2 Korinthia 5 - ꞌBuuk cĩ Thõõth cĩ Nyekuci

Eleeti cĩggaac ꞌcĩg ĩĩn ngeju

¹ Aattĩg eleeti cĩggaac hĩ tuggẽẽta ꞌcĩg haattiyyi naag loota nĩnga. Nẽ má irribattĩ tuggẽẽta cieegi, haga naag haĩ aaꞌnyeet hatĩ ngagĩĩt Nyekuci hõdẽĩ hõdẽĩ nĩngĩtĩ ꞌcĩ haattiyyi. Ĩĩn hatĩ olooyyioha cieeg ꞌcĩg hõllõngaa ẽhẽnyta ẽẽtĩ ꞌcĩ holli õõ. Aattĩg olooyyioha cieeg hẽẽtahujjieen nẽ aalla hatĩ ooo.

² Ma nga haattĩg naag loota nĩnga, nga hara haguran, hĩnĩngĩtĩ hadiim hõõ naag haattĩg õlõ hẽẽtahujjieen hĩ Nyekuc.

³ Hĩnĩngĩtĩ, ma hitihimti naaga, hõllõngaa hatĩ hammuddiaa ngaatĩ haattiyyi arriẽẽn.

⁴ Tuggẽẽta cieeg haattiyyi naag ko, aduhõõ hĩ guran cĩ pĩĩrnanĩt ꞌcĩ maka ꞌcĩ haꞌnyak naaga ko. Nẽ hõllõngaa hadĩman noho haĩ, hátĩ hũtũngteek eleeti ꞌcĩg hatĩ adaahĩ haaga ho. Hadiim naag hũũhũ eleeti iccig, hátĩ hiittiõõ hõllõngaa adaahĩ.

⁵ Nyekuc ꞌcĩ aaꞌnyĩk thooꞌthiok iccig vẽlẽk haauto ho. Ĩnõõnnõ ꞌcĩ aaꞌnyeet ngagĩĩt Lori ꞌcĩ Ẽllẽẽmĩth ꞌcĩ aaꞌnyeet hagaac aĩ adtican hatĩ nẽẽ thõõth icci.

⁶ Nẽẽthĩ, haanytĩk ꞌthinneeti cĩggaac hokomit. Ma nga harũgĩ naag loota nĩnga, nga ꞌthẽk hĩĩgĩn ꞌrẽẽttĩg hĩ Makayyioohit.

⁷ Harũgĩ naag hĩnĩngĩtĩ hẽlẽmmĩ Makayyioohit, hõllõngaa hĩnĩngĩtĩ hẽlẽggĩ ꞌcĩg hacĩn naag thõng.

⁸ Haaut hokomit, hĩnĩngĩtĩ mẽẽn ngaatĩ hadaaknĩ loota nĩnga nẽ hõõt õlõ hẽẽtahujjieen hũrũmtĩ hĩ Makayyioohit.

⁹ Tananga haaut õlõ hẽẽtahujjieen hĩ Makayyioohit hode nga harũgĩ naag loota nĩnga, nga ꞌthẽk hadiim naag Makayyioohit haccamanoothĩk.

¹⁰ Hĩnĩngĩtĩ aku hatĩ Krĩstõ iccioloongan dtaabawa nẽ ẽttẽẽd thooꞌthiok cĩggaac cũũmõ cũũmõ, hĩ dtiicanĩ ꞌcĩg baag adĩman ẽẽtĩ baa nga arũgĩ loota nĩnga, adĩman baa nẽẽ thooꞌthiok ꞌcĩg abũnnaa hode thooꞌthiok ꞌcĩg abathĩ.

Aꞌnyĩĩk eet vẽlẽk hagayyio hĩ Nyekuc

¹¹ Haga naag thõõth ꞌcĩ aĩ, hitingolli Makayyioohit nẽ huduktaak eet vẽlẽk hiita hĩ ĩnõõnnõ. Agayyeet Nyekuci ngagĩĩt ngaatĩ hĩĩgĩnnĩ eet ꞌcĩg haattĩg hutuno nẽ hammuhi agayyu niig buúk ngaatĩ hĩĩgĩnnĩ naag eet ꞌcĩg haattĩg hutuno.

¹² Hõllõngaa hattĩmanna naag ngaatĩ hirrianna eleeti cĩggaang. Hadiimmuung naag ngagiit irrianit, hĩnĩngĩtĩ ngagĩĩta, hatĩ arũmeennu hĩ eet ꞌcĩg hõllõngaa aduha thooꞌthiok ꞌcĩg ĩĩn dĩdĩ nẽ ĩthĩngõõnyanit, hĩnĩngĩtĩ thooꞌthiok ꞌcĩg ammuhuneek eeta ĩhõõggõ.

¹³ Má haattiyyia naag hĩ eeta ꞌcĩg aitiõõ muhẽẽnĩtĩ tõõ, ĩĩn thõõth cĩnaang hĩ Nyekuc. Nẽ má aũlan muhẽẽnĩtĩ cĩnaang, aũlan hátĩ heelluung ngagiita.

¹⁴ Aggammeet ngagĩĩt mĩnnanĩ cĩ Krĩstõ. Haga naag haĩ baa adaahĩ Krĩstõ, hĩnĩngĩtĩ eet vẽlẽk, ẽtẽrꞌtha thõõth ciee aĩ, õthõl eeta vẽlẽk daahĩth cĩnnĩ.

¹⁵ Nẽ baa adaahĩ Krĩstõ, hĩnĩngĩtĩ eet vẽlẽk, hátĩ hiittiõõ eeta ꞌcĩg arũgĩ hõllõngaa arũgĩ, hĩnĩngĩtĩ eleeti cĩggĩĩng diooni. Abũnnaa arũgĩ nẽẽg, hátĩ haccamattoothĩk hĩ Krĩstõ baa adaahĩ nẽ ũrũga tarĩ, hĩnĩngĩtĩ ĩhõõggõ.

¹⁶ Nẽẽthĩ, iꞌthianaanĩ kõr nicci, hadiim naag hiittiõõ hõllõngaa hetteedĩk eet thooꞌthiok hĩ eeta cĩg looc nicci. Tananga baa hetteeddik naag Krĩstõ thõõth ꞌgõõlaa cĩ, iittiõõ hõllõngaa occa hadĩman noho tarĩ.

¹⁷ Nẽẽthĩ, má ikia ẽlẽm ẽẽtĩ umwaa Krĩstõ, ikia ũtũhũĩ rũgẽtĩ cĩnnĩ ĩĩ ngeju. Ataarõthĩ nẽẽ thooꞌthiok cĩg rũgẽt cĩnnĩ baa ꞌrẽẽnĩ. Nẽ ammanyanĩ rũgẽtĩ baa ꞌrẽẽnẽẽnĩ nẽ ikia ꞌcĩ ĩĩn ngeju!

¹⁸ Nyekuc ꞌcĩ adtican thooꞌthiok iccig vẽlẽk, ngaatĩ ĩꞌthõõanĩ Krĩstõ Ngeerĩnĩ hikia haganĩtheet ngagĩĩt hĩ Nyekuc nẽ aaꞌnyeet hĩĩtõ eet ꞌcĩg hadtican ganõn ngaatĩ haduhaakĩ eet helemit ĩnõõnnõ.

¹⁹ Aĩ thõõth ciee nẽẽ, aaĩ Nyekuci ẽllaa cĩ Krĩstõ, ngaatĩ aaꞌnyeet ngagĩĩt hagayyio hĩ ĩnõõnnõ, ĩnõõ ꞌcĩ hõllõngaa agiilikeet ngagĩĩt ꞌthẽccanẽẽt cĩggaac. Nẽ aaꞌnyeet dtiic ꞌcĩ hõthõlĩ nyeemuut cĩ ganõõnõ.

²⁰ Hĩĩtõ naag ꞌthooyyiak cĩg Krĩstõ nẽ alauung Nyekuci ngagiit aĩ, ĩthĩhĩt nyeemuut cĩnnĩ ꞌcĩ ĩĩn ngeju ho. Hõthõõꞌtha naag nyeemuut cĩ Krĩstõ nẽ dĩdĩ hadiimmuung naag ngagiit agayyio hĩ Nyekuc.

²¹ Tananga baa hõllõngaa ĩĩn Krĩstõ ꞌthẽccannioohit, baa aaꞌnyĩk Nyekuci ĩnõõnnõ hĩĩ ꞌgaarrieenit, hĩnĩngĩtĩ ꞌthẽccanẽẽt cĩggaac, hátĩ hũbũttaath naag nẽ elemeet Nyekuci.