Kolooꞌthe 1 - ꞌBuuk cĩ Thõõth cĩ Nyekuci

Ĩꞌtha Paaulo lemmiook cĩg Kolooꞌthe

¹ Waraga ꞌcĩ hẽhẽẽda naa Paaulo, ẽẽtĩ baa ẽbẽraanna Nyekuci tabiittaa cĩnnĩ hĩĩ ꞌthooyyiahit cĩ Yeesu Krĩstõ cieeni. Hẽhẽẽdanna hõdẽĩ hĩ ꞌgotooneet Timotteeo.

Ala Paaulo Nyekuc nẽ ĩĩnĩk ĩlaallẽ

² Hẽhẽẽdakuung naag ngagiit waraga eet ꞌcĩg elleemmu nẽ aallannu elemmu thõõth cĩ Nyekuci, ꞌgotoonoga hĩ ngoonoga cĩg Krĩstõ ꞌtaaũnaa cĩ Kolooꞌthe. Aꞌnyĩĩk bũnnai hĩ ganõn ꞌcĩ aku hĩ Nyekuc Baangeet cĩnaac haau hĩ ngagiita.

³ Hanneeka naag hõdõõkõthĩ Nyekuc Maaꞌnyĩ Makayyioohit cĩnaac Yeesu Krĩstõ ĩlaallẽ, hatĩ halaiinnuung ngagiita.

⁴ Baa hĩthĩkta naag ngaatĩ elemmu niig Yeesu Krĩstõ nẽ ĩmmĩnattu eet vẽlẽk cĩg Nyekuci,

⁵ hĩnĩngĩtĩ muhẽẽnĩtĩ ꞌcĩ abũnnaa ꞌcĩ aꞌnyaku niiga, itiangthoothikuung ngagiit hẽẽtahujjieen. Baa ithiktu niig muhẽẽnĩt ꞌcĩ abũnnaa ho ĩĩcĩ oou, baa elemmu nyeemuut ꞌcĩ ĩĩn dĩdĩ, ꞌcĩ ĩĩn nyeemuut ꞌcĩ abũnnaa,

⁶ ĩꞌthanothoothĩk nyeemuut ciee loonyin vẽlẽk ꞌgõõlaa ꞌcĩ abũnnaa gẽrrẽẽt. Nẽ ikia ĩtĩlĩth ꞌgõõla hõdẽẽthõng hõrggẽẽnaa cunuung, nganĩngĩtĩ kõr baa athiknu niig thõõth ꞌcĩ ĩĩn dĩdĩ cĩ tarbalꞌthẽẽt cĩ Nyekuci, thooꞌthiohĩ vẽlẽk ĩcĩg ĩĩn dĩdĩ.

⁷ Iita illimattaau niig nyeemuut ꞌcĩ abũnnaa hĩ ꞌgooneet cĩnaang Epavarato. Hadticanoothĩka naag Krĩstõ hĩ ĩnõõnnõ hõdẽĩ, ĩĩn nẽẽ eet ꞌcĩ abũnnaa ꞌcĩ aꞌthũũnnĩ dtiic cĩ Krĩstõ, hĩnĩngĩtĩ ngagĩĩta.

⁸ Baa uduhaaheet nẽẽ ngagĩĩt thõõth ꞌcĩ ammĩnannu eet ũgĩ, mĩnnaanaa ĩbaa aaꞌnyuung Lorii ꞌcĩ Ẽllẽẽmĩth ngagiita.

Krĩstõ hĩ dtiicanĩ cĩgĩnnĩg

⁹ Hĩnĩngĩtĩ thõõth icci, ngaanĩngĩtĩ baa hathĩkna naag thõõth cunuung, nga hibillia ngaatĩ halaiinnuung ngagiita. Halayya naag Nyekuc haaꞌnyuung agaac tabiinit cĩnnĩ, ꞌgẽẽnyĩtha hĩ gaiittaa cĩ Loriio.

¹⁰ Nẽ hatĩ aꞌnyaktu rũgẽt ꞌcĩ adĩhĩꞌthu Makayyioohit nẽ aanytĩhu ĩnõõnnõ haccamanoothĩk hõdõõkõthĩ, ngaatĩ adĩmannu dtiicanĩ ꞌcĩg abũnnaa. Au hatĩ agayyu niig Nyekuc hĩllõõan.

¹¹ Halaiinna naag, hátĩ okomit niig bulẽẽttaa cĩ ꞌtirrian cĩnnĩ, hátĩ aꞌnyahit temeethi vẽlẽk ꞌcĩ adiimmu niiga. Aꞌnyĩĩk Nyekuc haaꞌnyuung taliinit.

¹² Halayyi naa, hátĩ ĩĩttĩk Nyekuc Baangeet ĩlaallẽ, ngaatĩ aaꞌnyuung ngagiit otholit hĩ ĩnõõnnõ thõõth baa aduhaak nẽẽ eet ꞌcĩg aattĩg habuccieetaa cĩ lanyito.

¹³ Ikia ẽẽlaeet Nyekuci ngagĩĩt habuccieetaa cĩ ꞌThĩttaanõ nẽ aꞌnyahaaeet habuccieetaa cĩ Ngeerĩnĩ ꞌcĩ ammĩnan nẽẽnĩ,

¹⁴ baa õõganneet nẽẽ ngagĩĩt haaut lõꞌngõõc nẽ ũtũngeek ꞌthẽccanẽẽt cĩggaac.

Makaaꞌthĩt cĩ Krĩstõ

¹⁵ Aaĩ Krĩstõ hĩ Nyekuci ꞌcĩ hõllõngaa hacĩn naaga. Baa arrittiaa nẽẽ ĩĩcĩ oou nẽ ĩĩn nẽẽ habu cĩ hẽlẽggĩ vẽlẽk ꞌcĩg ẽhẽnytaa.

¹⁶ Hĩnĩngĩtĩ baa ẽhẽnytaa hẽlẽggĩ vẽlẽk Krĩstõa, hẽlẽggĩ cĩg hẽẽtkujjieen hĩ cĩg lootu, hẽlẽggĩ ꞌcĩg hacĩnĩ hĩ ꞌcĩg hõllõngaa hacĩnĩ, ꞌcĩg aattĩg hĩ habuẽẽta hode habuccieeꞌnya hode makayyiooha ꞌcĩg aggam looc hode ꞌcĩg aꞌnyak makaaꞌthĩt, baa ẽhẽnytaa hẽlẽggĩ vẽlẽk Krĩstõa hĩĩtõ cĩgĩnnĩg.

¹⁷ Baa aaĩ nẽẽ baa nga hẽtẽhẽnytaa hẽlẽggĩ vẽlẽk nẽ aggam nẽẽ hẽlẽggĩ ꞌcĩg ẽhẽnytaa vẽlẽk haauto hõdẽĩ.

¹⁸ Ĩĩn Krĩstõ Makayyioohit cĩ lothippit cĩ lemmioohu. Nẽ ĩĩn lothippiti ciee ẽlẽ cĩnnĩ. Atiman nẽẽ ngaatĩ arũgnaanĩ daahĩtha, hátĩ hĩĩ Makayyioohit cĩ eet vẽlẽk hĩ hẽlẽggĩ vẽlẽk.

¹⁹ Baa accamanoothĩk Nyekuci ngaatĩ aayyi nẽẽ hũtũrũũr ẽllaa cĩ Ngeerĩnĩ.

²⁰ Nẽ baa accamana Nyekuci ngaatĩ aganĩthĩ hẽlẽggĩ vẽlẽk loota nĩnga hĩ hẽlẽggĩ cĩg hẽẽtkujjieen hoboddia hĩ ĩnõõnnõ. Baa adĩman nẽẽ ganõn icci biyyiẽẽtĩĩ cĩg Krĩstõ ĩĩ baag ẽrrẽnna hurucceea.

²¹ Baa gõõng iiginnu niig ꞌrẽẽttĩg hĩ Nyekuc. Baa aaꞌnyuung muhẽẽnĩtĩ cunuung ngagiit ĩĩtõ mĩrõk cĩg Nyekuci nẽ ĩdĩmattu thooꞌthiok ꞌcĩg abathĩ.

²² Nẽ ꞌyioko, ikia aganĩthuung nẽẽ ngagiit, hátĩ agayyio hĩ ĩnõõnnõ daahĩthaa cĩ Krĩstõ. Nẽ hĩnĩngĩtĩ thõõth icci, aꞌnyahaauung nẽẽ ngagiit muumaa cĩnnĩ nẽ iittu eet ꞌcĩg ẽllẽẽmĩth cĩg Nyekuci ꞌcĩg ammĩrĩ ꞌcĩg abillu muumaa cĩnnĩ hiꞌthihi ꞌthẽccan umwa.

²³ Nẽẽthĩ, má aallannu elemmu nẽ okomtu thõõth ꞌcĩ ĩĩn dĩdĩ, ma hẽꞌngẽlannu thõõthaa baa ĩĩn dĩdĩ ĩbaa ithiktu niig nyeemuutaa ꞌcĩ abũnnaa. Baa irrioonni nyeemuut ꞌcĩ abũnnaa ho looc vẽlẽk nẽ naa Paaulo, baa ẽbẽraawa Nyekuci hĩĩ dticciannioohit ꞌcĩ hirriooni thõõth icci.

Dtiic cĩ Paaulo lothippitaa cĩ lemmioohu

²⁴ Haccamanoothihi naa hatĩ haccanannii hĩnĩngĩtĩ ngagiit ẽllaa caannĩ, hĩnĩngĩtĩ hõthõlla naag hĩ Krĩstõ ꞌcannan cĩnnĩ ꞌcĩ aalla, hĩnĩngĩtĩ ẽlẽ cĩnnĩ ꞌcĩ ĩĩn lothippit cĩ lemmioohu.

²⁵ Baa adiimma nganĩĩt Nyekuci hĩĩ dticciannioohit cĩ lothippit cĩ lemmioohu nẽ idiim ĩꞌthõõwa nganĩĩt, hátĩ hillimaneehuung ngagiit nyeemuut cĩnnĩ vẽlẽk.

²⁶ Ĩĩn thõõth ciee thõõth ꞌcĩ ĩllõõan ꞌgẽẽnyĩth cĩ eetu, baa hõllõngaa agayyi irkiꞌnyia ꞌcĩg mẽẽlĩg, nẽẽthĩ ꞌyioko, ikia uppulanniaak eet cĩg Nyekuci.

²⁷ Hĩnĩngĩtĩ baa adiimmuung ngagiit Nyekuci eet ꞌcĩg hõllõngaa ĩĩgĩnnu ꞌJudeei, agaac ngaatĩ ĩĩnnĩ baliiniti hĩ bulẽẽnĩt cĩ Krĩstõ cunuung buúk. Thõõth ꞌcĩ ammiꞌthi ho cieeni. Aaĩ Krĩstõ hĩ ngagiita. Aaꞌnyuung thõõth ciee ngagiit agaac ngaatĩ hatĩ othollu niig bulẽẽnĩt cĩnnĩ.

²⁸ Hirrioonĩka naag eet nyeemuut cĩ Krĩstõ nẽ hidticattooyyia ꞌgẽẽnyĩth vẽlẽk hillimatta eet hĩ ngaatĩ hilootta eet vẽlẽk, hátĩ hiita hĩtĩlĩthĩt nuyyiooha cĩg Krĩstõ vẽlẽk hokomit lemiitta.

²⁹ Ĩnõõ cĩ hadticaniini naa gẽrrẽẽt ꞌtirriaanaa cĩnnĩ ĩbaa aaꞌnya nẽẽ nganĩĩt ko.