1 Timotteeo 2 - ꞌBuuk cĩ Thõõth cĩ Nyekuci

ꞌGõõl ꞌcĩ occa halaĩ Nyekuc

¹ Nẽẽthĩ ĩĩcĩ oou, hanneekii nõõ naa laõõĩ eet vẽlẽk. Aꞌnyĩĩk Nyekuc hẽẽl nẽ aggatan ĩhõõggõ vẽlẽk nẽ duhaak Nyekuc ꞌgõõl ꞌcĩ annẽẽkĩ ĩnõõnnõ ĩlaallẽ, hĩnĩngĩtĩ ĩhõõggõ vẽlẽk.

² Laõõĩ habuẽẽt ꞌcĩg obbitig hĩ ꞌgaala vẽlẽk, hátĩ haaut naag vẽlẽk lõꞌngõõc, ꞌgõõlaa ꞌcĩ hiꞌngoliini Nyekuc nẽ huꞌthuutti thõõth cĩnnĩ.

³ Laiinit ꞌcĩ abũnnaa ꞌcĩ aaꞌnyĩk Nyekuc ꞌcĩ ĩĩn Ellioohit cĩnaac hatal cieeni.

⁴ Adiim Nyekuci eet vẽlẽk heellia, hátĩ hiita hagaacõ thõõth ꞌcĩ ĩĩn dĩdĩ.

⁵ Hĩnĩngĩtĩ aaĩ Nyekuci hõdẽẽthõng diooni nẽ Yeesu Krĩstõ dioo ꞌcĩ ĩĩn jayyio ꞌcĩ aꞌnyaha eet hĩ Nyekuc.

⁶ Baa ẽlẽmana nẽẽ ẽlẽ cĩnnĩ, hátĩ hõõga eet vẽlẽk haauto lõꞌngõõc. Nyeemuut ciee ꞌcĩ aaꞌnyĩk Nyekuci eet loonyini vẽlẽk, hatĩ ũttũbanoothĩk kõrra tĩho.

⁷ Nẽ baa ẽbẽraanna Nyekuci nganĩĩt hĩĩ eet ꞌcĩ hirriooni nyeemuut ꞌcĩ abũnnaa nẽ hĩĩna ꞌthooyyiahit ꞌcĩ hallimaneehi eet ꞌcĩg hõllõngaa ĩĩn ꞌJudeei, nyeemuut cĩ lemiitto hĩ cĩ thõõth ꞌcĩ ĩĩn dĩdĩ. Hõllõngaa hittoorihi naa thõõth umwa, haduha thõõth ꞌcĩ ĩĩn dĩdĩ.

⁸ Hadiimi naa eet ꞌcĩg maacĩg loonyini vẽlẽk, halayyio hodongit athĩn cĩggĩĩng ꞌcĩg ẽllẽẽmĩth ꞌjieena, hiittiõõ liilii hode pẽkanĩ tõõ.

⁹ Hadiimi naa ngaaĩ hitihimti jurrung ꞌgõõlaa ꞌcĩ abũnnaa nẽ abathĩ ngaatĩ ahimtẽẽnĩ tahatak ꞌgõõlaa ꞌcĩ ẽhẽnytĩ ĩma hode ngaatĩ ahimti dihidok ꞌcĩg ĩĩn ꞌdaab hode pẽalꞌnya hode ceremwa ꞌcĩg adahĩ ꞌrabbẽẽt ꞌcĩg mẽẽlĩg.

¹⁰ Nẽ ngaaĩ ꞌcĩg aĩ halayya nẽ hĩmmĩnatta Nyekuc, aꞌnyĩĩk hĩdĩmatteek ꞌgõõnõgĩ thooꞌthiok ꞌcĩg abũnnaa.

¹¹ Abũnnaa alliman ngaaĩ thõõth ngaatĩ aattiyyi dẽẽ nẽ ĩthĩktõ muguruur.

¹² Hõllõngaa hẽlẽmaakĩ naa ngaaĩ hillimanit eet ꞌcĩg maacĩg, hode ngaatĩ aꞌnyahẽẽkĩ ĩhõõggõ makaaꞌthĩt, aꞌnyĩĩk hĩjjaaktõ muguruur.

¹³ Hĩnĩngĩtĩ baa ẽhẽnytaa Aadamĩ ĩĩcĩ oou, ma uruta, eteheꞌnyiaa Ẽẽvva.

¹⁴ Baa hõllõngaa Aadam ꞌcĩ ĩggõõl ꞌThĩttaanĩ ho, baa Ẽẽvva ꞌcĩ ĩggõõl ꞌThĩttaanĩ hẽꞌthẽcanõõ ho.

¹⁵ Nẽẽthĩ, ẽẽla hatĩ Nyekuci ngaaĩ hittirria lõhõlĩ, hatĩ aꞌthũũnnĩ nẽẽg lemiinit cĩnĩĩng hĩ mĩnnan hĩ ꞌlẽẽmĩth hĩ ngaatĩ aattiyyi jurrung.