Maatteeo 3 - ꞌBuuk cĩ Thõõth cĩ Nyekuci

Irrioon Yõaannẽ Batitta

¹ Ma baa urutaa cĩ irkiꞌnyia ũgĩ, ikia irrioon Yõaannẽ Batitta horrwaa ꞌcĩ õdõhõhĩĩ kak looccaa cĩ ꞌJudeea.

² Baa irrioon nẽẽ nyeemuut ꞌcĩ aĩ, “Ũtũngteek ꞌthẽccanẽẽt cugguung nẽ oboddiaau hĩ Nyekuc, hĩnĩngĩtĩ aau habuccieet cĩnnĩ cĩ hẽẽtkujjieen ojoonu.”

³ Baa Yõaannẽ Batitta baa õthõõth põrõvẽtaacĩ Iꞌthaia aĩ, “Ẽggẽrẽny mõlõõhĩ cĩ eet umwa horrwaa ꞌcĩ õdõhõhĩĩ kak aĩ, ‘Ũkũmatteek ꞌgõõl cĩ Makayyiookto, aanytĩk ꞌgõõl cĩnnĩ hũũlan.’ ”

⁴ Baa ahimit Yõaannẽ ceremwa ꞌcĩg ẽhẽnytaa ĩmanĩĩ cĩg nyaakaalak nẽ ẽcẽb hadẽẽngõ. Baa ꞌgẽẽn cĩnnĩ ꞌgirooc hĩ loteec.

⁵ Nĩngĩtĩ allũnganniaanĩ eeta cĩg ꞌJeruꞌthalẽmĩ hĩ cĩg looc cĩ ꞌJudeea vẽlẽk, hĩ cĩg unak cĩ hidioo cĩ ꞌJõrdanĩ vẽlẽk hiita hĩ Yõaannẽ,

⁶ nẽ uduktaak ĩnõõnnõ ꞌthẽccanẽẽt cĩggĩĩng, nĩngĩtĩ aggamẽẽkĩ nẽẽ ĩhõõggõ baattithimo hidiowwaa cĩ ꞌJõrdanĩ.

⁷ Ma baa acĩn Yõaannẽ Variꞌtheei hĩ Thadutheei ꞌcĩg mẽẽlĩg ngaatĩ au aggamĩ baattithimo ho, ikia eggerenyeek ĩhõõggõ ĩĩnnĩk, “Niig eeta ꞌcĩg abaꞌthu aaut hĩ hũkaaꞌnya ho, nganĩ ꞌcĩ aduhaakuung ngagiit aĩ, iita baattithimooa, hátĩ iliittia ukẽẽnĩt ꞌcĩ hatĩ aku ho?

⁸ Idticanit thooꞌthiok ꞌcĩg ẽtẽrꞌtha aĩ, ũtũngteehu niig ꞌthẽccanẽẽt cugguung dĩdĩ.

⁹ Ma hammuku hainnu, ‘Haꞌnyaka nẽẽ naag baangeet cĩnaang Abũrahaamõ.’ Haduhaakuunga! Aga Nyekuci ngaatĩ ũũkcĩ biyyiẽẽn iccig hĩĩtõ lõhõlĩ cĩg Abũrahamĩ.

¹⁰ Nẽẽthĩ ꞌyioko, ataadoothĩk mẽlẽẽhĩ correettaa cĩ heenu ẽlẽk. Eꞌngeddoothĩk hatĩ hẽẽt ꞌcĩ hõllõngaa õddõngta ꞌgẽẽn ꞌcĩ abũnnaa tuu nẽ udhuhoothĩk ꞌgwoyyiatõõ.

¹¹ “Haggameekuung naa baattithimo cĩ tũngẽẽnĩt cĩ ꞌthẽccaneetu maamĩ haaga, nẽẽthĩ, aku hatĩ eet umwaa ꞌcĩ ĩllõõannaa nganĩĩta, eet ꞌcĩ aitiõõ naa hõllõngaa hũũppani ngaatĩ hĩĩnnĩ appahaca cĩnnĩ nẽ hitilola caawa cĩgĩnnĩg. Aggameekuung hatĩ nẽẽ ngagiit baattithimo Loriiaa ꞌcĩ Ẽllẽẽmĩthĩ hĩ ꞌgwoyyia.

¹² Aꞌnyak nẽẽ hẽddẽm cĩ anyiitto attiaa cĩnnĩ. Aany hatĩ nẽẽ haal hilongana nẽ aarĩk ĩragawatõõ nẽ udduutik ngarrimo ꞌgwoyyiaa ꞌcĩ hõllõngaa adĩĩtĩ.”

Aggam Yeesu Baattithimo

¹³ Ma baa ho, ĩtĩngaayyia Yeesu looccaa cĩ ꞌGalileea ĩꞌthõng hõdõlan hidioo cĩ ꞌJõrdanĩ, hikia haggameek Yõaannẽ ĩnõõnnõ baattithimo.

¹⁴ Aku nõõ hinnia abũrĩ Yõaannẽ ngaatĩ aggamẽẽkĩ ĩnõõnnõ baattithimo nẽ ĩĩnnĩk, “Nganiit ꞌcĩ occa aggameekaa nganĩĩt baattithimo, akuu hinnia nii hĩ nganĩĩta?”

¹⁵ Ẽdẽcĩ hinnia Yeesu ĩnõõnnõ anneek, “Aꞌnyĩĩk nõõ haau hĩ ꞌyioko ho, hátĩ hĩdĩmanit thooꞌthiok vẽlẽk ꞌcĩg adiimmeet Nyekuci ngagĩĩt hidticanit.” Nĩngĩtĩ ẽlẽmmĩ Yõaannẽ ngaatĩ aggamẽẽkĩ ĩnõõnnõ baattithimo.

¹⁶ Ngaanĩngĩtĩ aggamĩ Yeesu baattithimo ho, ikia ĩꞌngõtha nẽẽ maamĩ battaala. Ma nĩngaata noho, ẽdẽẽnyõthĩ hẽẽtkujjieen ngaatĩ abbuuhẽnĩ nẽ udtuuha Lori cĩ Nyekuci ngaatĩ alluucciakĩ ĩnõõnnõ, ꞌcĩ aaĩ hĩ bõllõõĩ hikia hiccioloonganĩ ĩnõõnnõ.

¹⁷ Ma ho, õthõõtha mõlõõhĩ umwaa hẽẽtahujjieen ĩĩ, “Loholeec caannĩ ciee ꞌcĩ hamĩna, haccamanaa naa ĩnõõnnõ gẽrrẽẽt.”