Luugithõõ 4 - ꞌBuuk cĩ Thõõth cĩ Nyekuci

Aaꞌnyĩk Nyekuci Mũũꞌtha ꞌtirrian cobbi

¹ Baa ẽdẽcĩ Mũũꞌtha Nyekuc anneek, “Ma hatĩ ma hõllõngaa ẽlẽmma eeta cĩg Ĩꞌthĩraẽlĩ nganĩĩt hode hõllõngaa athĩkna nẽẽg nganĩĩt nẽ ĩĩttĩhaa, ‘Baa nga huppwaannahii Makayyioohiti nganiita’?”

² Nĩngĩtĩ ẽdẽcĩ Makayyioohiti ĩnõõnnõ annẽẽkĩ, “Ne nicciaa aꞌnyahi nii attia hataa?” Ẽdẽcĩ Mũũꞌtha anneek, “Hĩbahĩt.”

³ Ma ho, ĩĩ Makayyioohiti, “Dhuheek da loota.” Udhuheek Mũũꞌtha hĩbahĩt nicci loota, ma nĩngaata, ũũkĩ hinnia hĩbahĩtĩ nicciee hĩĩ hũkaat. Ma ho, avvireek hinnia Mũũꞌtha hũkaat nicci thõng.

⁴ Baa nẽẽ ĩĩnnĩk Makayyioohiti ĩnõõnnõ, “Urana hũkaat nicci ĩĩcĩ huulo.” Nĩngĩtĩ auranaanĩ Mũũꞌtha hũkaat nicci nẽ ũtũhũĩ ĩĩ hĩbahĩt tarĩ attiaa cĩnnĩ.

⁵ Ma nĩngaata, ĩĩ Makayyioohiti, “Dĩman terethiinit icci, hátĩ helemti eeta nganiit hĩĩtõ, ĩko baa uppwaannahii nganiit Makayyioohiti Nyekuci cĩ maajihi cĩggĩĩng dĩdĩ, Nyekuc cĩ Abũrahamĩ hĩ cĩ Iꞌthaako hĩ cĩ Yakobo.”

⁶ Nẽ ĩĩ Makayyioohiti, “Kĩtheek da aꞌthiit cunni cẽrẽmatõõ.” Ma nĩngaata, ĩkĩtheek Mũũꞌtha aꞌthiit cĩnnĩ cẽrẽmatõõ, ma baa õbõdaanĩ battaala ho, ũũkcĩ hinnia aꞌthiiti hĩĩ õõppẽr haau hĩ loduruui, hudukto hĩ aꞌthiit cĩ eet ꞌcĩ adak helleggeri thõng.

⁷ Ma ho, ĩĩnnĩk Makayyioohiti ĩnõõnnõ, “Bõdẽẽhĩ da ꞌyioko aꞌthiit cunni cẽrẽmatõõ.” Nĩngĩtĩ akĩthẽẽkĩ Mũũꞌtha aꞌthiit cĩnnĩ cẽrẽmatõõ, ma baa õbõdaanĩ battaala ho, ikia ũbũna aꞌthiiti hudukto hĩ ẽlẽ vẽlẽk.

⁸ Nẽ ĩĩ Makayyioohiti, “Má hõllõngaa elemmi nẽẽg nganiit hode hõllõngaa ẽlẽmĩ thõõth baa ĩnaat eeta baa adĩmani nii ĩĩcĩ oou, horoong hatĩ au ẽlẽmĩ ꞌcĩ ĩĩn ꞌramma ho.

⁹ Nẽẽthĩ, má hõllõngaa ẽlẽmĩ nẽẽg thooꞌthiok ꞌcĩg ĩĩn ꞌramma ꞌcĩg ĩnaatti ho, hode hõllõngaa athikniina, dtĩĩla maam hidiowwaa cĩ Naaĩlĩ nẽ udduutihuu ngaatĩ õdõhõhõhĩĩ. Ũũkcĩ hatĩ maama cĩg hidiowwaak ko loota hĩĩtõ biyyi.”

¹⁰ Baa aduhaak hinnia Mũũꞌtha Makayyioohit anneek, “Makayyioohit, gõõng ẽrẽka nganĩĩt thõõtha. Aꞌnyamannaa nganĩĩt ngaatĩ hõthõõthĩ nganĩngĩtĩ baarkit hĩĩ noho. Õdõhan nganĩĩt ahaatĩ ngaatĩ occa hõthõõthĩ.”

¹¹ Nĩngĩtĩ annẽẽkĩ Makayyioohiti ĩnõõnnõ, “Ẽlẽ, nganĩ nooyyia baa ꞌcĩ aaꞌnyĩk eet ũtũg ko? Nganĩ ꞌcĩ aaꞌnyĩk ĩnõõnnõ hidiitti ĩĩna, hode hĩjjaahõ hiittiõõ hõllõngaa õthõõth ko? Nganĩ ꞌcĩ aaꞌnyĩk eet hĩcĩnĩ hode hĩĩ ruben ko? Hõllõngaa nooyyia nganĩĩt Makayyioohit ꞌcĩ haaꞌnyihi ho?

¹² Nẽẽthĩ ꞌyioko bĩtõ, heellii hatĩ naa thõõth jurrung nẽ hillimaneehii thõõth ꞌcĩ hatĩ õkõ othoothi.”

¹³ Ẽdẽcĩ hinnia Mũũꞌtha ĩnõõnnõ anneek, “Makayyioohit, ꞌthõõ baaĩ nuun eet umwa ꞌcĩ ꞌrĩĩng hũũk hidtican thõõth icci.”

¹⁴ Nĩngĩtĩ alĩĩllĩkĩ Makayyioohiti Mũũꞌtha nẽ ĩĩ, “Ma ꞌgotonu Arõõnẽ cĩ hattũũg cĩ ꞌLeevi? Haga naa occa õthõõth nẽẽ jurrung. Otooyyia nẽẽ ꞌgõõla iita õõt ommottio hĩ nganiita nẽ accamanoothĩk hatĩ ꞌthĩnĩt cĩnnĩ gẽrrẽẽt hatĩ icini nganiita.

¹⁵ Thoothĩk ĩnõõnnõ nẽ uduhaahu thõõth ꞌcĩ haduhaakii naana. Heelluung hatĩ naa ngagiit ꞌrammaattĩg hatĩ othooꞌthu nẽ hillimaneehuung ꞌgii ꞌcĩ õõ adĩmannu.

¹⁶ Othoothĩk hatĩ nẽẽ eet, hĩnĩngĩtĩ nganiita nẽ õthõõth ꞌthẽk hatĩ nẽẽ hĩ nii dẽẽdẽ, haau hĩcĩ ĩĩnĩ nii Nyekuc hĩ ĩnõõnnõ.

¹⁷ Nẽẽthĩ, ꞌnyaak hĩbahĩt icci attiaa cunni, hátĩ dĩmanĩ thooꞌthiok ꞌcĩg ĩnaat eeta.”

Õbõdõõthĩ Mũũꞌtha Ijjiba

¹⁸ Ma ho, ikia õbõdõõthĩ Mũũꞌtha hĩ homoneec cĩnnĩ ꞌJeꞌthoro nẽ ĩĩnnĩk, “Ĩꞌnya da nõõ hũũk hĩcĩn eet cĩgannĩg Ijjiba, hatĩ nga aattĩg ꞌcĩg arũgĩ.” Ẽdẽcĩ ꞌJeꞌthoro ĩnõõnnõ anneek, “Bĩtõ, bĩĩt lõꞌngõõc.”

¹⁹ Nẽẽthĩ ꞌyioko, baa aduhaak Makayyioohiti Mũũꞌtha Midiana anneek, “Bodooth Ijjiba, hĩnĩngĩtĩ adaahito eeta vẽlẽk baag adiim aruki nganiita.”

²⁰ Nĩngĩtĩ õdõngẽẽkĩ Mũũꞌtha ngaa cĩnnĩ hĩ lõhõlĩ cĩgĩnnĩg thigiira nẽ õbõdõõthĩ Ijjiba. Nẽ baa aꞌnyak nẽẽ hĩbahĩt cĩ Nyekuci attiaa cĩnnĩ.

²¹ Baa nẽ uduhaak Makayyioohiti Mũũꞌtha ĩĩnnĩk, “Ma õdõlanuu Ijjib, mũdoothĩk habu cĩ Ijjibi nẽ idticanuu thooꞌthiok vẽlẽk ꞌcĩg ĩnaat eeta, baag haduhaakii naa hanneekii bĩĩt hatĩ dticcian. Nẽẽthĩ, haaꞌnyihi hatĩ naa ꞌthĩnĩt cĩnnĩ hĩllõõr hiittiõõ hõllõngaa alahaneek eet hõõt.

²² Nẽẽthĩ, duhaak habu cĩ Ijjibi anneek, ‘Thõõth ꞌcĩ aduha Makayyioohiti cieeni. Ĩĩn Ĩꞌthĩraẽlĩ loholeec caannĩ ꞌcĩ oou,

²³ nẽ baa huduhaahii naa nganiit hiinnihii, “Aꞌnyĩĩk loholeec caannĩ hũũk, hátĩ hũũk halawa nganĩĩta.” Nẽẽthĩ, ẽdẽnẽẽkĩ hinnia ngaatĩ õkõõĩ, nẽẽthĩ hoti ho, haruhi hatĩ naa ngeeruni ꞌcĩ oou hadaak.’ ”

²⁴ Ma ꞌgõõla, ngaatĩ gõõng ooginni eeta, iita ommottio Makayyioohiti hĩ Mũũꞌtha, nĩngĩtĩ abũcanaanĩ Makayyioohiti Mũũꞌtha aĩ huruk hadaak.

²⁵ Ma nĩngaata, ĩccĩtha ꞌThippõra telleenit ꞌcĩ ꞌlẽhẽdĩ nẽ ẽttẽẽda rucceenit cĩ ẽlẽ cĩ ngeerĩnĩ, ẽllaa cĩ eet ꞌcĩ maacĩ nẽ uhumeek ꞌthoo cĩg Mũũꞌtha. Nĩngĩtĩ annẽẽkĩ ꞌThippõra Mũũꞌtha, “Ĩĩnĩ nii hĩ nganĩĩt nyattaraan caannĩ cĩ biyyieetu.”

²⁶ Nĩngĩtĩ ũũnnĩkĩ Makayyioohiti Mũũꞌtha hõllõngaa aruhi. Ma ho, õthõõth ꞌThippora ĩĩ, “Dĩdĩ, eellia nii, hĩnĩngĩtĩ ꞌteedinit icci, maac caannĩ.”

²⁷ Ma ngaati, uduhaak Makayyioohiti Arõõnẽ ĩĩnnĩk, “Õõt ommottio hĩ Mũũꞌtha horrwatõõ ꞌcĩ õdõhõhĩĩ kak.” Nĩngĩtĩ ammũdõõthĩkĩ Arõõnẽ Mũũꞌtha muuraa cĩ Nyekuci nẽ ĩꞌtha ĩnõõnnõ.

²⁸ Ma ho, uduhaak Mũũꞌtha Arõõnẽ thooꞌthiok vẽlẽk baag aduhaak ĩnõõnnõ Makayyioohiti hũũk huduha, hĩ thooꞌthiok ꞌcĩg ĩnaatti baag anneek Makayyioohiti ĩnõõnnõ dĩman buúk.

²⁹ Nĩngĩtĩ alũtaanĩ Mũũꞌtha hĩ Arõõnẽ makayyiook cĩg Ĩꞌthĩraẽlĩ vẽlẽk,

³⁰ nẽ uduhaak Arõõnẽ ĩhõõggõ thõõth vẽlẽk baa aduhaak Makayyioohiti Mũũꞌtha. Baa adĩman Mũũꞌtha hẽlẽggĩ ꞌcĩg ĩnaatti buúk hẽbẽrẽẽnnĩĩ cĩg eetuk,

³¹ nĩngĩtĩ au elemiini eeta. Ma baa athĩhĩ nẽẽg ngaatĩ ammuhi Makayyioohiti ĩhõõggõ nẽ ĩcĩn pĩĩrnanĩt cĩnĩĩng ko, iita akatit huruꞌnyia nẽ alayyio.