Maarko 8 - ꞌBuuk cĩ Thõõth cĩ Nyekuci

Itirok Yeesu eet aalibꞌnya ꞌwec

¹ Kõr umwa, ikia lothippiti cobbi umwaa tarĩ nẽ kõr tĩho, ũmmũdeek iittiõõ ꞌgẽẽn ꞌcĩ occa adak nẽẽg tõõ. Nĩngĩtĩ avvĩyyĩ Yeesu nuyyiook cĩgĩnnĩg nẽ ĩĩnnĩk,

² “Hammaannihi naa eet niccig gẽrrẽẽt, hĩnĩngĩtĩ hũrũmteea hĩ ĩhõõggõ waathinniook iyyio nẽ aitiõõ ꞌgẽẽn ꞌcĩ occa adak tõõ.

³ Má hĩꞌthooihi naa ĩhõõggõ ꞌgõõl hõõt ĩĩcĩ olu nga hudukto, occa hinnia hatĩ awaalĩth ũgẽẽgĩ ꞌgõõla nẽ etteedito looc, hĩnĩngĩtĩ au nẽẽg ꞌrẽẽna gẽrrẽẽt.”

⁴ Nĩngĩtĩ ẽdẽcĩ nuyyiooha cĩgĩnnĩg ko ĩnõõnnõ annẽẽkĩ, “Ningina occa hatĩ ngaatĩ õdõhõhĩĩ kak ko ꞌcĩ occa hammũdaanĩ ꞌgẽẽn ꞌcĩ ũũppan eet iccig vẽlẽk?”

⁵ Nẽ ijin Yeesu ĩhõõggõ ĩĩnnĩk, “Aꞌnyaku niig ũbũnẽẽt thõng?” Ẽdẽcĩ nẽẽg Yeesu anneek, “Haꞌnyaka ũbũnẽẽt tũkĩramma.”

⁶ Ma ho, uduhaak nẽẽ lothippit haau loota. Nĩngĩtĩ aggamaanĩ ũbũnẽẽt ꞌcĩg ĩĩn tũkĩramma ho nẽ ĩĩnnĩk Nyekuc ĩlaallẽ nẽ appaha, nĩngĩtĩ aaꞌnyĩkĩ nuyyiook cĩgĩnnĩg heꞌngerrieek eeta. Baa nẽ ĩdĩmanit nuyyiooha hĩcĩ aduha nẽẽ ho.

⁷ Nẽ tarĩ baa ammũdeek aꞌnyak nẽẽg ulugo ꞌcĩg abadtẽc buúk, nĩngĩtĩ aggatanĩ Yeesu ulugo niccig nẽ aaꞌnyĩk nuyyiook heꞌngerrieek eeta.

⁸ Ma baa udukto eeta vẽlẽk hũũppattĩ, iita uluttia nuyyiooha thuruthur ꞌcĩg anyiꞌthiaa lohoddwa tũkĩramma ꞌcĩg abbĩꞌthĩĩ.

⁹ Baa ĩĩn eeta vẽlẽk aalibꞌnya ꞌwec, nĩngĩtĩ ĩꞌthõõĩkĩ nẽẽ ĩhõõggõ ꞌgõõl hõõt.

¹⁰ Ma hĩdĩĩkoothong, otodit nẽẽg hĩ nuyyiook cĩgĩnnĩg vẽlẽk haahũl, õõt ĩĩcĩ looc ꞌcĩ haĩ Dalmanutha.

Ajin Variꞌtheei thõõth ꞌcĩ ĩnaat eeta

¹¹ Ma baa ĩthĩhĩt Variꞌtheei aĩ õdõlan Yeesu, iita iꞌthiattaaĩ nẽẽg ẽppẽhattõõ hĩ ĩnõõnnõ. Baa attĩman nẽẽg ĩnõõnnõ hidtican thõõth ꞌcĩ ĩnaat eeta ꞌcĩ aku hẽẽtahujjieen, hẽtẽrẽtha makaaꞌthĩt cĩnnĩ.

¹² Baa õbõdẽẽkĩ Yeesu ꞌthĩnĩt gẽrrẽẽt nẽ õthõõth ĩĩ, “Inni gõõng eeta cĩg irkiꞌnyia iccig hijinit thõõth ꞌcĩ ĩnaat eeta ho? Haduhaakuung naa ngagiita, hõllõngaa hatĩ heterꞌtheehi eet iccig thõõth ꞌcĩ ĩnaat eeta ũdũt.”

¹³ Ma ho, ũtũngeek nẽẽ eet niccig nẽ õtõd haahũl abaahĩ bũlũc ũũk dhoortaa cĩ baakitu.

Abũũla cĩg Variꞌtheei hĩ ꞌcĩg Ẽrõõdẽ

¹⁴ Baa ataarriothĩ nuyyiooha ngaatĩ aꞌnyahaanĩ ũbũnẽẽt hĩĩ mẽẽlĩg, baa hinnia aꞌnyak ũbũnĩ hõdẽẽthõng dioo haahũlatõõ.

¹⁵ Ma nĩngaata, uduhaak Yeesu ĩhõõggõ ĩĩnnĩk, “Ĩcĩnĩt jurrung nẽ aaut dĩkĩĩm, ĩĩtõ ꞌrẽẽttĩg hĩ abũũla cĩg Variꞌtheei hĩ cĩg Ẽrõõdẽ.”

¹⁶ Ma ho, othoothito nuyyiooha nyaagwaana ĩĩtõ, “Õthõõth Yeesu hoti, hĩnĩngĩtĩ hõllõngaa haꞌnyak naag ũbũnẽẽta.”

¹⁷ Ma baa athĩhĩ Yeesu thõõth ꞌcĩ õthõõth nẽẽg ko, ikia ijin ĩhõõggõ ĩĩnnĩk, “Inni othoothit thõõth ꞌcĩ aitiõõnnĩ ũbũnẽẽta tõõ ho? Nga nooyyia ĩcĩnĩt hode nga agaac niig thooꞌthiok cĩgannĩg? Nga aalla adĩĩtĩ ngagiit ooti nẽ nga okommuung ꞌthinneeti noho?

¹⁸ Aꞌnyaku niig hẽbẽrĩ nẽ hõllõngaa acĩneennu. Aꞌnyaku ĩĩna nẽ hõllõngaa athĩkneennu. Nẽ hõllõngaa ammuhooꞌthu thooꞌthiok baag ĩnaat eeta buúk inni?

¹⁹ Ma kõr baa hiroktĩ naa eet aalibꞌnya ꞌtur ũbũnẽẽtĩ ꞌcĩg ĩĩn ꞌtur, ĩĩn nooyyia baa lohoddwaana ꞌcĩg alũtaannu niig ꞌcĩg ũbũnẽẽt ꞌcĩg anyiꞌthiaa thõng?” Ẽdẽcĩ nẽẽg aĩ, “Ĩĩn õmmõtõ hĩ ꞌramma.”

²⁰ “Nẽ hĩ baa happahĩ naa ũbũnẽẽt tũkĩramma nẽ heꞌngereeha eet aalibꞌnya ꞌwec, ĩĩn nooyyia lohoddwaana ꞌcĩg abbĩꞌthĩĩ ꞌcĩg thuruthur ꞌcĩg alũtaannu niig thõng?” Ẽdẽcĩ nẽẽg aĩ, “Ĩĩn tũkĩramma.”

²¹ Nĩngĩtĩ ajini Yeesu ĩhõõggõ annẽẽkĩ, “Nẽ ẽrẽhaauung hutuno?”

Aaꞌnyĩk Yeesu rubenniaahit hĩcĩnĩ

²² Ma baa iita nẽẽg ĩꞌthõng Beꞌthaida, iita aꞌnyaktaak eeta ũgẽẽgĩ Yeesu eet umwa ꞌcĩ rubenĩ nẽ iita alaacõ ĩnõõnnõ huhum eet nicci.

²³ Ma nĩngaata, ikia aggam Yeesu aꞌthiit cĩ rubenniookto ho nẽ ũũhĩ ĩnõõnnõ battaalaa cĩ olu. Nĩngĩtĩ õkõ attũũrĩkĩ ĩnõõnnõ ammũt hẽbẽrẽẽnnĩĩ cĩgĩnnĩg nẽ ataadĩk athĩn cĩgĩnnĩg ẽllaa cĩ rubenniookto nẽ ijin ĩnõõnnõ ĩĩnnĩk, “Occa icinu ꞌgiimwa?”

²⁴ Ma ho, ĩcĩnõõthĩ ẽẽtĩ hẽẽtkujjieen nẽ ĩĩ, “Eeĩ, hacini eeta, hacini aattĩg hĩ hẽẽna ꞌcĩg õvvõ thõng.”

²⁵ Ma nĩngaata, ataadĩk Yeesu ĩnõõnnõ athĩn hẽbẽrẽẽnnĩ tarĩ. Ma ngaati, ĩcĩnĩ ẽẽtĩ lõꞌngõõc, hĩnĩngĩtĩ ũbũttaathõ hẽbẽrĩ nẽ ĩcĩn hẽlẽggĩ vẽlẽk jurrung.

²⁶ Nĩngĩtĩ ĩꞌthõõĩkĩ Yeesu ĩnõõnnõ ꞌgõõl hũũk ĩĩcĩ õlõ cĩnnĩ nẽ uduhaak ĩĩnnĩk, “Ma nga hobodoothi hõkõ ꞌtaaũna tarĩ.”

Lemiinit cĩ Pẽẽtũrũ

²⁷ Baa õõ õvvõõĩ Yeesu hĩ nuyyiook cĩgĩnnĩg olooyyiok ꞌcĩg õbõhõõ hĩ ꞌtaaũn ꞌcĩ haĩ Caetharea Pilippi. Ma ꞌgõõla, ijin Yeesu nuyyiook cĩgĩnnĩg ĩĩnnĩk, “Aĩ ꞌthẽk eeta nganĩĩt nganĩ naa?”

²⁸ Ẽdẽcĩ nẽẽg aĩ, “Aĩ eeta, ĩĩnĩ nii Yõaannẽ Batitta, aĩ ũgẽẽgĩ, ĩĩnĩ nii Eliijja nẽ tarĩ, ĩĩtõ ũgẽẽgĩ, ĩĩnĩ nii põrõvẽtaac umwa.”

²⁹ Nẽ ijin Yeesu ĩhõõggõ tarĩ ĩĩnnĩk, “Ma ꞌthẽk niig dẽẽdẽ, ainnu nganĩ naa?” Ẽdẽcĩ Pẽẽtũrũ aĩ, “Ĩĩnĩ nii Krĩstõ.”

³⁰ Nĩngĩtĩ aduhaakĩ Yeesu ĩhõõggõ komiitta annẽẽkĩ, “Ma happulanaannangu.”

Õthõõth Yeesu thõõth cĩ daahĩth cĩnnĩ

³¹ Ma nĩngaata, iꞌthianaaĩ Yeesu illiman nuyyiook ĩĩnnĩk, “Ammũda hatĩ Ngeertĩ Eeto ꞌcannan cobbi gẽrrẽẽt nẽ abũrĩ hatĩ makayyiooha cĩg eetuk hĩ makayyiook cĩg paadĩrꞌnyaannu hĩ ꞌlimmanniook cĩg nyattal cĩ Mũũꞌtha ĩnõõnnõ. Aruhi hatĩ nẽẽ hadaak nẽ ũrũga tarĩ, urutaa cĩ waathinniook iyyio.”

³² Baa aduha nẽẽ thõõth icci cũrũmũũm hẽbẽrẽẽnnĩĩ cĩg eetuk vẽlẽk. Ma ho, ikia ũũhĩ Pẽẽtũrũ Yeesu ngadiiha nẽ ũũk eggerenyeek ĩnõõnnõ.

³³ Ma nĩngaata, ubbuudõthĩ Yeesu nuyyiook cĩgĩnnĩg nẽ eggerꞌnyeek Pẽẽtũrũ ĩĩnnĩk, “Ĩĩnĩ nii ꞌThĩttaan! Bĩĩt ĩĩcĩ bahuc caannĩ.” Nẽ tarĩ ĩĩnnĩk, “Ĩĩn muhẽẽnĩtĩ cunni muhẽẽnĩt cĩ eeto haaga, hõllõngaa ĩĩn cĩ Nyekuci.”

³⁴ Nĩngĩtĩ avvaanĩ Yeesu lothippit hĩ nuyyiook cĩgĩnnĩg hummuddiaak ĩnõõnnõ nẽ uduhaak ĩhõõggõ ĩĩnnĩk, “Má adiim eet umwaa ĩĩn nuyyioohit caannĩ, aꞌnyĩĩk ĩnõõnnõ hũtũbũr ẽlẽ cĩnnĩ nẽ irriongan hurucce cĩnnĩ nẽ ũnũa nganĩĩta.

³⁵ Má adiim ẽẽtĩ umwaa ẽẽla rũgẽt cĩnnĩ, adhuheek hatĩ nẽẽ rũgẽt cĩnnĩ ho tuu nẽ ẽẽtĩ ꞌcĩ adhuheek rũgẽt cĩnnĩ tuu, hĩnĩngĩtĩ nganĩĩt hĩ nyeemuut ꞌcĩ abũnnaa, ẽẽla hatĩ nẽẽ rũgẽt cĩnnĩ.

³⁶ Ne ꞌcĩ occa abũnnaa ꞌcĩ ammũda ẽẽtĩ, hatĩ aꞌnyak hẽlẽggĩ cĩg looc nicci vẽlẽk nẽ iꞌnginõõthĩ lorii cĩnnẽẽnĩ?

³⁷ Ne ꞌcĩ occa ataalõnĩ ẽẽtĩ hĩ lori cĩnnĩ?

³⁸ Má aꞌngaaõn ẽẽtĩ umwaa, hĩnĩngĩtĩ nganĩĩt hĩ ꞌlimman caannĩ waathinnioohĩĩ cĩg eet cĩg attihi eeta ngaaĩ cĩg eetuk hĩ waathinnioohĩ ꞌcĩg ĩĩnnĩ eeta ꞌthẽccanniook ko, aꞌngaaõn hatĩ Ngeertĩ Eeto buúk, hĩnĩngĩtĩ eet tĩho, hatĩ õbõda nẽẽ bulẽẽttaa cĩ Maacõnĩ, hatĩ ookorria hĩ aajĩlẽẽt ꞌcĩg ẽllẽẽmĩthĩ.”