2 Korinthia 6 - ꞌBuuk cĩ Thõõth cĩ Nyekuci

¹ Hĩcĩ hadticanni naag hõdẽĩ hĩ Nyekuci, halayyuung naag ngagiit haĩnna, idticattõõĩ bũnnai cĩ Nyekuci ꞌgõõlaa ꞌcĩ abũnnaa.

² Aduha ꞌBuuhi cĩ Nyekuci aĩ, “Ma ikia kõrra baa haccamanaa naana, hikia hatĩ hĩthĩhuunga nẽ ma kõr ꞌcĩ adiimmu eliinit, hakuu hatĩ heelluunga.” Nẽ ꞌyioko, haduhaakuung dĩdĩ, ikia kõrra ꞌcĩ eelluung Nyekuci ngagiita.

ꞌCannan ꞌcĩ ammũda Paaulo

³ Baa hõllõngaa hõhõõrranna naag ꞌgõõl cĩ eet umwa, hátĩ hiittiõõ bathi ꞌcĩ ammuddiaa dtiicaa cĩnaang ko tõõ, ĩnõõ ꞌcĩ hattĩmanna gẽrrẽẽt ngaatĩ hõllõngaa hahĩĩnanna thõõth umwa ꞌcĩ abathĩ.

⁴ Nẽẽthĩ, hẽlẽggẽẽnnĩ hĩ ꞌgoolliohĩ vẽlẽk, hadiim hẽtẽrꞌtha naag haĩ hĩĩgĩn appahacaaꞌnya cĩg Nyekuci. Baa gõõng hẽmmẽẽthĩ naag pĩĩrnanĩt hĩ ꞌcannan, tananga baa hummuddia mothiinit.

⁵ Baa huuktea naag nẽ haarrihoothĩha baabuuthatõõ nẽ uukeet lothippiti ngagĩĩt tabattĩ mẽẽlĩg. Hidticattooa naag gẽrrẽẽt nẽ hacĩneenna haal hiꞌthihi ꞌgẽẽn.

⁶ Hadiim hẽtẽrꞌtha naag haĩ hĩĩgĩn appahacaaꞌnya cĩg Nyekuci, ngaatĩ hĩĩgĩnnĩ tẽllĩg nẽ hagaacõ thõõth cĩ Nyekuci dĩdĩ, hĩ ngaatĩ hẽmmẽẽꞌthĩ ꞌcannan nẽ hĩĩtõ tarbalĩg. Aau Lorii ꞌcĩ Ẽllẽẽmĩth hĩ ngagĩĩta nẽ baa ĩĩn mĩnnanĩ cĩnaang thõõth dĩdĩ.

⁷ Hadiim hẽtẽrꞌtha naag haĩ, hĩĩgĩn appahacaaꞌnya cĩg Nyekuci, ngaatĩ hõthõõthĩ thõõth ꞌcĩ ĩĩn dĩdĩ nẽ ikia idticanõõ ꞌtirriani cĩ Nyekuci hĩ ngagĩĩta. Nẽ ꞌgõõlaa ꞌcĩ hoꞌngonyoonna hĩ dtiic cĩnaang, hiita hidticatta thõõth ꞌcĩ aũlan athĩnĩĩ ꞌrammaattĩg.

⁸ Tananga baa hitingollieet eeta ũgẽẽgĩ ngagĩĩta, hode hõllõngaa iꞌngoliinneeta, hode abuluꞌtheeta, hode accĩĩnneeta, hode aĩ hĩĩgĩnna naag oloꞌngiaak, aalla hõthõõꞌtha naag hõdõõkõthĩ thõõth cĩ eleeti cĩggaang ꞌcĩg ĩĩn dĩdĩ ho noho.

⁹ Hõllõngaa agayyeet ngagĩĩt eeta ũgẽẽgĩ nẽ agayyieetu niig ngagĩĩt jurrung. Haautta naag hĩcĩ hadaakta ẽlẽk, aalla nga harũgna noho. Baa huuktea naag nẽ nga hurukteea,

¹⁰ nẽ haccamanoothĩka ooo tananga korrioohĩĩ cĩg pĩĩrnattaak. Nẽ tananga hĩĩgĩnna naag hullaha, haanytĩha naag eet ꞌcĩg mẽẽlĩg gẽrrẽẽt baliinit, tananga hiꞌthihi ꞌgii ꞌcĩ haꞌnyaka naaga, ĩĩn hẽlẽggĩ vẽlẽk cĩggaang.

¹¹ Niig ꞌgotoonoga hĩ ngoonoga cĩg ꞌtaaũn cĩ Korinthia, baa hothoothikuung naag ngagiit cũrũmũũm ꞌthinneetinii ꞌcĩg tẽllĩg dĩdĩ.

¹² Hõllõngaa hĩcaaccuung naag ngagiit mĩnnan cĩnaang nẽ ngagiit dioo ꞌcĩg ĩcaacceetu ngagĩĩt mĩnnan cunuung.

¹³ Hothoothikuung naa ngagiit hĩcĩ hothoothihi lõhõlĩ cĩgannĩg nẽ haini ubbuuktĩheetu ngagĩĩt ꞌthinneeti cugguung.

ꞌCieeth cĩ Nyekuc ꞌcĩ arũgĩ

¹⁴ Iliittia eet ꞌcĩg hõllõngaa ĩĩn lemmiook cĩg Krĩstõ. Occa gõõng õõkõrõõ eeta ꞌcĩg abũnnaa hĩ eet ꞌcĩg abathĩ? Hode aduhõõ gõõng lanyit hĩ muguur?

¹⁵ Ganõn iina ꞌcĩ occa aꞌnyak Krĩstõ hĩ Belial? Hode ne gõõng ꞌcĩ õthõl lemmiooha cĩg Krĩstõ hĩ eet ꞌcĩg hõllõngaa ĩĩn lemmiook?

¹⁶ Ganõn iina ꞌcĩ aꞌnyak ꞌCieeth cĩ Nyekuci hĩ hẽlẽggĩ ꞌcĩg aar eeta hĩĩtõ nyekuꞌnya ho? Hĩnĩngĩtĩ hĩĩgĩn naag ꞌCieeth cĩ Nyekuc ꞌcĩ arũgĩ. Hĩcĩ aduha ꞌBuuhi cĩ Nyekuci aĩ, “Haaĩ hatĩ naa hĩ ĩhõõggõ nẽ hookorria hĩ ĩhõõggõ. Hĩĩnĩ hatĩ naa Nyekuc cĩnĩĩng nẽ ĩĩtõ nẽẽg eet cĩgannĩg.”

¹⁷ Nẽẽthĩ hoti ho, “Aĩ Makayyioohiti nẽẽ, “Ũtũngteek niig eet ꞌcĩg hõllõngaa ĩĩn lemmiook eꞌngerrio hĩ ĩhõõggõ, ma hahummu hẽlẽggĩ ꞌcĩg ĩĩn ꞌriiring nẽ hatĩ helemuung naa ngagiita.”

¹⁸ “Hĩĩna hatĩ naa Maaꞌnyu cunuung nẽ iittu hatĩ niig lõhõlĩ cĩgannĩg, haduha naa Makayyioohiti ꞌTirriannioohiti ꞌcĩ hĩllõõani vẽlẽk.”