ꞌRuuth 4 - ꞌBuuk cĩ Thõõth cĩ Nyekuci

Õlõm ꞌBõathĩ ꞌRuuth

¹ Ma kõr niccia noho, ũũk ꞌBõathĩ ĩĩcĩ hattũũg cobbi cĩ ꞌtaaũnõõ, ngaatĩ gõõng õthõõthĩ eeta lokihẽẽt hĩ thooꞌthiok cĩg lootu nẽ ũũk iccioloongan nĩngaata. Ma ho, uppwaanna ittioonniohiti baa aduha ꞌBõathĩ, nĩngĩtĩ avvĩyyĩ ꞌBõathĩ ĩnõõnnõ annẽẽkĩ, “Ijjia dako ꞌcioloongan loota ngaati ꞌgõõna, hadiimi hõthõõthõõ.” Nĩngĩtĩ ammũdõõthĩkĩ nẽẽ ꞌBõath nẽ õõt aauto nẽẽg vẽlẽk loota hõdẽĩ.

² Ma nĩngaata, ũtũvva ꞌBõathĩ makayyiook cĩg ꞌtaaũnaak õmmõtõ nẽ uduhaak ĩhõõggõ ĩĩnnĩk, “Iccioloonganit loota ngaati, ĩĩtõ hẽbẽrĩ cĩg thõõth icci.” Nĩngĩtĩ aattiyyi loota.

³ Ma nĩngaata, ĩĩnnĩk ꞌBõathĩ ittioonniohit tĩho, “Ũũtẽnĩ Naoomi baa õbõda looccaa cĩ Mõabĩ looc cĩ ittioonniohit cĩnaac Elimelek.

⁴ Baa hammuhi haini, occa hõthõõth hĩ nganiit thõõth icci, hátĩ tũũwa looc. Má adiimi ũũta, tũũwa hẽbẽrẽẽnnĩĩ cĩg makayyiook iccig. Nẽẽthĩ má hõllõngaa adiimi, duhaahaa nganĩĩt haga, hĩnĩngĩtĩ iini nii eet cobbi nẽ hanueeki naa nganiita.” Nĩngĩtĩ ẽdẽcĩ ẽẽtĩ tĩho aĩnnĩ, “Hũũta hatĩnĩ.”

⁵ Ma nĩngata, uduhaak ꞌBõathĩ ĩnõõnnõ ĩĩnnĩk, “Dĩdĩ, kõr ꞌcĩ hatĩ ũũtanĩĩ nii looc hĩ Naoomi, adiim olomi nii ꞌRuuth cĩ looc cĩ Mõabĩ buúk. Ĩĩn nẽẽ ngaatĩbõyyĩ. ꞌGõõlaa nĩĩca, aꞌnyak hatĩ ꞌRuuthi loholeec ꞌcĩ maacĩ ꞌcĩ hatĩ abulꞌtha maac cĩnnĩ baa adaaha nẽ ũꞌthũũtĩ loholeec looc cĩ halang cĩnĩĩng.”

⁶ Ẽdẽcĩ ittioonniohiti ciee ꞌBõath anneek, “Aitiõõ naa hõllõngaa occa hũũta looc iccia, hĩnĩngĩtĩ hadhuheehi hatĩ looc caannĩ ho tuu uruta. Tũũwa nẽẽ nii looc, aitiõõ naa hõllõngaa occa hũũta.”

⁷ Waathinniook nicciag, baa gõõng aꞌnyak eeta cĩg Ĩꞌthĩraẽlĩ nyepitee ꞌcĩ aĩ, ma adiim eeta ꞌramma ũũtõõ ijjio hode ataalõnĩ ijjio, appũrcca umwaa caawac nẽ aaꞌnyĩk tuuyyiohit, hode aaꞌnyĩk tuuyyiohiti baattĩ ijjioonnu, hátĩ hagaacõ eeta cĩg Ĩꞌthĩraẽlĩ ngaatĩ, ũkũmanõõthĩhĩ thõõthaa.

⁸ Nĩngĩtĩ appũrccaanĩ ittioonniohiti cĩ halang cĩ umwa ho caawac nẽ ĩĩnnĩk ꞌBõath, “Tũũ looc.”

⁹ Ma nĩngaata, uduhaak ꞌBõathĩ makayyiook hĩ eet vẽlẽk ꞌcĩg baag aattĩg nĩngaata ĩĩnnĩk, “Iiginnu ꞌyioko niig vẽlẽk hẽbẽrĩ kõr nicci ꞌcĩg acinnu ngaatĩ hũtũũwaĩĩ naa hĩ Naoomi looc vẽlẽk baa Elimẽlẽhĩ, hĩ cĩ Kilionĩ hĩ cĩ Mahalonĩ,

¹⁰ nẽ tarĩ hõlõma ꞌRuuth cĩ Mõabĩ, ngaatĩbõyyĩ baa ĩĩn ngaa cĩ Mahalonĩ. ꞌGõõlaa cĩ, aꞌnyak hatĩ nẽẽ loholeec ꞌcĩ maacĩ ꞌcĩ abulꞌtha maac cĩ ꞌRuuthi baa adaaha nẽ irigith ijjio cĩg halang cĩnnĩ, hátĩ hiittiõõ hõllõngaa aꞌnginoothi ꞌthaara cĩg Mahalonĩ lothippitaa cĩ eet cĩgĩnnĩg hĩ cĩg ꞌtaaũn cĩ Bẽtẽlẽmĩ. Iiginnu niig vẽlẽk kõr nicci hẽbẽrĩ.”

¹¹ Nĩngĩtĩ ẽdẽcĩ makayyiooha hĩ eet vẽlẽk ꞌcĩg baag aattĩg hattũũgaa cobbi aĩnnĩ, “Hĩĩgĩnna naag hẽbẽrĩ cĩg thõõth icci! Aꞌnyĩĩk Makayyioohit haaꞌnyĩk ngaa icci aku õlõõ cunni ho, hittira lõhõlĩ ꞌcĩg mẽẽlĩg haau hĩ baa Rakĩlẽ hĩ Lẽẽa, baag arrittiaanĩ eeta cĩg Ĩꞌthĩraẽlĩ! Aꞌnyĩĩk haaꞌnyi Makayyioohiti baliinit hattũũgaa cĩ Ẽvarathĩ nẽ ubuli Bẽtẽlẽma.

¹² Aꞌnyĩĩk Makayyioohit haaꞌnyi lõhõlĩ ꞌcĩg hatĩ arrita ngaa ciee hĩĩtõ mẽẽlĩg haauto hĩ lohollia cĩg baangeet cĩnaac Pẽrẽth, ngeertĩ Tamarĩ hĩ ꞌJuuda.”

¹³ Nĩngĩtĩ õkõõĩ ꞌBõathĩ ꞌRuuth halangatõõ cĩnnĩ nẽ õõt ũrũmtĩ hĩ ĩnõõnnõ. Ma baa oogin nẽẽ hĩ ꞌRuuth ko, ikia ẽẽl Makayyioohiti ĩnõõnnõ haꞌnyahõ nẽ ittira loholeec ꞌcĩ maacĩ.

¹⁴ Nĩngĩtĩ annẽẽkĩ ngaaĩ cĩg ꞌtaaũnaak Naoomi, “Hĩdĩhĩthĩt Makayyioohit ꞌcĩ ꞌyioko aaꞌnyi loholeec ꞌcĩ abulꞌtha halang cunni ho! Aꞌnyĩĩk loholeec icci hubuli Ĩꞌthĩraẽla.

¹⁵ Aaꞌnyi hatĩ nẽẽ nganiit muhẽẽnĩt ꞌcĩ abũnnaa nẽ uꞌthuutti hatĩ atahaanyu, hĩnĩngĩtĩ ĩĩn nẽẽ loholeec cĩ alaannuni. Nẽ ammĩnannii ꞌRuuthi nganiit nẽ mẽẽn nẽẽ hĩllõõan lõhõlĩ cugunnig baag maacĩg ĩĩn tũrkĩramma.”

¹⁶ Nĩngĩtĩ õdõngĩ Naoomi loholeec nẽ ĩꞌnyaag athaa nẽ ũꞌthũũtĩ ĩnõõnnõ.

¹⁷ Baa õthõõth ngaaĩ ꞌcĩg baag aattĩg nĩngaata aĩ, “Aꞌnyak Naoomi loholeec ꞌcĩ maacĩ.” Nĩngĩtĩ akannẽẽkĩ ĩnõõnnõ ꞌthaar ꞌcĩg haĩ Obeede. Baa ĩĩn Obeede maaꞌnyĩ ꞌJeeꞌthe nẽ ĩĩ ꞌJeeꞌthe maaꞌnyĩ habu Daavide.

Hattũũg cĩ õlõ cĩ habu Daavide

¹⁸ Hattũũg cĩ õlõ cĩ Pẽrẽthĩ cieeni: Baa ĩĩn Pẽrẽthĩ maaꞌnyĩ Hethoronĩ.

¹⁹ Nẽ ĩĩ Hethoronĩ maaꞌnyĩ Ramĩ. Ĩĩn Ramĩ maaꞌnyĩ Ammĩnadabĩ.

²⁰ Baa ĩĩn Ammĩnadabĩ maaꞌnyĩ Nahathõnĩ. Nẽ ĩĩ Nahathõnĩ maaꞌnyĩ ꞌThalmõõnẽ.

²¹ Ĩĩn ꞌThalmõõnẽ maaꞌnyĩ ꞌBõathĩ. Nẽ ĩĩ ꞌBõathĩ maaꞌnyĩ Obeede.

²² Baa ĩĩn Obeede maaꞌnyĩ ꞌJeeꞌthe. Nẽ ĩĩ ꞌJeeꞌthe maaꞌnyĩ habu Daavide.