2 Korinthia 13 - ꞌBuuk cĩ Thõõth cĩ Nyekuci

Tilooinit hĩ ꞌthaainit ꞌcĩ adtuurna

¹ Ĩĩn hatĩ ciee heeroni caannĩ ꞌcĩ ĩĩn iyyio, ꞌcĩ hẽhẽẽrõnaakuung ngagiita. “Ma othooꞌthi thõõth umwaa tarĩ, athĩhĩ hatĩ eeta ꞌcĩg ĩĩn ꞌramma hode iyyio hatĩ ĩĩn dĩdĩ.”

² Baa hitiloouung naa ngagiit ẽlẽk, baa hẽhẽẽrõnaakuung ngagiit hẽẽrõnaa caannĩ ĩĩ baa ĩĩn ꞌramma. Nẽ haduha ꞌyioko tarĩ, nga hĩĩgĩnnõõ ꞌrẽẽttĩg. Ma hõbõda, hakuu hatĩ huuki eet baag ẽꞌthẽcattõõ ĩĩcĩ oou ẽlẽk, hode eet ũgĩ ꞌcĩg nga ẽꞌthẽcanoothi thooꞌthiok noho.

³ Nẽ hĩcĩ adiimmu niig agayyu ngaatĩ õthõõthĩ Krĩstõ hĩ nganĩĩta, aitiõõ nẽẽ hõllõngaa appĩĩrnanĩ ꞌtirrian cĩnnĩ, hatĩ adiim ammiirannuung ngagiit ꞌthẽccanẽẽtĩĩ cugguung nẽ maka ꞌtirrianĩ cĩnnĩ hõrggẽẽnaa cunuung.

⁴ Tananga baa odooddothoothĩk nẽẽ hurucceea, aaĩ hĩcĩ baa appĩĩrna ꞌtirriani cĩnnẽẽnĩ. Nẽ ꞌyioko, arũgĩ nẽẽ ꞌtirriaanaa cĩ Nyekuci. Noho, happĩĩrna hatĩ naag buúk hĩ baa Krĩstõ. Nẽẽthĩ nẽẽꞌthẽk, acinnu hatĩ harũgĩ naag hĩ ĩnõõnnõ ꞌtirriaanaa cĩ Nyekuci nẽ hatĩ hidticattoothihuung ngagiita.

⁵ Iiyyielit eleeti cugguung hátĩ ummuddia, má aꞌnyaku lemiinit cĩ Krĩstõ ꞌcĩ ĩĩn dĩdĩ. Ĩttĩmanit eleeti cugguung nẽ má ĩllõõattu ꞌtĩmman icci, ammũdaannu hatĩ ngaatĩ aayyi Yeesu Krĩstõ hĩ ngagiita nẽ má hõllõngaa aaĩ Krĩstõ hĩ ngagiita, udhuktaau thĩ ꞌthẽk niig ꞌtĩmman icci.

⁶ Nẽ hammuhi occa hatĩ hõllõngaa ammũdaannu aĩ, hudhukta naag ꞌtĩmmaana.

⁷ Nẽ ꞌyioko, halayya naag Nyekuc, hátĩ hiittiõõ hõllõngaa adĩmannu niig hẽlẽggĩ ꞌcĩg abathĩ. Hõllõngaa hĩnĩngĩtĩ acĩn eeta aĩ hĩttĩmmateea naag ẽlẽk, ĩĩn hĩnĩngĩtĩ adticannu niig thooꞌthiok ꞌcĩg aũlanĩ, tananga haau hĩcĩ hudhuktaawa naag ꞌtĩmmaanaa ĩĩcĩ.

⁸ Hĩnĩngĩtĩ occa hõllõngaa hadĩmanna naag thooꞌthiok ꞌcĩg hõllõngaa ĩĩn dĩdĩ ꞌcĩg abũrĩ nyeemuut cĩ Krĩstõ.

⁹ Haccamanoothĩka naag hatĩ okommu niiga nẽ hippiirriawa naaga. Nẽ halaiinna naag gẽrrẽẽt haĩnna, aꞌnyĩĩk lemiinit cunuung hõkõm haau hĩ hẽẽt ꞌcĩ ĩĩga.

¹⁰ Ĩnõõ ꞌcĩ hẽhẽẽdakuung naa ngagiit thooꞌthiok iccig nga haayyia ꞌrẽẽna, hátĩ ma hikia, hiittiõõ hõllõngaa hothoothikuung komiitta makaaꞌthĩtaa caannĩ, ĩĩ baa aaꞌnya Makayyioohiti. Baa aaꞌnyĩhoothĩkaa nganĩĩt makaaꞌthĩt ciee, hátĩ heelluung ngagiita nẽ baa hõllõngaa aaꞌnyĩhoothĩkaa, hátĩ hĩꞌthannuung ngagiit thõng.

ꞌThaainit cĩ Paaulo ꞌcĩ adtuurna

¹¹ Dtuurnattaa caannĩ, ꞌgotoonoga hĩ ngoonoga, ĩlaallẽ, hũũha naana. Aꞌnyĩĩk lemiinit cunuung hõkõm haau hĩ hẽẽt ꞌcĩ ĩĩga, ĩthĩhĩt ĩlaali caannĩ, aꞌnyahit muhẽẽnĩt hõdẽẽthõng, aaut niig vẽlẽk lõꞌngõõc. Nẽ hatĩ au ganõnĩ cĩ Nyekuci hĩ mĩnnan cĩnnĩ hĩ ngagiita.

¹² Ĩꞌthaac ꞌgoonogu taliitta.

¹³ Ĩꞌthaayyuung lemmiooha cĩg Nyekuci vẽlẽk ngagiita.

¹⁴ Aꞌnyĩĩk bũnnai cĩ Makayyioohit cĩnaac Yeesu Krĩstõ hĩ mĩnnan cĩ Nyekuci hĩ rũmẽẽnĩt cĩ Lori ꞌcĩ Ẽllẽẽmĩth, haau hĩ ngagiit vẽlẽk.