1 Tẽꞌthaloonika 4 - ꞌBuuk cĩ Thõõth cĩ Nyekuci

Authet ꞌcĩ aaꞌnyĩk Nyekuc hatal

¹ ꞌGotoonoga hĩ ngoonoga, baa haduhaakuung naag authet ꞌcĩ abũnnaa ꞌcĩ haaꞌnyĩkĩ Nyekuc hatal dĩdĩ, hĩcĩ aattiyyu niig ꞌyioko ho. Hanneekuung ngagiit ĩdĩmanit hoti hĩllõõan ꞌthaarĩĩ cĩg Makayyioohit cĩnaac Yeesu Krĩstõ.

² Ummuhuttooth thõõth baa hallimannuung naag ngagiit ꞌthaarĩĩ cĩg Makayyioohit Yeesu.

³ Adiimmuung ngagiit Nyekuci aꞌnyahit ꞌthinneeti ꞌcĩg ẽllẽẽmĩthĩ nẽ ma hattihoonnu tahatak.

⁴ Nẽ niig hõdẽĩ hõdẽĩ, illimanit ngaatĩ occa iꞌngoliinnu eleeti cugguung ꞌgõõlaa ꞌcĩ ẽllẽẽmĩthĩ.

⁵ Ma hiigginnu appahacaaꞌnya cĩg thooꞌthiok ꞌcĩg abũraneeku niiga, hĩ eeta ꞌcĩg hõllõngaa aga Nyekuc.

⁶ Nẽẽthĩ, niig lemmiooha, ma higgoolonnu ꞌgõõlaa cĩ igoriꞌthu ngaaĩ cĩg ꞌgoonoginnu, hĩnĩngĩtĩ baa huduktaahuung naag ngagiit jurrung hiittihuung, uuk hatĩ Nyekuci eet ꞌcĩg adĩman thooꞌthiok ꞌcĩg ĩĩn ꞌriiring ꞌcĩg aattĩg nohotaa.

⁷ Baa avvaanneet ngagĩĩt Nyekuci hiita hĩĩtõ eet ꞌcĩg ẽllẽẽmĩth, ꞌcĩg haburi thooꞌthiok ꞌcĩg ĩĩn ꞌriiring.

⁸ Nẽ ẽẽtĩ ꞌcĩ ẽdẽcẽẽkĩ ꞌlimman icci, hõllõngaa ẽdẽcẽẽkĩ ꞌlimman cĩ eeto, ẽdẽcẽẽkĩ ꞌlimman cĩ Nyekuc ꞌcĩ aaꞌnyuung Lorii ꞌcĩ Ẽllẽẽmĩthĩ.

⁹ Nẽ ꞌyioko, occa hõllõngaa hẽhẽẽdakuung naag ngagiit waraga ꞌcĩ hanneekuung ĩmmĩnanit eleeti, hĩnĩngĩtĩ baa illimaneehuung ngagiit Nyekuci thõõth cĩ mĩnnaanõ ẽlẽk.

¹⁰ Nẽ dĩdĩ, ammĩnannu niig ꞌgotoonogu hĩ ngoonogu lokor cĩ Maccedoonia ho vẽlẽk. Nẽ hanneekuung ĩrrĩcatta gẽrrẽẽt ittoorrik hĩllõõan mĩnnan gõõng hõdõõkõthĩ.

¹¹ Emmeeꞌthik aaut lõꞌngõõc olooyyiohĩ, uꞌthuutti autheꞌnya cugguung nẽ idticattõ athĩnĩĩ cugguung gẽrrẽẽt, hĩ baa haduhaakuung naaga.

¹² Nẽẽthĩ hatĩ ꞌgõõlaa cĩ, au hatĩ iꞌngoliinnuung eeta cĩg battaalu ꞌcĩg nga hagaacõ thõõth cĩ Makayyiookto nẽ hatĩ iittiõõ hõllõngaa alihinnu ꞌgiimwa hĩ eet umwa tarĩ.

Bõdaanĩt cĩ Makayyiookto

¹³ ꞌGotoonoga hĩ ngoonoga, aitiõõ hõllõngaa hadiimmuung naag ngagiit ĩĩtõ eet ꞌcĩg hõllõngaa agayyu thõõth cĩ ꞌgoonogu baag adaahito ẽlẽk, hátĩ hiittiõõ hõllõngaa arruennu gẽrrẽẽt, hĩ eeta ꞌcĩg hõllõngaa aꞌnyak muhẽẽnĩt.

¹⁴ Hẽlẽmĩ naag haĩ, baa adaak Yeesu nẽ ũrũga tarĩ nẽ tarĩ hẽlẽmĩ haĩ, ma hatĩ õbõdaaĩ Nyekuci Yeesu tarĩ, õõkõra hatĩ nẽẽ hĩ eet baag ẽlẽmĩ ĩnõõnnõ baa nga hadaahito nẽẽgĩ.

¹⁵ Hĩcĩ aduha thõõth cĩ Makayyiookto, haduhaakuung naag ngagiit hanneekuung, naag ꞌcĩg nga harũgĩ ĩꞌthõng kõr ꞌcĩ õbõdaanĩ Makayyioohiti ho, aitiõõ hatĩ hõllõngaa huwwattẽẽkĩ ꞌgoonogeet baag adaahito ẽlẽk.

¹⁶ Alluuccia hatĩ Makayyioohiti hẽẽtahujjieen ẽggẽrꞌnya moloohaa cobbi nẽ ẽggẽrꞌnya mõlõõhĩ cĩ habu cĩ aajĩleetu, hĩ molook cĩ tũũrĩ ꞌcĩ avvẽẽnĩ Nyekuci. Ma nĩngaata, arũgna hatĩ eeta baag adaahĩ lemiittaa cĩ Krĩstõ, ĩĩcĩ oou.

¹⁷ Nẽẽthĩ hatĩ naag eeta ꞌcĩg nga harũgĩ kõr niccia, hũrũmtoothĩk hĩ eet ꞌcĩg arũgna ho nẽ hõõt hommottio hĩ Makayyioohit diitha hẽẽtahujjieen. Nẽẽthĩ hatĩ kõr niccia, hõõt hũrũmtĩ naag hĩ Makayyioohit ooo.

¹⁸ Nẽẽthĩ, ũkũtanit ꞌgoonogu thooꞌthiohĩĩ cĩg.