2 Timotteeo 4 - ꞌBuuk cĩ Thõõth cĩ Nyekuci

¹ Haduhaaki dĩdĩ muumaa cĩ Nyekuci, hĩ ĩcĩ Yeesu Krĩstõ ꞌcĩ hatĩ aku ẽttẽẽd thooꞌthiok cĩg eet ꞌcĩg adaahito, hĩ ꞌcĩg nga arũgĩ vẽlẽk, hatĩ uppwaanna Yeesu hĩ habuccieet cĩnnĩ, haaꞌnyii tilooinit icci.

² ꞌLimmaneek eet thõõth cĩ Nyekuci jurrung, tananga ammũjĩ hode õkõmĩ ngaatĩ adĩmanĩĩ noho, raa ꞌlimmaneek eet thõõth cĩ Nyekuci ooo, tẽrẽth eet ꞌgoolliok ꞌcĩg abathĩ, ꞌgerenyeek ꞌthẽccanniook, aꞌnyĩĩk ꞌthinneeti cĩggĩĩng hokomit nẽ ꞌlimmanõ ꞌthĩnĩtaa cĩ õkõmĩ.

³ Aaĩ hatĩ kõrra ꞌcĩ au aharrẽẽkĩ eeta ꞌlimman ꞌcĩ ĩĩn dĩdĩ cĩ Nyekuci ho nẽ utuhuyyi ũnnẽẽcõ hẽlẽggĩ ꞌcĩg abũraneek eleeti cĩggĩĩng haaga nẽ atabtõõthĩ ꞌlimmanniook ꞌcĩg aduhaak ĩhõõggõ thooꞌthiok cĩg adiim athĩhĩ nẽẽgĩ.

⁴ Au hatĩ abũrĩ eeta thõõth cĩ Nyekuci ꞌcĩ ĩĩn dĩdĩ nẽ utuhuyyi ũnnẽẽcõ dtẽẽllẽn cĩg baangaani.

⁵ Nẽẽthĩ niina, ꞌthũũtĩ ẽlẽ cunni jurrung hõdõõkõthĩ. Ma haireehi pĩĩrnanĩt dtiica cĩ Nyekuci. Dticcian dtiic hĩ ꞌlimmannioohiti cĩ nyeemuut ꞌcĩ abũnnaa nẽ dẽcaak dtiic ꞌcĩ aaꞌnyi Nyekuci ho jurrung.

⁶ Nẽẽthĩ ꞌyioko, aau nganĩĩt rũgẽtĩ caannĩ hĩ mẽrta ꞌcĩ aanytĩhoothĩk Nyekuc ẽlẽk nẽ hoti buúk, õbõhĩ kõrra ꞌcĩ hadaaknĩ naana.

⁷ Baa hidticana naa jore ꞌcĩ abũnnaa, hẽdẽcaaha iret buúk nẽ hũꞌthũũtĩ lemiinit dĩdĩ.

⁸ Nẽ ꞌthaa icci, ereeyyi nganĩĩt ꞌbaaniniti caannĩ ꞌcĩ abũnnaa, ꞌcĩ hatĩ aaꞌnya Makayyioohiti ꞌcĩ ẽttẽẽd thõõth jurrung kõr ꞌcĩ hatĩ õbõdaanĩ nẽẽ loota nĩnga. Nẽ hõllõngaa ꞌbaaninit caannĩ diooni, aaꞌnyĩk hatĩ nẽẽ ꞌbaaninit eet vẽlẽk ꞌcĩg accamana nẽ ẽrẽẽcõ ĩnõõnnõ kõr ꞌcĩ hatĩ uppwaannanĩ nẽẽnĩ.

Thooꞌthiok ꞌcĩg aduhaak Paaulo Timotteeo

⁹ Ẽlẽ Timotteeo, ijjia dõlanaa hĩdĩĩkoothong,

¹⁰ hĩnĩngĩtĩ ĩmmĩnan ꞌDẽẽma hẽlẽggĩ cĩg looc nicci ũtũngeeha haau ẽmmẽn, ĩtĩnga ũũk ꞌtaaũnaa cĩ Tẽꞌthaloonika. Nẽ tarĩ ĩtĩnga Kerethenĩ buúk ũũk looccaa cĩ ꞌGalaaꞌthia, õkõ adtican dtiic cĩ Makayyiookto nẽ ũũk Tiito looccaa cĩ Dalamatia.

¹¹ ꞌLuuka ꞌyioko dioo, ꞌcĩ harũmeenna ngaati. Diima Maarko ookorria thõng, hĩnĩngĩtĩ ẽẽlla nẽẽ nganĩĩt dtiicaa caannĩ.

¹² Baa tarĩ hĩꞌthõõa naa Ticiko hũũk ꞌtaaũna cĩ Eevvetho.

¹³ Nẽ ma ikia, thõhõtaaha cẽrẽm cĩ lajjõ baa huunnihi õlõõ cĩ Karpo, ꞌtaaũnaa cĩ Tõrõa, hĩ ꞌbuuhẽt buúk, ettebehini ꞌbuuhẽt aag adĩmanniaa ꞌrõõhaa cĩ taꞌngõõ.

¹⁴ Ĩdĩmanaa tarĩ Alĩthandoro, ẽẽtĩ gõõng attur thĩĩk lohippongora, ꞌbuth gẽrrẽẽt. Adũman hatĩ Makayyioohiti thõõth ꞌcĩ adĩmaneeka nẽẽ nganĩĩt ko.

¹⁵ Bẽẽk nii buúk ĩnõõnnõ muguruur, hĩnĩngĩtĩ ĩĩn nẽẽ eet ꞌcĩ arũhũũlana ngaatĩ ẽppẽhanĩ thõõth vẽlẽk ꞌcĩ halliman naag ko.

¹⁶ Baa õõyyĩa eeta nganĩĩt lokihooa, baa hiꞌthihi eet ꞌcĩ aku ẽẽlannaa nganĩĩt, hĩnĩngĩtĩ iirrieeha eeta vẽlẽk haau ẽmmẽn. Aꞌnyĩĩk Nyekuc hatamaatĩk ĩhõõggõ, hĩnĩngĩtĩ thõõth icci.

¹⁷ Nẽẽthĩ, baa Makayyioohit dioo ꞌcĩ abĩlĩ dhoortaa caannĩ nẽ aaꞌnya ꞌtirrian, hátĩ hillimaneek eet nyeemuut cĩ Nyekuci nẽ ĩthĩhĩt eeta ꞌcĩg hõllõngaa ĩĩn ꞌJudeei vẽlẽk, hĩnĩngĩtĩ nganĩĩta nẽ heellia ũtũũgaa cĩ ꞌmaaõ.

¹⁸ Ẽẽlannaa ꞌthẽk hatĩ gõõng nganĩĩt Makayyioohiti thooꞌthiohĩĩ vẽlẽk, ĩcĩg abathĩ nẽ hatĩ ũũka nganĩĩt habuccieetaa cĩnnĩ hẽẽtahujjieen lõꞌngõõc. Haau bulẽẽnĩtĩ hĩ ĩnõõnnõ ooo! Aamẽn.

ꞌThaainit cĩ adtuurna cĩ Paaulo

¹⁹ ꞌThaaĩhaa Piriciilla hĩ Akwila hĩ eet vẽlẽk cĩg halang cĩ Onethivoro.

²⁰ Idionganniaa Erathto ꞌtaaũnaa cĩ Korinthia nẽ hũtũngeeha Torovimo ꞌtaaũnaa cĩ Mileeto, hĩnĩngĩtĩ baa õmmõõrĩ nẽẽ thõng.

²¹ Tooyyia hataman, nga hõdõlaneehi tagĩĩthĩ. Ĩꞌthaayyi Eubulo hĩ Puden, hĩ Liino, hĩ Kalaudia, hĩ lemmiook vẽlẽk ꞌcĩg aattĩg ngaati.

²² Aꞌnyĩĩk Makayyioohit haau loriiaa cunni. Aꞌnyĩĩk bũnnai cĩ Nyekuci haau hĩ ngagiita.