2 Korinthia 12 - ꞌBuuk cĩ Thõõth cĩ Nyekuci

Thooꞌthiok ꞌcĩg ẽtẽrꞌtha Makayyioohiti honoothittatõõ

¹ Occa ꞌthẽk hirriani naa thõng, nẽẽthĩ, aitiõõ hinnia ꞌgii ꞌcĩ hammũda naa hĩ ꞌrianĩĩth tõõ. Nẽẽthĩ, occa hirrianĩ naa honoothi hĩ hẽlẽggĩ ũgĩ ꞌcĩg eterꞌtheeka Makayyioohiti nganĩĩta.

² Haga naa nuyyioohit umwa cĩ Krĩstõ baa õdõng honoothi ĩnõõnnõ nẽ ũũhĩ õlõõ cĩ Nyekuci hẽẽtkujjieen, irkiꞌnyiaannĩĩ baag allacattĩ ĩĩn õmmõtõ hĩ ꞌwec. Aitiõõ naa hõllõngaa haga ngaatĩ baa õkõõĩ nuyyioohiti tĩho ẽlla noho hode aitiõõ, Nyekuc dioo ꞌcĩ aga.

³ Hĩ baa haduha naana, Nyekuc dioo ꞌcĩ aga, hatĩ baa õkõ ẽẽtĩ tĩho hẽẽtahujjieen ẽllaa cĩnnĩ noho.

⁴ Nẽẽthĩ, baa õkõõĩ honoothi ĩnõõnnõ hẽẽtahujjieen ngaatĩ baa õkõ athĩknĩ hẽlẽggĩ ꞌcĩg ẽllẽẽmĩth gẽrrẽẽt, ꞌcĩg anyamanneet ngaatĩ hathithanĩ.

⁵ Hirrianĩ hatĩ naa eet tĩho, hõllõngaa hatĩ hirrianĩ ẽlẽ caannĩ nẽ hatĩ hõthõõtha pĩĩrnanĩt cĩ ẽlẽ caannĩ diooni.

⁶ Tananga má hẽbẽra naa ꞌrianĩĩth, hõllõngaa hatĩ haggiithi. Haduhaakuung naa ngagiit thõõth dĩdĩ nẽ hĩttĩmana ngaatĩ hõllõngaa haduhaakuung thõõth ꞌcĩ maka gẽrrẽẽt. ꞌGõõlaa cĩ, aitiõõ hatĩ ẽẽtĩ ꞌcĩ ammuhaanna nganĩĩt gẽrrẽẽt hĩllõõan tõõ, hĩnĩngĩtĩ ĩcĩttu niig ꞌgii vẽlẽk ꞌcĩ hadĩmani naana nẽ huduha.

⁷ Ee mĩĩ ꞌthẽk, hothoothi naa ꞌyioko hẽlẽggĩ ꞌcĩg baag ẽllẽẽmĩth baag hĩcĩna naana. Ĩꞌthõõa ꞌThĩttaanĩ aajĩlõ cĩnnĩ ꞌcĩ ĩĩn lori ꞌcĩ abathĩ, hátĩ hikia haꞌnyaha pĩĩrnanĩt ꞌcĩ ẽkẽdan aaĩ hĩgõõng akatĩ eet bĩllẽẽtĩ, hátĩ hiittiõõ hõllõngaa hirriani gẽrrẽẽt.

⁸ Baa hala naa Makayyioohit tabattĩ iyyio, hátĩ hatamaatĩhaa nganĩĩt hittik pĩĩrnanĩt ꞌcĩ haꞌnyahi ho battaala.

⁹ Nẽ ikia ẽdẽca nẽẽ nganĩĩt ĩnnĩhaa, “Bũnnai caannĩ dioo ꞌcĩ adiimi niina. Hĩnĩngĩtĩ maka ꞌtirriani caannĩ hatĩ appĩĩrna niina.” Nẽẽthĩ, hatali hatĩ naa gẽrrẽẽt hatĩ aaꞌnya Krĩstõ nganĩĩt ꞌtirrian cĩnnĩ, hĩnĩngĩtĩ appĩĩrna ẽlẽ caannẽẽnĩ.

¹⁰ Eei, haccamanoothihi naa ngaatĩ happĩĩrnanĩĩ, hĩ ngaatĩ hodoominii, hĩ ngaatĩ huukẽnĩĩ, hĩ ngaatĩ homothiini hĩ ngaatĩ haccananiini, hĩnĩngĩtĩ Krĩstõ. Ĩnõõ ꞌcĩ ma happĩĩrna, hattirani.

Aꞌthũũnnĩ Paaulo nuyyiook cĩg Makayyiooktak

¹¹ Baa haarĩha naa ẽlẽ caannĩ haau hĩ ꞌgiiꞌthiahiti nẽ baa ngagiit ꞌcĩg attĩnganeekaangu nganĩĩt hĩdĩman noho ho, hĩnĩngĩtĩ occa baa ngagiit ꞌcĩg ẽẽllaangu nganĩĩta. Tananga haau naa hĩ ꞌgiimwa haaga, habũnna hinnia naa buúk huduktooa hĩ ꞌthooyyiak ꞌcĩg tiirik ko thõng.

¹² Baa nga harũmĩ naag hĩ ngagiita, baa hemmeethi nẽ hidticana thooꞌthiok ꞌcĩg ĩnaat eeta, ꞌcĩg ẽtẽrꞌtha aĩ, hĩĩnĩ naa ꞌthooyyiahit cĩ Krĩstõ dĩdĩ.

¹³ Iita abaccu niig ꞌgattan hõdẽẽthõng ꞌcĩ baa ammũda lothippiꞌnya cĩg lemmiook cĩg Krĩstõ loonyinii ũgẽẽgĩ. Ĩnõõ thõõth ꞌcĩ haĩnnĩ naa, baa hõllõngaa hajinnuung naa ngagiit hanneekuung eelliaangu nganĩĩta. Nẽ atamaattihaangu nganĩĩt, hĩnĩngĩtĩ bathi icci.

¹⁴ Hadiimi haꞌnyahaakuung heeroni caannĩ ꞌcĩ ĩĩn iyyio. Nẽ hõllõngaa hatĩ hadiimi naa eliinit umwa hĩ ngagiita. Hadiimmuung naa ngagiit dioo ĩĩtõ lemmiook cĩg Krĩstõ, hõllõngaa hĩnĩngĩtĩ hẽlẽggĩ ꞌcĩg aꞌnyaku niiga. Hõllõngaa occa lõhõlĩ ꞌcĩg kidicig ꞌcĩg occa ẽẽl maajihi hĩ ngaaggi, ĩhõõggõ ꞌcĩg occa ẽẽl lõhõlĩ cĩggĩĩng.

¹⁵ Haccamanoothihi hatĩ naa gẽrrẽẽt hatĩ hõthõl hẽlẽggĩ vẽlẽk ꞌcĩg haꞌnyahi naana hĩ ẽlẽ caannĩ, ꞌcĩg eelluung ngagiit ĩĩtõ lemmiook cĩg Nyekuci. Nẽ má hammĩnannuung naa ngagiit gẽrrẽẽt, ĩcca occa hatĩ ammĩnannaangu niig nganĩĩt hĩdĩĩc?

¹⁶ Baa elemtu niig iittu, hõllõngaa naa haꞌnyahaakuung ngagiit pĩĩrnanĩt. Nẽẽthĩ, baa ammuk eeta ũgẽẽgĩ aĩ, hakuu naa halũllũũmannuung ngagiit ꞌgẽẽnyĩthaa caannĩ ngaatĩ hogolleekuung thõng.

¹⁷ Au baa iggoolluung eeta baag hĩꞌthõõakuung naana?

¹⁸ Baa haduhaahi naa Tiito hikia hẽhẽẽrõnaahuung ngagiita, ĩnõõnnõ hĩ ꞌgotooneet umwa. Baa hõllõngaa iggoolluung Tiito ngagiit thõng, iggooluung baallĩ? Hõllõngaa baa haattiyyia naag ꞌgõõla hõdẽẽthõng hĩ nẽẽnĩ?

¹⁹ Unuuktihu baa niig ngaatĩ ammuku aĩ, hẽẽlanna naag eleeti cĩggaang? Baa hõthõõꞌtha thooꞌthiok ꞌcĩg aga Nyekuci buúk aĩ, hĩĩgĩnna nuyyiook cĩg Krĩstõ. Nẽ ꞌgotoonoga hĩ ngoonoga, ꞌgii vẽlẽk ꞌcĩ hadticanna naaga, hadticanna, hátĩ hõkõm lemiiniti cunuung hĩ Krĩstõ.

²⁰ Homoꞌthi naa haini ma hikia naana, hõllõngaa hatali ngaatĩ hammũdaakuung ngagiit aattiyyu ꞌgõõlaa ꞌcĩ hõllõngaa hadiimi naana nẽ aitiõõ hatĩ niig buúk hõllõngaa atallu ꞌgõõl ꞌcĩ haayyi naana. Nẽ hiꞌngolli naa ngaatĩ occa aꞌnyaku ꞌgerenyi, hĩ inan hĩ lĩĩlĩẽẽnĩt hĩ voggongi hĩ tongomi hĩ ꞌrianĩĩth hĩ tahahaaꞌthĩt.

²¹ Hiteelli naa haini ma hõbõda tarĩ, aaꞌnya hatĩ Nyekuci nganĩĩt ngaaoni hõrggẽẽnaa cunuung. Nẽ homoꞌthi hatĩ naa, hĩnĩngĩtĩ mẽẽlĩg eeta ꞌcĩg nga hũtũngteek ꞌthẽccanẽẽt cĩggĩĩng baag ꞌrẽẽttĩg. Nga mẽẽlĩg eeta ꞌcĩg adĩman hẽlẽggĩ ꞌcĩg ĩĩn ꞌriiring, ꞌwaangĩth, hĩ thooꞌthiok ꞌcĩg hõllõngaa aũlan lothippita, hĩ thooꞌthiok ꞌcĩg aaꞌnyeet ngaaoni.