1 Timotteeo 3 - ꞌBuuk cĩ Thõõth cĩ Nyekuci

Makayyiook cĩg lothippit cĩ lemmioohu

¹ Ĩĩn thõõth ciee thõõth dĩdĩ. Má adiim ẽẽtĩ umwaa ĩĩn makayyioohit cĩ lothippit cĩ lemmioohu, occa hĩĩtõ ũbũraneek eet tĩho dtiic ꞌcĩ abũnnaa gẽrrẽẽt.

² Abũnnaa ĩĩn makayyioohiti cĩ lothippit cĩ lemmioohu, eet ꞌcĩ aꞌnyak ngaa hõdẽẽthõng, eet ꞌcĩ aꞌthũũnnĩ ẽlẽ cĩnnĩ nẽ ĩĩ eet ꞌcĩ iꞌngolli eet, abũnnaa ĩĩn eet ꞌcĩ iꞌngolli hẽẽrõn nẽ aga ngaatĩ allimanĩ eet.

³ Abũnnaa ĩĩn eet ꞌcĩ hõllõngaa ĩĩn duuttiahit hode ahaattiohit, abũnnaa ĩĩn eet ꞌcĩ alalĩ ꞌthĩnĩt. Abũnnaa ĩĩn eet ꞌcĩ arũmĩ hĩ eet vẽlẽk lõꞌngõõc nẽ hõllõngaa ammĩnan ꞌrabbẽẽta.

⁴ Nẽ abũnnaa makayyioohiti cĩ lothippit cĩ lemmioohu ĩĩn eet dĩdĩ ꞌcĩ aꞌthũũnnĩ õlõ cĩnnĩ jurrung nẽ irrioonĩk lõhõlĩ cĩgĩnnĩg hĩthĩhĩt nẽ itingolli thõõth ꞌcĩ aduha nẽẽnĩ.

⁵ Má hõllõngaa aggam makayyioohiti õlõ cĩnnĩ jurrung, occa hatĩ aꞌthũũnnĩ nẽẽ lothippit cĩ lemmiook cĩg Nyekuci hutuno?

⁶ Abũnnaa ĩĩn makayyioohiti cĩ lothippit cĩ lemmioohu eet ꞌcĩ ũnũũhĩk lemiinit hĩ Nyekuc, hĩnĩngĩtĩ ma athĩngõõnyanĩ, aĩnanaak hinnia habuui cĩ loriẽẽt ꞌcĩg abathĩ ĩnõõnnõ hẽꞌthẽcanõõ.

⁷ Abũnnaa ĩĩn eet ꞌcĩ accamana eeta vẽlẽk dĩdĩ, hátĩ hiittiõõ hõllõngaa aꞌnyak ꞌthaar ꞌcĩg abathĩ nẽ udhuhoothĩk thooꞌthiok ꞌcĩg abathĩ cĩg habu cĩ loriẽẽt ꞌcĩg abathĩ.

Dticcianniook cĩg lothippit cĩ lemmioohu

⁸ Abũnnaa dticcianniooha cĩg lothippit cĩ lemmioohu buúk, ĩĩn eet dĩdĩ ꞌcĩg itieelli eet nẽ hõllõngaa aꞌnyak utugeeti ꞌramma, hõllõngaa aangal mẽrta gẽrrẽẽt nẽ iittiõõ hõllõngaa ammĩnan ꞌrabbẽẽta.

⁹ Abũnnaa ĩĩn eet ꞌcĩg aꞌthũũnnĩ thõõth cĩ Nyekuci dĩdĩ nẽ elemit ꞌthinneetinii cĩg tẽllĩg.

¹⁰ Abũnnaa attĩmanni nõõ nẽẽg õõa ꞌcĩ nga hidticattõõĩ nẽ má aitiõõ thõõth ꞌcĩ abathĩ ꞌcĩ ammuddiaa hĩ ĩhõõggõ tõõ, nẽẽthĩ hatĩ aaꞌnyĩhoothĩk dtiici hidticattõõ.

¹¹ Nẽ ꞌgõõlaa cĩ buúk, abũnnaa iꞌngolli ngaaĩ cĩggĩĩng eet nẽ udukta thõõth ꞌcĩ ĩĩn dĩdĩ nẽ hõllõngaa õngõmĩt eeta, hode hõllõngaa ĩĩn duuttiak nẽ aanytĩk huꞌthuutti thooꞌthiok vẽlẽk ꞌcĩg abũnnaa ꞌcĩg adĩman nẽẽgĩ.

¹² Abũnnaa ꞌthẽk ẽẽtĩ ꞌcĩ adticanni lothippitaa cĩ lemmioohu, aꞌnyak ngaa hõdẽẽthõng nẽ ĩĩn eet ꞌcĩ aꞌthũũnnĩ õlõ hĩ lõhõlĩ cĩgĩnnĩg jurrung.

¹³ Nẽ eeta ꞌcĩg adticanni lothippitaa cĩ lemmioohu jurrung, au hatĩ ammũda nẽẽg bũnnai ꞌcĩ õkõmĩ hĩ mẽdĩĩth lemiittaa ꞌcĩ aꞌnyak nẽẽg, hĩnĩngĩtĩ Yeesu Krĩstõ.

ꞌGõõl ꞌcĩ occa aattiyyi eeta cĩg Nyekuci

¹⁴ Nẽẽthĩ ꞌyioko, hẽhẽẽdakii naa nganiit waraga icci, tananga hammuhi ngaatĩ hakuuni hĩ nganiit hĩdĩĩkoothong.

¹⁵ Má hõllõngaa hakuu hĩdĩĩkoothong, etereꞌthii hatĩ waraga ciee ꞌgõõl ꞌcĩ occa haattiyyi naag lothippiti cĩ lemmiook cĩg halang cĩ Nyekuci jurrung, hĩnĩngĩtĩ hĩĩgĩn naag halang cĩ Nyekuci ꞌcĩ arũgĩ, ꞌcĩ ĩĩn hitiir ꞌcĩ õkõmĩ ꞌcĩ hammũdaanĩ thõõth ꞌcĩ ĩĩn dĩdĩ.

¹⁶ Aitiõõ jinẽẽnĩtĩ tõõ, ĩĩn ciee thõõth cobbi gẽrrẽẽt, ꞌcĩ ĩllõõan ꞌgẽẽnyĩth cĩ eetu lemiittaa cĩnaac. Baa arrittiaa Yeesu loota nĩnga hĩĩ eet hĩ naaga nẽ ikia ẽtẽrẽtha Lorii ꞌcĩ Ẽllẽẽmĩth aĩ, aaꞌnyĩk nẽẽ Nyekuc hatal gẽrrẽẽt nẽ ĩcĩnĩt aajĩlẽẽta buúk ĩnõõnnõ, ma nĩngaata, ikia ũũhĩ Nyekuci ĩnõõnnõ bulẽẽtta hẽẽtahujjieen. Allimanoothĩk thõõth cĩnnĩ eet loonyini vẽlẽk, nĩngĩtĩ au ẽlẽmmĩ eeta thõõth cĩnnĩ.