1 Korinthia 9 - ꞌBuuk cĩ Thõõth cĩ Nyekuci

Makaaꞌthĩt cĩ ꞌthooyyiaktõ

¹ Nga nooyyia hooggia naana? Hõllõngaa nooyyia hĩĩnĩ naa ꞌthooyyiahit? Nga nooyyia baa hĩcĩn naa Yeesu Makayyioohit cĩnaac? Hõllõngaa nooyyia iiginnu niig eet ꞌcĩg aꞌnyaha dtiici caannĩ cĩ Makayyiookto ho?

² Tananga hõllõngaa hĩĩnĩ naa ꞌthooyyiahit hĩ eet ũgĩ, hĩĩnĩ ꞌthooyyiahit hĩ ngagiit dĩdĩ! Hĩnĩngĩtĩ iiginnu eet dẽẽdẽ ꞌcĩg aggamoothĩka nganĩĩt dtiici ꞌcĩ hĩĩnnĩ ꞌthooyyiahit cĩ Makayyiookto ho.

³ Thõõth ꞌcĩ heteiini naa ẽlẽ caannĩ hatĩ ajinna eeta ꞌcĩg etteedĩkaa nganĩĩt thõõth cieeni.

⁴ Ĩcca occa hõllõngaa haꞌnyak naag makaaꞌthĩt ꞌcĩ hũdẽẽttõ hĩ cĩ duhẽẽttõ?

⁵ Ĩcca occa hõllõngaa haꞌnyak naag makaaꞌthĩt ꞌcĩ hõõkõrĩ hõdẽĩ hĩ ngaa ꞌcĩ ĩĩn lemmioohit, hĩcĩ õõkõr ꞌthooyyiaha ũgẽẽgĩ hĩ ꞌgõtõõnõgĩ Makayyiooktak hĩ Pẽẽtũrũ?

⁶ Hode nganĩĩt hĩ Baarnaba dioo ꞌcĩg occa hadticaniinna, hátĩ hũrũgta?

⁷ Adũman gõõng ũrũtana ꞌrabbẽẽt cĩggĩĩng ẽmmẽn? Aitiõõ gõõng eeta ꞌcĩg atiboolan hẽẽn ꞌcĩg viinoaak hõllõngaa adak ꞌgẽẽn cĩ mana cĩ viinoo ꞌcĩ atiboolan nẽẽg ko ũgĩ? Hõllõngaa nooyyia aam tũhayyiooha ira cĩg ẽẽtha cĩggĩĩng?

⁸ Haduha ꞌyioko ꞌthẽk naa thõõth icci hĩ ẽẽtĩ ꞌcĩ holli õõ haaga? Hõllõngaa nooyyia aduha nyattalĩ cĩ Mũũꞌtha thõõth icci dioo noho?

⁹ Hĩnĩngĩtĩ eheeddi nyattaalaa cĩ Mũũꞌtha aĩ, “Ma hecebi olĩ ũtũg hatĩ athĩan haala.” Aallak Nyekuci olĩꞌnya diooni?

¹⁰ Dĩdĩ, aduhaakeet nẽẽ ngagĩĩt thõõth icci, aitiõõ ꞌyioko hõllõngaa aduha? Eei, baa eheeddi thõõth ciee, hĩnĩngĩtĩ ngagĩĩta, nẽẽthĩ ma akannĩ kattioohiti olla nẽ ĩthĩanõõ thĩannioohiti thõng, adĩman nẽẽg vẽlẽk noho muhẽẽttaa ꞌcĩ hatĩ au õthõlĩ haal ꞌcĩg ajanniaa ho thõng.

¹¹ Má baa hathaccia naag hinyomo cĩg thõõth cĩ Nyekuci hõrggẽẽnaa cunuung, õkõmĩ occa gẽrrẽẽt ngaatĩ occa hammũdaanna ꞌbaaninit cĩ ijjioonnu hĩ ngagiita?

¹² Má aꞌnyak eeta ũgẽẽgĩ makaaꞌthĩt ꞌcĩ eellu niig ĩhõõggõ, hõllõngaa occa haꞌnyaka naag makaaꞌthĩt niccia hĩllõõan? Baa hõllõngaa hadticaniinna naag makaaꞌthĩt icci. Nẽ hinnia ꞌgõõlaa umwaanĩ, hẽmmẽẽthĩ naag hẽlẽggĩ vẽlẽk, hátĩ hiittiõõ hõllõngaa halaam nyeemuut ꞌcĩ abũnnaa cĩ Krĩstõ.

¹³ Hõllõngaa agayyu niig aĩ, ammũda eeta ꞌcĩg adticanni ꞌCieethaa cĩ Nyekuci ꞌgẽẽn cĩnĩĩng ꞌCieethaa cĩ Nyekuci nẽ eeta ꞌcĩg adticanni altaarĩa, õthõl nẽẽg ꞌgẽẽn ꞌcĩ aaꞌnyĩhoothĩk Nyekuc altaarĩa?

¹⁴ ꞌGõõlaa ꞌcĩ aduhõõ thõng, baa aduha Makayyioohiti aĩ, ammũda eeta ꞌcĩg irrioon nyeemuut ꞌcĩ abũnnaa ꞌgẽẽn cĩnĩĩng nyeemuutaa ꞌcĩ abũnnaa.

¹⁵ Nẽẽthĩ, nga hidticanõõĩ naa makaaꞌthĩt caannĩ ho. Nẽ hõllõngaa heheedi naa thõõth icci, muhẽẽttaa ꞌcĩ hatĩ adĩmannu niig thõõth icci, hĩnĩngĩtĩ nganĩĩta. Mẽẽn ngaatĩ occa hadaaknĩ hĩllõõan ngaatĩ aggamaanna eet umwaa ꞌrianĩĩth icci.

¹⁶ ꞌCĩĩnẽnĩt hĩ nganĩĩt hatĩ hõllõngaa hirriooni nyeemuut ꞌcĩ abũnnaa, hõllõngaa occa hathĩngõõnyani, hĩnĩngĩtĩ hattĩnganoothihi hirrioono. Pĩĩrnanĩt hĩ nganĩĩt hatĩ hõllõngaa hirriooni nyeemuut ꞌcĩ abũnnaa!

¹⁷ Má hirriooni naa hĩnĩngĩtĩ hadiimi naana, hadũmannii hatĩnĩ. Nẽẽthĩ, má hõllõngaa hadiimi hirriooni naana, aalla nga ĩĩn thõõth baa aaꞌnya nganĩĩt Nyekuci hidtican noho.

¹⁸ Dũman caannĩ ho inoo? Ĩnõõnnõ cieeni. Má hallimani naa nyeemuut ꞌcĩ abũnnaa, abũnnaa haaꞌnyihi eet haaga hõllõngaa hũũtẽnĩ thõng, hátĩ hiittiõõ hõllõngaa hadticaniini makaaꞌthĩt caannĩ, hatĩ hallimani eeta.

¹⁹ Hõllõngaa hĩĩnĩ naa appahaca cĩ eet umwa. Nẽẽthĩ hinnia, hikia hĩĩna appahaca cĩ eet vẽlẽk, hátĩ hũlũllũũmana eet ꞌcĩg mẽẽlĩg gẽrrẽẽt helemit Krĩstõ.

²⁰ Hĩ eet cĩg ꞌJudeei, baa hikia haau naa hĩ ꞌJudeeiniti, hátĩ hũlũllũũman ĩhõõggõ hĩĩtõ lemmiook. Hĩ eet cĩg nyattaalak, baa hikia haau naa buúk hĩ ẽẽtĩ ꞌcĩ anũ nyattal, tananga hõllõngaa hanũ naa nyattal, hátĩ hũlũllũũman eet cĩg nyattaalak hiita hĩĩtõ lemmiook.

²¹ Nẽ má harũmeenna naag hĩ eet ꞌcĩg hõllõngaa aggam nyattalĩ, hataarothi naa nyattal nẽ hũlũllũũmana ĩhõõggõ hĩĩtõ lemmiook. Nẽẽthĩ nẽẽꞌthẽk, baa nga hataaroth naa thõõth cĩ nyattal cĩ Nyekuci. Nẽ dĩdĩ, aggamma nganĩĩt nyattalĩ cĩ Krĩstõ.

²² Hĩ eet ꞌcĩg hõllõngaa õkõmĩ ꞌthinneeti, hikia haau naa buúk hĩ ẽẽtĩ ꞌcĩ hõllõngaa õkõmĩ ꞌthĩnĩt, hátĩ hũlũllũũman ĩhõõggõ hiita hĩĩtõ lemmiook. Hikia hĩĩna naa ꞌgii vẽlẽk hĩ eet vẽlẽk, hátĩ hẽẽla ũgĩ.

²³ Hadĩmani naa thooꞌthiok iccig vẽlẽk, hĩnĩngĩtĩ nyeemuut ꞌcĩ abũnnaa, hátĩ hũmmũda naa buúk ꞌgattan cĩnnĩ.

²⁴ Hõllõngaa agayyu niig aĩ ireta, avvir irettiooha nẽ ũmmũda ẽẽtĩ hõdẽẽthõng ꞌbaaninit? Ukulit niig buúk noho, hátĩ ummuddia ꞌbaaninit.

²⁵ Allimanni irettiooha gẽrrẽẽt, hátĩ hĩllõõanit nẽ hinnia allimanni nẽẽg nẽ umuddia ꞌbaaninit ꞌcĩ hõllõngaa aalla ũdũt, nẽẽthĩ, hallimanni naag, hátĩ hummuddia ꞌbaaninit ꞌcĩ aalla ũdũt.

²⁶ Nẽẽthĩ, hõllõngaa hairi naa hĩ ẽẽtĩ ꞌcĩ avvir tahatak, hõllõngaa hajanĩ naa jore hĩ ẽẽtĩ ꞌcĩ uuk ngõõt haaga.

²⁷ Haꞌthũũnnĩ naa ẽlẽ caannĩ hĩ irettioohiti nẽ haaꞌnyĩha hĩĩ appahaca caannĩ, hátĩ hiittiõõ hõllõngaa hadhukia urutaa ꞌcĩ hirriõõnĩhĩĩ eet ũgĩ nyeemuut ꞌcĩ abũnnaa.