2 Korinthia 9 - ꞌBuuk cĩ Thõõth cĩ Nyekuci

ꞌRabbẽẽt cĩg eet cĩg Nyekuci

¹ Hõllõngaa occa hẽhẽẽdakuung naa ngagiit waraga, hĩnĩngĩtĩ thõõth cĩ ꞌbaaninit cunuung ꞌcĩ aaꞌnyiku lemmiook ꞌcĩg aattĩg ꞌJeruꞌthalẽma ho.

² Haga naa ngaatĩ adiimmu niig aaꞌnyiku ꞌbaaninit cunuung lemmiook ꞌcĩg aattĩg ꞌJeruꞌthalẽma nẽ hirrianĩ naa ꞌbaaninit icci ngaatĩ haduhaaki lemmiook cĩg looc cĩ Maccedoonia, nganĩngĩtĩ irkit baa gõlla, hanneehi akũmanoothiku niig looccaa cĩ Acaia, ngaatĩ attihaannu ꞌbaaninit nẽ deciiniti cunuung ꞌcĩ attihaannu ꞌbaaninit ko, akũtan ĩhõõggõ buúk hitikta ꞌbaaninit.

³ Nẽẽthĩ, hĩꞌthõõa naa ꞌgotoonoga iccig, hátĩ hiittiõõ ꞌrianĩĩthĩ cĩnaang hĩnĩngĩtĩ ngagiit, hõllõngaa ĩĩn olongit, nẽẽthĩ hinnianĩ, ũkũmattoothĩk niiga, hĩcĩ haini naa occa ꞌthẽk akũmanoothiku ho.

⁴ Má hookorriawa naag hĩ lemmiook cĩg Maccedoonia nẽ hummuddiaahuung nga ũkũmattoothĩk, haꞌngaaoni hatĩ ngaatĩ baa haarikuung naa ngagiit ꞌthĩnĩt. Aꞌngaaonnu hatĩ niig buúk gẽrrẽẽt ngaatĩ hõllõngaa attihaannu ꞌbaaninit cunuung.

⁵ Nĩngĩtĩ hakuu hammuhi nẽ huduhaaha ꞌgotoonoga hutuattaa nẽẽg hiita hĩ ngagiit ĩĩcĩ oou, nga hikia naana, hatĩ hũkũmatteek nẽẽg ꞌbaaninit cunuung baa aduhaannu niiga. Nẽẽthĩ hatĩ ĩĩ ciee ꞌbaaninit dĩdĩ ꞌcĩ ẽrẽẽõ ꞌcĩ attihaannu ꞌthinneetini dĩdĩ, ꞌcĩ hõllõngaa attĩnganoothikuung thõng.

⁶ Ummuhuttooth thõõth umwa cieeni, ẽẽtĩ ꞌcĩ athacĩ hinyomo ꞌcĩg abadtẽc haaga, ajana hatĩ nẽẽ buúk haal ꞌcĩg abadtẽc nẽ ẽẽtĩ ꞌcĩ athacĩ hinyomo ꞌcĩg mẽẽlĩg, ajana hatĩ nẽẽ buúk haal ꞌcĩg mẽẽlĩg.

⁷ Aꞌnyĩĩk eet hõdẽĩ hõdẽĩ hittikta ꞌbaaninit cĩnĩĩng ꞌgõõlaa cĩ muhẽẽnĩt cĩ ꞌthinneeti cĩggĩĩng, hõllõngaa ꞌgõõlaa ꞌcĩ aitiõõ hõllõngaa adiim nẽẽgĩ hode attĩnganõõthĩkĩ thõng, hĩnĩngĩtĩ ammĩnan Nyekuci eet ꞌcĩg attiha ꞌbaaninit taliitta.

⁸ Nẽ aaꞌnyuung hatĩ Nyekuci ngagiit vẽlẽk bũnnaiittaa cĩnnĩ, ꞌgii ꞌcĩ adiimmu niiga. Nẽẽthĩ hatĩ gõõng aꞌnyaktu hẽlẽggĩ vẽlẽk ꞌcĩg adiimmu niiga, hinyigiꞌthiaa ꞌcĩg mẽẽlĩg ꞌcĩg occa othollu hĩ ꞌgoonogu.

⁹ Eheeddi ꞌBuuhaa cĩ Nyekuci aĩ, “Ittiha ẽẽtĩ ꞌbaaninit cĩnnĩ ꞌcĩ maka aaꞌnyĩk eet ꞌcĩg ĩĩn pĩĩrnattiaak nẽ aalla hatĩ dtiicanĩ cĩgĩnnĩg ꞌcĩg aũlan ko ooo.”

¹⁰ Nyekuc ꞌcĩ aaꞌnyĩk kattiook hinyomo hathacit nẽ aaꞌnyĩk ꞌgẽẽn buúk. Ĩttõõr hatĩ nẽẽ ꞌgii vẽlẽk ꞌcĩ aꞌnyaku niiga, hatĩ ĩttoorru niig buúk ꞌbaaninit ꞌcĩ aaꞌnyiku ꞌgoonogu ꞌcĩg appĩĩrna.

¹¹ Aggatannuung hatĩ ngagiit Nyekuci gẽrrẽẽt ꞌgoolliohĩĩ ꞌcĩg mẽẽlĩg nẽ hatĩ gõõng uꞌthuuttu niig buúk ꞌgõõl ꞌcĩ eellu ꞌgoonogu ꞌcĩg appĩĩrna nẽ hatĩ ĩdĩhĩthĩt eeta ꞌcĩg mẽẽlĩg Nyekuc hatĩ haꞌnyaktoothĩha naag lemmiook ꞌbaaninit cunuung.

¹² Nẽ dtiici ꞌcĩ adticannu niig ko, hõllõngaa ĩĩn ꞌbaaninit ꞌcĩ haaꞌnyĩk eet cĩg Nyekuci diooni, ĩĩn ꞌbaaniniti ꞌgii ꞌcĩ aaꞌnyĩk eet ꞌcĩg mẽẽlĩg haccamattoothĩk gẽrrẽẽt ngaatĩ atallĩ Nyekuc.

¹³ Nẽ hĩnĩngĩtĩ ꞌbaaninit ꞌcĩ aaꞌnyiku niig lemmiook ko, adĩhĩth hatĩ nẽẽg Nyekuc. Hĩnĩngĩtĩ ꞌbaaniniti cunuung ꞌcĩ aaꞌnyĩku niig ĩhõõggõ hĩ lemmiook vẽlẽk ko, ẽtẽrꞌtha thõõth ꞌcĩ athiknu niig nyeemuut ꞌcĩ abũnnaa cĩ Krĩstõ.

¹⁴ Alaiinnuung ꞌyioko nẽẽg ngagiit nẽ adiim acĩnnuung, hĩnĩngĩtĩ aaꞌnyuung ngagiit Nyekuci bũnnai, hátĩ aggatanit ĩhõõggõ gẽrrẽẽt.

¹⁵ Hatalit Nyekuc, hĩnĩngĩtĩ ꞌbaaninit cunuung ꞌcĩ maka gẽrrẽẽt ĩllõõan, ꞌcĩ hõllõngaa occa athithan ẽẽtĩ umwaa ũdũt!