1 Korinthia 8 - ꞌBuuk cĩ Thõõth cĩ Nyekuci

ꞌGẽẽn ꞌcĩ aaꞌnyĩhoothĩk nyekuꞌnya ꞌcĩg ꞌrĩĩng

¹ Waragaawaa baa ꞌnuung, baa ajinnaangu niig nganĩĩt thõõth cĩ ꞌgaarriẽẽn ꞌcĩg aaꞌnyĩhoothĩk hẽlẽggĩ ꞌcĩg aar eeta hĩĩtõ nyekuꞌnya. Haga naag vẽlẽk thõõth icci. Nẽẽthĩ, aaꞌnyeet ꞌgẽẽnyĩthĩ hirriattĩ eleeti cĩggaac nẽ aaꞌnyeet mĩnnanĩ heelit ꞌgoonogeet.

² Nẽ dĩdĩ, eeta ꞌcĩg ammuk aĩ hagayyia thõõth gẽrrẽẽt, aitiõõ hõllõngaa aga thõõth vẽlẽk.

³ Nẽẽthĩ, ẽẽtĩ ꞌcĩ ammĩnan Nyekuc, aga Nyekuci ngaatĩ ammĩnanĩ nẽẽ ĩnõõnnõ.

⁴ Nẽẽthĩ hoti ho, thõõth cĩ hadahĩ ꞌgarriẽẽn ꞌcĩg aaꞌnyĩhoothĩk hẽlẽggĩ ꞌcĩg aar eeta hĩĩtõ nyekuꞌnya, haga naag haĩ ꞌgii ꞌcĩ aar eeta hĩĩ Nyekuc ho, ĩĩn ꞌgiimwa haaga looccaa nĩĩcĩ nẽ aaĩ Nyekuci hõdẽẽthõng diooni.

⁵ Horoong aattĩg nyekuꞌnya hẽẽtahujjieen hĩ loota nĩnga nẽ ala eeta ũgẽẽgĩ nyekuꞌnya ꞌcĩg hõllõngaa ĩĩn dĩdĩ hĩ makayyiook ꞌcĩg mẽẽlĩg.

⁶ Haꞌnyak naag Nyekuc hõdẽẽthõng diooni nẽ ĩĩn Baangeet. Baa ẽhẽnyta nẽẽ hẽlẽggĩ vẽlẽk nẽ harũgĩ naag, hĩnĩngĩtĩ ĩnõõnnõ. Yeesu Krĩstõ diooni ꞌcĩ ĩĩn Makayyioohit cĩnaac. Baa ẽhẽnytaa hẽlẽggĩ vẽlẽk ꞌthaarĩĩ cĩgĩnnĩg nẽ aaꞌnyeet Yeesu ngagĩĩt rũgẽt.

⁷ Hõllõngaa aga eeta vẽlẽk thooꞌthiok iccig. Nẽ dĩdĩ, baa itiliꞌthia eeta ꞌcĩg mẽẽlĩg ꞌgõõlaa ꞌcĩ ẽlẽmmĩ thõõth ꞌcĩ aĩ, arũgĩ hẽlẽggĩ ꞌcĩg aar eeta hĩĩtõ nyekuꞌnya ho. Nẽẽthĩ, má adak nẽẽg iding ꞌcĩ aaꞌnyĩhoothĩk hẽlẽggĩ ꞌcĩg aar eeta hĩĩtõ nyekuꞌnya ho, accanan hinnia ĩhõõggõ muhẽẽnĩtĩ cĩ ꞌthinneeti cĩggĩĩng ꞌcĩg hõllõngaa õkõmĩ.

⁸ Ĩĩn dĩdĩ, hõllõngaa aallak Nyekuci ꞌgẽẽn ꞌcĩ hadak naaga. Nẽẽthĩ, hõllõngaa habathĩ naag, hĩnĩngĩtĩ ꞌgẽẽn ꞌcĩ hadahĩ nẽ tarĩ, hõllõngaa habũnnaa, hĩnĩngĩtĩ ꞌgẽẽn ꞌcĩ hadahĩ.

⁹ Ma haĩnanaaku eet ꞌcĩ hõllõngaa attiran muhẽẽnĩtĩ cĩ ꞌthĩnĩt cĩnnĩ, thõõth ꞌcĩ abathĩ, hĩnĩngĩtĩ agayyu niig ngaatĩ adaku ꞌgeenniok vẽlẽk.

¹⁰ Má ĩcĩnuung eet ꞌcĩ hõllõngaa aꞌnyak ꞌthĩnĩt ꞌcĩ õkõmĩ ngagiit eet ꞌcĩg agayyu ngaatĩ adaku ꞌgẽẽn ꞌcieethaa cĩ ꞌgii ꞌcĩ aar eeta hĩĩ nyekuc ꞌcĩ hõllõngaa ĩĩn dĩdĩ ho, aaꞌnyĩk hinnia hatĩ thõõth ciee ĩnõõnnõ buúk, hũũk hũbũraneek ngaatĩ õkõ adahĩ ꞌgẽẽn ꞌcĩ aaꞌnyĩhoothĩk hẽlẽggĩ ꞌcĩg aar eeta hĩĩtõ nyekuꞌnya ho.

¹¹ Nẽẽthĩ hoti ho, aduhoothĩk hatĩ ꞌgotonu hĩ ngoonu baag adaaknĩ Krĩstõ nẽ hõllõngaa attiran lemiiniti ho, ꞌgẽẽnyĩthaa cunuung.

¹² Ma ẽꞌthẽcannu niig ngaatĩ adĩmannu ꞌgotoonogu hĩ ngoonogu ꞌbuth ꞌgõõlaa ĩĩcĩ nẽ ujjuurru muhẽẽnĩt cĩ ꞌthinneeti cĩggĩĩng ꞌcĩ hõllõngaa õkõmĩ ho, ẽꞌthẽcattu niig thõõth cĩ Krĩstõ.

¹³ Nẽẽthĩ hoti ho, má aaꞌnyĩk idingi ꞌcĩ hadahi naa ꞌgõtõna hĩ ngõõna hẽꞌthẽcattõõ, occa hatĩ hõllõngaa hadahi naa iding tĩho tarĩ, hátĩ hiittiõõ nẽẽg hõllõngaa ẽꞌthẽcanĩ.