ꞌRooma 4 - ꞌBuuk cĩ Thõõth cĩ Nyekuci

Lemiinit cĩ Abũrahamĩ

¹ Hõthõõth occa ꞌyioko naag Abũrahaamõ baangeet baa baangaani haĩ ũmmũda nẽẽ neegi thõõthaa cĩ ẽlẽmmĩ Nyekuci ĩnõõnnõ ho?

² Má baa ẽlẽmĩ Nyekuci Abũrahaamõ, hĩnĩngĩtĩ ꞌgii ꞌcĩ baa adĩman nẽẽnĩ, occa thĩ mĩĩ baa aꞌnyak nẽẽ ꞌgiimwa ꞌcĩ irrianĩ. Nẽẽthĩ, occa hõllõngaa ꞌgõõl cĩ Nyekuci niccia.

³ Aduha ꞌBuuhi cĩ Nyekuci aĩ nẽẽ, “Baa ẽlẽmĩ Abũrahamĩ thõõth cĩ Nyekuci, hĩnĩngĩtĩ thõõth icci, ikia accamana Nyekuci ĩnõõnnõ ngaatĩ ĩĩnnĩ eet ꞌcĩ abũnnaa.”

⁴ Ma adticanni ẽẽtĩ, hõllõngaa aaꞌnyĩhoothĩk ꞌrabbẽẽta cĩgĩnnĩg hĩ ꞌbaaniniti, aaꞌnyĩhoothĩk hĩ dũmanĩ cĩ dtiic cĩnnĩ ho.

⁵ Nẽẽthĩ, ẽẽtĩ ꞌcĩ hõllõngaa adticanni nẽ aꞌnyak lemiinit hĩ Nyekuc ꞌcĩ ẽlẽmĩ eet ꞌcĩg ĩĩn ꞌthẽccanniook, ẽlẽmĩ hatĩ Nyekuci ĩnõõnnõ hĩĩ eet ꞌcĩ abũnnaa, hĩnĩngĩtĩ aꞌnyak nẽẽ lemiinit hĩ Nyekuc.

⁶ Aduha habuui Daavide buúk thõõth icci diooni, ngaatĩ õthõõthĩ taliinit cĩ eet ꞌcĩ acĩn Nyekuci abũnnaa, tananga nga hidtican dtiic umwa.

⁷ “ꞌGattan hĩ eet ꞌcĩg atamaatĩk Nyekuci ꞌthẽccanẽẽt cĩggĩĩng nẽ umummuunyattĩ ꞌthẽccanẽẽta cĩggĩĩng.

⁸ ꞌGattan hĩ eet ꞌcĩ iittiõõ Makayyioohiti hõllõngaa agiil ꞌthẽccanẽẽt cĩgĩnnĩg.”

⁹ Ĩĩn ꞌgattanĩ ciee cĩ eet ꞌcĩg etteeddi eleeti dioo hode ꞌcĩg eet ꞌcĩg hõllõngaa etteeddi eleeti buúk? Baa gõõng hõthõõth naag haĩ, lemiiniti cĩ Abũrahamĩ aaꞌnyĩhoothĩk ĩnõõnnõ hĩ ẽẽtĩ ꞌcĩ abũnnaa.

¹⁰ Nẽẽthĩ, edeeꞌnyia baa thõõth ꞌcĩ ẽlẽmmĩ Nyekuci Abũrahaamõ baa nĩngaan? Edeeꞌnyia baa ĩĩcĩ oou hode urutaa baa ẽttẽẽdõĩ Abũrahaamõ ẽlẽ cĩnnĩ ẽlẽk? Eei, baa edeeꞌnyia ĩĩcĩ oou.

¹¹ Baa aaꞌnyĩk Abũrahamĩ ẽlẽ cĩnnĩ hẽttẽẽdĩ, hĩnĩngĩtĩ hẽtẽrẽtha aĩ, baa ẽlẽmĩ Nyekuci ĩnõõnnõ, hĩnĩngĩtĩ lemiinit cĩnnĩ, tananga baa nga hẽttẽẽdĩ ẽlẽ cĩnnẽẽnĩ. Thõõth ꞌcĩ aaꞌnyĩk Abũrahaamõ hĩĩ maaꞌnyĩ eet vẽlẽk ꞌcĩg ẽlẽmĩ Nyekuc ko cieeni, tananga nga hetteeddi eleeti cĩggĩĩng.

¹² Nẽ tarĩ ĩĩ Abũrahaamõ buúk maaꞌnyĩ eet ꞌcĩg etteeddi eleeti nẽ hõllõngaa ĩĩn maaꞌnyĩ eet ꞌcĩg etteeddi eleeti diooni, nẽẽthĩ, ĩĩn maaꞌnyĩ eet ꞌcĩg anũ ꞌgõõl cĩ lemiinit baa aꞌnyak baangẽẽtĩ cĩnaac Abũrahamĩ baa nga hẽttẽẽdĩ ẽlẽ.

Ĩĩn thõõth cĩ Nyekuci, cĩ eet ꞌcĩg aꞌnyak lemiinit

¹³ Baa hõllõngaa ammũda Abũrahamĩ hĩ lõhõlĩ cĩg lõhõlĩ cĩgĩnnĩg, thõõth ꞌcĩ aduha Nyekuci, aĩ ĩĩn hatĩ nẽẽg ꞌrigiꞌthiook cĩg lootu, hĩnĩngĩtĩ nyattal. Nẽẽthĩ, baa ammũda, hĩnĩngĩtĩ bũnnai ꞌcĩ aku, hĩnĩngĩtĩ lemiinit.

¹⁴ Má baa haaꞌnyĩk Nyekuci Abũrahaamõ hĩ lõhõlĩ cĩgĩnnĩg thõõth ꞌcĩ arigithi nẽẽg looc icci, hĩnĩngĩtĩ aꞌthũũnnĩ nẽẽg nyattal, occa hinnia baa ĩĩn lemiiniti cĩnĩĩng ko ꞌgiimwa haaga nẽ occa ĩĩn thõõth ꞌcĩ aduha Nyekuci ho buúk ꞌgiimwa haaga.

¹⁵ Hĩnĩngĩtĩ alĩĩlĩ Nyekuci hatĩ ẽꞌthẽcanni nyattalĩ cĩnnẽẽnĩ. Nẽ ngaatĩ aitiõõ nyattalĩ tõõ, aitiõõ ꞌgii ꞌcĩ occa ẽꞌthẽcan eeta tõõ.

¹⁶ Nẽẽthĩ hoti ho, aku thõõth ꞌcĩ aduha Nyekuci, hĩnĩngĩtĩ lemiinit nẽ thõõth ꞌcĩ aduha nẽẽ ho, agayyi, hĩnĩngĩtĩ tarbalꞌthẽẽt cĩnnĩ cobbi. Hõllõngaa ĩĩn thõõth ꞌcĩ aduha Nyekuci ho, cĩ lõhõlĩ cĩg Abũrahamĩ dioo ꞌcĩg aꞌnyak nyattal. Ĩĩn cĩ lõhõlĩ cĩg lõhõlĩ cĩg Abũrahamĩ vẽlẽk, hĩnĩngĩtĩ aꞌnyak nẽẽg lemiinit hĩ baa nẽẽnĩ. Ĩĩn Abũrahamĩ baangeet cĩnaac vẽlẽk.

¹⁷ Hĩcĩ eheeddi ꞌBuuhaa cĩ Nyekuci aĩ nẽẽ, “Haaꞌnyii naa nganiit ĩĩnu maaꞌnyĩ loonyin ꞌcĩg mẽẽlĩg.” Ĩĩn nẽẽ baangeet cĩnaac muumaa cĩ Nyekuci, baa ẽlẽmĩ nẽẽ aĩ, aaꞌnyĩk rũgẽt daakiak nẽ ẽtẽhẽnya hẽlẽggĩ ꞌcĩg ĩĩn ngeju.

¹⁸ Tananga baa aitiõõ hõllõngaa aꞌnyak Abũrahaamõ muhẽẽnĩt ꞌcĩ abũnnaa, baa aalla ẽlẽmĩ nẽẽ aĩ, aku hatĩ ĩĩn nẽẽ maaꞌnyĩ loonyin ꞌcĩg mẽẽlĩg. Hĩnĩngĩtĩ baa uduhaak Nyekuci ĩnõõnnõ ĩĩnnĩk, “Lõhõlĩ hatĩ cugunnig ko nicciag.”

¹⁹ Baa aalla õkõmĩ lemiiniti cĩ Abũrahamĩ, tananga baa ĩĩtõ irkiꞌnyia cĩgĩnnĩg ꞌmiia hõdẽĩ (100). Baa aga nẽẽ ngaatĩ õbõhõõĩ ĩnõõnnõ daahĩthĩ nẽ iittiõõ ngaa cĩnnĩ Thaara hõllõngaa occa aꞌnyak lõhõlĩ.

²⁰ Nẽẽthĩ, baa aitiõõ Abũrahamĩ hõllõngaa ĩccaad hode ajin thõõth baa aduha Nyekuci. Baa aaꞌnyĩk lemiiniti cĩnnĩ ĩnõõnnõ hõkõm ꞌthĩnĩt nẽ baa ikia aaꞌnyĩk nẽẽ bulẽẽnĩt vẽlẽk Nyekuc.

²¹ Baa aga Abũrahamĩ ngaatĩ aꞌnyahĩ Nyekuci makaaꞌthĩt dĩdĩ, ꞌcĩ occa adĩmanĩ thõõth baa aduha nẽẽnĩ.

²² Ĩnõõ baa adukiaanĩ nẽẽ aĩ, “Ikia accamana Nyekuci ĩnõõnnõ ngaatĩ ĩĩnnĩ eet ꞌcĩ abũnnaa.”

²³ Thooꞌthioha ꞌcĩg aĩ, “Ĩĩn nẽẽ eet ꞌcĩ abũnnaa ho,” baa hõllõngaa eheeddi, hĩnĩngĩtĩ ĩnõõnnõ diooni,

²⁴ baa eheeddi thõõth ciee hĩĩ cĩnaac, hĩnĩngĩtĩ helemmi hatĩ naag buúk, hĩnĩngĩtĩ lemiinit cĩnaac hĩ Nyekuc, baa arũgtha Makayyioohit cĩnaac Yeesu daahĩtha.

²⁵ Baa aaꞌnyĩk Nyekuci Yeesu hadaak, hĩnĩngĩtĩ ꞌthẽccanẽẽt cĩggaac nẽ ũrũgũtha ĩnõõnnõ daahĩtha, hátĩ helemeet Nyekuci ngagĩĩta.