ꞌRuuth 2 - ꞌBuuk cĩ Thõõth cĩ Nyekuci

Omottio ꞌRuuthi hĩ ꞌBõath

¹ Baa aaĩ ẽẽtĩ umwaa ꞌcĩ aballi gẽrrẽẽt nẽ ubuli Bẽtẽlẽma ꞌcĩ haĩ ꞌthaar cĩgĩnnĩg ꞌBõath. Baa ĩĩn nẽẽ eet cĩ habuccieet cĩ Elimẽlẽhĩ maac cĩ Naoomi.

² Ma kõr umwa, ĩĩnnĩk ꞌRuuthi ꞌcĩ ĩĩn tĩnaatĩ eet cĩ Mõabĩ Naoomi, “Ĩꞌnya da hũũk hutuhuura haal ꞌcĩg ũũnnĩk janniooha manẽẽnĩtõõ, hatĩ aaĩ eet umwaa ꞌcĩ õõrĩ ꞌthĩnĩt ꞌcĩ ẽlẽmaakaanĩ.” Ẽdẽcĩ Naoomi anneek, “Bĩtõ loholeec caannĩ.”

³ Ma baa õkõ anuoothi ꞌRuuthi eet ꞌcĩg ajanni ĩĩcĩ uruto ahuurothi haal ko, ĩko hinnia ẽbẽanoothĩk mana cĩ ꞌBõathĩ dẽẽdẽ, eet ꞌcĩ baa aku habuccieetaa cĩ Elimẽlẽhĩ.

⁴ Ma baa ũtũngeek ꞌBõathĩ Bẽtẽlẽm nẽ ũũk manaa cĩnnĩ, ũũk ĩꞌtha nẽẽ janniook nẽ ĩĩnnĩk, “Aꞌnyĩĩk Makayyioohit haau hĩ ngagiita!” Ẽdẽcĩ janniooha aĩ, “Aꞌnyĩĩk Makayyioohit haggattanii nganiita!”

⁵ Ma baa adtuuha ꞌBõathĩ ꞌRuuth manatõõ tõõ ho, ijin makayyioohit cĩ janniook cĩgĩnnĩg ĩĩnnĩk, “ꞌCĩ nganĩ thĩnõ loholeec caa?”

⁶ Ẽdẽcĩ makayyioohiti cĩ jannioohu aĩ, “Alawan cĩ Naoomi umwa nicciee, tĩnaatĩ eet ꞌcĩ ĩĩn Mõabeenit, ꞌcĩ baa õõkõra hĩ Naoomi looccaa cĩ Mõabĩ.

⁷ Aku ajinna anneeka, ‘Aꞌnyaa nuun hanũooth janniook, hátĩ hũlũta haal ꞌcĩg ũũnnothoothĩk loota ho nẽ aaꞌnyaa huuranooth haal ꞌcĩg adhukiaak looc lucciaahĩ buúk.’ Ahuuri nẽẽ nganĩngĩtĩ oloohotha hĩĩ noho, abĩlĩ nẽẽ hĩdĩĩc haaga, hatĩ õkõ iyyioman tuggatõõ diooni.”

⁸ Ma nĩngaata, ũũk ũmmũdoothĩk ꞌBõathĩ ꞌRuuth nẽ ĩĩnnĩk, “Thĩhaa nganĩĩta loholeec caannĩ, ma hõkõ hahuuri manaa umwaanĩ nẽ ma huunnihi nĩngĩtĩ icci ũdũt. Ala ngaati ũrũmtĩ hĩ dticcianniook cĩgannĩg ꞌcĩg ngayyig ko.

⁹ Bẽẽk janniook ꞌcĩg maacĩg, cĩĩn nĩngĩtĩ ajaniini nẽ unuoothu dticcianniook ꞌcĩg ngayyig. Iyyia huduhaaha naa janniook ẽlẽk, hiittiõõ hõllõngaa uuki nganiita. Nẽ má aammi kõrra, bĩĩt hũũd maam ꞌcĩg ogoocĩk dticcianniooha ijjioꞌnyaannĩ hata.”

¹⁰ Ma baa athĩhĩ ꞌRuuthi thooꞌthiok iccig ko, akat huruꞌnyia nẽ akatĩ hẽbẽrĩ looc. Nẽ ĩĩnnĩk ꞌBõath, “Inni occa gõõng ꞌrũhũũlana loholeec cĩ looc ꞌcĩ ꞌrĩĩng haaga gẽrrẽẽt noho ho?”

¹¹ Ẽdẽcĩ hinnia ꞌBõathĩ aĩ, “Hĩthĩha naa ꞌgii vẽlẽk baa adĩmaneehi nii iꞌnyinnuni ngaanĩngĩ baa adaaknĩ maac cunnẽẽnĩ. Nẽ tarĩ hĩthĩha ꞌgõõl ꞌcĩ ũũnnĩkĩĩ nii maaꞌnyu hĩ ngaanu hĩ looc cunni nẽ iita ũrũmteeu hĩ eet ꞌcĩg looc ꞌrĩĩng pir ko.

¹² Aꞌnyĩĩk Makayyioohit Nyekuc cĩ Ĩꞌthĩraẽlĩ ꞌcĩ aku adiimi nii huꞌthuutti nganiit ko, hũdũmanii jurrung, hĩnĩngĩtĩ thõõth ꞌcĩ adĩmani ho.”

¹³ Ma ho, ĩĩnnĩk ꞌRuuthi ĩnõõnnõ, “Makayyioohit caannĩ, hammuhi hĩcĩ haĩ occa nuun aalla acĩnnaa nii nganĩĩt ꞌthĩnĩtaa cĩ alalĩ hõdõõkõthĩ. Aaꞌnyaa nii nganĩĩt haccamanoothĩk, hĩnĩngĩtĩ othoothĩkaa ꞌthĩnĩtaa ꞌcĩ alalĩ, tananga hõllõngaa hĩĩnĩ dticciannioohit umwa cunni buúk.”

¹⁴ Ma baa duhẽẽtta, ũtũvvũ ꞌBõathĩ ꞌRuuth ĩĩnnĩk, “Ijjia hudukto. ꞌTiik ũbũnĩ cieeni, ꞌnyõllaneek viinoaa ꞌcĩ ẽmmẽdĩ ho.” Nĩngĩtĩ aku aayyi ꞌRuuthi loota arũmẽẽnĩ hĩ janniook nẽ aaꞌnyĩk ꞌBõathĩ ĩnõõnnõ haal ꞌcĩg ĩwaaddi hadak. Ma nĩngaata, adahõ ꞌRuuthi ĩꞌthõng hũũppanĩ hinyigitha ũgĩ.

¹⁵ Ma baa õbõdõõthĩ ꞌRuuthi ũũk idticanõõ tarĩ, ikia uduhaak ꞌBõathĩ dticcianniook cĩgĩnnĩg ĩĩnnĩk, “Aanytĩk ꞌRuuth huurana haal ꞌcĩg adhukiaak looc lucciaahĩ, ma habiꞌthu ĩnõõnnõ.

¹⁶ Ũbũcũkta haal ũgĩ lucciaahĩĩ cugguung nẽ udhukteeku ĩnõõnnõ loota lohoroor. Aꞌnyĩĩk ĩnõõnnõ huurana nẽ ma heggernyeeku!”

¹⁷ Nĩngĩtĩ ahuurẽnĩ ꞌRuuthi nĩngaata huutub, ma baa athĩana nẽẽ haal ꞌjiaatĩn niccia ho, abbĩꞌthĩĩ hinnia lohod hũtũrũũr, hĩĩtõ kiiloꞌnya õmmõtõ hĩ ꞌramma.

¹⁸ Ma nĩngaata, irriongan nẽẽ haal ũũhĩ ꞌtaaũnatõõ, nĩngĩtĩ õkõ acĩnĩ inyinninẽẽnĩ. Ma ho, ũũk tarĩ aaꞌnyĩk ꞌRuuthi inyinnini ꞌgẽẽn ꞌcĩ baa anyiꞌtha nẽẽ baa ũũppanĩ nẽẽnĩ.

¹⁹ Ma nĩngaata, ijin Naoomi ꞌRuuth ĩĩnnĩk, “Ahuuri hatĩ nii kõr nicci ngaana? Nẽ adticannii hatĩ nii iyyieni ngaana? Aꞌnyĩĩk Nyekuc haggatan eet ꞌcĩ eelli nganiit ko!” Nĩngĩtĩ aduhaakĩ ꞌRuuthi inyinnini eet ꞌcĩ aaꞌnyĩk ĩnõõnnõ hutuhuuro ho. Baa anneek ꞌRuuthi ĩnõõnnõ, “Iyyia hahuuri manaa cĩ eet ꞌcĩ haĩ ꞌthaar ꞌBõath.”

²⁰ Nĩngĩtĩ annẽẽkĩ Naoomi alaannĩnĩ, “Aꞌnyĩĩk Makayyioohit haggatan ĩnõõnnõ! Atamaatĩheet Makayyioohiti ngagĩĩt ꞌcĩg nga harũgĩ ho, hĩ eet baaggaac adaahito buúk.” Nẽ tarĩ ĩĩ, “Ĩĩn ꞌBõathĩ ittioonniohit cĩnaac dẽẽdẽ, ĩĩn nẽẽ lommioohit ꞌcĩ occa aꞌthũũnnĩ ijjio cĩggaac nẽ ittira lõhõlĩ cĩg halang cĩnaac.”

²¹ Ma ho, ĩĩ ꞌRuuthi, “Iyyia anneeka nganĩĩt buúk, ‘Ũrũmtĩ nõõ hĩ dticcianniook cĩgannĩg ĩꞌthõng hedecciaak janiinit.’ ”

²² Ma nĩngaata, ĩĩnnĩk Naoomi alaannĩnĩ, “Loholeec caannĩ, occa mẽẽn hĩ nganiit ngaatĩ ookorru hĩ dticcianniook cĩgĩnnĩg ꞌcĩg ngayyig, hĩnĩngĩtĩ ma õkõ manaa cĩ eet cĩrrĩĩng, horoong hinnia hatĩ õkõ ohoddia.”

²³ Nẽẽthĩ hoti ho, aala ꞌRuuthi utuhuuro hõbõktõ hĩ dticcianniook ꞌcĩg ngayyig cĩg ꞌBõathĩ manatõõ, ĩꞌthõng hedeccia janiiniti vẽlẽk. Nẽẽthĩ waathinniook nicciag, baa arũmĩ ꞌRuuthi hĩ inyinnini.