ꞌRuuth 3 - ꞌBuuk cĩ Thõõth cĩ Nyekuci

ꞌRuuth hĩ ꞌBõath hilongana

¹ Kõr umwa, baa anneek Naoomi alaannĩnĩ ꞌRuuth, “Loholeec caannĩ, hadiimi heelli naa nganiit diima eet ꞌcĩ olommi nganiit ꞌcĩ hatĩ arũmeennu jurrung.

² Baa arũmeennu niig hĩ dticcianniook ꞌcĩg ngayyig cĩg ꞌBõathĩ nẽ aga nii buúk ngaatĩ ĩĩnnĩ ꞌBõathĩ ittioonniohit cĩnaac dẽẽdẽ. Aany hatĩ nẽẽ haal hatĩjjiaat hilongana.

³ Bĩĩt ꞌraanĩ nẽ uudi ngõõrra ꞌcĩ õꞌngõlĩ ẽmmẽdĩ nẽ itihimuu ceremwa cugunnig ꞌcĩg ẽllẽẽmĩthĩ. Nẽ uuhu hilonganaa cĩnnĩ. Nẽẽthĩ, ma haaꞌnyihi ꞌBõath hicini ĩꞌthõng hẽdẽcaak ꞌgẽẽn.

⁴ Ma ũũk ũꞌnyaahĩ, behooth nĩngĩtĩ õkõ oongiyyi jurrung. Ma ohoddia ũꞌnyaaha, bĩĩt dõõng cẽrẽm cĩ bungẽẽttõ nẽ atangu ĩĩcĩ ꞌthoonu. Ma ĩcĩnĩ, aduhaaki hatĩ nẽẽ nganiit thõõth ꞌcĩ occa adĩmani.”

⁵ Ẽdẽcĩ ꞌRuuthi aĩ, “Hõkõ ꞌthẽk hatĩ hadĩmani naa thõõth vẽlẽk hĩcĩ aduha nii ho.”

⁶ Ma nĩngaata, ũllũũcĩ ꞌRuuthi baalin niccia ũũk ĩĩcĩ hilonganõ, nĩngĩtĩ õkõ adĩmanĩ thooꞌthiok vẽlẽk baag aduhaak inyinninẽẽnĩ.

⁷ Ma baa ẽdẽcaak ꞌBõathĩ ꞌgẽẽn nẽ accamanoothĩha, ũũk atangu nẽẽ ngaatĩ baa arruthanõõthĩkĩ haala ĩĩcĩ gõlla. Ma nĩngaata, ĩnĩha ꞌRuuthi ikia õdõng cẽrẽm ꞌcĩ abungẽẽnĩ ꞌBõathĩ ĩĩcĩ ꞌthoonu, nĩngĩtĩ oongiyyi nĩngaata.

⁸ Ma baa baal hõrggẽẽna, ukuleek ꞌBõathĩ ꞌjieen. Ma baa ũũkcĩ ho, acĩn hinnia ngaa umwa oongi ĩĩcĩ ꞌthoo cĩgĩnnĩg!

⁹ Nĩngĩtĩ ajini ꞌBõathĩ ngaa tĩho annẽẽkĩ, “Nganiit nganĩ?” Ẽdẽcĩ ngaa tĩho ꞌBõath anneek, “Makayyioohit caannĩ, nganĩĩt ꞌRuuth, bungaa baaĩ nuun eetocaa cĩ cẽrẽm cunni, hĩnĩngĩtĩ ĩĩnĩ nii lommioohit cĩ halang caannĩ.”

¹⁰ Ma ngaati, ẽdẽc ꞌBõathĩ ĩĩ, “Aꞌnyĩĩk Makayyioohit haggataniina loholeec caannĩ. Hĩnĩngĩtĩ hõllõngaa ammĩnani nii iꞌnyinnuni diooni, ammĩnani eet cĩg halang cunni vẽlẽk, hátĩ hubuluꞌthiaa ꞌthaara cĩg maac cunni baa adaaha. Nẽ tarĩ hõllõngaa aallahi ngaatĩ occa aꞌthũwanni nyahaappanĩta, tananga ꞌcĩg aballi hode ꞌcĩg ĩĩn hullaha, akuu hinnia hĩ nganĩĩt nẽ ĩĩnnĩhaa lõmaanĩ.

¹¹ Nẽẽthĩ ꞌyioko, ma hiꞌngolli thõõth umwa loholeec caannĩ. Hadĩmaneekii ꞌthẽk hatĩ naa nganiit ꞌgii vẽlẽk ꞌcĩ adiimmaa nii nganĩĩt hĩdĩmaneehiina, hĩnĩngĩtĩ agayyi eeta vẽlẽk cĩgannĩg cĩg ꞌtaaũnaak nganiit ngaatĩ ĩĩnnĩ ngaa ꞌcĩ abũnna gẽrrẽẽt.

¹² Nẽ dĩdĩ, hĩĩnĩ naa ittioonniohit cunuung ꞌcĩ maac cunni ꞌcĩ occa holommii nganiita, nẽẽthĩ hinnianĩ, aaĩ ittioonniohiti umwaa cĩ hattũũg cĩ maac cunni dẽẽdẽ.

¹³ Tangu ngaati baalin icci, ma ngerrenita, hõõ hatĩ hothoothonna hĩ nganĩĩta. Nẽ má ẽlẽmĩ ngaatĩ olommiina, abũnnaa hatĩ gẽrrẽẽt. Aꞌnyĩĩk ĩnõõnnõ holomiina. Nẽẽthĩ, má hõllõngaa ẽlẽmĩ, bũtĩ hĩ Makayyioohiti, holommii hatĩ naa dẽẽdẽ! Nẽẽthĩ ꞌyioko, tangu ngaati ĩꞌthõng haal lõõcĩ.”

¹⁴ Nĩngĩtĩ oongiyyi ꞌRuuthi ĩĩcĩ ꞌthoo cĩg ꞌBõathĩ ĩꞌthõng hõbõhĩ alĩĩthĩ, nẽẽthĩ, baa ĩꞌngaathĩ nẽẽ baa nga hõbõrrõõng uruto. Ma nĩngaata, uduhaak ꞌBõathĩ ꞌRuuth ĩĩnnĩk, “Ma haaꞌnyihi eet umwa haga ngaatĩ akuuni baa ngaa umwaa hilongana ngaati baal.”

¹⁵ Ma nĩngaata, ĩĩnnĩk tarĩ ꞌBõathĩ ꞌRuuth, “Daaĩ ngĩtõõga cunni hataa nẽ ẽbbẽttaanu ngaati.” Nĩngĩtĩ adamtiaakĩ ꞌBõathĩ ĩnõõnnõ haal tabattĩ tõrkõnõn nẽ ĩcĩĩdĩhĩ ngĩtõõgawatõõ nẽ õdõngẽẽhĩ iꞌnyiaawa. Nĩngĩtĩ õbõdõõꞌthĩ ꞌBõathĩ ꞌtaaũna.

¹⁶ Ma baa õbõdõõthĩ ꞌRuuthi ũmmũdoothĩk inyinnini, ũũk ijin Naoomi ĩnõõnnõ ĩĩnnĩk, “Õkõ thĩnõ aaĩ thõõth hutuno loholeec caannĩ?” Nĩngĩtĩ ẽddẽẽbakĩ ꞌRuuthi Naoomi thooꞌthiok vẽlẽk ꞌcĩg baag adĩmaneek ꞌBõathĩ ĩnõõnnõ.

¹⁷ Nẽ tarĩ ĩĩnnĩk nẽẽ inyinnini, “Adamtuaaka ꞌBõathĩ nganĩĩt haal iccig tabattĩ tõrkõnõn nẽ ĩĩnnĩhaa, ‘Ma hobodoothi hĩ iꞌnyinnuni athĩnĩ ꞌtẽl.’ ”

¹⁸ Ma ho, ĩĩnnĩk Naoomi ꞌRuuth, “ꞌRẽẽõ loholeec caannĩ, ĩꞌthõng thĩĩk thõõth ꞌcĩ hatĩ adukiaa. Aitiõõ hatĩ ꞌBõathĩ hõllõngaa iyyioman ĩꞌthõng hũkũmanoothĩk thõõth ciee kõr nicci.”