2 Korinthia 11 - ꞌBuuk cĩ Thõõth cĩ Nyekuci

Paaulo hĩ ꞌthooyyiak ꞌcĩg hõllõngaa ĩĩn dĩdĩ

¹ Hammuhi occa emmeeꞌthu ꞌgiithẽnĩt caannĩ, nẽẽthĩ nẽẽꞌthẽk, ĩdĩmattu nohotaa ẽlẽk.

² Harrĩcanaannuung naa ngagiit hĩ Nyekuci, hĩnĩngĩtĩ baa aattiyyu niig hĩ bũhẽẽcĩ ꞌcĩ nga hũꞌthũwanĩ ꞌcĩ hẽbẽraahi naa Krĩstõ diooni.

³ Nẽẽthĩ, homoꞌthi naa haini iggoolluung hatĩ ꞌThĩttaanĩ baa ĩĩn hũkaat baa ĩggõõl Ẽẽvva, nẽ arahannuung hatĩ ngagiit, hátĩ hiittiõõ hõllõngaa anuyyu thõõth ꞌcĩ tẽllĩ ꞌcĩ ĩĩn dĩdĩ cĩ Krĩstõ.

⁴ Baa hillimatteehuung naag ngagiit nyeemuut cĩ Yeesu nẽ iita elemtu nyeemuut cĩnaang nẽ aggamtu Lori ꞌcĩ Ẽllẽẽmĩthĩ. Nẽ iita aanytĩhu eet ũgĩ hillimatteehuung nyeemuut ꞌcĩ abũnnaa cĩ Yeesu. Nẽ ꞌyioko, iita ũkũmattoothihu niig ngaatĩ elemmu nyeemuut umwa ꞌcĩ abũnnaa nẽ aggamtu lori ꞌcĩ ꞌrĩĩng.

⁵ Nẽẽthĩ, hammuhi occa haduhoonna naag buúk, hĩ eet ꞌcĩg avvĩ eleeti cĩggĩĩng aĩ hĩĩgĩnna ꞌthooyyiak ꞌcĩg tiirik ko thõng.

⁶ Tananga hõllõngaa hothoothi naa jurrung hĩ nẽẽgĩ, haꞌnyahi ꞌgẽẽnyĩth ꞌcĩ hagaĩ thõõth. Baa hillimatteehuung naag ngagiit thõõth icci ẽlẽk jurrung ꞌgoolliohĩ vẽlẽk.

⁷ Hẽꞌthẽcana occa baa naa ngaatĩ haaꞌnyĩkĩĩ ẽlẽ caannĩ hĩĩ hĩdĩc nẽ hõdõngaauung ngagiit, ngaatĩ hallimaneekuung nyeemuut ꞌcĩ abũnnaa cĩ Nyekuci haaga?

⁸ Baa aaꞌnya nganĩĩt lothippiꞌnya cĩg lemmioohu ũgẽẽgĩ ꞌbaaninit cĩnĩĩng, hátĩ heeluung naa ngagiita. Harratanaa occa baa naa ĩhõõggõ ꞌbaaninit thõng?

⁹ Tananga baa happĩĩrna naa hiꞌthihi ꞌgii ꞌcĩ haꞌnyahi baa harũmĩ hĩ ngagiita, baa hõllõngaa hatĩkĩannuung naa ngagiita. Lemmiook baag au looccaa cĩ Maccedoonia dioo, baag au aꞌnyahaaka ꞌbaaninit nẽ nga hĩtĩkĩĩan eet umwa hõrggẽẽnaa cunuung ꞌgõõlaa umwaanĩ nẽ haalla hatĩ hadĩmani noho ũdũt.

¹⁰ Hĩcĩ aaĩ thõõth cĩ Krĩstõ dĩdĩ hĩ nganĩĩt ko, aitiõõ hatĩ ẽẽtĩ ꞌcĩ abĩllĩ ꞌrianĩĩth caannĩ ho looccaa cĩ Acaia, ngaatĩ hallimanĩĩ thõõth cĩ Nyekuci haaga tõõ.

¹¹ Inni? Hĩnĩngĩtĩ hõllõngaa hammĩnannuung naa ngagiita? Aga Nyekuci ngaatĩ hammĩnannuung naa ngagiita!

¹² Nẽ haalla hatĩ naa hadticani thooꞌthiok gõõng hadticani hõdõõkõthĩ, hátĩ hĩbĩlĩ eet ꞌcĩg adiim ammũda ꞌgõõl ꞌcĩ ĩthakꞌthẽẽkĩ dtiic cĩnĩĩng irrianĩ ho, hĩ dtiic cĩnaang.

¹³ Ĩĩn eeta ꞌcĩg aattĩg noho ꞌthooyyiak ꞌcĩg hõllõngaa ĩĩn dĩdĩ, oolongeekeet aĩ hĩĩgĩnna ꞌthooyyiak cĩg Krĩstõ.

¹⁴ Aitiõõ hõllõngaa occa hakuleek naag ꞌjieen, hĩnĩngĩtĩ ꞌThĩttaan dẽẽdẽ ꞌcĩ õõlõng aĩ, hĩĩnĩ aajĩlõ ꞌcĩ hakuu hĩ Nyekuc.

¹⁵ Nẽẽthĩ hoti ho, aitiõõ hõllõngaa hakuleek ꞌjieen, hatĩ má iggoolleet ꞌThĩttaanĩ ngagĩĩt ngaatĩ õõlõngĩ dticcianniooha cĩgĩnnĩg aattiyyi hĩ dticcianniooha ꞌcĩg abũnnaa. Ammũda hatĩ nẽẽg ꞌgii ꞌcĩ adiim dtiici cĩnĩĩng ko kõr umwa.

Accananni Paaulo hĩnĩngĩtĩ Krĩstõ

¹⁶ Hõbõdẽẽkĩ tarĩ, hõllõngaa hadiimmuung naa ngagiit ummuhit ĩĩtõ hĩĩnĩ naa ꞌgiiꞌthiahit. Nẽẽthĩ, má ammuku nohotaa, ĩꞌnya ꞌthĩĩ da haau hĩ ꞌgiiꞌthiahiti, hátĩ hirrian naa buúk hĩdĩhĩdĩĩc.

¹⁷ Nẽ baa haꞌnyahi naa ꞌrianĩĩth icci, haꞌnyahi hĩ ꞌgiiꞌthiahiti haaga, hõllõngaa haꞌnyahi, hĩnĩngĩtĩ Makayyioohit.

¹⁸ Nẽ hĩcĩ irrianit eeta ꞌcĩg mẽẽlĩg ꞌgõõlaa cĩ eet cĩg looc nicci ho, hirriani hatĩ naa buúk.

¹⁹ Ammuku niig ainnu iiginnu eet ꞌcĩg eggeeꞌnyu gẽrrẽẽt nẽ aalla nga anuꞌthaannu ꞌgiiꞌthiahit noho!

²⁰ Nẽ dĩdĩ, nga aalla anuꞌthaannu niig eet ꞌcĩg aarruung ngagiit ĩĩtõ appahacaaꞌnya noho, arratannuunga nẽ igorithit ijjio cugguung nẽ tarĩ õdõng eleeti cĩggĩĩng hĩllõõattuung ngagiita nẽ atabaangtuung ngagiit muumti cũrũmũũm nĩĩcĩ noho.

²¹ Aggamma nganĩĩt ngaaoni ngaatĩ occa haĩnnĩ, hõllõngaa hattiran naag ngaatĩ occa hadĩmanĩ thooꞌthiok tĩko. Nẽ má irrian ẽẽtĩ, occa hirriani naa buúk.

²² Irrian nẽẽg aĩ, hĩĩgĩnna Ebereei? Hĩĩnĩ naa buúk. Irrian nẽẽg aĩ hĩĩgĩnna eet cĩg Ĩꞌthĩraẽlĩ? Hĩĩnĩ naa buúk Ebereeinit. Irrian nẽẽg aĩ, hĩĩgĩnna lõhõlĩ cĩg Abũrahamĩ? Hĩĩnĩ naa buúk loholeec cĩ Abũrahamĩ.

²³ Irrian nẽẽg aĩ hĩĩgĩnna dticcianniook cĩg Krĩstõ? Hĩĩnĩ hinnia naa ꞌgiiꞌthiahit hatĩ hothoothi hoti, hĩnĩngĩtĩ hĩllõõani naa ĩhõõggõ. Hĩnĩngĩtĩ hidticanoothĩha naa Nyekuc gẽrrẽẽt, haarĩhoothĩha baabuuth tabattĩ mẽẽlĩg nẽ huuki halliẽẽnĩ tabattĩ mẽẽlĩg, hĩnĩngĩtĩ Krĩstõ nẽ hoboktooa hĩ daahĩth tabattĩ mẽẽlĩg.

²⁴ Nẽ tarĩ, uukta makayyiooha cĩg ꞌJudeei buúk tabattĩ ꞌtur halliẽẽn hẽẽn iyyio hĩ tũrkũwwec.

²⁵ Hohoddia hĩbahĩta tabattĩ iyyio nẽ hohoddia biyyiẽẽnĩ tabattĩ hõdẽĩ. Ilibti haahũlĩta ꞌcĩg baag hõvvõõĩ buúk tabattĩ iyyio nẽ haau bũlũcatõõ cobbi, baalin hõdẽĩ hĩ waathĩn hõdẽĩ.

²⁶ Nẽ weetaa caannĩ hõvvõõyyĩ ho vẽlẽk, hammũda naa pĩĩrnanĩt ngaatĩ habaahinii hidiowwẽẽn, homotoonna hĩ igorriaak nẽ hũmmũda pĩĩrnanĩt hĩ eet cĩg looc caannĩ dẽẽdẽ nẽ tarĩ, hũmmũda pĩĩrnanĩt hĩ eet ꞌcĩg hõllõngaa ĩĩn ꞌJudeei. Baa hammũda naa pĩĩrnanĩt ꞌtaaũnnioohĩĩ ꞌcĩg obbitig nẽ hũmmũda pĩĩrnanĩt battaalliohĩĩ ꞌcĩg õdõhõhĩĩ hĩ bũlũccwaanĩ ꞌcĩg obbitig, hĩ eetinii ꞌcĩg aĩ hĩĩgĩnna nuyyiook cĩ Makayyiookto.

²⁷ Baa hadticanii naa gẽrrẽẽt nẽ haꞌnyaha baalinniook ꞌcĩg mẽẽlĩg hiꞌthihi ũꞌnyaak nẽ haau uraa, aamma kõrra, hiꞌthihi ꞌgii ꞌcĩ hadahi. Ahũdda lajjõ hĩnĩngĩtĩ hiꞌthihi ceremwa ꞌcĩg habungẽẽnĩ jurrung, hatĩ alalĩ lõõcĩ.

²⁸ Nẽ thooꞌthiohĩĩ cĩg vẽlẽk, baa atĩkĩĩannaa nganĩĩt thõõth cĩ lothippit cĩ lemmiook cĩg ꞌtaaũnniook vẽlẽk hõdõõkõthĩ.

²⁹ Ma aitiõõ eeta ũgẽẽgĩ hõllõngaa aꞌnyak ꞌtirrian, aitiõõ thĩ ꞌthẽk hĩ nganĩĩt buúk tõõ. Ma ĩggõõl eeta eet ũgĩ harahanit nẽ ẽꞌthẽcattõõ, hakuu halĩĩlĩ naa gẽrrẽẽt.

³⁰ Nẽ má hirriana naana, abũnnaa hirrianĩ hẽlẽggĩ ꞌcĩg ẽtẽrꞌtha aĩ, aitiõõ nganĩĩt ꞌtirriani tõõ.

³¹ Nyekuc Maaꞌnyĩ Makayyioohit cĩnaac Yeesu Krĩstõ, ꞌcĩ aga aĩ hõllõngaa hoolongi naana nẽ aꞌnyĩĩk hĩdĩhĩthĩ nẽẽ ooo!

³² Makayyioohit cĩ Damaathĩko ꞌcĩ baa aaꞌnyĩk ũũrũta cĩgĩnnĩg hebehit hattũũgẽt ꞌcĩg obbitig, aĩ hatĩ haggama nganĩĩta, korrioohĩĩ baag ĩĩnnĩ Arẽẽtathĩ habu.

³³ Tõjõhõ hiita hõyõyyõõrattaawa ꞌgotoonoga ũgẽẽgĩ hutulaa cĩ araanõ, nĩngĩtĩ hanĩhĩ nĩngaata halĩĩtanĩĩ ĩnõõnnõ.