Maatteeo 28 - ꞌBuuk cĩ Thõõth cĩ Nyekuci

Ũrũga Yeesu

¹ Ma baa edeccia Kõrra cĩ ꞌYiommaanõ, lomidikaawa ngerrenita, iita õõt Maria Madalẽẽna hĩ Maria baa umwa, hõõt hĩcĩnĩt ꞌlook cĩ Yeesu.

² Baa aaĩ hirihidtihi umwaa ꞌcĩ attiran gẽrrẽẽt, hĩnĩngĩtĩ baa alluuccia aajĩlõ cĩ Makayyiookto hẽẽtahujjieen nẽ ũũk ĩĩcĩ ꞌloohu. Nĩngĩtĩ aku abĩllĩĩngĩ bẽẽ ꞌcĩ aꞌnyũũgẽnĩ hattũũg cĩ ꞌloohu ho nẽ ũũk iccioloonganĩ thõng.

³ Baa aaĩ nẽẽ hĩ bõrõhẽẽcĩ ꞌcĩ ammadĩ thõng nẽ ĩĩtõ õõrĩg ceremwaana cĩgĩnnĩg haauto hĩ loduruui.

⁴ Baa iꞌngolli bekiooha ĩnõõnnõ gẽrrẽẽt nẽ abarritit haauto hĩ eeta ꞌcĩg adaahito ẽlẽk.

⁵ Nẽ uduhaak aajĩlõ nicciee ngaaĩ niccig ĩĩnnĩk, “Ma hiteelinnu, haga naa adiimmu niig Yeesu baa odooddothoothĩk hurucceea.

⁶ Aitiõõ nẽẽ ngaati tõõ! Ũrũga nẽẽ daahĩtha hĩ baa aduha nẽẽnĩ. Iita da ĩcĩnĩt nĩngĩ baa aarĩhõõthĩkĩ ẽlẽ cĩnnẽẽnĩ.

⁷ Nẽ ꞌyioko, õõt hĩdĩĩkoothong õõt uduktaak nuyyiook cĩgĩnnĩg ĩĩttĩk, ‘Ũrũga Yeesu daahĩtha nẽ utuwaneekuung ngagiit ũũk ĩĩcĩ ꞌGalileea. Õõ hatĩ acinnu niig ĩnõõnnõ ĩĩca.’ Thõõth ꞌcĩ hakuu haduhaakuung naa ngagiit ko nicciaani.”

⁸ Nĩngĩtĩ aꞌthũkcĩ ngaaĩ niccieeg ũũnnĩkĩ ꞌlook hõõt huduktaak nuyyiook cĩgĩnnĩg, tananga itieelli, baa accamanoothĩk pee.

⁹ Ma hĩdĩĩkoothong, ikia uppwaannak Yeesu ĩhõõggõ nẽ ĩĩnnĩk, “Hĩꞌthaayyuunga!” Nĩngĩtĩ au ĩĩthahaanĩ nẽẽg hiita hõbõktõ hĩ ĩnõõnnõ nẽ arabũtĩtõ ꞌthoo cĩgĩnnĩg, nĩngĩtĩ alaĩ ĩnõõnnõ.

¹⁰ Ma nĩngaata, ikia uduhaak Yeesu ĩhõõggõ ĩĩnnĩk, “Ma hiteelinnu! Õõt uduktaak ꞌgotoonoga anneek, hõõt hommottio ĩĩcĩ ꞌGalileea, õõ hatĩ acĩnna nẽẽg nganĩĩt ĩĩca.”

Nyeemuut cĩ bekioohu

¹¹ Ma baa nga õvvõ ngaaĩ cieeg ꞌgõõla, iita õõt athegereeꞌnya ũgẽẽgĩ ꞌcĩg baag ẽbẽk ꞌlook cĩ Yeesu ĩĩcĩ ꞌtaaũnõõ nẽ õõt uduktaak makayyiook cĩg paadĩrꞌnyaannu thooꞌthiok vẽlẽk ꞌcĩg baag acĩn nẽẽgĩ.

¹² Ma baa iita ommottio makayyiooha cĩg paadĩrꞌnyaannu hĩ makayyiook cĩg eetuk, iita ummuhit ꞌgõõl ꞌcĩ appirridanĩ nẽẽg athegereeꞌnya ꞌrabbẽẽtĩĩ ꞌcĩg mẽẽlĩg gẽrrẽẽt.

¹³ Nẽ itilõõcõ ĩhõõggõ ĩĩttĩk, “Uduktaak eet ĩĩttĩk, ‘Iita igorithit nuyyiooha cĩg Yeesu ẽlẽ cĩ Yeesu baa baal, baa nga hooginna naag thõng.’

¹⁴ Nẽ má ũũk ĩthĩk ꞌgaalacĩ cobbi thõõth icci, hothoothonna hatĩ hĩ ngagĩĩta nẽ hatĩ iittiõõ thõõth umwaa ꞌcĩ abathĩ hĩ ngagiit tõõ.”

¹⁵ Nĩngĩtĩ aggamaanĩ athegereeꞌnya ꞌrabbẽẽt niccig nẽ ĩdĩmanit hĩ baa adukiaak ĩhõõggõ. Nẽ nga aalla athithan eeta cĩg ꞌJudeei nyeemuut ꞌcĩ aĩ, “Iita igorithit nuyyiooha cĩg Yeesu ẽlẽ cĩ Yeesu,” hĩĩ kõr hĩ niccieeni.

Tilooinit cobbi

¹⁶ Nĩngĩtĩ ĩꞌngaannĩ nuyyiooha cĩg Yeesu baag ĩĩn õmmõtõ hĩ hõdẽĩ õõĩ ꞌGalileea, ĩĩcĩ muur baa aduhaak Yeesu ĩhõõggõ anneek hõõt homottiõõĩ.

¹⁷ Ma baa ĩcĩnĩt nẽẽg Yeesu, iita alaacõ nẽẽg ĩnõõnnõ, nẽẽthĩ hinnia, baa nga aalla ĩccaad ũgẽẽgĩ ĩnõõnnõ noho.

¹⁸ Ma nĩngaata, ikia uppwaannak Yeesu ĩhõõggõ nẽ ĩĩnnĩk, “Baa aaꞌnyĩhoothĩhaa nganĩĩt makaaꞌthĩt cĩ hẽẽtkujjieen hĩ cĩ lootu vẽlẽk.

¹⁹ Nẽ ꞌyioko, õõt aanytĩk eet loonyini vẽlẽk hĩĩtõ nuyyiook cĩgannĩg, aggamteek ĩhõõggõ baattithimo ꞌthaarĩĩ cĩg Maacõnĩ hĩ cĩg Ngeerĩnĩ hĩ cĩg Lori ꞌcĩ Ẽllẽẽmĩthĩ,

²⁰ õõt illimanit ĩhõõggõ jurrung hĩthĩhĩt thõõth vẽlẽk baa hallimaneekuung naa ngagiita. Nẽ dĩdĩ, harũmĩ hatĩ gõõng naag hĩ ngagiit hõdõõkõthĩ ĩꞌthõng kõr cĩ decciaanĩt cĩ lootu.”