Maarko 3 - ꞌBuuk cĩ Thõõth cĩ Nyekuci

Eet ꞌcĩ alalliaa aꞌthiiti

¹ Ma baa kõr umwa, ikia ũũk Yeesu ĩĩcĩ ꞌCieeth cĩ Laiitto nẽ baa aaĩ ẽẽtĩ umwaa ꞌcĩ alalliaa aꞌthiiti tõõ nĩngaata.

² Baa adiim Variꞌtheei ũgẽẽgĩ ammũda ꞌgõõl ꞌcĩ õhõppõõcanẽẽkĩ Yeesu thõõth ꞌcĩ abathĩ nẽ ebehit ĩnõõnnõ gẽrrẽẽt, hátĩ hĩcĩnĩt má aaꞌnyĩk nẽẽ eet nicci õmmõõrĩ ho hũbũna Kõrraa cĩ ꞌYiommaanõ ho dĩdĩ.

³ Ma nĩngaata, ikia uduhaak Yeesu eet ꞌcĩ alalliaa aꞌthiiti ho ĩĩnnĩk, “Tĩnga ꞌjieena bĩĩl hõrggẽẽna ngaatĩ acĩnni eeta vẽlẽk.”

⁴ Ma ho, ijin nẽẽ Variꞌthei ĩĩnnĩk, “Occa abũnnaa ngaatĩ hadticanĩ ꞌgii ꞌcĩ abũnnaa hode ꞌcĩ abathĩ Kõrraa cĩ ꞌYiommaanõ? Occa hẽẽla rũgẽt cĩ eeto Kõrraa cĩ ꞌYiommaanõ hode haruk thõng?” Ĩjjaaki hinnia nẽẽg vẽlẽk kim, hiꞌthihi eet ꞌcĩ ẽdẽcĩ buúk.

⁵ Nĩngĩtĩ ẽggẽlẽẽmĩ Yeesu ĩhõõggõ lĩĩlĩẽẽttaa nẽ iittiõõ hõllõngaa accamanoothĩk, hĩnĩngĩtĩ baa õkõmĩ ĩhõõggõ ooti. Nẽ uduhaak eet nicci ĩĩnnĩk, “Õõd aꞌthiit cunni hũũlan.” Nĩngĩtĩ õõdĩ nẽẽ aꞌthiit nẽ ũbũna aꞌthiiti cĩnnĩ ho tarĩ!

⁶ Ma adtuuha Variꞌtheei thõõth icci ho, iita uduhunit õõt battaalaa cĩ ꞌCieeth cĩ Laiitto, nĩngĩtĩ õõ atuhanĩ hĩ eet cĩg Ẽrõõdẽ, ꞌgõõl ꞌcĩ occa aruhi nẽẽg Yeesu.

Lothippit cobbi ꞌcĩ anũ Yeesu

⁷ Ma baa õõt Yeesu hĩ nuyyiook cĩgĩnnĩg ĩĩcĩ bũlũcõ, ikia ũnũ lothippiti ꞌcĩ maka ꞌcĩ aku ꞌGalileea ĩnõõnnõ.

⁸ Ma baa athĩhĩ nẽẽg thooꞌthiok vẽlẽk ꞌcĩg baag adtican Yeesu ho, iita ummuddiaak eeta ꞌcĩg mẽẽlĩg gẽrrẽẽt ĩnõõnnõ. Baa au eeta cieeg looccaa cĩ ꞌJudeea hĩ ꞌJeruꞌthalẽma hĩ looccaa ꞌcĩ haĩ Idumeea, hĩ ꞌcĩg au ĩĩcĩ uruto cĩ hidioo cĩ ꞌJõrdanĩ nẽ iita ũgẽẽgĩ ꞌtaaũnnioohĩĩ cĩg ꞌTire hĩ ꞌThidõõnẽ.

⁹ Baa maka lothippiti cĩ eetu ho gẽrrẽẽt, nĩngĩtĩ aduhaakĩ Yeesu nuyyiook cĩgĩnnĩg haꞌnyakta haahũl haavvi nẽẽnĩ, hátĩ hiittiõõ hõllõngaa ẽẽhõnĩ eeta ĩnõõnnõ.

¹⁰ Ma baa aaꞌnyĩk nẽẽ eet ꞌcĩg mẽẽlĩg hũbũttaathõ ho, iita eeta vẽlẽk ꞌcĩg baag õmmõõrĩ, õꞌngõnytõõĩ ꞌgõõl ꞌcĩ aayyi nẽẽnĩ, aĩ hátĩ huhumta ĩnõõnnõ.

¹¹ Ma baa acĩn eeta ꞌcĩg aꞌnyak loriẽẽt ꞌcĩg abathĩ ĩnõõnnõ ho, iita etteedito looc nẽ urruuyyio ĩĩtõ, “Ĩĩnĩ nii Ngeertĩ Nyekuci!”

¹² Nĩngĩtĩ aduhaakĩ Yeesu ĩhõõggõ komiitta annẽẽkĩ, “Ma hõõ haduhaaku eet umwa hanneeku nganĩĩt nganĩ naa.”

Ẽbẽra Yeesu ꞌthooyyiak õmmõtõ hĩ ꞌramma

¹³ Ma nĩngaata, ũũk aau Yeesu muuraa hujjieen nẽ ũtũvvũ eet baag adiim nẽẽ hiita hĩ ĩnõõnnõ.

¹⁴ Nĩngĩtĩ ẽbẽraanĩ nẽẽ eet õmmõtõ hĩ ꞌramma nẽ akateek ꞌthaar ꞌcĩg haĩ ꞌthooyyiak, hátĩ hũrũmtĩ hĩ ĩnõõnnõ nẽ ĩꞌthooĩk hõõt ꞌlimmaana,

¹⁵ nẽ aaꞌnyĩk ĩhõõggõ makaaꞌthĩt ꞌcĩ iiggiaĩ loriẽẽt ꞌcĩg abathĩ.

¹⁶ Eet õmmõtõ hĩ ꞌramma ꞌcĩg ẽbẽra nẽẽ ho cieegi. ꞌThimõõnẽ ꞌcĩ akanneek Yeesu ꞌthaar ꞌcĩg haĩ Pẽẽtũrũ,

¹⁷ ꞌJeemith hĩ ꞌgõtõnĩ Yõaannẽ, lõhõlĩ cĩg ꞌThebedeeo ꞌcĩg akanneek Yeesu ĩhõõggõ ꞌthaar ꞌcĩg haĩ Boanergeth, nĩngĩtĩ aĩ, “Lõhõlĩ cĩg Boroheecak.”

¹⁸ Andrea, Pilippo, Bartolomeeo, Maatteeo, Tomaaꞌthio, ꞌJeemith ngeertĩ Aliveo, Tadeeo, ꞌThimõõnẽ baa gõõng ĩĩn ꞌThilot,

¹⁹ hĩ ꞌJuuda Ithkarioote ꞌcĩ hatĩ õkõ õhõppõõcan Yeesu.

Yeesu hĩ ꞌBeelthebub

²⁰ Ma baa ũũk uduhun Yeesu ꞌcieeth, ikia uluttia lothippiti cobbi gẽrrẽẽt, hanyaman ĩnõõnnõ hĩ nuyyiook cĩgĩnnĩg ꞌgõõl ꞌcĩ aduhẽẽnĩ.

²¹ Ma baa athĩhĩ ittioonnioha cĩgĩnnĩg thõõth icci ho, iita idiimito õõt utugurria ĩnõõnnõ aĩ hoottia ĩĩcĩ olu, hĩnĩngĩtĩ baa ammuk nẽẽg aĩ, “Adak ĩnõõnnõ maangõnĩ.”

²² Baa õthõõth ꞌlimmanniooha ũgẽẽgĩ cĩg nyattal cĩ Mũũꞌtha, ꞌcĩg baag au ꞌJeruꞌthalẽma aĩ, “Aꞌnyak nẽẽ ꞌThĩttaan ꞌcĩ haĩ ꞌBeelthebub ẽllaa cĩnnĩ nẽ iiggia nẽẽ loriẽẽt ꞌcĩg abathĩ ho, makaaꞌthĩtaa ꞌcĩ ĩĩnnĩ habu cĩ loriẽẽt ꞌcĩg abathĩ.”

²³ Ma ho, ũtũvvũ Yeesu ĩhõõggõ hiita hĩ ĩnõõnnõ nẽ uduhaak thõõth ꞌcĩ awantoothĩk anneek, “Occa gõõng iiggia ꞌThĩttaanĩ ꞌThĩttaan ꞌgõõnĩ hutuno?”

²⁴ Má ẽꞌngẽrĩ habuccieet umwaa nẽ aꞌnyak jore ẽmmẽn, ĩꞌthaanni hatĩ habuccieet niccia.

²⁵ Nẽ má eꞌngerri eeta halangatõõ nẽ urukto nyaagwaana, aitiõõ hatĩ halang niccia hõllõngaa abĩlĩ ĩꞌthõng, ĩĩn hatĩ dtuurnanĩt cĩnnĩ niccia.

²⁶ Má ẽꞌngẽr ꞌThĩttaanĩ habuccieet cĩnnĩ hĩĩ mẽẽlĩg, aitiõõ hatĩ nẽẽ hõllõngaa aalla ĩꞌthõng, ĩꞌthaanni hatĩ nẽ ĩĩ dtuurnanĩt cĩnnĩ niccia.

²⁷ “Nẽ dĩdĩ, occa hõllõngaa aduhun ẽẽtĩ umwaa ꞌcieeth cĩ eet ꞌcĩ attiranĩ nẽ ũũhĩ ijjio cĩgĩnnĩg, hatĩ nga hẽcẽb ĩnõõnnõ. Occa nõõ ẽcẽb nẽẽ ĩnõõnnõ thõng, nẽẽthĩ ẽbẽlan ijjio cĩgĩnnĩg.

²⁸ “Haduhaakuung naa ngagiit dĩdĩ, ũũnnothoothĩk hatĩ eet ꞌthẽccanẽẽta vẽlẽk hĩ thooꞌthiok ꞌcĩg ĩĩn doominit vẽlẽk ꞌcĩg horoong aduha nẽẽgĩ, tananga habathit hẽlẽggĩ tĩko gẽrrẽẽt.

²⁹ Nẽẽthĩ, ẽẽtĩ ꞌcĩ õdõõm Lori ꞌcĩ Ẽllẽẽmĩthĩ, aitiõõ hatĩ hõllõngaa ũũnnothoothĩk ꞌthẽccanẽẽta cĩgĩnnĩg ũdũt, hĩnĩngĩtĩ ĩdĩman nẽẽ ꞌthẽccan ꞌcĩ aalla ooo.”

³⁰ Baa õthõõth Yeesu hoti, hĩnĩngĩtĩ baa aĩ eeta, “Aꞌnyak nẽẽ lori ꞌcĩ abathĩ ẽllaa cĩnnĩ.”

Aattĩ Yeesu hĩ ꞌgõtõõnõgĩ cĩgĩnnĩg

³¹ Ma nĩngaata, uppwaatta aattĩ Yeesu hĩ ꞌgõtõõnõgĩ, iita ĩbĩlĩt battaala nẽ ĩꞌthõõcõ eet umwa hũũk hũtũvvũ ĩnõõnnõ.

³² Baa arũmĩ Yeesu hĩ lothippit cĩ eetu, nĩngĩtĩ annẽẽkĩ nẽẽg ĩnõõnnõ, “Aĩ nganiit morwahit arũmĩ hĩ ꞌgotoonogu hĩ ngoonogu battaala adiimmi nganiita.”

³³ Ẽdẽcĩ Yeesu ĩhõõggõ anneek, “Nganĩ ꞌcĩ ĩĩn morwahit caannĩ nẽ hĩnganĩ ꞌcĩg ĩĩn ꞌgotoonoga ho?”

³⁴ Nĩngĩtĩ akannĩ nẽẽ hẽbẽrĩ lothippit nẽ õthõõth ĩĩ, “Ĩĩn cieeg morwahit caannĩ hĩ ꞌgotoonoga hĩ ngoonoga cĩgannĩg!

³⁵ Ẽẽtĩ ꞌcĩ ammĩnan nẽ ũnũ thõõth cĩ Nyekuci, ĩĩn ꞌgõtõna hĩ ngõõna hĩ morwahit caannĩ.”