2 Timotteeo 3 - ꞌBuuk cĩ Thõõth cĩ Nyekuci

Korriook cĩg decciaanĩt cĩ lootu

¹ Ẽlẽ Timotteeo, gaooth ĩĩ nẽẽ, õkõmĩ hatĩ authetĩ gẽrrẽẽt, korrioohĩĩ cĩg decciaanĩt cĩ lootu.

² Ammĩnan hatĩ eeta eleeti cĩggĩĩng ẽmmẽn nẽ ĩmmĩnanit ꞌrabbẽẽt, athĩngõõnyan nẽ uduulito eleeti, odoommi tahatak nẽ iittiõõ hõllõngaa athĩhĩ maajihi nẽ hõllõngaa anneek eet ĩlaallẽ nẽ ũtũbũrĩt ngaatĩ anũĩ thõõth cĩ Nyekuci.

³ Aitiõõ ĩhõõggõ mĩnnanĩ tõõ, hõllõngaa ammaannĩk eet ꞌcĩg adĩman ĩhõõggõ ꞌbuth, ẽmẽddaanĩ ngaatĩ õꞌngõmtĩ ꞌgõõnõgĩ, hõllõngaa aꞌthũũnnĩ eleeti cĩggĩĩng, ĩĩn tongororriaak nẽ ũtũbũrĩt thooꞌthiok vẽlẽk ꞌcĩg abũnnaa.

⁴ Au hatĩ õhõppõõcan ꞌgõõnõgĩ, ajanĩ thooꞌthiok tahatak, attik iꞌnyiaati nẽ accamattoothĩk, hĩnĩngĩtĩ ammĩnan ngaatĩ adĩmanĩ thooꞌthiok ꞌcĩg adiim nẽẽgĩ nẽ ũtũbũrĩt ngaatĩ ammĩnanĩ Nyekuc.

⁵ Tananga õõlõng aĩ hĩĩgĩnna eet cĩg Nyekuci, aitiõõ hatĩ thõõth cĩnĩĩng ko, hõllõngaa ĩĩn dĩdĩ, ma hookorru hĩ eet ꞌcĩg aattĩg noho.

⁶ Ĩĩn eeta nicciag, eet ꞌcĩg maacĩg ꞌcĩg õvvõ halaꞌngiõõhĩĩ cĩg eetuk, nẽ ũlũllũũmanit ngaaĩ ꞌcĩg hõllõngaa attiran, ꞌcĩg ẽꞌthẽcattõõ ꞌcĩg aggam muhẽẽnĩtĩ ꞌcĩ abũranẽẽkĩ thooꞌthiok vẽlẽk ꞌcĩg abathĩ.

⁷ Ẽmẽddaanĩ ngaaĩ niccieeg ngaatĩ allimanaanĩ thooꞌthiok ꞌcĩg ĩĩn ngeju hõdõõkõthĩ nẽ hõllõngaa adiim aga thõõth ꞌcĩ ĩĩn dĩdĩ buúk.

⁸ Hĩ baa ẽppẽhan eeta baag haĩ hĩ ꞌJaannẽthĩ hĩ ꞌJambere thõõth cĩ Mũũꞌtha, abũrĩ eeta cieeg thõõth ꞌcĩ ĩĩn dĩdĩ, ĩĩn nẽẽg eet ꞌcĩg ẽꞌngẽjĩ ooti nẽ hõllõngaa ĩĩn lemiiniti cĩnĩĩng dĩdĩ.

⁹ Aitiõõ hatĩ nẽẽg hõllõngaa õõ nĩngĩmwa, hĩnĩngĩtĩ aga hatĩ eeta ngaatĩ ĩĩnnĩ thõõth cĩnĩĩng ko vẽlẽk ꞌgiithẽnĩt, haau hĩ baa ammuddiaa ꞌJaannẽthĩ hĩ ꞌJambere.

Aduhaak Paaulo pĩĩrnanĩt cĩnnĩ Timotteeo

¹⁰ Ẽlẽ Timotteeo, agau nii thõõth baa hallimaneehi naa eet hĩ authet ꞌcĩ haayyi naana. Aga nii thõõth ꞌcĩ hadiimi hadticani naana, hĩ thõõth ꞌcĩ helemi, hĩ ꞌgõõl ꞌcĩ hẽmmẽẽꞌthĩ naa ꞌcannan, hĩ ngaatĩ hammĩnanĩ eeta, hĩ ngaatĩ hadĩhanĩĩ thooꞌthiok.

¹¹ Agayyaa nii nganĩĩt baa hemmeethi naa pĩĩrnanĩt ꞌtaaũnaa cĩ Antiohĩ hĩ ꞌtaaũnaa cĩ Ikoniumĩ hĩ ĩĩcĩ Liꞌthira nẽ aalla Nyekuci ẽẽlla nganĩĩt thooꞌthiohĩĩ cĩg vẽlẽk.

¹² Nẽẽthĩ ꞌthẽk, ẽẽtĩ umwaa ꞌcĩ adiim aĩ haau authetaa ꞌcĩ anũĩ thõõth cĩ Yeesu Krĩstõ, ammũda hatĩ ꞌcannan.

¹³ Nẽ eeta ꞌcĩg ẽꞌngẽjĩ ooti hĩ ꞌcĩg õõlõng aĩ hagayyia thõõth nẽ hõllõngaa aga dĩdĩ buúk ko, au hatĩ abathoothi nẽẽg gẽrrẽẽt, ĩggõõl ꞌgõõnõgĩ nẽ ĩggõõl eeta ĩhõõggõ buúk.

¹⁴ Nẽẽthĩ niina, ala ꞌthũũtĩ thooꞌthiok baag allimanoothikii nẽ elemmu dĩdĩ. Hĩnĩngĩtĩ aga nii hĩnganĩ baag allimannii nganiita.

¹⁵ Nganĩngĩtĩ hĩdĩꞌthẽẽtõ, agau nii thooꞌthiok ꞌcĩg eheeddi ꞌBuuhaa cĩ Nyekuci ĩĩcĩ Ẽllẽẽmĩthĩ, ꞌcĩg aaꞌnyi nganiit ꞌgẽẽnyĩth ꞌcĩ agaĩ ꞌgõõl ꞌcĩ aku eellianĩĩ, hĩnĩngĩtĩ lemiinit ꞌcĩ aꞌnyahi hĩ Yeesu Krĩstõ.

¹⁶ Aku thõõth vẽlẽk ꞌcĩ eheeddi ꞌBuuhaa cĩ Nyekuci, hĩ Nyekuc ꞌcĩ abũnnaa ꞌcĩ eelleet hillimanit eet thõõth ꞌcĩ ĩĩn dĩdĩ nẽ eelleet heterethit eet ꞌgõõl ꞌcĩ abathĩ, hĩ ngaatĩ hallimanẽẽkĩ eet ꞌgõõl ꞌcĩ aattiyyi ꞌlimmaanaa ꞌcĩ abũnnaa.

¹⁷ Hátĩ haga ẽẽtĩ ꞌcĩ alliman thõõth cĩ Nyekuci ho, ngaatĩ adticanĩ thooꞌthiok vẽlẽk ꞌcĩg abũnnaa.