Maatteeo 10 - ꞌBuuk cĩ Thõõth cĩ Nyekuci

Ĩꞌthõ Yeesu ꞌthooyyiak õmmõtõ hĩ ꞌramma

¹ Ũtũvva Yeesu ꞌthooyyiak cĩgĩnnĩg õmmõtõ hĩ ꞌramma hiita hĩ ĩnõõnnõ nẽ aaꞌnyĩk ꞌtirrian ꞌcĩ iiggiaĩ loriẽẽt ꞌcĩg abathĩ hĩ ꞌcĩg ẽẽlanĩ eet mooriꞌthioohĩ cũũmõ cũũmõ.

² ꞌThaarriok cĩg ꞌthooyyiak ꞌcĩg ĩĩn õmmõtõ hĩ ꞌramma ho cieegi: Hõdẽĩ ꞌThimõõnẽ ꞌcĩ haĩ ꞌthaar ũgĩ Pẽẽtũrũ, hĩ ꞌgõtõnĩ ꞌcĩ haĩ Andrea, hĩ ꞌJeemith ngeertĩ ꞌThebedeeo, hĩ ꞌgõtõnĩ ꞌcĩ haĩ Yõaannẽ.

³ Pilippo hĩ Bartolomeeo, Tomaaꞌthio hĩ Maatteeo baa ĩĩn eet ꞌcĩg alũt occoro, ꞌJeemith ngeertĩ Aliveo, hĩ Tadeeo;

⁴ hĩ ꞌThimõõnẽ ꞌcĩ haĩ ꞌThilot, hĩ ꞌJuuda Ithkarioote ꞌcĩ hatĩ aku õhõppõõcan Yeesu.

Tilooinit ꞌcĩ adukiaak ꞌthooyyiak õmmõtõ hĩ ꞌramma

⁵ Baa ĩꞌthõ Yeesu ꞌthooyyiak iccig ĩĩn õmmõtõ hĩ ꞌramma ho, ꞌgõõlaa ꞌcĩ annẽẽkĩ ĩhõõggõ, “Ma hooyyu hĩ eet ꞌcĩg hõllõngaa ĩĩn ꞌJudeei hode ꞌtaaũnnioohĩĩ cĩg eet cĩg Thamaria.

⁶ Õõt hĩ eet cĩg Ĩꞌthĩraẽlĩ diooni, hĩnĩngĩtĩ aattĩg nẽẽg hĩ aꞌtha ꞌcĩg iꞌngittõõthĩ ẽlẽk.

⁷ Nẽ ma oottu, irrioonit nyeemuut ꞌcĩ aĩ, ‘Õbõhĩ habuccieet cĩ hẽẽtkujjieen aau ojoonu.’

⁸ Aanytĩk eet ꞌcĩg õmmõõrĩ hũbũttaathõ, uruguꞌthia eet ꞌcĩg adaahĩ, ũtũũnyĩt eet ꞌcĩg adak helleggeri nẽ itiggiayyu loriẽẽt ꞌcĩg abathĩ. Baa ammũdaannu niig ꞌbaaninit ꞌcĩ hõllõngaa adũmannu thõng, nẽẽthĩ ꞌyioko, eelit niig buúk eet haaga.

⁹ Ma haꞌnyaku ꞌrabbẽẽt hode ꞌdaab hode maccĩrẽẽn.

¹⁰ Nẽ ma haꞌnyaku locoburẽẽt hẽẽrõna hode ĩttooriku ceremwa ũgĩ hode caawa hode hĩbahĩt cĩ tohomiitto, hĩnĩngĩtĩ gõõng ꞌthẽk adiim dticcianniooha ꞌgẽẽn dtiicaa ꞌcĩ adtican nẽẽgĩ.

¹¹ “Ma aduhunnu ꞌtaaũn hode õlõ umwa, ĩꞌthaac eet nẽ idiimtau eet ꞌcĩ õõrĩ ꞌthĩnĩt nẽ aauttu nĩngaata, ĩꞌthõng ũtũngteek nĩngĩtĩho.

¹² Má aduhunnu õlõ umwa, aanytĩk ꞌgattan cĩ ganõõnõ ngaatĩho.

¹³ Má abũnnaa õlõ tĩho, aanytĩk ꞌgattan haau nĩngaata. Má aitiõõ, aanytĩk ꞌgattan cunuung ko, hõbõda hĩ ngagiita.

¹⁴ Nẽẽthĩ, má aburruung eet umwaanĩ hode hõllõngaa athĩhĩ nyeemuut, utuddungteek tuduhaac cĩ ꞌthoo cugguung hĩĩ terethiinit ꞌcĩ aburruung nẽẽg ngagiit, hatĩ ũtũngteehu õlõ tĩho hode ꞌtaaũn tĩho.

¹⁵ Haduhaakuung dĩdĩ, mẽẽn hatĩ ukẽẽnĩtĩ cĩ ꞌThõõdõmĩ hĩ ꞌGõmõõra kõr cĩ decciaanĩt cĩ lootu, hĩllõõan ukẽẽnĩt cĩ ꞌtaaũn tĩho.

Terethiinit cĩ thõõth ꞌcĩ abathĩ

¹⁶ “Hĩꞌthooyyuung naa ngagiit aaut hĩ aꞌtha ꞌcĩg hĩꞌthooikuung hõrggẽẽnaa cĩ huduumwanu. Nẽẽthĩ, õõt eggeenyit aaut hĩ hũkaaꞌnya nẽ iittu tarbalĩg hĩ ngabuuthiꞌnya.

¹⁷ Uꞌthuutti eleeti cugguung, hĩnĩngĩtĩ aggammuung hatĩ eeta nẽ oottuung lokihẽẽtĩ nẽ uuktuung ꞌCieethinii cĩg Laiittak.

¹⁸ Aꞌnyakiaannu hatĩ lokihooa hĩ ꞌgaala ꞌcĩg obbitig hĩ habuẽẽta, hĩnĩngĩtĩ iiginnu nuyyiook cĩgannĩg. Ĩĩn hatĩ ciee kõr ꞌcĩ aduhaaku makayyiook hĩ eet ꞌcĩg hõllõngaa ĩĩn ꞌJudeei nyeemuut caannĩ.

¹⁹ Nẽẽthĩ, ma aggamtuunga, ma hommothiinnu thõõth ꞌcĩ hatĩ ooyyu aduhaannu hode ooyyu hatĩ aduhaannu hutuno. Kõr niccia, adukiaakuung hatĩ thõõth ꞌcĩ ooyyu othooꞌthu,

²⁰ hĩnĩngĩtĩ hõllõngaa hatĩ ngagiit ꞌcĩg hatĩ othooꞌthu ho, Lori cĩ Maaconu ꞌcĩ hatĩ aduhaakuung thõõth ꞌcĩ hatĩ ooyyu othooꞌthu.

²¹ “Waathinnioohĩĩ nĩĩcag noho, õhõppõõcan hatĩ ꞌgotonnia ꞌgõtõnĩ huruhi hadaak nẽ õhõppõõcan maaꞌnyia loholeec cĩnnĩ. Aruhõõ hatĩ lohollia hĩ maajihi hĩ ngaaggi haanytĩk hurukti.

²² Aaburreekuung hatĩ eeta vẽlẽk, hĩnĩngĩtĩ nganĩĩta. Nẽ ẽẽtĩ ꞌcĩ aꞌthũũnnĩ lemiinit cĩnnĩ ĩꞌthõng dtuurnanĩt cĩ lootu, eelliaa hatĩ nẽẽnĩ.

²³ Ma adĩmannuung eeta ꞌbuth ngaamwaanĩ, ũtũngteek nĩngĩtĩho nẽ ivvirru oottu ngaatĩ ꞌrĩĩng. Haduhaakuunga, hõllõngaa hatĩ ẽdẽcaaku ngaatĩ ooyyu ꞌtaaũnnioohĩĩ cĩg Ĩꞌthĩraẽlĩ vẽlẽk, õõaa ꞌcĩ nga hikiaaĩ Ngeertĩ Eeto.

²⁴ “Hõllõngaa occa ĩllõõan loholeec cĩ ꞌthukuulo ꞌlimmannioohit cĩnnĩ, hode ĩllõõan appahaca makayyioohit cĩnnĩ.

²⁵ Ũũppan ngaatĩ occa aayyi loholeec cĩ ꞌthukuulo hĩ ꞌlimmannioohiti cĩnnẽẽnĩ nẽ occa ũũppan appahaca buúk ngaatĩ occa aayyi hĩ makayyioohiti cĩnnẽẽnĩ. Nẽ má aũyya eeta nganĩĩt baattĩ olu anneeka ꞌBeelthebub, aũ hinnia hatĩ eeta eet cĩg halang cĩnnĩ vẽlẽk anneek nganĩ?

Itingolli Nyekuc

²⁶ “Nẽẽthĩ hoti ho, ma hiꞌngolinnu eet umwa! Hẽlẽggĩ vẽlẽk ꞌcĩg aguꞌthi, appulanniaa hatĩ battaala nẽ hẽlẽggĩ vẽlẽk ꞌcĩg ammiꞌthi, au hatĩ edeeꞌnyia.

²⁷ Thõõth ꞌcĩ haduhaakuung naa muguratõõ, õõt othoothit waath nẽ thõõth ꞌcĩ ĩgõrꞌthaaki ẽẽtĩ hĩdĩĩc ĩtaata, othoothit thõõth tĩho õlĩla cĩ ꞌcieethu.

²⁸ Ma hiꞌngolinnu eet ꞌcĩg aruk ẽlẽ diooni nẽ hõllõngaa occa aruk lori buúk. Itingolli Nyekuc diooni ꞌcĩ occa aruk ẽlẽ hĩ lori cunuung ꞌgwoyyiaa ꞌcĩ aalla ũdũt.

²⁹ Hõllõngaa nooyyia ũũtĩ hĩbaallĩ ꞌramma ꞌcĩg kidicig ꞌrabbaacit hõdẽẽthõng? Nẽẽthĩ, hõllõngaa occa adhukiaak umwaa looc, nga haga Maaꞌnyu cĩ hẽẽtahujjieen.

³⁰ Tananga ĩmana cĩg õõ cunni buúk, itigiilli vẽlẽk.

³¹ Ma hiteelinnu, hĩnĩngĩtĩ iiginnu niig eet ꞌcĩg tiirik ĩllõõannu hĩbaallĩ ꞌcĩg hidicig ꞌcĩg mẽẽlĩg.

Uduktaak eet thõõth cĩ Krĩstõ

³² “Ẽẽtĩ ꞌcĩ aduhaak eet ũgĩ aĩ hĩĩnĩ eet caannĩ, haduhaahi hatĩ naa buúk Baaba ꞌcĩ hẽẽtkujjieen hanneehi, ĩĩnĩ nii nuyyioohit caannĩ.

³³ Nẽẽthĩ, ẽẽtĩ ꞌcĩ abũrra nganĩĩt hẽbẽrẽẽnnĩĩ cĩg eetuk, haburi hatĩ naa buúk ĩnõõnnõ hẽbẽrẽẽnnĩĩ cĩg Baaba caannĩ cĩ hẽẽtahujjieen.

Aꞌnyaha Yeesu jore hõllõngaa ganõn

³⁴ “Ma hammuku hainnu hakuu naa haꞌnyaha ganõn looccaa nĩĩcĩ. Hõllõngaa haꞌnyaha ganõn, haꞌnyaha bathi cĩ joro.

³⁵ Hakuu hikia hũtũhũ, “ ‘Nyahaappanĩt hurukto hĩ maajihi, nẽ urukto buheeci hĩ ngaaggi, aruhõõ alawanĩta hĩ inyigwa.

³⁶ Arũmeennu hatĩ hĩ mĩrõk halaꞌngiõõhĩtõõ cugguung.’

³⁷ “Ẽẽtĩ ꞌcĩ ammĩnan maaꞌnyĩ hode aattĩnnĩ hĩllõõan ngaatĩ ammĩnanna nganĩĩta, hõllõngaa ĩĩn caannĩ. Nẽ ẽẽtĩ ꞌcĩ ammĩnan ngeerĩnĩ hode bũhaanyĩnĩ hĩllõõan ngaatĩ occa ammĩnanna nganĩĩta, hõllõngaa ĩĩn nẽẽ buúk eet caannĩ,

³⁸ nẽ ẽẽtĩ ꞌcĩ hõllõngaa irriongan hurucce cĩnnĩ nẽ ũnũa nganĩĩta, hõllõngaa ĩĩn nuyyioohit caannĩ.

³⁹ Ẽẽtĩ ꞌcĩ adiim aꞌthũũnnĩ rũgẽt cĩnnĩ loota nĩnga, adhuheek hatĩ rũgẽt cĩnnĩ ho tuu. Nẽ ẽẽtĩ ꞌcĩ adhuheek rũgẽt cĩnnĩ tuu, hĩnĩngĩtĩ nganĩĩta, aalla hatĩ rũgẽtĩ cĩnnĩ ũdũt.

Dũman cĩ thooꞌthiok ꞌcĩg abũnnaa

⁴⁰ “Ẽẽtĩ ꞌcĩ elemmuung ngagiita, ẽlẽmma nganĩĩt buúk nẽ ẽẽtĩ ꞌcĩ ẽlẽmma nganĩĩta, ẽlẽmĩ eet baa ĩꞌthõõannaa nganĩĩta.

⁴¹ Nẽ ẽẽtĩ ꞌcĩ ẽlẽmĩ põrõvẽtaac hĩnĩngĩtĩ ĩĩn nẽẽ põrõvẽtaac, aaꞌnyĩhoothĩk hatĩ ĩnõõnnõ ꞌbaaniniti cĩ põrõvẽtaacõ. Nẽ má ẽlẽmĩ ẽẽtĩ eet umwa, hĩnĩngĩtĩ adĩman thooꞌthiok ꞌcĩg aũlanĩ, aaꞌnyĩhoothĩk hatĩ ĩnõõnnõ ꞌbaaniniti cĩ eet ꞌcĩ adĩman thooꞌthiok ꞌcĩg aũlanĩ.

⁴² Nẽ má aaꞌnyĩk eet umwaa tarballiook cĩgannĩg ko hooppo cĩ maam ꞌcĩg alalĩ, hĩnĩngĩtĩ ĩĩn eet tĩho nuyyioohit caannĩ, haduhaakuung dĩdĩ, ammũda hatĩ nẽẽ ꞌbaaninit.”