Maarko 11 - ꞌBuuk cĩ Thõõth cĩ Nyekuci

Aduhun Yeesu ꞌJeruꞌthalẽm

¹ Ma baa õbõktĩ Yeesu hĩ nuyyiook cĩgĩnnĩg õdõlanit ꞌJeruꞌthalẽm, iita uppwaattak ꞌtaaũnniook ꞌcĩg haĩ Bẽthvaje hĩ Bẽthani Muuraa cĩ Olivi. Ma nĩngaata, ikia ĩꞌthõ Yeesu nuyyiook cĩgĩnnĩg ꞌramma hutuattĩ hõõt ĩĩcĩ oou.

² Baa aduhaak Yeesu ĩhõõggõ anneek, “Õõt õlõõ ꞌcĩ acinooꞌthu hata nẽ ma uduhuttu, ammũdoothiku hatĩ thigir ꞌcĩ hidici ꞌcĩ ecebbi ꞌcĩ nga hõtõõĩ eet umwaa ũdũt. Õõgta noho nẽ aꞌnyaktaau ngaati.

³ Má ajinnuung eet umwaa anneekuung, ‘Ne ꞌcĩ adĩmannu ho?’ Uduktaak ĩĩttĩk, ‘Adiim Makayyioohiti thigir nẽ õbõdaanĩ hatĩ hĩdĩĩkoothong.’ ”

⁴ Nĩngĩtĩ õõ ammũdõõthĩkĩ nuyyiooha cĩg Yeesu ho thigir tĩho dĩdĩ, ecebbi hattũũga ꞌgõõla. Ma baa aĩ hõõgtawa nẽẽg thigir ko,

⁵ ajin hinnia eeta ũgẽẽgĩ ꞌcĩg baag abĩlĩ nĩngaata ĩhõõggõ anneek, “Ne ꞌcĩ adĩmannu niig hataa? Õõgannu thigir nicciaa inni?”

⁶ Ma ho, edecit nuyyiooha ꞌgõõlaa ĩbaa aduhaakĩ Yeesu ĩhõõggõ, nĩngĩtĩ ẽlẽmaakĩ eeta tĩko ĩhõõggõ thigir hootti.

⁷ Ma baa ootti nẽẽg thigir aꞌnyaktoothĩk Yeesu, õõt ataaddik ceremwa cĩggĩĩng bahuucaa cĩ thigiiro, nĩngĩtĩ ataadõõthĩkĩ Yeesu bahuuca lokora.

⁸ Baa mẽẽlĩg eeta ꞌcĩg aara ceremwa cĩggĩĩng ꞌcĩg bungẽẽttak nẽ eteettik ꞌgõõla nẽ tarĩ eteettik ũgẽẽgĩ taba ꞌcĩg ẽꞌngẽdda mõrẽẽnĩtõõ.

⁹ Baa awacak eeta ꞌcĩg baag uwwattĩ hĩ ꞌcĩg au uruta vẽlẽk aĩ, “Hubuluthit Nyekuc!” “Aꞌnyĩĩk Nyekuc haggatan eet ꞌcĩ aku ꞌthaarĩĩ cĩg Makayyiookto!”

¹⁰ “Aꞌnyĩĩk Nyekuc haggatan habuccieet ꞌcĩ hatĩ aku hĩ baangeet cĩnaac Daavide!” “Hĩdĩhĩthĩt Nyekuc ꞌcĩ aaĩ hẽẽtahujjieen!”

¹¹ Ma baa õdõlan Yeesu ꞌJeruꞌthalẽm, ũũk uduhun nẽẽ ꞌCieeth cĩ Nyekuci nẽ atarraaban looc hĩcĩn hẽlẽggĩ vẽlẽk. Ma baa utub lõõcĩ, õõt nẽẽg hĩ ꞌthooyyiak cĩgĩnnĩg ĩĩcĩ Bẽthani.

Ĩccĩĩn Yeesu ꞌmũũnĩc

¹² Ma baa loohoth cĩnnĩ, baa ũtũngteek Yeesu hĩ nuyyiook cĩgĩnnĩg Bẽthani, ikia adak ĩnõõnnõ magĩthĩ.

¹³ Nĩngĩtĩ acĩnõõꞌthĩ ꞌmũũnĩc umwa ꞌcĩ dhudhungik bõllõõha ꞌrẽẽna, ma aĩ hũũk hĩcĩn ko, ammũdoothĩk hinnia nga hõddõngõt buúk, hĩnĩngĩtĩ baa hõllõngaa nyĩlõk ꞌcĩ abbiirri ꞌmũũnĩ niccia.

¹⁴ Ma nĩngaata, ĩccĩĩn Yeesu ꞌmũũnĩc nicci ĩĩnnĩk, “Hiꞌthihi hatĩ eet umwa ꞌcĩ aduki tarĩ ũdũt!” Nẽ baa athĩhĩ nuyyiooha cĩgĩnnĩg ĩnõõnnõ muguruur.

Itiggia Yeesu eet ꞌCieethaa cĩ Nyekuci

¹⁵ Ma baa õdõlanit Yeesu hĩ nuyyiook cĩgĩnnĩg ꞌJeruꞌthalẽm, ũũk uduhun nẽẽ halaangatõõ cĩ ꞌCieeth cĩ Nyekuci nẽ ũũk itiggiawaak tuuyyiok ꞌcĩg baag ũũtẽnĩ ijjio cĩggĩĩng vẽlẽk battaala. Baa ebelluukan nẽẽ tẽrẽmẽẽjĩt cĩg eet ꞌcĩg appak ꞌrabbẽẽta hĩ dtaabĩt cĩg eet ꞌcĩg ũũtẽnĩ ngabuuthiꞌnya,

¹⁶ nẽ hõllõngaa ẽlẽmaakĩ eet umwa ngaatĩ irrionganĩ ꞌgiimwa halangatõõ cĩ ꞌCieeth cĩ Nyekuci.

¹⁷ Nĩngĩtĩ allimanĩ eet annẽẽkĩ, “Aĩ Nyekuci ꞌBuuhaa cĩnnĩ, “ ‘Haĩ hatĩ ꞌCieeth caannĩ, ꞌCieeth cĩ Laiitto, ꞌcĩ alaiini eeta vẽlẽk cĩg loonyinu.’ Auunnu hinnia niig aarru hĩĩ ‘nĩngĩtĩ aguꞌthẽẽnĩ igorriaaha!’ ”

¹⁸ Ma baa athĩhĩ makayyiooha cĩg paadĩrꞌnyaannu hĩ ꞌlimmanniook cĩg nyattal cĩ Mũũꞌtha thõõth icci ho, iita atarrabanit ꞌgõõl ꞌcĩ adiim aruhi Yeesu. Nẽ baa itieelli nẽẽg ĩnõõnnõ, hĩnĩngĩtĩ baa mẽẽlĩg eeta ꞌcĩg abulan ꞌlimmanĩ cĩnnĩ ho gẽrrẽẽt.

¹⁹ Ma baa ĩĩ ꞌjiaatĩn lõõcĩ, uduhutta Yeesu hĩ nuyyiook cĩgĩnnĩg ꞌtaaũnaa cĩ ꞌJeruꞌthalẽmĩ battaala.

ꞌLimman cĩ ꞌmũũnĩcõ

²⁰ Ma baa loohoth cĩnnĩ ngerrenita, baa nga õvvõ Yeesu hĩ nuyyiook cĩgĩnnĩg ꞌgõõlaa, iita udtuukta nuyyiooha cĩgĩnnĩg ꞌmũũnĩc ngaatĩ õdõhõknĩ ĩꞌthõng hõdõlan cõrrẽẽna.

²¹ Ĩko nẽẽ nga ammuhoothi Pẽẽtũrũ thõõth baa accĩĩnĩ Yeesu ꞌmũũnĩc, nĩngĩtĩ aduhaakĩ Pẽẽtũrũ Yeesu annẽẽkĩ, “Cĩĩn nõõ ꞌlimmannioohit, ꞌmũũnĩc baa acciinni nii ciee õdõhõk kak ko!”

²² Ma nĩngaata, uduhaak Yeesu nuyyiook ĩĩnnĩk, “Aꞌnyahit lemiinit hĩ Nyekuc.

²³ Haduhaakuung naa ngagiit thõõth dĩdĩ, má aduhaak ẽẽtĩ umwaa muur icci anneek, ‘Bĩĩt dhuhoothĩk bũlũcatõõ,’ nẽ hõllõngaa akidan ꞌthĩnĩtatõõ cĩnnĩ nẽ ẽlẽm ĩĩ, ĩĩn hatĩ thõõth ꞌcĩ aduha nẽẽ ho dĩdĩ, aku ꞌthẽk hatĩ ĩĩn thõõth tĩho dĩdĩ.

²⁴ Nẽ haduhaakuung naa ngagiita, ꞌgii ꞌcĩ ajinnu niig laiitta, elemit ĩĩtõ ammũdaannu ꞌthẽk hatĩnĩ nẽ hatĩ ĩĩ ꞌgii tĩho cunuung.

²⁵ Nẽẽthĩ má alaiinnu, atamaattik nõõ eet ꞌcĩg adĩmannuung ngagiit ꞌbuth, hátĩ hatamaatihuung Maaꞌnyu ꞌcĩ aaĩ hẽẽtahujjieen ngagiit buúk, hĩnĩngĩtĩ ꞌthẽccanẽẽt cugguung.

²⁶ Nẽẽthĩ, má hõllõngaa ammaanniku niig eet ꞌcĩg adĩmannuung ngagiit ꞌbuth, aitiõõ hatĩ Maaꞌnyu ꞌcĩ aaĩ hẽẽtahujjieen hõllõngaa ammaannĩk ꞌthẽccanẽẽt cugguung buúk.”

Jinẽẽnĩt cĩ makaaꞌthĩt cĩ Yeesu

²⁷ Iita oboddia Yeesu hĩ nuyyiook cĩgĩnnĩg ꞌJeruꞌthalẽma, ma nĩngaata, ikia õtõ Yeesu halangatõõ cĩ ꞌCieeth cĩ Nyekuci. Nĩngĩtĩ au ajini makayyiooha cĩg paadĩrꞌnyaannu hĩ ꞌlimmanniook cĩg nyattal cĩ Mũũꞌtha hĩ makayyiook cĩg eetuk ĩnõõnnõ.

²⁸ Baa ajin nẽẽg Yeesu anneek, “Makaaꞌthĩt ꞌcĩ attiha nii ngaana ꞌcĩ adticanĩĩ hẽlẽggĩ iccig ko? Nganĩ ꞌcĩ aaꞌnyi nganiit makaaꞌthĩt icci ho?”

²⁹ Ẽdẽcĩ Yeesu ĩhõõggõ anneek, “Ĩꞌnya da hijinuung naa buúk ngagiit thõõth hõdẽẽthõng. Má ẽdẽccaangu jurrung, haduhaakuung thĩ hatĩ naa buúk ngagiit makaaꞌthĩt ꞌcĩ hadticanĩĩ hẽlẽggĩ iccig ko.

³⁰ Uduktaahaangu da, aku baa baattithimo cĩ Yõaannẽ hẽẽtahujjieen hĩ Nyekuc hode aku hĩ eet ꞌcĩ holli õõ haaga?”

³¹ Nĩngĩtĩ ahĩkĩĩmanĩ nẽẽg nyaagwaana aĩnnĩ, “Hanneek occa ne? Má haĩ hĩĩttĩk, ‘Baa aku baattithimo cĩ Yõaannẽ hẽẽtahujjieen,’ anneekeet hinnia hatĩ, ‘Nẽ thĩ baa hõllõngaa elemmu niig Yõaannẽ inni?’

³² Nẽ ꞌgõõlaa umwaanĩ, baa ẽlẽmĩ eeta cieeg ngaatĩ ĩĩnnĩ Yõaannẽ põrõvẽtaac. Nẽẽthĩ, occa hõllõngaa haĩ eet cĩ holli õõ haaga, ꞌcĩ aaꞌnyĩk ĩnõõnnõ makaaꞌthĩt ꞌcĩ aggamẽẽkĩ eet baattithimo ho.”

³³ Ma ho, ĩĩttĩk nẽẽg Yeesu, “Aitiõõ hõllõngaa hagayyĩa naaga.” Nĩngĩtĩ annẽẽkĩ Yeesu ĩhõõggõ buúk, “Hõllõngaa thĩ haduhaakuung naa buúk ngagiit, eet iina ꞌcĩ aaꞌnyaa nganĩĩt makaaꞌthĩt ꞌcĩ hadticanĩĩ thooꞌthiok iccig ko.”