1 Tẽꞌthaloonika 1 - ꞌBuuk cĩ Thõõth cĩ Nyekuci

ꞌThaainit cĩ Paaulo

¹ Nganĩĩt Paaulo, hĩ ꞌThĩĩla hĩ Timotteeo ꞌcĩg hẽhẽẽdakuung ngagiit lothippit cĩ lemmiook cĩg ꞌtaaũn cĩ Tẽꞌthaloonika waraga icci ho. Hẽhẽẽdakuung ngagiit eet ꞌcĩg iiginnu eet cĩg Nyekuc Baangeet cĩnaac hĩ Makayyioohit Yeesu Krĩstõ. Aꞌnyĩĩk bũnnai cĩ Nyekuci hĩ authet ꞌcĩ aattiyyu lõꞌngõõc, haau hĩ ngagiit vẽlẽk.

Lemiinit cĩ nuyyiook cĩg Tẽꞌthaloonika

² Hanneeka naag Nyekuc hõdõõkõthĩ ĩlaallẽ, hĩnĩngĩtĩ ngagiit vẽlẽk nẽ habbuꞌnguung ngagiit laiittaa cĩnaang.

³ Gõõng haduhaaka naag Nyekuc Baangeet hõdõõkõthĩ thõõth cĩ lemiinit cunuung hĩ dtiic cunuung cĩ mĩnnaanõ, ꞌcĩ ĩĩn dĩdĩ hĩ ĩnõõnnõ, hĩ ngaatĩ aꞌnyaku muhẽẽnĩt ꞌcĩ õkõmĩ hĩ Makayyioohit cĩnaac Yeesu Krĩstõ.

Lemiinit hĩ terethiinit cĩ eet cĩg Tẽꞌthaloonika

⁴ ꞌGotoonoga hĩ ngoonoga, hagayyia naag ngaatĩ ammĩnannuung Nyekuci ngagiit nẽ ẽbẽraauung ĩĩtõ eet cĩgĩnnĩg,

⁵ hĩnĩngĩtĩ baa hõllõngaa haꞌnyahaakuung naag ngagiit nyeemuut ꞌcĩ abũnnaa ho utugeetini haaga, baa haꞌnyahaakuung ꞌtirriaanaa ꞌcĩ aku hĩ Lori ꞌcĩ Ẽllẽẽmĩthĩ, hĩ muhẽẽnĩt ꞌcĩ õkõmĩ. Agayyu niig ꞌgõõl baa haattiyyia naag hõrggẽẽnaa cunuung, hĩnĩngĩtĩ ngagiita.

⁶ Ma baa iita elemtu niig Nyeemuut cĩ Yeesu, iita aauttu niig buúk hĩ naaga nẽ aauttu hĩ Makayyioohiti Yeesu. Tananga baa ummuddiaau niig pĩĩrnanĩt cobbi gẽrrẽẽt thõõthaa cĩ, ikia aaꞌnyuung Lorii ꞌcĩ Ẽllẽẽmĩth ngagiit accamattoothĩk.

⁷ Nẽ iita etereꞌthieehu niig vẽlẽk lemmiook cĩg Makayyiooktak looccaa cĩ Maccedoonia hĩ looccaa cĩ Acaia ĩĩttĩhu, iiginnu niig lemmiook ꞌcĩg abũnnaa.

⁸ Nẽ hĩnĩngĩtĩ ngagiita, ikia ĩꞌthanothoothĩk thõõth cĩ Makayyiookto loonyini vẽlẽk hõllõngaa Maccedoonia hĩ Acaia dioo nẽ ikia agaĩ lemiiniti cunuung cĩ Nyekuci loonyin vẽlẽk, nẽ occa ꞌthẽk iittiõõ hõllõngaa hathithan thõõth icci thõng buúk.

⁹ Nẽ tarĩ, baa athithan eeta vẽlẽk thõõth ꞌcĩ elemmeetu niig ngagĩĩt, kõr baa hẽhẽẽrõnaakuung, hĩ ꞌgõõl baa uunniku niig hẽlẽggĩ ꞌcĩg ala eeta hĩĩtõ nyekuꞌnya nẽ idticattoothihu Nyekuc dĩdĩ ꞌcĩ arũgĩ.

¹⁰ Nẽ athithan tarĩ eeta ꞌgõõl ꞌcĩ ereeyyu niig Ngeertĩ Nyekuci, ꞌcĩ hatĩ aku hẽẽtahujjieen, baa arũgtha Nyekuci daahĩtha, ĩnõõnnõ Yeesu ꞌcĩ hatĩ aku ẽẽlanneet ngagĩĩt lĩĩlĩẽẽttaa cĩ Nyekuci, kõr ꞌcĩ hatĩ aku ẽttẽẽdĩ nẽẽ thooꞌthiok cĩg eetuk, hatĩ kõr ꞌcĩ decciaanĩt cĩ lootu.