Maarko 2 - ꞌBuuk cĩ Thõõth cĩ Nyekuci

Aaꞌnyĩk Yeesu eet hũbũna

¹ Ma baa urutaa cĩ waathinniook ꞌcĩg abadtẽc haaga, ikia õbõdõõthĩ Yeesu ũũk ĩĩcĩ ꞌtaaũn cĩ Kapernaumĩ nẽ ĩꞌthanothoothĩk nyeemuut looc hĩdĩĩkoothong, ĩthĩhĩt eeta aĩ ikia nẽẽ õlõ.

² Nĩngĩtĩ allũnganniaanĩ eeta ꞌcĩg mẽẽlĩg auuni hĩbbĩt ꞌcieeth hõdõlan hattũũg, hiittiõõ nĩngĩtĩ idiongan tõõ. Nẽ ikia illimaneek Yeesu ĩhõõggõ thõõth cĩ Nyekuci.

³ Ma ho, uppwaatta eeta ꞌwec ꞌcĩg irriongana eet umwa ꞌcĩ alalliaa ẽlẽ.

⁴ Baa aꞌnyaman ĩhõõggõ ꞌgõõl ꞌcĩ õdõlanĩ Yeesu, hĩnĩngĩtĩ lothippit cobbi ho. Nĩngĩtĩ õtõdĩ nẽẽg ꞌcieeth nẽ õõt erreccia hutuli ꞌcieetha lokora, ngaatĩ aayyi Yeesu dẽẽdẽ. Ma baa erreccia ẽlẽk, iita õyõyyõõratta nẽẽg eet ꞌcĩ alalliaa ẽlẽ ho ĩꞌthõng hõdõlan looc ngaatĩ aayyi Yeesu.

⁵ Ma baa acĩn Yeesu lemiinit cĩnĩĩng ko, ikia uduhaak eet ꞌcĩ õmmõõrĩ ho ĩĩnnĩk, “Loholeec caannĩ, ũtũngtoothĩk nganiit ꞌthẽccanẽẽta cugunnẽẽgĩ.”

⁶ Baa aattĩg ꞌlimmanniooha cĩg nyattal cĩ Mũũꞌtha iccioloongan nĩngaata nẽ ummuhit ẽmmẽn ĩĩtõ,

⁷ “Inni ꞌthẽk hõthõõth ẽẽtĩ ciee hoti ho? Ĩĩn ciee doominit hĩ Nyekuc. Nganĩ gõõng ꞌcĩ occa ammaannĩk eet, hĩnĩngĩtĩ ꞌthẽccanẽẽt cĩggĩĩng ko? Nyekuc dioo ꞌcĩ occa ammaannĩhĩ.”

⁸ Baa aga Yeesu muhẽẽnĩt cĩnĩĩng ko hĩdĩĩkoothong nẽ ijin ĩhõõggõ ĩĩnnĩk, “Inni ummuhit niig thooꞌthiok ꞌcĩg aattĩg noho ho?

⁹ Thõõth iina ꞌcĩ ammũjĩ, ꞌcĩ hannẽẽkĩ eet icci õmmõõrĩ ho, ‘Ũtũngtoothĩk nganiit ꞌthẽccanẽẽta,’ hode ꞌcĩ hannẽẽkĩ, ‘Tĩnga, dũhan lotoonu cunni bĩtõ?’

¹⁰ Nẽẽthĩ hátĩ agaac ĩĩtõ, aꞌnyak Ngeertĩ Eeto makaaꞌthĩt ꞌcĩ ammaannĩkĩ eet, hĩnĩngĩtĩ ꞌthẽccanẽẽt loota nĩnga.” Nĩngĩtĩ aduhaakĩ eet ꞌcĩ alalliaa ẽlẽ ho annẽẽkĩ,

¹¹ “Hanneekii naa nganiit tĩnga, dũhan lotoonu cunni bĩĩt ĩĩcĩ olu.”

¹² Ma ho, ĩtĩnga ẽẽtĩ nicciee hẽbẽrẽẽnnĩĩ cĩg eet vẽlẽk nẽ ũdũhan lotoonu cĩnnĩ nĩngĩtĩ õkõõĩ, acĩn lothippiti vẽlẽk. Baa abulan thõõth ciee eet vẽlẽk nẽ ĩdĩhĩthĩt nẽẽg Nyekuc gẽrrẽẽt ĩĩtõ, “Gõõng nga hĩcĩtta thõõth ꞌcĩ aaĩ hoti ũdũt!”

Ũtũvvũ Yeesu ꞌLeevi

¹³ Ma baa ikia õbõdõõthĩ Yeesu ũũk ĩĩcĩ dẽmẽt cĩ Bũlũc cĩ ꞌGalileea tarĩ, baa aku lothippiti cobbi gẽrrẽẽt irriamaneek ĩnõõnnõ, nĩngĩtĩ iꞌthianaanĩ nẽẽ allimanĩ ĩhõõggõ.

¹⁴ Ma baa nga õvvõ nẽẽnĩ, ẽdẽẽnyõthĩ ꞌLeevi ngeertĩ Aliveo, iccioloongan ngaatĩ adũmanĩ eeta occoro. Nĩngĩtĩ annẽẽkĩ ĩnõõnnõ, “Nũaa nganĩĩta!” Ma ho, ikia ĩtĩnga ꞌLeevi nẽ ũnũ ĩnõõnnõ.

¹⁵ Ma baa uruta, iita udukto Yeesu hĩ eet ꞌcĩg mẽẽlĩg ꞌcĩg alũt occoro hĩ ꞌthẽccanniook, hĩ nuyyiook cĩgĩnnĩg õlõõ cĩ ꞌLeevi. Baa mẽẽlĩg eeta gẽrrẽẽt ꞌcĩg anũ ĩnõõnnõ.

¹⁶ Ma baa acĩn ꞌlimmanniooha cĩg nyattal cĩ Mũũꞌtha ꞌcĩg baag ĩĩn Variꞌtheei Yeesu, ngaatĩ aduhẽẽnĩ hĩ eet ꞌcĩg alũt occoro hĩ ꞌthẽccanniook ko, ijinit nẽẽg nuyyiook cĩgĩnnĩg ĩĩttĩk, “Inni hudukto Yeesu hĩ eet ꞌcĩg alũt occoro hĩ ꞌcĩg ĩĩn ꞌthẽccanniook hõdẽĩ ho?”

¹⁷ Ma baa athĩhĩ Yeesu thõõth icci ho, ẽdẽc ĩhõõggõ ĩĩnnĩk, “Aitiõõ hõllõngaa eet ꞌcĩg abũnnaa ꞌcĩg adiim akĩĩm, ĩĩn eet ꞌcĩg õmmõõrĩ diooni ꞌcĩg adiim ĩnõõnnõ. Baa hõllõngaa hakuu naa, hĩnĩngĩtĩ eet ꞌcĩg abũnnaa, hakuu naa, hĩnĩngĩtĩ ꞌthẽccanniook.”

Jinẽẽnĩt cĩ thõõth ꞌcĩ hẽdẽtaanĩ eleeti ꞌgẽẽna

¹⁸ Kõr umwa, baa ẽdẽta nuyyiooha cĩg Yõaannẽ Batitta hĩ eet ꞌcĩg ĩĩn Variꞌtheei eleeti ꞌgẽẽna. Ma ho, iita eeta ũgẽẽgĩ ijinit Yeesu ĩĩttĩk, “Inni nuyyiooha cĩg Yõaannẽ Batitta hĩ nuyyiook cĩg Variꞌtheei hedettia eleeti ꞌgẽẽna nẽ iittiõõ cugunnig hõllõngaa ẽdẽta eleeti ho?”

¹⁹ Ẽdẽcĩ Yeesu ĩhõõggõ anneek, “Hõllõngaa occa ẽdẽta eeta ꞌcĩg ĩĩn ꞌgõõnõgĩ nyattaraanak eleeti ꞌgẽẽna, hatĩ nga arũmĩ nẽẽ hĩ ĩhõõggõ.

²⁰ Nẽẽthĩ, aaĩ hatĩ kõrra umwaa ꞌcĩ ũũnnĩkĩ nyattaraan ĩhõõggõ nẽ hatĩ edettia nẽẽg eleeti kõr niccia.

²¹ “Aitiõõ ẽẽtĩ umwaa ꞌcĩ occa ahubeek cẽrẽm ꞌcĩ ĩĩn ngeju cẽrẽmaa ꞌcĩ ũnũũk tõõ. Má uhubeeha, ẽrrẽẽc hinnia hatĩ cẽrẽm ꞌcĩ ĩĩn ngeju cẽrẽm ꞌcĩ ũnũũk ko, hĩĩ maka loppulacĩ.

²² Nẽ aitiõõ ẽẽtĩ ꞌcĩ occa adũddeek mẽrtĩ cĩ viinoo ꞌcĩ ĩĩn ngeju hutubaawa ꞌcĩ ũnũũk tõõ, má ũtũdũdeeha, alibi hinnia hatĩ hutuba hudduuti mẽrta. Abũnnaa ngaatĩ adũddẽẽkĩ ẽẽtĩ mẽrtĩ cĩ viino ꞌcĩ ĩĩn ngeju hutubaawa ꞌcĩ nga ĩĩn ngeju.”

Makayyioohit cĩ Kõr cĩ ꞌYiommaanõ

²³ Ma baa Kõrraa umwaanĩ ĩcĩ ꞌYiommaanõ, baa õõkõr Yeesu hĩ nuyyiook cĩgĩnnĩg ẽꞌngẽrkẽẽthan mana umwa cĩ ꞌgẽẽmẽ nẽ weetaa cĩnĩĩng ko, ajatta nuyyiooha cĩgĩnnĩg ꞌgẽẽmẽ ũgĩ.

²⁴ Nĩngĩtĩ annẽẽkĩ Variꞌtheei Yeesu, “Cĩĩn nõõ, inni hĩdĩmanit nuyyiooha cugunnig ꞌgii ꞌcĩ aꞌngirannii Kõrraa cĩ ꞌYiommaanõ ho?”

²⁵ Ẽdẽcĩ Yeesu aĩ, “Nga nooyyia itigiilit niig thõõth baa adĩman habuui Daavide, kõr baa adiimi nẽẽ hĩ eet cĩgĩnnĩg ꞌgẽẽn baa adak magĩthĩ?

²⁶ Baa aduhun nẽẽ ꞌCieeth cĩ Nyekuci waathinnioohĩĩ baag ĩĩnnĩ Abiatharĩ paadĩr cobbi, nẽ ũũk uduk ꞌgẽẽn ꞌcĩ aggatanĩ ẽlẽk, ꞌcĩ occa aduk paadĩrꞌnya diooni nẽ ẽꞌngẽra umwa aaꞌnyĩk eet baag õõkõr hĩ ĩnõõnnõ.”

²⁷ Nĩngĩtĩ aduhaakĩ Yeesu ĩhõõggõ annẽẽkĩ, “Baa aarĩhoothĩk Kõrra cĩ ꞌYiommaanõ hĩĩ bũnnai cĩ eetu nẽ baa hõllõngaa ẽhẽnytaa eeta hĩĩtõ bũnnai cĩ Kõr cĩ ꞌYiommaanõ.

²⁸ Nẽẽthĩ ꞌyioko, ĩĩn Ngeertĩ Eeto Makayyioohit cĩ Kõr cĩ ꞌYiommaanõ.”