1 Yõaannẽ 1 - ꞌBuuk cĩ Thõõth cĩ Nyekuci

Thõõth ꞌcĩ rũgẽtõ

¹ Haduhaakuung naa ngagiit eet ꞌcĩ baa aaĩ baa ꞌthianaattaa cĩ lootu, baa hathĩkna nẽ hĩcĩtta ĩnõõnnõ hẽbẽrẽẽnnĩĩ cĩggaang nẽ huhumta athĩnĩĩ cĩggaang dẽẽdẽ. Ĩĩn nẽẽ Thõõth cĩ rũgẽt ꞌcĩ hirrioonna naag ko.

² Baa uppwannakeet ẽẽtĩ ciee ĩĩn rũgẽt ko ngagĩĩt nẽ hĩcĩtta ĩnõõnnõ. Nẽ ꞌyioko, hĩĩtta naag ꞌcĩg haduhaakuung ngagiit thõõth cĩnnĩ ho, hẽbẽrĩ cĩgĩnnĩg ꞌcĩg hanneekuung, ĩĩn nẽẽ rũgẽt ꞌcĩ aalla ooo. Baa arũmĩ nẽẽ hĩ Maaꞌnyĩ nẽ uppwaannaheet ngagĩĩta.

³ Haduhaakuung naag ngagiit thõõth ꞌcĩ hĩcĩtta nẽ hĩthĩkta, hátĩ iita hũrũmtĩ hĩ ngagĩĩt hõdẽĩ. Nẽ hũrũmtĩ hõdẽĩ hĩ Baangeet hĩ Ngeerĩnĩ Yeesu Krĩstõ.

⁴ Hẽhẽẽdakuung naag thooꞌthiok iccig, hátĩ haccamattoothĩha naag dĩdĩ.

Haaut lanyita

⁵ Nyeemuut baa hathĩkna naag hĩ Yeesu cieeni nẽ ꞌyioko, huduktaahuung ngagiit hĩĩttĩhuung, ĩĩn Nyekuci lanyit nẽ aitiõõ muguuri umwaa hĩ ĩnõõnnõ tõõ ũdũt.

⁶ Má haĩ naag hõthõl rũgẽt hĩ Nyekuc nẽ aalla nga haattĩg muguuratõõ noho, hõõlõng naag thõng nẽ hõllõngaa haattĩg thõõthaa ꞌcĩ ĩĩn dĩdĩ.

⁷ Má haattĩg naag lanyita hĩcĩ aaĩ Nyekuci, hõthõl naag rũgẽt hĩ ꞌgoonogeet thõng. Nẽ ũtũũnyĩtõ biyyieeta cĩg Yeesu ꞌthẽccanẽẽt cĩggaac vẽlẽk.

⁸ Má haĩ naag nga hẽꞌthẽcattõ, hĩggõõl naag eleeti cĩggaac thõng, nẽ aitiõõ thõõth ꞌcĩ ĩĩn dĩdĩ ꞌthinneetinii cĩggaac tõõ.

⁹ Nẽ má haduhaak ꞌthẽccanẽẽt cĩggaac Nyekuc, haga ngaatĩ haarĩkĩ ꞌthinneeti cĩggaac hĩ ĩnõõnnõ haĩnnĩ, aũlan nẽẽ ngaatĩ ammaannĩkeet ngagĩĩt ꞌthẽccanẽẽt cĩggaac nẽ ũtũũnyeet thooꞌthiohĩĩ ꞌcĩg abathĩ vẽlẽk.

¹⁰ Má haĩ naag nga hẽꞌthẽcattõ, haaꞌnyĩk naag Nyekuc haau hĩ oloꞌngiaahiti, nẽ aitiõõ nyeemuut cĩnnĩ ꞌthinneetinii cĩggaac tõõ.