Maatteeo 27 - ꞌBuuk cĩ Thõõth cĩ Nyekuci

Ootti eeta Yeesu hĩ Pĩlaatõ

¹ Ma baa ngaalloohoth ngerrenita gẽrrẽẽt, uluttia makayyiooha cĩg paadĩrꞌnyaannu hĩ makayyiook cĩg eetuk vẽlẽk nẽ iita utuhanit thõõth ꞌcĩ adiim aruhi nẽẽg Yeesu hadaak.

² Iita ecebit nẽẽg ĩnõõnnõ nẽ ootti hõõt haanytĩk ꞌgaalac cobbi ꞌcĩ haĩ Pĩlaatõ, ꞌcĩ aggam looc niccia.

Itithing ꞌJuuda ẽlẽ

³ Ma baa acĩn ꞌJuuda baa õhõppõõcan ĩnõõnnõ ngaatĩ ẽttẽẽdõthõõthĩkĩ Yeesu daahĩthĩ ho, ikia õmmõthĩ nẽẽ gẽrrẽẽt, hĩnĩngĩtĩ ꞌgii baa adticaneek nẽẽ Yeesu. Nĩngĩtĩ õbõdẽẽkĩ ꞌrabbẽẽt ꞌcĩg hũtũrĩg ĩĩn maccĩrẽẽn hẽẽn iyyio, hĩ makayyiook cĩg paadĩrꞌnyaannu hĩ makayyiook cĩg eetuk.

⁴ Nẽ ĩĩ, “Hẽꞌthẽcana, hõhõppõõcana eet ꞌcĩ ammĩrĩ, nga hẽꞌthẽcan ꞌgiimwa ũdũt.” Ẽdẽcĩ nẽẽg aĩ, “Ne niccia hĩ ngagĩĩt? Ĩĩn niccia thõõth cunni ẽmmẽn.”

⁵ Nĩngĩtĩ adhuhẽẽkĩ ꞌJuuda ꞌrabbẽẽt niccig ꞌCieethaa cĩ Nyekuci nẽ ũũk itithing ẽlẽ cĩnnĩ.

⁶ Iita uuratta makayyiooha cĩg paadĩrꞌnyaannu ꞌrabbẽẽt niccig nẽ ĩĩtõ, “Baa adũmaniini ꞌrabbẽẽt ꞌcĩg kũtũrĩg iccig ẽẽtĩ ꞌcĩ adiim aruhi thõng. Aꞌngirannii nyattaala, ngaatĩ hitangꞌthi ꞌrabbẽẽt iccig ꞌCieethaa cĩ Nyekuci.”

⁷ Nĩngĩtĩ alũtẽẽnĩ nẽẽg nẽ utuhanit thõõth ĩĩtõ, “Hutuuyyiaĩ ꞌrabbẽẽt iccig mana cĩ eet gõõng ẽhẽnyĩt ijjioꞌnya nẽ haarito hĩĩ nĩngĩtĩ adaiini eeta cĩg loonyin ꞌcĩg ꞌrĩĩng.”

⁸ Ĩnõõ ꞌcĩ annẽẽkĩ eeta nĩngĩtĩho, “Nĩngĩtĩ biyyieetu,” hĩĩ kõr hĩ nicciee ho.

⁹ Nĩngĩtĩ aku edeeꞌnyianĩ thõõth baa aduha põrõvẽtaacĩ ꞌJeremia ĩĩnnĩ dĩdĩ baa aĩ, “Ootti nẽẽg ꞌrabbẽẽt ꞌcĩg kũtũrĩg ĩĩn maccĩrẽẽn hẽẽn iyyio, baag ẽlẽmĩ eeta cĩg Ĩꞌthĩraẽlĩ ngaatĩ ũũtanĩ Yeesu,

¹⁰ nẽ utuyyia nĩngĩtĩ eet ꞌcĩ ẽhẽnyĩt ijjioꞌnya ꞌrabbẽẽtĩĩ nĩĩcĩg, hĩ baa aduhaaka nganĩĩt Makayyioohiti.”

Ijin Pĩlaatõ Yeesu

¹¹ Ma baa aꞌnyakiaa Yeesu hikia hĩbĩl muumaa cĩ Pĩlaatõ ho, ikia ijin Pĩlaatõ ĩnõõnnõ ĩĩnnĩk, “Ĩĩnĩ nii habu cĩ ꞌJudeei?” Ẽdẽcĩ Yeesu aĩ, “Aaĩ hĩcĩ aduha nii ho.”

¹² Ma baa õhõppõõcan makayyiooha cĩg paadĩrꞌnyaannu hĩ makayyiook cĩg eetuk ĩnõõnnõ ho, baa hõllõngaa ẽdẽcĩ nẽẽ ĩhõõggõ ũdũt.

¹³ Nĩngĩtĩ ajini Pĩlaatõ ĩnõõnnõ annẽẽkĩ, “Hõllõngaa athihi nii thõõth ꞌcĩ aduha nẽẽg aĩ, adĩmani nii ho?”

¹⁴ Baa ĩjjaaki Yeesu hõllõngaa ẽdẽcĩ thõõth umwa buúk, nĩngĩtĩ abulanĩ thõõth ciee ꞌgaalac cobbi.

Etteedothoothĩk Yeesu daahĩthĩ

¹⁵ Baa gõõng ĩĩn nyattal cĩ ꞌgaalac cobbi ngaatĩ õõganĩ nẽẽ eet hõdẽẽthõng irkita baabuuthatõõ, ꞌcĩ ẽbẽra lothippiti korrioohĩĩ cĩg Karramẽẽt cĩg Haangittaak.

¹⁶ Korriook nicciag, baa aꞌnyak eeta baabutheenit umwa ꞌcĩ haĩ Yeesu Barabbath.

¹⁷ Ma baa uluttia lothippiti vẽlẽk hõdẽĩ, ikia ꞌcieethaa cĩ Pĩlaatõ, ikia ijin Pĩlaatõ ĩhõõggõ ĩĩnnĩk, “Adiimmu niig hõõgahuung naa nganĩ, Barabbath hode Yeesu ꞌcĩ haĩ Krĩstõ ho?”

¹⁸ Baa aga nẽẽ gẽrrẽẽt ngaatĩ ababuuthanĩ eeta cĩg ꞌJudeei Yeesu, hĩnĩngĩtĩ baa eheꞌthi nẽẽg thõng.

¹⁹ Ma baa nga iccioloongan Pĩlaatõ dtaabawa cĩnnĩ ĩcĩ habuẽẽꞌthĩtõõ, ikia ĩꞌthõõa ngaa cĩnnĩ nyeemuut ꞌcĩ aĩ, “Ma haddangaahi eet niccia ammĩrĩ hataa, hĩnĩngĩtĩ accanannaa nganĩĩt honoothi aabaal gẽrrẽẽt, hĩnĩngĩtĩ ĩnõõnnõ.”

²⁰ Nẽẽthĩ hinnia, baa alũllũũman makayyiooha cĩg paadĩrꞌnyaannu hĩ makayyiook cĩg eetuk lothippit hijinit Pĩlaatõ hõõgak ĩhõõggõ Barabbath nẽ uruk ꞌcĩ ĩĩn Yeesu.

²¹ Nẽ ĩĩ ꞌgaalacĩ cobbi, “Nganĩ eetinii ꞌcĩg ĩĩn ꞌramma ho, ꞌcĩ adiimmaangu niig nganĩĩt hõõgahuung?” Ẽdẽcĩ nẽẽg aĩ, “Õgaaheet Barabbath.”

²² Nĩngĩtĩ ajini Pĩlaatõ ĩhõõggõ annẽẽkĩ, “Nẽ hatĩ hadahĩ naa Yeesu ꞌcĩ haĩ Krĩstõ ho ne?” Ẽdẽcĩ nẽẽg vẽlẽk aĩ, “Otoddoyyieek ĩnõõnnõ hurucceea!”

²³ Ẽdẽcĩ Pĩlaatõ aĩ, “Inni? Neegi ꞌcĩ ẽꞌthẽcan nẽẽ ho?” Ẽggẽrẽny hinnia nẽẽg gẽrrẽẽt aĩ, “Toddoeek ĩnõõnnõ hurucceea!”

²⁴ Ma baa acĩn Pĩlaatõ ngaatĩ aitioonni ꞌgõõl ꞌcĩ õõganĩ nẽẽ Yeesu tõõ nẽ iꞌthiattaaĩ eeta awacahit gẽrrẽẽt ko, ittiha nẽẽ maam nẽ ũtũũny athĩn cĩgĩnnĩg hẽbẽrẽẽnnĩĩ cĩg lothippitaak nẽ ĩĩ, “Hammiri naa biyyiẽẽtĩĩ cĩg eet icci, ĩĩn niccia thõõth cunuung.”

²⁵ Ẽdẽcĩ hinnia eeta vẽlẽk aĩ, “Ĩꞌnya heteheellia naag biyyi cĩgĩnnĩg ko hĩ lõhõlĩ cĩggaang vẽlẽk!”

²⁶ Nĩngĩtĩ õõgakĩ Pĩlaatõ ĩhõõggõ Barabbath nẽ uduhaak athegereeꞌnya cĩgĩnnĩg huukito Yeesu nẽ otoddoyyieek hurucceea.

Atararri athegereeꞌnya Yeesu

²⁷ Nĩngĩtĩ õõĩ athegereeꞌnya cĩg ꞌgaalac cobbi Yeesu ngaatĩ aattiyyi nẽẽgĩ nẽ uluttia nẽẽg vẽlẽk iita irriamatteek ĩnõõnnõ.

²⁸ Ma ho, uppuruccia nẽẽg ceremwa cĩg Yeesu nẽ itihimtẽẽhĩ ĩnõõnnõ cẽrẽm ꞌcĩ marihi,

²⁹ nẽ ẽtẽhẽnyta tẽẽ ꞌcĩ ĩĩn bĩlla haau hĩ tẽmẽdẽhĩ cĩ habuuo nẽ aarrihii õõa cĩnnĩ nẽ aarrihi hĩbahĩt attiaa cĩnnĩ cobbi nẽ akattieek ĩnõõnnõ huruꞌnyia nẽ atararri ĩĩttĩk, “Hĩꞌthaaõ habu cobbi cĩ ꞌJudeei!”

³⁰ Ma ngaati, iita uttuurrik ĩnõõnnõ ammũt nẽ aggamta hĩbahĩt nẽ ohoddia ĩnõõnnõ õõ tabattĩ hiriiri.

³¹ Ma baa uttumattõõĩ nẽẽg ĩnõõnnõ nẽ atararri ẽlẽk, uppuruccia cẽrẽm nẽ itihimtẽẽhĩ ceremwa aagĩnnĩg tarĩ, nĩngĩtĩ õõ õdõõddĩ ĩnõõnnõ hurucceea.

Toddoiinit cĩ Yeesu

³² Ma baa nga õvvõ nẽẽg ꞌgõõla, iita ommottio hĩ eet umwa ꞌcĩ haĩ ꞌThimõõnẽ cĩ looc cĩ Cireene, nĩngĩtĩ attĩnganẽẽkĩ ĩnõõnnõ hirriongan hurucce cĩ Yeesu ho.

³³ Iita õdõlanit nẽẽg nĩngĩtĩ haĩ ꞌGologooꞌtha, nĩngĩtĩ aĩ, “Nĩngĩtĩ ẽmmẽẽn cĩ õõ cĩ eeto.”

³⁴ Ma nĩngaata, iita aanytĩk nẽẽg Yeesu hũhũd mẽrtĩ cĩ viinoo ꞌcĩ õꞌngõõtanoothĩk ꞌgiimwa ꞌcĩ ahahatĩĩ dtum, ma baa atarĩ Yeesu mẽrtĩ nicci viinoo ho, ikia ũtũbũr ngaatĩ ahũdĩ.

³⁵ Ma baa otoddoyyieek nẽẽg ĩnõõnnõ hurucceea ẽlẽk, iita eꞌngerit nẽẽg ceremwa cĩgĩnnĩg ꞌgõõlaa ꞌcĩ aruhi tooto.

³⁶ Nĩngĩtĩ aattiyyi nẽẽg loota ẽbẽhĩ ĩnõõnnõ nĩngaata.

³⁷ Nẽ iita otoddoyyieek nẽẽg thõõth ꞌcĩ ẽttẽẽdõthõõthĩkĩ nẽẽ daahĩth õõa cĩnnĩ lokora aĩ, YEESU HABU CĨ ꞌJUDEEI CIEENI.

³⁸ Baa aattĩg igorriaaha ũgẽẽgĩ ꞌramma ꞌcĩg õdõõddĩ hĩ ĩnõõnnõ hõdẽĩ, umwa ĩĩcĩ aꞌthiit cĩnnĩ cobbi nẽ ĩĩ umwa ĩĩcĩ aꞌthiit ꞌcĩ hidici.

³⁹ Baa õdõõm eeta ꞌcĩg baag õvvõ nĩngaata vẽlẽk ĩnõõnnõ nẽ udhuhit ooti,

⁴⁰ nẽ ĩĩtõ, “Nii ꞌcĩ othoothi aini õkõ hatĩ ĩꞌthaani ꞌCieeth cĩ Nyekuci nẽ etehenyuu tarĩ urutaa cĩ waathinniook iyyio ho, ẽla thĩ da ꞌyioko ẽlẽ cunni, luuccia loota hurucceea, hatĩ ĩĩnĩ nii Ngeertĩ Nyekuci!”

⁴¹ ꞌGõõlaa nĩĩcĩ dioo noho, iita attararri makayyiooha cĩg paadĩrꞌnyaannu hĩ ꞌlimmanniook cĩg nyattal cĩ Mũũꞌtha hĩ makayyiook cĩg eetuk buúk ĩnõõnnõ,

⁴² nẽ ĩĩtõ, “Gõõng ẽẽla nẽẽ eet ũgĩ, nẽẽthĩ ꞌyioko, hõllõngaa ẽẽla ẽlẽ cĩnnĩ inni? Má ĩĩn nẽẽ habu cĩ Ĩꞌthĩraẽlĩ, aꞌnyĩĩk hulluuccia hurucceea loota! Nẽẽthĩ hatĩ helemit ĩnõõnnõ.

⁴³ Ẽlẽmĩ nẽẽ Nyekuc. Aꞌnyĩĩk Nyekuc hẽẽla ĩnõõnnõ ꞌyioko hatĩ adiimi, hĩnĩngĩtĩ aĩ nẽẽ, ‘Hĩĩnĩ Ngeertĩ Nyekuci.’ ”

⁴⁴ Nẽ igorriaaha baag õdõõddĩ hĩ ĩnõõnnõ hõdẽĩ buúk, iita odoomito ĩnõõnnõ ꞌgõõlaa nĩĩcĩ dioo noho.

Adaak Yeesu

⁴⁵ Ma baa aau kõrra lokora, ikia adaak kõrra hĩĩ lõõcĩ muguur ĩꞌthõng hĩ ꞌthaa iyyio.

⁴⁶ Baa ꞌthaa niccia noho, urruuo Yeesu ĩĩ, “Eloi, Eloi, Lama Thabachthani?” Nĩngĩtĩ aĩ, “Nyekuc caannĩ, Nyekuc caannĩ, ũũnnĩkaa inni?”

⁴⁷ Ma baa athĩhĩ eeta ꞌcĩg baag abĩlĩ nĩngaata thõõth icci ho, othoothito ĩĩtõ, “Avvĩ nẽẽ Eliijja.”

⁴⁸ Nĩngĩtĩ airi eet umwaa nĩngaata hĩdĩĩkoothong nẽ ũũk ittiha cẽrẽm nẽ õꞌnyõlaneek mẽrtatõõ cĩ viinoo ꞌcĩ ammũccarĩĩ nẽ aarĩk hẽẽta nẽ uduhuthẽẽhĩ Yeesu hũcũũcũ.

⁴⁹ Nẽ ĩĩtõ eeta ũgẽẽgĩ, “Hereeyyio da nõõ! Hĩcĩnĩt da hatĩ aku ẽẽla Eliijja ĩnõõnnõ!”

⁵⁰ Ikia urruuo Yeesu moloohaa cobbi tarĩ, nĩngĩtĩ adaaknĩ.

⁵¹ Ma nĩngaata noho, appahĩ cẽrẽm ꞌcĩ ẽꞌngẽr ꞌCieeth cĩ Nyekuci hĩĩ ꞌramma, iꞌthianaanĩ hẽẽtahujjieen hõdõlan looc. Baa õmmõõtĩ lõõcĩ nẽ ilibti lõbarabĩta buúk.

⁵² Nĩngĩtĩ abbuuhẽnĩ ꞌlõõhĩta nẽ ũrũgta eleeti cĩg eet cĩg Nyekuci baag adaahito.

⁵³ Ma baa ũrũga Yeesu daahĩtha, iita uduhutta nẽẽg ꞌlõõhĩtĩtõõ cĩggĩĩng nẽ õõt ĩĩcĩ ꞌtaaũn cobbi ꞌcĩ ẽllẽẽmĩth cĩ ꞌJeruꞌthalẽmĩ, ngaatĩ baa acĩnĩ eeta ꞌcĩg mẽẽlĩg ĩhõõggõ.

⁵⁴ Ma baa acĩn ꞌgaalacĩ cĩ ũũrũta cĩg ꞌRooma hĩ eet ꞌcĩg baag arũmĩ hĩ ĩnõõnnõ ẽbẽk Yeesu, hirihidtik hĩ hẽlẽggĩ ꞌcĩg baag edeeꞌnyia vẽlẽk ko, iita abarritit nẽẽg gẽrrẽẽt nẽ ĩĩtõ, “Ĩko mĩĩ baa ĩĩn ẽẽtĩ ciee Ngeertĩ Nyekuci dĩdĩ!”

⁵⁵ Baa mẽẽlĩg ngaaĩ ꞌcĩg õõkõra hĩ Yeesu ĩĩcĩ ꞌGalileea ꞌcĩg baag au ẽẽl ĩnõõnnõ, baa aattĩg ngaaĩ tĩko nĩngaata nẽ ẽdẽẽnytõthĩ Yeesu ngadiiha.

⁵⁶ Hõrggẽẽnaa cĩ ngaaĩ iccig, baa aaĩ Maria Madalẽẽna, hĩ Maria aattĩ ꞌJeemithi hĩ Yothebo, ꞌcĩg ĩĩn lõhõlĩ cĩg ꞌThebedeeo.

Adaĩ Yeesu

⁵⁷ Ma baa ĩĩ ꞌjiaatĩn lõõcĩ, ikia uppwaanna ẽẽtĩ umwa ꞌcĩ ĩĩn ballioohit ꞌcĩ haĩ Yothebo ꞌcĩ baa aku ꞌtaaũnaa cĩ Arimathea, baa nẽ ikia ĩĩ nẽẽ buúk nuyyioohit cĩ Yeesu.

⁵⁸ Nĩngĩtĩ aku õkõõĩ nẽẽ hĩ Pĩlaatõ nẽ ũũk ijin ẽlẽ cĩ Yeesu, nĩngĩtĩ aduhaakĩ Pĩlaatõ athegereeꞌnya cĩgĩnnĩg hõõt haanytĩk ẽlẽ cĩ Yeesu ĩnõõnnõ hũũk hada.

⁵⁹ Ũũk ittiha Yothebo ẽlẽ cĩ Yeesu nẽ ũmũmmũũran cẽrẽmaa ꞌcĩ tẽllĩ,

⁶⁰ nẽ aarĩk ꞌloohaa cĩnnĩ ĩĩcĩ baa accĩtha nẽẽ lõbaraba. Nẽ ittiha bẽẽ cobbi gẽrrẽẽt ũꞌnyũũgĩ hattũũg cĩ ꞌloohu, nĩngĩtĩ õkõõĩ.

⁶¹ Baa aaĩ Maria Madalẽẽna hĩ Maria baa umwa buúk, iccioloongan loota nĩngaata ngadiiha ẽbẽk ꞌlook.

Bekiook cĩg ꞌloohu

⁶² Ma baa loohoth cĩnnĩ, baa ĩĩn lõõcĩ Kõr cĩ ꞌYiommaanõ, iita õõt makayyiooha cĩg paadĩrꞌnyaannu hĩ eet ꞌcĩg ĩĩn Variꞌtheei hĩ Pĩlaatõ,

⁶³ nẽ ĩĩttĩk, “Makayyioohit, hammuhooꞌtha naag thõõth baa aduha oloꞌngiaahiti nicciaa, baa nga arũgĩ aĩ, ‘Urutaa cĩ waathinniook iyyio, arũgna hatĩ nẽẽ daahĩtha tarĩ.’

⁶⁴ Nẽẽthĩ ꞌyioko, duhaak athegereeꞌnya hebehit hattũũg cĩ ꞌloohu jurrung, ĩꞌthõng hõdõlanit waathinniooha ꞌcĩg ĩĩn iyyio ho. Má hõllõngaa aduhaahi jurrung, anĩha hatĩ nuyyiooha cĩgĩnnĩg nẽ iita igorithit ẽlẽ cĩnnĩ nẽ õõt uduktaak eet ĩĩttĩk, ũrũga Yeesu daahĩtha. Nẽ ꞌgoolittaa cĩnĩĩng adtuurna ho, abathĩ hatĩ gẽrrẽẽt hĩllõõan baa oou.”

⁶⁵ Ẽdẽcĩ Pĩlaatõ aĩ, “Ootti niig athegereeꞌnya ũgĩ cugguung hõõt hebehit ꞌlook hĩcĩ agayyu niiga.”

⁶⁶ Nĩngĩtĩ õõ aꞌnyũũgĩ nẽẽg hattũũg cĩ ꞌloohu ho nẽ idilit jurrung nẽ aarrik athegereeꞌnya ũgĩ hebehit hattũũg.