ꞌRooma 1 - ꞌBuuk cĩ Thõõth cĩ Nyekuci

Waraga hĩ eet cĩg ꞌRooma

¹ Nganĩĩt Paaulo ꞌcĩ hĩĩnĩ dticciannioohit cĩ Yeesu Krĩstõ. Baa ẽbẽraanna Nyekuci nganĩĩt hĩĩ ꞌthooyyiahit nẽ aaꞌnya hirrioon nyeemuut ꞌcĩ abũnnaa cĩ Nyekuci.

² Nyeemuut baa aduha nẽẽ baarkit thooꞌthiohĩĩ baag aduha põrõvẽtaaꞌnya ꞌBuuhaa cĩ Nyekuci aĩ,

³ ĩĩn nyeemuut ciee abũnnaa ho, cĩ Ngeerĩnĩ baa aku arrittiaa hĩĩ eet hĩ naaga, hattũũgaa cĩ habu Daavide.

⁴ Nẽẽthĩ, baa aduha Lorii ꞌcĩ Ẽllẽẽmĩth ꞌtirriaanaa cĩnnĩ, ngaatĩ ĩĩnnĩ Yeesu Krĩstõ Makayyioohit cĩnaac Ngeertĩ Nyekuci, hĩnĩngĩtĩ baa arũgtha Nyekuci ĩnõõnnõ daahĩtha.

⁵ Hĩnĩngĩtĩ ĩnõõnnõ hĩ ꞌthaar cĩgĩnnĩg, hiita hummuddia naag bũnnai hĩ ngaatĩ hĩĩgĩnnĩ ꞌthooyyiak cĩgĩnnĩg, hátĩ hutuvvuyyia eet hõrggẽẽnaa cĩ eet ꞌcĩg hõllõngaa ĩĩn ꞌJudeei, hiita hĩthĩhĩt thõõth ꞌcĩ aku lemiitta.

⁶ Aattiyyu niig buúk hõrggẽẽnaa cĩ eet ꞌcĩg avva Yeesu Krĩstõ hĩĩtõ cĩgĩnnĩg ko.

⁷ Hẽhẽẽdakuung naa ngagiit vẽlẽk waraga icci ꞌRoomattĩ. Ammĩnannuung Nyekuci ngagiit nẽ ẽbẽraauung ĩĩtõ eet cĩgĩnnĩg ꞌcĩg ẽllẽẽmĩthĩ. Aꞌnyĩĩk bũnnai hĩ ganõn ꞌcĩ aku hĩ Nyekuc Baangeet cĩnaac hĩ Makayyioohit cĩnaac Yeesu Krĩstõ, haau hĩ ngagiita.

Aavvik Paaulo ꞌgõõl ꞌcĩ õkõõĩ ꞌRoomattĩ

⁸ Ĩĩcĩ oou, hala naa Nyekuc ꞌthaarĩĩ cĩg Yeesu Krĩstõ, hĩnĩngĩtĩ ngagiit vẽlẽk. Hadĩmani naa hoti, hĩnĩngĩtĩ athithan eeta loonyini vẽlẽk lemiinit cunuung.

⁹ Ĩĩn Nyekuci ꞌcĩ hadticanoothihi naa ꞌthĩnĩtaa caannĩ vẽlẽk, hirrioonĩk eet nyeemuut ꞌcĩ abũnnaa cĩ Ngeerĩnĩ ho, hebereec caannĩ ꞌcĩ aga ꞌgõõl ꞌcĩ hammuhaannuung naa ngagiit hõdõõkõthĩ

¹⁰ laiittaa caannĩ ꞌthaaꞌnya vẽlẽk nẽ halayyi ꞌyioko haini tabiittaa cĩ Nyekuci, ubbuuhĩhaa aattĩ nẽẽ nganĩĩt ꞌgõõl ꞌcĩ hakuu hacinnuung ngagiita.

¹¹ Habũraneehi naa ngaatĩ hakuu hacinnuung ngagiit, hátĩ hiita hotholit ꞌgattan hõdẽẽthõng baa aaꞌnya nganĩĩt Lorii cĩ Nyekuci, hátĩ ummuddia niig ꞌtirrian lemiittaa cunuung.

¹² Thõõth ꞌcĩ haduha naa ho, haini aꞌnyĩĩk lemiinit cĩnaac hũkũtaneet ngagĩĩta.

¹³ ꞌGotoonoga hĩ ngoonoga, hõllõngaa hadiimmuung naa ngagiit herehuung ngaatĩ hammuhi naa tabattĩ mẽẽlĩg hikia hicinuung ngagiita, nẽẽthĩ hinnia, hũlũhoothĩha hĩĩ noho, hátĩ hũlũllũũmana eet hõrggẽẽnaa cunuung helemit Nyekuc, hĩ baa hadĩmani eetinii ꞌcĩg hõllõngaa ĩĩn ꞌJudeei.

¹⁴ Haꞌnyahi naa dtiic hĩ eet ꞌcĩg ꞌGirihi hĩ ꞌcĩg hõllõngaa ĩĩn ꞌGirik, hĩ ꞌcĩg ẽggẽẽnyĩth, hĩ ꞌcĩg hõllõngaa ẽggẽẽnyĩth buúk.

¹⁵ Ĩnõõ ꞌcĩ habũranẽẽkĩ naa ngaatĩ hirriõõnĩ nyeemuut ꞌcĩ abũnnaa hĩ ngagiit buúk ꞌcĩg aattiyyu ꞌRoomattĩ ho.

ꞌTirrian cĩ nyeemuut ꞌcĩ abũnnaa

¹⁶ Hõllõngaa haꞌngaaoni naa ngaatĩ hirriõõnĩ nyeemuut ꞌcĩ abũnnaa, hĩnĩngĩtĩ ĩĩn nẽẽ ꞌtirrian cĩ Nyekuci ꞌcĩ eellianĩ eeta vẽlẽk ꞌcĩg ĩĩn lemmiook, ꞌJudeei nõõ ĩcĩ oou, nẽẽthĩ hatĩ ĩĩ eet ꞌcĩg hõllõngaa ĩĩn ꞌJudeei uruta.

¹⁷ Aduha nyeemuut ꞌcĩ abũnnaa ho, ꞌgõõl ꞌcĩ elemmeet Nyekuci hĩĩtõ tẽllĩg muumaa cĩnnĩ. Iꞌthianaanĩ thõõth ciee nẽ ũttũbanoothĩk lemiitta. Attũbanoothĩk thõõth ciee ꞌthianaatta ĩꞌthõng decciaanĩt lemiitta. Hĩcĩ aduha ꞌBuuhi cĩ Nyekuci aĩ, “Arũgĩ hatĩ ẽẽtĩ ꞌcĩ ẽlẽmĩ Nyekuci, hĩnĩngĩtĩ lemiinit.”

Alĩĩllĩk Nyekuci ꞌthẽccanniook

¹⁸ Ẽtẽrꞌtha Nyekuci liilii cĩnnĩ hẽẽtahujjieen, ꞌcĩ aꞌnyaheek nẽẽ eet vẽlẽk ꞌcĩg ĩĩn ꞌthẽccanniook, ꞌcĩg ammũt thõõth ꞌcĩ ĩĩn dĩdĩ ꞌthẽccanẽẽtĩĩ cĩggĩĩng,

¹⁹ aga nẽẽg thõõth cĩ Nyekuci jurrung, hĩnĩngĩtĩ baa eteretheek Nyekuci ĩhõõggõ.

²⁰ Nganĩngĩtĩ teheꞌnyiaanĩt cĩ lootu, iita ẽdẽẽnyta thooꞌthioha cĩg Nyekuci jurrung aag gõõng hõllõngaa edeeꞌnyia, ꞌtirrianaa cĩnnĩ ĩcĩ aalla ũdũt, hĩ makaaꞌthĩt cĩnnĩ nẽ iita agayyi hẽlẽggẽẽnnĩĩ baag ẽhẽnytaa, hátĩ hiittiõõ eeta hõllõngaa ẽppẽhanĩ.

²¹ Tananga baa aga ꞌthẽccanniooha Nyekuc, baa hõllõngaa abuluth nẽẽg ĩnõõnnõ haau hĩ Nyekuci dĩdĩ, hode anneek ĩnõõnnõ ĩlaallẽ, nẽẽthĩ, ikia ẽꞌthẽcanĩ muhẽẽnĩtĩ cĩnĩĩng nẽ abathit ꞌthinneeti cĩggĩĩng.

²² Tananga baa aĩ nẽẽg hẽggẽẽꞌnya, iita ĩĩtõ nẽẽg ꞌgiiꞌthiak,

²³ nẽ ũtũngteek ngaatĩ alaĩ Nyekuc ꞌcĩ abuli ꞌcĩ aalla ooo nẽ alaacõ ꞌthoourẽẽt ꞌcĩg ẽhẽnytaa haauto hĩ eeta, hĩ hĩbaallĩ hĩ idiꞌngwa cĩg moru hĩ idiꞌngwa ꞌcĩg õgõlĩt loota ꞌcĩg hatĩ adaahĩ.

²⁴ Nẽẽthĩ hoti ho, ikia alahaneek Nyekuci ĩhõõggõ hĩdĩmanit thooꞌthiok ꞌcĩg ĩĩn ꞌriiring ꞌcĩg aaꞌnyĩkĩ nẽẽg eleeti cĩggĩĩng ngaaoni.

²⁵ Iita ũtũngteek nẽẽg thõõth cĩ Nyekuci ꞌcĩ ĩĩn dĩdĩ nẽ idticattõõĩ thõõth ꞌcĩ ĩĩn õlõng, ala nẽẽg nẽ idticattoothĩk hẽlẽggĩ ꞌcĩg ẽhẽnyta Nyekuci nẽ ũtũbũrĩt ngaatĩ alaĩ Teheꞌnyioohit ꞌcĩ adĩkꞌthĩ ooo. Aamẽn.

²⁶ Hĩnĩngĩtĩ thooꞌthiok iccig, ikia alahaneek Nyekuci ĩhõõggõ hũbũratteek thooꞌthiok ꞌcĩg ĩĩn ꞌriiring, tananga ngaaĩ cĩggĩĩng buúk, iita ũtũngteek maaccwa cĩggĩĩng nẽ itikto hĩ ꞌgõõnõgĩ ꞌcĩg ngayyig.

²⁷ Nẽ ꞌgõõla hõdẽẽthõng, iita ũtũbũrĩt eeta ꞌcĩg maacĩg buúk ngaaĩ cĩggĩĩng nẽ ittihit ꞌgõõnõgĩ ꞌcĩg maacĩg. Iita aarito nẽẽg ꞌgõõnõgĩ hĩĩtõ ngaaĩ cĩggĩĩng, ĩnõõ ꞌcĩ uuki Nyekuci ĩhõõggõ, hĩnĩngĩtĩ ꞌthẽccanẽẽt cĩggĩĩng ko.

²⁸ Nẽẽthĩ hoti ho, hĩcĩ ũtũbũrĩt eeta cieeg ngaatĩ aꞌthũũnnĩ thõõth cĩ Nyekuci ho, ikia alahanẽẽhĩ nẽẽ muhẽẽnĩt ꞌcĩ abathĩ haggam ĩhõõggõ, hátĩ hĩdĩmanit nẽẽg thooꞌthiok ꞌcĩg hõllõngaa occa adĩmanni.

²⁹ Iita ẽꞌthẽcattõõ nẽẽg ꞌgoolliohĩĩ cĩg mẽẽlĩg nẽ ĩĩtõ eet ꞌcĩg abathĩ, ĩĩn lobolobbwaak nẽ idticatteek ꞌgõõnõgĩ thooꞌthiok ꞌcĩg abathĩ. Ehethiini hẽlẽggĩ cĩg eetuk, aruk eeta, ẽppẽhanõõ hĩ ꞌgõõnõgĩ, ĩggõõl eet nẽ ummuhit ngaatĩ adĩmanĩ thooꞌthiok ꞌcĩg abathĩ. Aangal ngaatĩ õꞌngõmtĩ ꞌgõõnõgĩ,

³⁰ õthõõth ꞌgõõnõgĩ ꞌbuth, aaburreek Nyekuc, athĩngõõnyanĩ nẽ irrianit gẽrrẽẽt nẽ accamatta ngaatĩ adĩmanĩ thooꞌthiok ꞌcĩg abathĩ. Hõllõngaa athĩhĩ maajihi hĩ ngaaggi.

³¹ Ĩĩn nẽẽg eet ꞌcĩg hiꞌthihi muhẽẽnĩt, hiꞌthihi eet ꞌcĩ ẽlẽmĩ ĩhõõggõ, hõllõngaa ammaannĩk eet umwa nẽ ĩĩtõ tongororriaak.

³² Tananga aga nẽẽg thõõth ꞌcĩ abũnnaa ꞌcĩ aduha Nyekuci aĩ, eeta ꞌcĩg adĩman thooꞌthiok ꞌcĩg aattĩg noho, occa adaahĩ thõng, aalla hinnia adĩman thooꞌthiok ꞌcĩg aattĩg noho nẽ accamatta ꞌgõõnõgĩ ꞌcĩg adĩman thooꞌthiok ꞌcĩg abathĩ.