1 Timotteeo 4 - ꞌBuuk cĩ Thõõth cĩ Nyekuci

Ĩggõõl hatĩ ꞌlimmanĩ ꞌcĩ ĩĩn õlõng eeta

¹ Aduha Lorii ꞌcĩ Ẽllẽẽmĩth jurrung aĩ, aattĩg hatĩ eeta ũgẽẽgĩ waathinnioohĩĩ ꞌcĩg adtuurna, ꞌcĩg au abũrĩ ngaatĩ ẽlẽmmĩ Nyekuc nẽ iita ĩthĩhĩt nẽ ũnnẽẽcõ ꞌgoolinit hĩ ꞌlimman cĩ thõõth cĩ loriẽẽt ꞌcĩg abathĩ.

² Ĩggõõl hatĩ ĩhõõggõ oloꞌngiaaha ꞌcĩg ũtũbũrĩt thõõth cĩ Nyekuci nẽ iittiõõ ꞌthinneeti cĩggĩĩng hõllõngaa athĩhĩ thõõth cĩ Nyekuci.

³ Ẽdẽnẽẽkĩ oloꞌngiaaha tĩko eet ngaatĩ aꞌthũwaniini, hĩ ngaatĩ aduhi ꞌgeenniok baag ẽhẽnyta Nyekuci, hátĩ huduhit eeta taliitta, eeta ꞌcĩg ẽlẽmĩ Nyekuc nẽ agaacõ thõõth ꞌcĩ ĩĩn dĩdĩ.

⁴ Hĩnĩngĩtĩ abũnnaa hẽlẽggĩ vẽlẽk baag ẽhẽnyta Nyekuci nẽ má hĩĩttĩk naag Nyekuc ĩlaallẽ, occa haaga ngaatĩ haduhi ꞌgeenniok vẽlẽk,

⁵ hĩnĩngĩtĩ aggatan Nyekuci ꞌgeenniok vẽlẽk thõõthaa cĩnnĩ hĩ laiitta.

Itilo Paaulo Timotteeo

⁶ Má allimaneehi nii eet thooꞌthiok iccig, aku hatĩ ĩĩnĩ dticciannioohit ꞌcĩ abũnnaa cĩ Yeesu Krĩstõ, ꞌcĩ alĩꞌtha thooꞌthiohĩĩ ꞌcĩg ĩĩn dĩdĩ hĩ lemiittaa cĩ Nyekuci, hĩ ꞌlimmaana ꞌcĩ abũnnaa ꞌcĩ ẽlẽmmĩ nẽ ũnũĩ ĩnõõnnõ.

⁷ Ma hadticaniini dtẽẽllẽn ꞌcĩg hõllõngaa ĩĩn dĩdĩ, ꞌcĩg hõllõngaa õõkõrõõ hĩ thõõth cĩ Nyekuci, gõõng accamana ngaaĩ ꞌcĩg atahaanyito, haĩ haaga nẽẽ, ꞌrũhũũlana ngaatĩ allimanĩĩ thõõth cĩ Nyekuci.

⁸ Abũnnaa nẽẽꞌthẽk ngaatĩ hallimanẽẽkĩ eleeti dtiic, nẽẽthĩ hinnia, ĩllõõan dtiici cĩ Nyekuci thooꞌthiok vẽlẽk. Aaꞌnyeet rũgẽt ꞌcĩ abũnnaa baa adukiaa, hĩnĩngĩtĩ rũgẽt cĩ ꞌyioko ho, hĩ cĩ hatĩ horumwa.

⁹ Ĩĩn thõõth ꞌcĩ haduha naa ho dĩdĩ nẽ adiim occa hẽlẽmĩ,

¹⁰ nẽ hadticaniinna gẽrrẽẽt, ngaatĩ haarĩka muhẽẽnĩt cĩnaang hĩ Nyekuc ꞌcĩ arũgĩ, ꞌcĩ ĩĩn Ellioohit cĩ eet vẽlẽk, hĩ dẽẽdẽ eet ꞌcĩg elemit ĩnõõnnõ.

¹¹ ꞌLimmaneek ĩhõõggõ thooꞌthiok iccig nẽ uduhaahu ĩhõõggõ huꞌthuutti jurrung.

¹² Ma haaꞌnyihi eet umwa hatamaaci, hĩnĩngĩtĩ aĩ nga ĩĩnĩ hĩdĩca. Aꞌnyĩĩk lemmiook hĩcĩtta hĩ nganiit ꞌgõõl ꞌcĩ anũĩ nẽẽg thõõth cĩ Nyekuci, ꞌrioona cunni, hĩ authetaa ꞌcĩ aayyi jurrung, hĩ ꞌgõõlaa ꞌcĩ ammĩnanĩĩ eet, hĩ ngaatĩ ẽlẽmmĩ thõõth cĩ Nyekuci, hĩ ꞌgõõlaa ꞌcĩ hõllõngaa adĩmani thooꞌthiok ꞌcĩg ĩĩn ꞌriiring.

¹³ ꞌThũũtĩ ngaatĩ allimanẽẽkĩ nẽ itigiilihuu eet ꞌBuuk cĩ Nyekuci lothippita laiittatõõ, ĩꞌthõng huppwaannahii naana nẽ ma habili ngaatĩ irrioonĩkĩ nẽ illimanuu ĩhõõggõ.

¹⁴ Dticcianõõĩ ꞌgẽẽnyĩth baa aaꞌnyi nganiit Lorii ꞌcĩ Ẽllẽẽmĩth kõr baa aggatanni makayyiooha cĩg lemmioohu, hĩ baa aduha nẽẽg thõõthaa baa aaꞌnyĩk Nyekuci ĩhõõggõ.

¹⁵ ꞌThũũtĩ nẽ ĩdĩmanuu thooꞌthiok iccig jurrung, hátĩ hĩcĩtta eeta ꞌgõõl ꞌcĩ adticanĩĩ nii thooꞌthiok ꞌcĩg abũnnaa.

¹⁶ ꞌThũũtĩ authet cĩ rũgẽt cunni hĩ thõõth ꞌcĩ allimaneehi eet jurrung! Ala dĩman thooꞌthiok iccig jurrung, hĩnĩngĩtĩ má aꞌthũũnnĩ, ẽẽla hatĩ ẽlẽ cunni nẽ hatĩ ẽẽla eet ꞌcĩg athikni nganiit buúk.