2 Timotteeo 2 - ꞌBuuk cĩ Thõõth cĩ Nyekuci

Ũũrũtaac cĩ Krĩstõ

¹ Nẽ nii loholeec caannẽẽnĩ, kõõm bũnnaiittaa ꞌcĩ aaĩ hĩ Yeesu Krĩstõ.

² Hĩ hẽlẽggĩ baag athihi nii haduha naa hẽbẽrẽẽnnĩĩ cĩg eet ꞌcĩg mẽẽlĩg, hátĩ bĩĩt ꞌlimmaneek nii buúk eet ꞌcĩg occa ũũlũ ngaatĩ allimanĩ ꞌgõõnõgĩ.

³ Hetemeethit hĩ ngagĩĩt pĩĩrnanĩt hõdẽĩ au hĩ ũũrũtaacĩ cĩ Yeesu Krĩstõ.

⁴ Hõllõngaa ũũrũtaacĩ aduknoothĩk dtiicanĩ cĩg eet ꞌcĩg hollig, adiim ꞌthẽk nẽẽ haaꞌnyĩk makayyioohit cĩnnĩ haccamanoothĩk.

⁵ ꞌGõõlaa ꞌcĩ aduhõõ thõng, má anũ irettioohiti thooꞌthiok ꞌcĩg aggam hirangi cĩ ireto, aku hatĩ ĩllõõan nẽẽ ireta nẽ aggam ꞌbaaninit.

⁶ Kattioohiti ꞌcĩ akannĩ gẽrrẽẽt, ĩnõõnnõ ꞌcĩ atiman ngaatĩ ammũdaanĩ ꞌgẽẽn ĩĩcĩ oou.

⁷ ꞌMuuk thõõth baa haduhaakii naa ho jurrung, hĩnĩngĩtĩ eelli hatĩ Makayyioohiti gaa thooꞌthiok iccig vẽlẽk.

⁸ Muhunooth Yeesu Krĩstõ, baa arũgtha Nyekuci daahĩtha, baa arrittiaa nẽẽ hattũũgaa cĩ habu Daavide. Nyeemuut ꞌcĩ abũnnaa ꞌcĩ hallimani naa ho cieeni,

⁹ ꞌcĩ happĩĩrnanĩĩ ngaatĩ hecebiini baabuutha hĩ ꞌthẽccannioohiti. Nẽ occa hõllõngaa ecebbi thõõth cĩ Nyekuci baabuutha.

¹⁰ Ĩnõõ cĩ hẽmmẽẽꞌthĩ naa thooꞌthiok vẽlẽk, hĩnĩngĩtĩ eet baag ẽbẽra Nyekuci, hátĩ hummuddia nẽẽg buúk elliaanĩt ꞌcĩ aaĩ hĩ Yeesu Krĩstõ bulẽẽttaa ꞌcĩ aalla ooo.

¹¹ Thõõth ꞌcĩ ĩĩn dĩdĩ cieeni, “Má baa hadaahito naag hĩ Krĩstõ, harũgĩ hatĩ naag hĩ ĩnõõnnõ buúk.

¹² Má hẽmmẽẽthĩ naag ꞌcannan, haggam hatĩ naag looc hõdẽĩ hĩ ĩnõõnnõ. Má haburi naag ĩnõõnnõ, abũrreet hatĩ nẽẽ buúk ngagĩĩta.

¹³ Má hĩccaad naag lemiinit cĩnaac, aalla nẽẽ elemmeet Yeesu ngagĩĩt ũdũt noho, hĩnĩngĩtĩ hõllõngaa occa ĩggõõl nẽẽ ẽlẽ cĩnnĩ.”

Dticciannioohit ꞌcĩ abũnnaa

¹⁴ Nii Timotteeo, ma haaꞌnyihi eet umwa hataarõthĩ thooꞌthiok iccig, tilo ĩhõõggõ muumaa cĩ Nyekuci, hiittiõõ hõllõngaa ẽppẽhanõõnĩ thooꞌthiok. Aitiõõ pẽkanĩ hõllõngaa ẽẽl eet umwa, ẽꞌthẽcan hinnia eet ꞌcĩg athĩknĩ nẽ aaꞌnyĩk ĩhõõggõ pĩĩrnanĩt.

¹⁵ Dticcianõ gẽrrẽẽt, hátĩ ĩĩ dticciannioohit ꞌcĩ ẽlẽmĩ Nyekuci, ꞌcĩ ĩĩnĩ dticciannioohit cĩnnĩ ꞌcĩ hõllõngaa aꞌngaaõn ngaatĩ aꞌthũũnnĩ thõõth cĩnnĩ jurrung, nẽ illimaneehu eet thõõth cĩnnĩ ꞌcĩ ĩĩn dĩdĩ.

¹⁶ Awwua ꞌrẽẽna hĩ eet ꞌcĩg õthõõth thooꞌthiok ꞌcĩg hõllõngaa ĩĩn cĩg Nyekuci, hĩnĩngĩtĩ aaꞌnyĩk thooꞌthioha cieeg ĩhõõggõ, hũtũbũrĩt Nyekuc.

¹⁷ Ĩꞌthanothoothĩk hatĩ ꞌlimmanĩ ciee looc haau hĩ carrahula ꞌcĩ abubuurana ẽlla nẽ hõllõngaa alalĩ buúk. Nẽ eetinii cĩg, Himeneeo hĩ Vileeto ꞌcĩg allimaneek eet thooꞌthiok ꞌcĩg aattĩg hoti,

¹⁸ ꞌcĩg arahanit thõõthaa cĩ Nyekuci ĩcĩ ĩĩn dĩdĩ. Aĩ nẽẽg, ũrũgta eeta baag adaahito ẽlẽk. Nẽ ĩĩn thõõth ciee õlõng, ꞌcĩ ẽꞌthẽcan ooti cĩg eet ũgĩ ꞌcĩg elemit thõõth cĩ Nyekuci.

¹⁹ Nẽẽthĩ, abĩlĩ thõõth ꞌcĩ Nyekuci õkõmĩ kak, aꞌnyũũgĩ nẽ ẽtẽhẽẽdĩ battaala thõõth ꞌcĩ aĩ, “Aga Makayyioohiti eet cĩgĩnnĩg.” Nẽ, “Eeta ꞌcĩg aĩ hĩĩgĩnna eet cĩg Makayyiooktak, aꞌnyĩĩk hũtũngteek thooꞌthiok ꞌcĩg ĩĩn ꞌthẽccan.”

²⁰ ꞌCieetõõ cobbi, aattĩg hẽddẽmĩ ꞌcĩg tiirik ꞌcĩg adĩmanniaa ꞌdaaba, hode maccĩrẽẽnĩĩ dioo nẽ aattĩg ꞌcĩg adamanniaa hẽẽnĩ nẽ ẽtẽhẽnytaa ũgẽẽgĩ dooba. Hadticaniini ũgĩ korrioohĩĩ ꞌcĩg obbitig nẽ hidticattõõĩ ũgĩ waathinnioohĩ vẽlẽk.

²¹ Má tẽlla ẽẽtĩ thooꞌthiohĩĩ cĩg, occa hatĩ aar Makayyioohiti ĩnõõnnõ haau hĩ hẽddẽmĩ cĩnnĩ ꞌcĩ adticanĩ dtiic ꞌcĩ ẽllẽẽmĩth ꞌcĩ tiiri hĩ Makayyioohit nẽ ũkũmanoothĩk, hátĩ hidtican dtiicanĩ vẽlẽk ꞌcĩg abũnnaa.

²² Lĩĩta thooꞌthiok ꞌcĩg abathĩ ꞌcĩg abũraneek nyahaappanĩta hĩ buheeci. Nũũ thõõth ꞌcĩ abũnnaa hõdõõkõthĩ, ꞌnyaak lemiinit cĩ Nyekuci hĩ mĩnnan nẽ aau lõꞌngõõc nẽ laa Makayyioohit hõdẽĩ hĩ eet ꞌcĩg tẽllĩg.

²³ Ma hedecoothihi thooꞌthiok ꞌcĩg ẽppẽhanõõnĩ eeta cĩg ꞌgiithẽttaak, hĩnĩngĩtĩ aꞌnyahaaki thooꞌthioha nicciag jore.

²⁴ Ẽẽtĩ ꞌcĩ adticanoothĩk Nyekuc, hõllõngaa occa ĩĩn nyeppekiaahit. Abũnnaa ĩĩn eet ꞌcĩ tarbalĩ hĩ eet vẽlẽk nẽ ĩĩ ꞌlimmannioohit ꞌcĩ abũnnaa, ꞌcĩ aꞌnyak ꞌthĩnĩt ꞌcĩ maka.

²⁵ Nẽ tarĩ, abũnnaa ĩĩn eet ꞌcĩ tarbalĩ buúk, hátĩ hẽtẽrẽth eet ꞌcĩg ẽppẽhanõõ hĩ ĩnõõnnõ. Horoong hatĩ ũũhũ Nyekuci eet niccig, hũtũngteek ꞌthẽccanẽẽt cĩggĩĩng nẽ elemit thõõth cĩnnĩ ꞌcĩ ĩĩn dĩdĩ,

²⁶ nẽ hatĩ iita ummuddia nẽẽg thõõth dĩdĩ ꞌcĩ alĩĩtanĩ detiinit cĩ habu cĩ loriẽẽt ꞌcĩg abathĩ, ꞌcĩg baa aaꞌnyĩk ĩhõõggõ hĩĩtõ appahacaaꞌnya ꞌcĩg adticanoothĩk ĩnõõnnõ.