Kolooꞌthe 4 - ꞌBuuk cĩ Thõõth cĩ Nyekuci

¹ Niig makayyiooha, ĩdĩmatteek appahacaaꞌnya cugguung thooꞌthiok ꞌcĩg abũnnaa ꞌcĩg aũlanĩ, hĩnĩngĩtĩ agayyu niig buúk ngaatĩ aꞌnyaku Makayyioohit cunuung hẽẽtahujjieen.

Kũttan cĩ laiitto

² Ĩrrĩcatta laiinit, aaut dĩkĩĩm nẽ ĩĩttĩhu Nyekuc ĩlaallẽ.

³ Alayyiooyyieetu ngagĩĩt buúk, hátĩ hubbuuhiheet Nyekuci ngagĩĩt ꞌgõõl, hátĩ hõõt huduktaaha eet thõõth cĩ Krĩstõ ꞌcĩ ĩllõõan ꞌgẽẽnyĩth cĩ eetu, ꞌcĩ ꞌyioko hecebiini naa baabuutha ho.

⁴ Alayyiooyyiaangu nganĩĩt, hátĩ hũũk hilliman eet jurrung, hĩnĩngĩtĩ dtiic caannĩ niccia.

⁵ Aaut jurrung hatĩ arũmeennu hĩ eet ꞌcĩg hõllõngaa ĩĩn lemmiook, illimatteek ĩhõõggõ nyeemuut cĩ Nyekuci hatĩ ammũdaannu ꞌgõõl ꞌcĩ arũmeennu hĩ ĩhõõggõ.

⁶ Aanytĩk thõõth ꞌcĩ othooꞌthu niig hõdõõkõthĩ haaꞌnyĩk eet ꞌcĩg athiknuung ngagiit haccamattoothĩk, hátĩ agaac ngaatĩ occa attacannu eet vẽlẽk ꞌcĩg ajinnuung ngagiit ꞌgõõlaa ꞌcĩ abũnnaa.

ꞌThaainit ꞌcĩ adtuurna

⁷ Aduhaakuung hatĩ Ticiko nyeemuꞌnya cĩgannĩg vẽlẽk. Ĩĩn nẽẽ ꞌgotooneet ꞌcĩ hammĩna naa gẽrrẽẽt ꞌcĩ ĩĩn lemmioohit, dticciannioohit ꞌcĩ hadticanoothĩka Makayyioohit hõdẽĩ jurrung.

⁸ Hĩꞌthõõakuung naa ĩnõõnnõ, hátĩ agaac niig authet cĩnaang nẽ hátĩ haaꞌnyĩk nẽẽ ꞌthinneeti cugguung hokomit.

⁹ Õõkõra Ticiko hĩ Onethimo ꞌgotooneet ꞌcĩ aꞌthũũnnnĩ thõõth cĩ Nyekuci nẽ hammĩnanna naag gẽrrẽẽt, ĩĩn Onethimo buúk eet cĩ ꞌtaaũn cunuung. Au hatĩ athithanaakuung nẽẽg thõõth vẽlẽk ꞌcĩ aaĩ ngaati.

¹⁰ Ĩꞌthaayyuung ꞌgõõna Arithtarko ꞌcĩ harũmeenna baabuutha hõdẽĩ ngagiita, ĩꞌthaayyuung Maarko midinni Baarnaba buúk. Baa ithiktu niig nyeemuut ꞌcĩ akuuni Maarko hĩ ngagiit ẽlẽk, ma õdõlanuunga, ũrũmtĩ hĩ ĩnõõnnõ lõꞌngõõc.

¹¹ Ĩꞌthaayyuung Yeesu ꞌcĩ haĩ ꞌthaar ũgĩ Juutto buúk ngagiita. Eet ꞌcĩg ĩĩn lemmiook eetinii ꞌcĩg ĩĩn ꞌJudeei dticciannioohĩĩ cĩgannĩg ĩĩcĩg habuccieet cĩ Nyekuci dioo cieegi nẽ amammaayattaa nẽẽg nganĩĩt haccamanoothĩk dĩdĩ.

¹² Ĩꞌthaayyuung Epavarato cĩ lothippit cunuung ngagiita, ꞌcĩ ĩĩn dticciannioohit cĩ Yeesu Krĩstõ. Alayyi nẽẽ hõdõõkõthĩ gẽrrẽẽt, hĩnĩngĩtĩ ngagiita, hátĩ okomit lemiittaa cunuung nẽ ĩdĩmattu tabiinit cĩ Nyekuci jurrung.

¹³ Hĩcĩna naa thõõth ꞌcĩ adticaniini nẽẽ gẽrrẽẽt, hĩnĩngĩtĩ ngagiita, hĩ lemmiook cĩg ꞌtaaũn cĩ Laodicea hĩ cĩg Hierapoli buúk.

¹⁴ Ĩꞌthaayyuung akĩĩmĩ cĩnaac ꞌLuuka hõdẽĩ hĩ ꞌDẽẽma.

¹⁵ Ĩꞌthaayyihaangu lemmiook cĩg ꞌtaaũn cĩ Laodicea hõdẽĩ hĩ ngooneet Nyĩmva hĩ lothippit cĩ lemmiook ꞌcĩg alayyi õlõõ cĩnnĩ.

¹⁶ Ma itigiillu waraga icci, aanytĩk hitigiili lothippitaa cĩ lemmiook cĩg ꞌtaaũn cĩ Laodicea buúk nẽ itigiillu niig buúk waraga baa hĩꞌthooihi naa ĩhõõggõ.

¹⁷ Uduktaak Arkippo ĩĩttĩk, “Dẽcaak dtiic baa aaꞌnyĩhoothikii nganiit ꞌthaarĩĩ cĩg Makayyiookto.”

¹⁸ Hẽhẽẽdakuung naa Paaulo ꞌthaainit icci athĩnĩĩ cĩgannĩg. Ma hataarroꞌthu thõõth ꞌcĩ hecebiini naa baabuutha ho. Aꞌnyĩĩk bũnnai cĩ Nyekuci haau hĩ ngagiita.