Maatteeo 20 - ꞌBuuk cĩ Thõõth cĩ Nyekuci

Dtẽẽllẽn ꞌcĩg awantoothĩk dticcianniook cĩg manu

¹ Baa aduha Yeesu ꞌgõõl ꞌcĩ hatĩ aayyi habuccieet cĩ hẽẽtkujjieen aĩ, “Aaĩ habuccieet cĩ hẽẽtkujjieen hĩ baattĩ manu ꞌcĩ õkõ kõr umwa ngerrenita nẽ ũlũta eet hiita hakattio manaa cĩnnĩ ĩcĩ viinoo.

² Ma urutaa ꞌcĩ ẽlẽmĩ nẽẽ ngaatĩ adũmanĩ dticcianniook ꞌdinaar hõdẽẽthõng cĩ dtiic cĩ kõr hõdẽĩ, ikia ĩꞌthooĩk ĩhõõggõ manaa cĩnnĩ ĩcĩ viinoo.

³ “Ma baa ꞌthaa tũrkũwwec ngaalloohoth, ikia ũũk nẽẽ ĩĩcĩ ꞌcuuho nẽ udtuuha eet ũgĩ ꞌcĩg aitiõõ hõllõngaa adtican ꞌgiimwa.

⁴ Nĩngĩtĩ aduhaakĩ ĩhõõggõ annẽẽkĩ, ‘Õõt idticattõ niig buúk manatõõ tõõ caannĩ ĩcĩ viinoo nẽ hatĩ hũdũmanuung ngagiit ꞌgiiaa ꞌcĩ abũnnaa.’

⁵ Nĩngĩtĩ õõĩ nẽẽgĩ. Ma ho, ũũk ũlũta baattĩ manu eet ũgĩ tarĩ, baa aau kõrra lokora nẽ baa iggiingi kõrra buúk nẽ aaꞌnyĩk hidticattõõ.

⁶ “Ma baa ꞌthaa ꞌtur baa õbõhĩ okoloothĩk kõrra, ikia ũũk ũmmũdoothĩk eet ũgĩ tarĩ ꞌcĩg abĩlĩ haaga, nĩngĩtĩ ajini ĩhõõggõ annẽẽkĩ, ‘Abillu ngaati huutub haaga inni?’

⁷ “Ẽdẽcĩ eeta tĩko ĩnõõnnõ anneek, ‘Hĩnĩngĩtĩ aitiõõ ẽẽtĩ ꞌcĩ alũtteet nẽ aaꞌnyeet dtiic tõõ.’ “Ẽdẽcĩ nẽẽ ĩhõõggõ anneek, ‘Õõt idticattõ niig buúk manaa caannĩ ĩcĩ viinoo.’

⁸ “Ma baa utub lõõcĩ, ikia othoothĩk baattĩ manu makayyioohit cĩ dticciannioohu ĩĩnnĩk, ‘Tũũ dticcianniook nẽ ũdũmanuu ꞌrabbẽẽt cĩggĩĩng, ꞌthianaaĩ dticciannioohĩĩ cĩg adtuurna ĩꞌthõng hõdõlan aag iꞌthianaanĩ dtiic ĩĩcĩ oou.’

⁹ “Iita dticcianniooha aag au dtiica ꞌthaa ꞌtur ꞌjiaat nẽ aggamit ꞌdinaar hõdẽẽthõng cĩ dtiic cĩ kõr hõdẽẽthõng.

¹⁰ Ma baa au eeta baag atiman dtiic ĩĩcĩ oou ho, baa ammuhuneek nẽẽg aĩ, occa baa haggamma ꞌrabbẽẽt ꞌcĩg mẽẽlĩg, au hinnia aggam nẽẽg buúk ꞌdinaar cĩ kõr hõdẽẽthõng.

¹¹ Ma baa aggamit nẽẽg ꞌrabbẽẽt ẽlẽk, iita ongoongoyyieek nẽẽg baattĩ manu.

¹² Baa õthõõth nẽẽg aĩ, ‘Iyyia adticanni eeta caag ꞌthaa hõdẽẽthõng haaga, nẽ ũdũmanuu ĩhõõggõ huduktooa hĩ ngagĩĩt, eet aag hadticaniinna huutub, kõrraa ꞌcĩ aaburii padtahac ko inni?’

¹³ “Ẽdẽcĩ nẽẽ dticciannioohit umwa hõrggẽẽnaa cĩnĩĩng anneek, ‘ꞌGõõna, nga hĩdĩmanii ꞌbuth ũdũt. Nga nooyyia helemit naag ngaatĩ adũmaniini ꞌdinaar hõdẽẽthõng cĩg dtiic cĩ kõr hõdẽẽthõng?

¹⁴ ꞌGaam ꞌrabbẽẽt cugunnig bĩtõ. Hadiimi hadũmani naa eet aa aku uruta, ꞌrabbẽẽt ꞌcĩg aduhõõ hĩ cugunnig thõng.

¹⁵ Hõllõngaa haꞌnyahi naa makaaꞌthĩt ꞌcĩ hadĩmanĩĩ thõõth ꞌcĩ hadiimi ꞌrabbẽẽtĩĩ cĩgannĩg? Hode iinani nii thõõth ꞌcĩ hẽẽlĩ naa eet iccig ko?’

¹⁶ “Ĩnõõ hatĩ ꞌcĩ aku adtuurnanĩ ẽẽtĩ ꞌcĩ uwwattĩ nẽ utuanĩ ẽẽtĩ ꞌcĩ aku uruta.”

Õbõdẽẽhĩ Yeesu thõõth cĩ daahĩth cĩnnĩ

¹⁷ Ma baa kõr ꞌcĩ õkõõĩ Yeesu ꞌJeruꞌthalẽma, baa õkõõĩ nẽẽ nuyyiook cĩgĩnnĩg õmmõtõ hĩ ꞌramma ngadiiha nẽ ũũk uduhaak ĩhõõggõ ĩĩnnĩk,

¹⁸ “Hõõ naag ꞌyioko ĩꞌthõng ꞌJeruꞌthalẽm, ma hatĩ ĩĩca, õkõ hatĩ õhõppõõcanoothĩk Ngeertĩ Eeto athĩnĩĩ cĩg makayyiook cĩg paadĩrꞌnyaannu hĩ ꞌlimmanniook cĩg nyattal cĩ Mũũꞌtha. Õõ hatĩ etteedĩk nẽẽg ĩnõõnnõ daahĩth,

¹⁹ nẽ hatĩ aanytĩk ĩnõõnnõ eet ꞌcĩg hõllõngaa ĩĩn ꞌJudeei, hodoomito ĩnõõnnõ nẽ uukito ĩꞌthõng hotoddoyyieek hurucceea. Ma urutaa cĩ waathinniook iyyio, arũgna hatĩ nẽẽ daahĩtha.”

Laiinit cĩ morwahitoo

²⁰ Ma nĩngaata, ikia ũmmũdaak aattĩ lõhõlẽẽtĩg ꞌThebedeeo Yeesu nẽ akateek ĩnõõnnõ huruꞌnyia nẽ ala ĩnõõnnõ ꞌgii ꞌcĩ adiim nẽẽnĩ.

²¹ Nĩngĩtĩ ajini Yeesu ĩnõõnnõ annẽẽkĩ, “Ne ꞌcĩ adiimi nii ho?” Ẽdẽcĩ nẽẽ Yeesu anneek, “Aꞌnyĩĩk baaĩ nuun lõhõlĩ cĩgannĩg ko, haau hõdẽẽthõng ĩĩcĩ aꞌthiit cunni cobbi nẽ aau umwaa ĩĩcĩ aꞌthiit cunni ꞌcĩ hidici habuccieetaa cunni.”

²² Ẽdẽcĩ Yeesu ĩhõõggõ anneek, “Hõllõngaa agayyu niig thõõth ꞌcĩ ajinnu niig ko, uullu hatĩ niig ngaatĩ ahuddu hooppo cĩ ꞌcannaanõ ꞌcĩ hatĩ hõkõ hahudi naana?” Ẽdẽcĩ nẽẽg aĩ, “Occa hahũdda.”

²³ Nĩngĩtĩ aduhaakĩ Yeesu ĩhõõggõ annẽẽkĩ, “Dĩdĩ ahuddu hatĩ niig hooppo caannĩ, nẽẽthĩ, hõllõngaa nganĩĩt ꞌcĩ occa haduha nganĩ ꞌcĩ hatĩ aaĩ ĩĩcĩ aꞌthiit caannĩ cobbi, hode ĩĩcĩ aꞌthiit ꞌcĩ hidici. Baaba ꞌcĩ hatĩ aduha.”

²⁴ Ma baa athĩhĩ nuyyiooha ũgẽẽgĩ ꞌcĩg baag ĩĩn õmmõtõ thõõth icci ho, iita iliiliyyieek nẽẽg ꞌgõõnõgĩ ꞌcĩg ĩĩn ꞌramma ho.

²⁵ Ma ho, ikia ũtũvva Yeesu ĩhõõggõ ngaatĩ odoyyii nẽ ĩĩnnĩk, “Agayyu niig ngaatĩ arratanĩ habuẽẽta cĩg eet ꞌcĩg hõllõngaa ĩĩn ꞌJudeei eet cĩggĩĩng nẽ aggamit makayyiooha cĩggĩĩng ĩhõõggõ ꞌgõõlaa ꞌcĩ ẽdẽẽnyanĩ makaaꞌthĩt cĩnĩĩng.

²⁶ Ma hadticaniinnu hĩ nẽẽgĩ. Ẽẽtĩ ꞌcĩ adiim ĩĩn makayyioohit hõrggẽẽnaa cunuung, aꞌnyĩĩk hidticanoothĩk ꞌgõõnõgĩ.

²⁷ Nẽ ẽẽtĩ ꞌcĩ adiim uwwatteekuung ngagiita, aꞌnyĩĩk hĩĩ appahaca cunuung,

²⁸ haau hĩ Ngeertĩ Eeto baa aku hikia hidticanoothĩk eet, hõllõngaa hidticattoothĩk eeta ĩnõõnnõ, baa aku ajalana nẽẽ rũgẽt cĩnnĩ hẽẽla eet ꞌcĩg mẽẽlĩg.”

Aaꞌnyĩk Yeesu eet ꞌcĩg rubettĩg hĩcĩttĩ

²⁹ Ma baa ũũnnĩk Yeesu hĩ nuyyiook cĩgĩnnĩg ꞌJeriko ho, ikia ũnũ ĩnõõnnõ lothippiti cobbiẽẽnĩ.

³⁰ Baa iccioloongan eeta ꞌcĩg maacĩg ꞌcĩg rubettĩg ꞌramma ꞌgõõla ngadiiha, ma baa athĩhĩ nẽẽg aĩ õvvõ Yeesu obokii hĩ ĩhõõggõ ho, iita eggerenyit nẽẽg ĩĩtõ, “Makayyioohit, Ngeertĩ Daavide, tamaatĩheet ngagĩĩta!”

³¹ Baa eggerꞌnyeek lothippiti ĩhõõggõ anneek ĩjjaaktõ, ẽggẽrẽny hinnia nẽẽg gẽrrẽẽt aĩ, “Makayyioohit, Ngeertĩ Daavide, tamaatĩheeta!”

³² Nĩngĩtĩ abĩllĩ Yeesu nẽ ũtũvvũ ĩhõõggõ nẽ ijin ĩĩnnĩk, “Adiimmu niig hadakuung naa ne?”

³³ Ẽdẽcĩ nẽẽg Yeesu anneek, “Makayyioohit, anyeet hĩcĩtteea.”

³⁴ Nĩngĩtĩ ammaannĩkĩ Yeesu ĩhõõggõ nẽ uhum hẽbẽrĩ cĩggĩĩng. Ma hĩdĩĩkoothong, ĩcĩttĩ nẽẽgĩ nẽ ũnnẽẽcõ Yeesu.