Maatteeo 24 - ꞌBuuk cĩ Thõõth cĩ Nyekuci

ꞌThaaninit cĩ ꞌCieeth cĩ Nyekuci

¹ Ma baa ũtũngeek Yeesu ꞌCieeth cĩ Nyekuci, iita ithithattaak nuyyiooha cĩgĩnnĩg ĩnõõnnõ ꞌgõõl ꞌcĩ ehenytiini ꞌCieeth cĩ Nyekuci hẽllẽẽm gẽrrẽẽt.

² Nẽ ikia ijin Yeesu ĩhõõggõ ĩĩnnĩk, “Acinnu niig ꞌcieethi niccig vẽlẽk, haduhaakuung dĩdĩ, ĩꞌthaanni hatĩ hiittiõõ bẽẽ ꞌcĩ ataadothoothĩk ꞌgõõnĩ tõõ!”

Tilooinit cĩ ꞌcannanõ

³ Ma baa urutaa cĩnnĩ, baa nga iccioloongan Yeesu loota ũbũtaa cĩ Muur cĩ Olivi, iita ummuddioothĩk nuyyiooha cĩgĩnnĩg ĩnõõnnõ ẽmmẽn nẽ ijinit ĩĩttĩk, “Adĩmanni hatĩ thõõth ciee hatĩngaan? Ne hatĩ ꞌcĩ ẽtẽrꞌtha aĩ, akuu hatĩ niina, hĩ decciaanĩt cĩ lootu?”

⁴ Ẽdẽcĩ Yeesu aĩ, “Ĩcĩnĩt jurrung nẽ ma haaꞌnyiku eet umwa higgooluung ngagiita.

⁵ Hĩnĩngĩtĩ mẽẽlĩg hatĩ eeta ꞌcĩg au aĩ, ‘Hĩĩnĩ naa Krĩstõ.’ Ĩggõõl hatĩ nẽẽg eet ꞌcĩg mẽẽlĩg.

⁶ Athiknu hatĩ thooꞌthiok cĩg joreenu nẽ ma hiꞌngolinnu. Aluba ꞌthẽk hatĩ hẽlẽggĩ ꞌcĩg aattĩg hoti, nẽẽthĩ nẽẽ hatĩ nga aku decciaanĩtĩ cĩ lootu.

⁷ Aruhõõ hatĩ loonyina hĩ loonyin nẽ urukto habuccieeꞌnya hĩ habuccieeꞌnya. Aku hatĩ nyarõnĩ nẽ õmmõõnnĩ hatĩ hirihidtihi looc loonyinii ꞌcĩg mẽẽlĩg.

⁸ Ma iita ẽdẽẽnyta thooꞌthioha cieegi, agayyiooth ĩĩtõ, ĩĩ ciee ꞌthianaanĩt cĩ thooꞌthiok ꞌcĩg abathĩ gẽrrẽẽt.

⁹ “Aggamiinnu hatĩ nẽ aarrihoothihu baabuuth nẽ uukteu hode aruheennu thõng buúk. Akannannuung hatĩ eeta cĩg loonyin vẽlẽk, hĩnĩngĩtĩ nganĩĩta.

¹⁰ Waathinniook tĩko, mẽẽlĩg hatĩ eeta ꞌcĩg ũũnnĩk lemiinit, õhõppõõcanõõ nẽ aaburroo nyaagwaana.

¹¹ Mẽẽlĩg hatĩ põrõvẽtaaꞌnya ꞌcĩg hõllõngaa ĩĩn dĩdĩ, ꞌcĩg au atalmaanyan eeta.

¹² Ĩꞌthanothoothĩk hatĩ bathi looc nẽ iittiõõ hõllõngaa ammĩnanõõ eeta ꞌcĩg mẽẽlẽẽgĩ.

¹³ Nẽẽthĩ, ẽẽtĩ ꞌcĩ ẽlẽmma nganĩĩt ĩꞌthõng decciaanĩt cĩ lootu, eelliaa hatĩnĩ.

¹⁴ Nẽ irrioonni hatĩ nyeemuut ꞌcĩ abũnnaa cĩ habuccieet cĩ Nyekuci loonyini vẽlẽk, hátĩ hĩthĩhĩt eeta vẽlẽk, nẽẽthĩ hatĩ ikia decciaanĩtĩ cĩ lootu.”

ꞌThẽrẽt ꞌcĩ abathĩ hĩ Nyekuc

¹⁵ Nẽ õthõõth Yeesu tarĩ ĩĩ, “Aaĩ hatĩ kõrra ꞌcĩ acinnu niig ‘ꞌgii ꞌcĩ abathĩ gẽrrẽẽt ꞌcĩ aꞌnyaha ꞌribban,’ abĩlĩ Ngaatĩ Ẽllẽẽmĩth ꞌCieethaa cĩ Nyekuci, hĩ baa aduha põrõvẽtaacĩ Danieele aĩ, anneek eet ꞌcĩ agiili thõõth icci, thĩĩk jurrung!

¹⁶ Má aattiyyu niig looccaa cĩ ꞌJudeea korriook nicciag, ivvirit õõt hõrõmẽẽtĩ.

¹⁷ Má aaĩ õlĩlaa cĩ ꞌcieeth cunni, ma halluuccia hakuu ꞌcieetõõ aĩ ijjia ꞌtiha ꞌgiimwa.

¹⁸ Má aaĩ manatõõ, ma haini ĩꞌnya hobodooth ĩĩcĩ olu hũũk hittiha cẽrẽm.

¹⁹ Abathĩ hatĩ gẽrrẽẽt korriook nicciag, hĩ ngaaĩ ꞌcĩg aꞌnyaki hĩ ꞌcĩg õrõõktĩ lohollia.

²⁰ Alayyio gẽrrẽẽt, hátĩ hiittiõõ hõllõngaa airru tagĩĩtha hode Kõrraa cĩ ꞌYiommaanõ.

²¹ Korriook hatĩ ꞌcĩg ꞌcannan cobbi gẽrrẽẽt tĩko, ꞌcĩ nga haau nganĩngĩtĩ ẽhẽnytaanĩ Nyekuci looc nẽ hõllõngaa hatĩ aku ꞌcannani ꞌcĩ aaĩ hoti tarĩ ũdũt.

²² Má hõllõngaa ohodeek Nyekuci korriook tĩko hĩĩtõ huturig, aitiõõ hatĩ ẽẽtĩ ꞌcĩ arũgĩ tõõ. Nẽẽthĩ, hĩnĩngĩtĩ eet ꞌcĩg ẽbẽra nẽẽnĩ, ohodeek hatĩ nẽẽ korriook tĩko hĩĩtõ huturig.

²³ Waathinnioohĩĩ tĩko, má anneekuung eet umwa, ‘Krĩstõ cieeni!’ Hode, ‘Ĩnõõnnõ caanĩ!’ Ma helemmu ũdũt.

²⁴ Hĩnĩngĩtĩ au hatĩ krĩstõꞌnya hĩ põrõvẽtaaꞌnya ꞌcĩg hõllõngaa ĩĩn dĩdĩ nẽ idticanit thooꞌthiok ꞌcĩg ĩnaat eeta gẽrrẽẽt, hĩttĩmanit ngaatĩ ĩggõõlĩ eet ꞌcĩg ẽbẽra Nyekuci buúk.

²⁵ Agaac ĩĩtõ heterethuung naa ĩĩcĩ oou ẽlẽk.

²⁶ “Nẽẽthĩ, má anneekuung eet umwaa, ‘Aaĩ Krĩstõ horrwatõõ ꞌcĩ õdõhõhĩĩ kak,’ ma hooyyu ĩtĩho! Nẽ má aduha eet umwaa aĩ, ‘Aguꞌthi nẽẽ ngaamwaanĩ,’ ma helemmu ũdũt!

²⁷ Aaĩ hatĩ kõrra ꞌcĩ akuuni Ngeertĩ Eeto hĩ bõrõhẽẽcĩ ꞌcĩ ammadĩ, ꞌcĩ aku ĩĩcĩ uruto, acĩn eeta ĩĩcĩ õkõlõõthĩkĩ kõrra vẽlẽk nẽ aaĩ hatĩ kõrra cĩ akuuni Ngeertĩ Eeto noho.

²⁸ Alũtĩ hodobwaana ngaatĩ aayyi ꞌgii ꞌcĩ adaaha.”

Kõr ꞌcĩ uppwaannanĩ Ngeertĩ Eeto

²⁹ Õbõdẽẽkĩ Yeesu õthõõth aĩ, “Urutaa cĩ korriook cĩg ꞌcannaanak ko, “ ‘Adaahĩ hatĩ kõrra, hĩ nyĩlõk. Adhukiaa hatĩ mũnyũnya, nẽ õtõmõ hẽẽtkujjieen.’

³⁰ “Ma urutaa cĩnnĩ vẽlẽk, edeeꞌnyia hatĩ terethiiniti hẽẽtahujjieen, ꞌcĩ akuuni Ngeertĩ Eeto, hutullẽẽcõ loonyini vẽlẽk cĩg lootu. Edeenyothi hatĩ nẽẽg Ngeertĩ Eeto ngaatĩ alluuccianĩ diiꞌthiohĩĩ cĩg hẽẽtkujjieen, makaaꞌthĩta hĩ bulẽẽttaa cobbi.

³¹ Ĩꞌthõ hatĩ nẽẽ aajĩlẽẽt cĩgĩnnĩg hadtahit illieeri cobbi gẽrrẽẽt, huluttia eeta ꞌcĩg ẽbẽra Nyekuci ꞌgoolliohĩĩ ꞌcĩg ꞌrẽẽttĩg loota nĩnga hĩ hẽẽtahujjieen vẽlẽk.

ꞌLimman ꞌcĩ awantoothĩk ꞌmũũnĩc

³² “Illimatta thõõth hĩ ꞌmũũnĩc. Ma ũtũrrũũmatta bõllõõha tabanĩ, agayyu ngaatĩ õbõhõõĩ ũrraatĩ.

³³ Ma icittu thooꞌthiok iccig vẽlẽk, agaac ĩĩtõ õbõhĩ ꞌthaa.

³⁴ Haduhaakuung dĩdĩ, hõllõngaa hatĩ adaahĩ eeta cĩg waathinniook niccig, nga hikia thõõth ꞌcĩ haduha naa ho.

³⁵ Edecciaa hatĩ hẽẽtkujjieen hĩ looc nẽ thõõth caannĩ ho, aitiõõ hatĩ hõllõngaa edecciaa ũdũt.

Aitiõõ eet ꞌcĩ aga kõr hode ꞌthaa tõõ

³⁶ “Hiꞌthihi eet ꞌcĩ aga kõr hode ꞌthaa ꞌcĩ hatĩ akuuni thõõth cieeni, tananga aajĩlẽẽta cĩg hẽẽtkujjieen hĩ Ngeertĩ Eeto buúk, hõllõngaa aga thõõth icci, Maaꞌnyĩ dioo ꞌcĩ aga.

³⁷ Ma hatĩ õbõda Ngeertĩ Eeto, aattĩg hatĩ eeta hĩ baa waathinniook baag Nõõa.

³⁸ Hĩnĩngĩtĩ baarkit, baa nga huruk Nyekuci eet vẽlẽk tawaana cobbi, baa aduhi eeta nẽ ũhũdĩt mẽrtĩ nẽ ũꞌthũwattõõ, hode aaꞌnyĩk lõhõlĩ cĩggĩĩng hũꞌthũwattĩ, ĩꞌthõng kõr baa adukni Nõõa haahũl cobbi.

³⁹ Baa hõllõngaa aga nẽẽg ꞌgii ꞌcĩ hatĩ aku, ĩꞌthõng hikia tawanĩ cobbi hittik eet vẽlẽk. Aaĩ hatĩ noho, kõr ꞌcĩ hatĩ akuuni Ngeertĩ Eeto.

⁴⁰ Akannĩ hatĩ eeta ꞌramma manatõõ, hẽbẽra hatĩ naa hõdẽĩ dioo nẽ hũtũngeeha hõdẽẽthõng.

⁴¹ ꞌGõõla ꞌcĩ aduhõõ thõng, ereki hatĩ ngaaĩ ꞌramma hirriẽẽtĩ, hẽbẽra hatĩ naa hõdẽĩ nẽ hũtũngeeha umwa.

⁴² “Nẽẽthĩ hoti ho, aaut dĩkĩĩm, hĩnĩngĩtĩ hõllõngaa agayyu niig kõr ꞌcĩ hatĩ akuuni Makayyioohiti cunuung.

⁴³ Nẽ agaac thõõth icci, má baa haga baattĩ olu ꞌjiaatĩn ꞌcĩ akuuni igorriaahiti, occa baa ẽbẽk õlõ jurrung, hiittiõõ hõllõngaa ĩgõrꞌthĩ.

⁴⁴ Nẽ aaut dĩkĩĩm niig buúk jurrung, hĩnĩngĩtĩ aku hatĩ Ngeertĩ Eeto kõr ꞌcĩ hatĩ hõllõngaa ammuhuneeku ĩnõõnnõ ngaatĩ akuuni.

Dticcianniook ꞌcĩg abũnnaa hĩ ꞌcĩg abathĩ

⁴⁵ “Nganĩ ꞌcĩ ĩĩn dticciannioohit ꞌcĩ abũnnaa ꞌcĩ ẽggẽẽnyĩth, ꞌcĩ anneek baattĩ olu, bẽẽk õlõ cĩnnĩ nẽ aaꞌnyĩk eet cĩg olu ꞌgẽẽn ꞌthaa ꞌcĩ adiimi nẽẽgĩ?

⁴⁶ Abũnnaa hatĩ hĩ dticciannioohit tĩho ngaatĩ ammũdaakĩ baattĩ olu ĩnõõnnõ adtican dtiic tĩho, kõr ꞌcĩ hatĩ õbõdaanĩ nẽẽnĩ.

⁴⁷ Haduhaakuung dĩdĩ, aaꞌnyĩk hatĩ baattĩ olu dticciannioohit tĩho hẽbẽk ꞌgii vẽlẽk ꞌcĩ aꞌnyak nẽẽ õlõõ cĩnnĩ.

⁴⁸ Má occa hummuk dticciannioohiti ꞌcĩ abathĩ nẽ ĩĩ, ‘Nga baaĩ nẽẽ aayyiaa nganĩĩt baattĩ olu ĩꞌthõng,’

⁴⁹ nẽ iꞌthianaaĩ uuk dticcianniook ꞌgõõnõgĩ nẽ uduho ẽmmẽn, hũhũdĩt mẽrtĩ hĩ ꞌgõõnõgĩ ꞌcĩg ĩĩn duuttiak.

⁵⁰ Uppwaannak hatĩ baattĩ olu dticciannioohit niccia, kõrraa hĩ ꞌthaawaa ꞌcĩ hõllõngaa aga nẽẽnĩ.

⁵¹ Aku hatĩ uuk baattĩ olu dticciannioohit niccia ꞌbuth nẽ itiggia ĩnõõnnõ dtiicaa cĩnnĩ, hõõt hũrũmtĩ hĩ oloꞌngiaak, ngaatĩ arruuẽnĩ eeta hadahit nyĩgĩt huciitha.”