1 Yõaannẽ 2 - ꞌBuuk cĩ Thõõth cĩ Nyekuci

Eelleet Krĩstõ ngagĩĩta

¹ Lõhõlĩ cĩgannĩg, hẽhẽẽdakuung naa ngagiit waraga icci, hátĩ hiittiõõ hõllõngaa adĩmannu ꞌthẽccanẽẽt. Nẽẽthĩ, má ĩdĩmattu ꞌthẽccan, adĩman Yeesu Krĩstõ Ẽẽtĩ ꞌcĩ Abũnnaa hõdõõkõthĩ, thõõth ꞌcĩ aũlanĩ nẽ aduhaak hatĩ nẽẽ Maaꞌnyĩ hũtũngeek ꞌthẽccanẽẽt cĩggaac.

² Ĩĩn Krĩstõ ꞌgaarrieenit ꞌcĩ attik ꞌthẽccanẽẽt cĩggaac battaala. Nẽẽthĩ, hõllõngaa attik ꞌthẽccanẽẽt cĩggaac diooni, attik ꞌthẽccanẽẽt cĩg eet cĩg lootu vẽlẽk.

³ Má hathĩhĩ naag tilooinit cĩ Nyekuci jurrung, haga naag ngaatĩ hagaĩ ĩnõõnnõ dĩdĩ.

⁴ Nẽ má hõthõõth naag haĩ haga ĩnõõnnõ, nẽ hõllõngaa hathĩhĩ thõõth cĩnnĩ, haduha naag õlõng nẽ aitiõõ thõõth ꞌcĩ ĩĩn dĩdĩ ꞌthinneetinii cĩggaac tõõ.

⁵ Nẽẽthĩ, má aꞌthũũnnĩ ẽẽtĩ umwaa thõõth cĩ Nyekuci, aku edeeꞌnyia mĩnnanĩ cĩ Nyekuci ngaatĩ ĩĩnnĩ dĩdĩ hĩ ĩnõõnnõ.

⁶ Má hõthõõth naag haĩ hĩĩgĩn cĩgĩnnĩg, abũnnaa hanũ terethiinit cĩ Krĩstõ.

Tilooinit ꞌcĩ ĩĩn ngeju

⁷ ꞌGotoonoga hĩ ngoonoga, hõllõngaa hẽhẽẽdakuung naa tilooinit ꞌcĩ ĩĩn ngeju. Hẽhẽẽdakuung tilooinit baa oou baa illimanoothihuung ngagiita, nẽ ĩĩn nyeemuut baa ithiktu niig ẽlẽk.

⁸ Nẽẽthĩ, ĩĩn tilooinit ꞌcĩ ĩĩn ngeju dĩdĩ, nẽ agayyu niig thõõth cĩnnĩ ꞌcĩ ĩĩn dĩdĩ haau hĩcĩ aga Krĩstõ. Occa icittu niig ẽlẽk ngaatĩ aꞌnginõõꞌthĩ muguuri nẽ ũttũhũlõõ lanyit ꞌcĩ ĩĩn dĩdĩ ẽlẽk.

⁹ Má haĩ naag haattĩg lanyita nẽ haaburreek eet umwa, nga haattĩg naag muguuratõõ.

¹⁰ Nẽ má hammĩnan ꞌgoonogeet, haattĩg naag lanyita nẽ aitiõõ thõõth ꞌcĩ abathĩ ꞌcĩ hahĩĩnak ĩhõõggõ tõõ.

¹¹ Má haaburreek naag ꞌgoonogeet hĩ ngoonogeet, haattĩg naag nẽ hõtõõcõ muguuratõõ nẽ hõllõngaa haga ꞌgõõl ꞌcĩ hõõĩ, hĩnĩngĩtĩ hõllõngaa occa hacĩnĩ muguuratõõ.

¹² Hẽhẽẽdakuung naa ngagiit lõhõlĩ cĩg Nyekuci waraga icci, hĩnĩngĩtĩ ũtũngtoothĩk ꞌthẽccanẽẽta cugguung, hĩnĩngĩtĩ Krĩstõ.

¹³ Hẽhẽẽdakuung naa ngagiit nyakangaaꞌnya hĩ morwak waraga, hĩnĩngĩtĩ agayyu niig Krĩstõ baa aaĩ baa nga heteheꞌnyiaa lõõcĩ. Nẽ tarĩ, hẽtẽhẽẽdahuung waraga ngagiit nyahaappanĩt hĩ buheeci, hĩnĩngĩtĩ ĩllõõattu niig ꞌThĩttaan.

¹⁴ Hẽhẽẽdakuung naa waraga ngagiit lõhõlĩ, hĩnĩngĩtĩ agayyu niig Baangeet. Hẽhẽẽdakuung naa ngagiit waraga nyakangaaꞌnya hĩ morwak, hĩnĩngĩtĩ iita agayyu niig Krĩstõ, baa aaĩ baa nga heteheꞌnyiaa lõõcĩ. Hẽhẽẽdakuung ngagiit nyahaappanĩt hĩ buheeci, hĩnĩngĩtĩ attirannu niiga. Õkõmĩ thõõth cĩ Nyekuci ꞌthinneetinii cugguung nẽ ĩllõõattu niig ꞌThĩttaan.

Ma hammĩnannu looc nicci

¹⁵ Nẽẽthĩ hoti ho, ma hammĩnannu looc nicci hode hẽlẽggĩ cĩg looc nicci. Hĩnĩngĩtĩ má ammĩnannu niig looc nicci, aitiõõ thĩ hõllõngaa occa ammĩnannu Baangeet.

¹⁶ Hĩnĩngĩtĩ aku thĩngõõnyani cĩ ꞌgiithẽnĩt cĩnaac looccaa cĩ nẽ aku muruꞌthẽẽt ꞌcĩ habũranẽẽkĩ naag hẽlẽggĩ ꞌcĩg hacĩn thõng ko buúk, looccaa cĩ. Aitiõõ hẽlẽggĩ cieeg vẽlẽk hõllõngaa au hĩ Baangeet.

¹⁷ Aꞌnginoothi hatĩ lõõcĩ ciee hõdẽĩ hĩ thooꞌthiok vẽlẽk ꞌcĩg abũraneek eeta. Nẽẽthĩ, ẽẽtĩ ꞌcĩ adĩman thõõth ꞌcĩ accamana Nyekuci, arũgĩ hatĩ nẽẽ ũdũt.

Mĩrõk cĩg Krĩstõ

¹⁸ Niig lohollia cĩgannẽẽgĩ, korriook ꞌcĩg adtuurna cieegi. Baa ĩthĩktu niig aĩ uppwaanna hatĩ mirohiti cĩ Krĩstõ korrioohĩĩ cĩg, tananga ꞌyioko, uppwaatta mĩrõha cĩg Krĩstõ ꞌcĩg mẽẽlĩg ẽlẽk. Nẽ ꞌgõõl ꞌcĩ hagaĩ ngaatĩ ĩĩ korriook ꞌcĩg adtuurna ho cieegi.

¹⁹ Baa ũtũngteek eeta cieeg lothippit cĩnaac, nẽẽthĩ hinnia, baa hõllõngaa ĩĩn nẽẽg eet cĩg lothippit cĩnaac dĩdĩ. Má baa hĩĩtõ nẽẽg eet cĩg lothippit cĩnaac, occa baa aalla nẽẽg lothippitaa cĩnaac. Nẽ hinnianĩ, baa ũtũngteeheet nẽẽg ngagĩĩta, ĩnõõ ꞌcĩ hau hagaĩ naag haĩnnĩ, hõllõngaa ĩĩn nẽẽg eet cĩg lothippit cĩnaac ko.

²⁰ Nẽẽthĩ, hõllõngaa aattiyyu niig hĩ nẽẽgĩ, hĩnĩngĩtĩ aaꞌnyuung ngagiit Krĩstõ ꞌcĩ Ẽllẽẽmĩth Lori cĩnnĩ nẽ iita agayyu niig vẽlẽk thõõth ꞌcĩ ĩĩn dĩdĩ.

²¹ Nẽẽthĩ hoti ho, hõllõngaa hẽhẽẽdakuung naa ngagiit waraga icci, hĩnĩngĩtĩ hõllõngaa agayyu niig thõõth ꞌcĩ ĩĩn dĩdĩ. Nẽẽthĩ, hẽhẽẽdakuung, hĩnĩngĩtĩ agayyu thõõth ꞌcĩ ĩĩn dĩdĩ hĩcĩ ĩĩn õlõng nẽ tarĩ, agayyu ngaatĩ hõllõngaa akuuni thõõth ꞌcĩ ĩĩn dĩdĩ thõõthaa ꞌcĩ ĩĩn õlõng.

²² Nẽ oloꞌngiaahit ẽẽtĩ ꞌcĩ õthõõth aĩ, hõllõngaa ĩĩn Yeesu, Krĩstõ dĩdĩ. Nẽ ẽẽtĩ ꞌcĩ abũrĩ Baangeet hĩ Ngeerĩnĩ, ĩĩn mirohit cĩ Krĩstõ.

²³ Ẽẽtĩ ꞌcĩ abũrĩ Ngeertĩ Nyekuci, abũrĩ nẽẽ Maaꞌnyĩ buúk. Nẽẽthĩ, ẽẽtĩ ꞌcĩ ẽlẽmĩ Ngeertĩ Nyekuci, ẽlẽmĩ nẽẽ Maaꞌnyĩ buúk.

²⁴ Aallattia ummuhit nyeemuut baa athiknu ĩĩcĩ oou nẽ hatĩ ũrũmteeu hõdẽĩ hõdõõkõthĩ ꞌthinneetinitõõ hĩ Ngeertĩ Nyekuci hĩ Maaꞌnyĩ buúk.

²⁵ Baa uduhaaheet Ngeerĩnĩ ngagĩĩt rũgẽt ꞌcĩ aalla ooo.

²⁶ Hẽhẽẽdakuung naa ngagiit thooꞌthiok iccig, hátĩ agaac eet ꞌcĩg hatĩ adiim arahannuung ngagiita.

²⁷ Nẽ aggatannuung Krĩstõ ngagiit Loriiaa ꞌcĩ Ẽllẽẽmĩthĩ. Nẽẽthĩ ꞌyioko, aau Lorii hĩ ngagiit nẽ occa hõllõngaa adiimmu ꞌlimmanniook ũgĩ tarĩ. Hĩnĩngĩtĩ aduha Lorii thõõth ꞌcĩ ĩĩn dĩdĩ nẽ illimanuung ꞌgii vẽlẽk. Nẽẽthĩ hoti ho, aallattia ũrũmĩt ꞌthinneeti hĩ Krĩstõ, hĩ baa illimaneehuung Lorii ngagiit ĩdĩmanit.

Lõhõlĩ cĩg Nyekuci

²⁸ Niig lohollia, aallattia ũrũmtĩ hĩ Krĩstõ ꞌthinneetinitõõ cugguung. Nẽ ma õbõda nẽẽnĩ, õkõmĩ hatĩ ꞌthinneeti cugguung nẽ iittiõõ thõõth ꞌcĩ aguꞌtheennu ngaaoniitta tõõ.

²⁹ Hĩcĩ haga naag haĩ, adĩman Krĩstõ thõõth ꞌcĩ aũlanĩ, haga naag buúk haĩ ĩĩn eeta vẽlẽk ꞌcĩg adĩman thõõth ꞌcĩ aũlan, lõhõlĩ cĩg Nyekuci.