllõngaa õbõdaannu, hakuu hatĩ hõkõõĩ ꞌthiihit cunuung ꞌcĩ aꞌnyak ꞌloomo ngaatĩ aayyi hataa nẽ hõbõdĩ.

⁶ Aaĩ ꞌgii hõdẽẽthõng ꞌcĩ adĩmannu jurrung. Aaburreeku niig thooꞌthiok ꞌcĩg abathĩ ꞌcĩg adtican eeta ꞌcĩg anũ thõõth cĩ eet cĩg Nikõõla, hĩcĩ haaburreehi naa buúk.

⁷ “Má athĩkneennu, ĩthĩhĩt thõõth ꞌcĩ aduhaak Lorii ꞌcĩ Ẽllẽẽmĩth lothippiꞌnya cĩg lemmioohu ho jurrung. Haaꞌnyihi hatĩ naa eet ꞌcĩg abũrĩ thooꞌthiok ꞌcĩg abathĩ, huduhit hẽẽt cĩ rũgẽtõ ꞌcĩ aaĩ õlõõ cĩ Nyekuci.”

Waraga hĩ lemmiook cĩg Thĩmĩrna

⁸ Nẽ ĩnnĩhaa Yeesu nẽẽ, “Teheedĩk waraga aajĩlõ cĩ lothippit cĩ lemmioohu, ꞌtaaũnaa cĩ Thĩmĩrna. “Duhaak anneek, nyeemuut nicciaa ꞌcĩ aku hĩ eet ꞌcĩ baa iꞌthianaanĩ hẽlẽggĩ vẽlẽk nẽ udtuura. Baa adaaha nẽ ꞌyioko kõr icci ũrũga.

⁹ Haga naa pĩĩrnanĩt cunuung hĩ tamaati ꞌcĩ iiginnu hullaha nẽ abalinnu nẽẽꞌthẽk pee. Nẽ haga ngaatĩ odoommuung eeta ꞌcĩg aĩ hĩĩgĩnna ꞌJudeei ho nẽ hõllõngaa ĩĩn nẽẽg ꞌJudeei dĩdĩ. Ĩĩn nẽẽg lothippit cĩ ꞌThĩttaanõ.

¹⁰ Nẽ ma hiꞌngolinnu ꞌgõõl ꞌcĩ hatĩ õõ accananiinnu. Aggammuung hatĩ habuui cĩ loriẽẽt ꞌcĩg abathĩ nẽ aarihuung baabuuthatõõ, accananiinnu hatĩ gẽrrẽẽt waathinniook õmmõtõ, ꞌgõõl ꞌcĩ hatĩ attĩmannuung habuui cĩ loriẽẽt ꞌcĩg abathĩ ho niccia. Ma huunniku thõõth cĩ Nyekuci ũdũt, tananga adiim arukuunga habuui cĩ loriẽẽt ꞌcĩg abathĩ ho. Haaꞌnyuung hatĩ naa ꞌbaaninit ꞌcĩ rũgẽt ꞌcĩ aalla ooo, hĩnĩngĩtĩ ĩllõõattu niig ꞌtĩmman cĩ ꞌThĩttaanõ.

¹¹ “Má athĩkneennu, ĩthĩhĩt thõõth ꞌcĩ aduhaak Lorii ꞌcĩ Ẽllẽẽmĩth lothippiꞌnya cĩg lemmioohu ho jurrung. Nẽ ẽẽtĩ ꞌcĩ abũrĩ thõõth cĩ ꞌThĩttaanõ ũdũt, aitiõõ hatĩ ẽẽtĩ tĩho hõllõngaa õkõ accananni ꞌgwoyyiaa ꞌcĩ aalla ooo, hĩnĩngĩtĩ daahĩth ꞌcĩ uruto niccia.”

Waraga hĩ lemmiook cĩg Pẽrgamo

¹² Ma ho ĩnnĩhaa Yeesu nẽẽ, “Teheedĩk waraga aajĩlõ cĩ lothippit cĩ lemmioohu, ꞌtaaũnaa cĩ Pẽrgamo. “Duhaak anneek, nyeemuut ꞌcĩ aku hĩ eet ꞌcĩ aꞌnyak nyetuboot ꞌcĩ ꞌlẽhẽdĩ gẽrrẽẽt nicciaani.

¹³ Haga naa nĩngĩtĩ aattiyyu niig ko, ĩĩn ꞌtaaũn ꞌcĩ aayyi habuẽẽꞌthĩt cĩ ꞌThĩttaanõ, nẽẽthĩ, nga aalla aꞌthuunnu niig thõõth caannĩ noho. Tananga baa aruhi Antipa, ẽẽtĩ baa ĩĩn hebereec caannĩ hõrggẽẽnaa cunuung, ꞌtaaũnaa cĩ ꞌThĩttaanõ hataa, aalla nga ẽlẽmmaangu niig nganĩĩt noho.

¹⁴ “Haꞌnyahi naa thooꞌthiok ꞌcĩg abadtẽc ꞌcĩg hatabi haduhaakuunga, ꞌcĩg nga adĩmannu niig ꞌgõõlaa ꞌcĩ abathĩ. Aattĩg eeta ũgẽẽgĩ hõrggẽẽnaa cunuung ꞌcĩg anũ ꞌlimman cĩ Balaamĩ, eet baa eterꞌtheek Balak haaꞌnyĩk eet cĩg Ĩꞌthĩraẽlĩ hĩdĩmanit thooꞌthiok ꞌcĩg abathĩ. Baarkit, baa alũllũũmaneek Balaamĩ eet hẽꞌthẽcattõõ ꞌgõõlaa ꞌcĩ aduhi ꞌgeenniok ꞌcĩg aaꞌnyĩk eeta hẽlẽggĩ ꞌcĩg aar nẽẽg hĩĩtõ nyekuꞌnya hatĩ alayyi. Nẽ ũlũllũũmaneek hitikto tahatak.

¹⁵ Nẽ tarĩ, aattiyyu niig ũgẽẽgĩ ꞌcĩg anuyyu ꞌlimman cĩ eet cĩg Nikõõla.

¹⁶ Haduhaakuunga, ũtũngteek ꞌthẽccanẽẽta, má hõllõngaa uunniku, hakuu hatĩ hĩdĩĩkoothong hiita huruktooa hĩ eet ꞌcĩg adĩman ꞌthẽccanẽẽta. Haruhi hatĩ ĩhõõggõ nyetubootaa ꞌcĩ haꞌnyahi ũtũũga ho.

¹⁷ “Má athĩkneennu, ĩthĩhĩt thõõth ꞌcĩ aduhaak Lorii ꞌcĩ Ẽllẽẽmĩth lothippiꞌnya cĩg lemmioohu ho jurrung. Nẽ haaꞌnyihi hatĩ naa eet ꞌcĩ aꞌnyaman ꞌgoolinit cĩ ꞌThĩttaanõ, ꞌgẽẽn ꞌcĩ haĩ manna ꞌcĩ haggunyuthi naa ngaamwaanĩ hẽẽtahujjieen. Nẽ tarĩ, haaꞌnyihi hatĩ eet hõdẽĩ hõdẽĩ, bẽẽ ꞌcĩ õõrĩ cĩ eheedini ꞌthaara ꞌcĩg ĩĩn ngeju, ꞌcĩg aitiõõ ẽẽtĩ ꞌcĩ aga ꞌthaar tĩko tõõ, aga hatĩ baattĩ ꞌthaaru diooni.”

Waraga hĩ lemmiook cĩg Thiatira

¹⁸ Nẽ ĩnnĩhaa Yeesu nẽẽ, “Teheedĩk waraga aajĩlõ cĩ lothippit cĩ lemmioohu, ꞌtaaũnaa cĩ Thiatira. “Duhaak anneek, nyeemuut nicciaa ꞌcĩ ĩꞌthõõa Ngeertĩ Nyekuci, ꞌcĩ alanyĩt hẽbẽrĩ haauto hĩ lanyit cĩ ꞌgwoyyio nẽ attaalito ꞌthoona hĩ ꞌthĩĩha ꞌcĩg attalĩthĩ.

¹⁹ Haga naa hẽlẽggĩ vẽlẽk ꞌcĩg adĩmannu niiga. Haga mĩnnan cunuung hĩ lemiinit cunuung hĩ dtiic cunuung hĩ ꞌgõõl ꞌcĩ emmeeꞌthu thooꞌthiok. Nẽ haga ngaatĩ adticannu thooꞌthiok jurrung waathinnioohĩĩ cĩg, hĩllõõan baag adticannu baa ꞌrẽẽna.

²⁰ “Aaĩ thõõth hõdẽẽthõng diooni ꞌcĩ hatabi haduhaakuunga. Alahatteehu tarĩ niig ngaa ꞌcĩ haĩ ꞌJeꞌthebeela hataa, hoolongeek eet gẽrrẽẽt, aĩ hĩĩnĩ põrõvẽtaac cĩ Nyekuci nẽ illimaneek eet õlõng nẽ tarĩ, ũlũllũũmaneek dticcianniook cĩgannĩg, huduhit ꞌgẽẽn ꞌcĩ aaꞌnyĩk ngarĩta hẽlẽggĩ ꞌcĩg aar eeta hĩĩtõ nyekuꞌnya nẽ illimaneek hidticanit thooꞌthiok ꞌcĩg ĩĩn ꞌriiring buúk.

²¹ Haaꞌnyĩha naa ĩnõõnnõ kõr ꞌcĩ ũũnnĩkĩ ꞌthẽccanẽẽt cĩgĩnnĩg ꞌcĩg adĩmani ꞌwaangĩꞌthẽẽt ko nẽ aitiõõ hinnia hõllõngaa adiim ũũnnĩk nẽẽ thooꞌthiok cĩgĩnnĩg ꞌcĩg ĩĩn ꞌriiring ko buúk.

²² “Nẽ ꞌyioko, hadhuheehi hatĩ naa Jethebẽẽla nangẽrẽbaa cĩ ꞌcannaanõ nẽ haaꞌnyĩha eet ꞌcĩg adĩman hĩ ĩnõõnnõ thooꞌthiok ꞌcĩg ĩĩn ꞌriiring ko hippiirria gẽrrẽẽt, hatĩ hõllõngaa ũũnnĩk ꞌthẽccanẽẽt cĩggĩĩng ko.

²³ Haruhi hatĩ naa nuyyiook cĩgĩnnĩg hadaahito nẽ hatĩ iita agaacõ lothippiꞌnya cĩg lemmioohu vẽlẽk, ngaatĩ ĩĩnnĩ nganĩĩt ꞌcĩ hatarraabani muhẽẽnĩt hĩ thooꞌthiok vẽlẽk ꞌcĩg aꞌnyak eeta ꞌthinneetinii cĩggĩĩng. Nẽ hatĩ hũdũmana naa eet hõdẽĩ hõdẽĩ ꞌgõõlaa ꞌcĩ adticaniini nẽẽgĩ.

²⁴ Nẽ thĩ nẽẽꞌthẽk niig ũgẽẽgĩ ꞌtaaũnaa cĩ Thiatira ho, hõllõngaa anuyyu thõõth ꞌcĩ abathĩ ꞌcĩ allimaneekuung ngaa nicciee ho. Nẽ hõllõngaa agayyu thõõth ꞌcĩ anneek nuyyiooha cĩgĩnnĩg, ‘ꞌGii dĩdĩ ꞌcĩ ammiꞌthẽẽnĩ ꞌThĩttaanĩ.’ Nẽ hanneekuung, iittiõõ hatĩ hõllõngaa hatattadeekuung pĩĩrnanĩt umwa tarĩ.

²⁵ Uꞌthuutti thõõth cĩ Nyekuci jurrung ĩꞌthõng hikia naana.

²⁶ “Nẽ haaꞌnyihi hatĩ naa eet ꞌcĩ ũtũbũr thõõth cĩ ꞌThĩttaanõ nẽ ũꞌthũũtĩ lemiinit caannĩ ũdũt, makaaꞌthĩt ꞌcĩ aggamĩ loonyin vẽlẽk, ĩꞌthõng decciaanĩt cĩ lootu.

²⁷ “ ‘Aggam hatĩ nẽẽ loonyin vẽlẽk hĩbahĩtaa ꞌcĩ ĩĩn ꞌthiihit, ĩꞌthaan hatĩ nẽẽ loonyin iccig haauto hĩ ijjioꞌnya ꞌcĩg alibi.’ Haaꞌnyihi hatĩ ĩnõõnnõ ꞌtirrian ꞌcĩ aduhõõ hĩ baa aaꞌnya nganĩĩt Baaba caannĩ thõng.

²⁸ Nẽ tarĩ, haaꞌnyĩha ĩnõõnnõ coobooc hĩĩ terethiinit ꞌcĩ ĩllõõanĩ mĩrõk.

²⁹ “Má athĩkneennu, ĩthĩhĩt thõõth ꞌcĩ aduhaak Lorii ꞌcĩ Ẽllẽẽmĩth lothippiꞌnya cĩg lemmioohu ho jurrung.”