1 Korinthia 7 - ꞌBuuk cĩ Thõõth cĩ Nyekuci

Terethiinit cĩ ꞌthũwaanõ

¹ Nẽẽthĩ ꞌyioko, hattacani naa thooꞌthiok baag ajinnaangu niig nganĩĩt waragaawaa cunuung. Baa ainnu niig, “Abũnnaa occa ngaatĩ hõllõngaa aꞌthũwaniini eeta?”

² Nẽẽthĩ, hĩnĩngĩtĩ mẽẽlĩg thooꞌthioha ꞌcĩg ĩĩn ꞌriiring, abũnnaa aꞌnyak ẽẽtĩ ngaa cĩnnĩ nẽ aꞌnyak ngaa maac cĩnnĩ.

³ Adiim maac hẽlẽm thõõth cĩ ngaa cĩnnĩ hatĩ adiim oogini nẽ ngaa buúk aꞌnyĩĩk hẽlẽm maac cĩnnĩ hatĩ adiim oogini.

⁴ Ĩĩn ẽlẽ cĩ ngaaõ cĩ maac cĩnnĩ, hõllõngaa ĩĩn ẽlẽ cĩ ngaaõ diooni nẽ ĩĩn ẽlẽ cĩ maacõ cĩ ngaa cĩnnĩ, hõllõngaa ĩĩn cĩ maacõ diooni.

⁵ Ma haburru ngaatĩ attihoonnu, horoong thĩ hatĩ elemoonnu ngaatĩ abillu ꞌtihõõnĩt hĩdĩhĩdĩĩc, hátĩ alayyio nõõ thõng. Nẽẽthĩ hátĩ iittiõõ ꞌThĩttaanĩ hõllõngaa attĩmannuunga, hĩnĩngĩtĩ hõllõngaa uullu ngaatĩ aggammu eleeti cugguung jurrung.

⁶ Haduha naa thõõth icci, hátĩ eberria thõõth ꞌcĩ adĩmannu niiga, hõllõngaa hattĩnganeekuung thõng.

⁷ Occa nuun baa iittiõõ eeta vẽlẽk hõllõngaa aꞌthũwanni hĩ naana. Nẽẽthĩ hinnianĩ, aꞌnyak eeta hõdẽĩ hõdẽĩ ꞌbaaninit ꞌcĩ aku hĩ Nyekuc, aꞌnyak umwaa ꞌbaaninit icci aꞌnyak umwaa iccia.

⁸ Nẽ ꞌyioko, hanneehi naa eet ꞌcĩg nga hũꞌthũwattõõ hĩ ngaatĩbõyyĩꞌnya, mẽẽn hĩ ĩhõõggõ ngaatĩ hõllõngaa aꞌthũwaniini hĩ naana.

⁹ Nẽ má hõllõngaa ũũlũ ngaatĩ aꞌthũũnnĩ eleeti cĩggĩĩng, aꞌnyĩĩk hũꞌthũwattõõ, mẽẽn ngaatĩ aꞌthũwaniini hĩllõõan ngaatĩ abũranẽẽkĩ ꞌtihõõnĩt.

¹⁰ Thõõth ꞌcĩ haduhaahi naa eet ꞌcĩg ũꞌthũwattõõ cieeni, hõllõngaa nganĩĩt ꞌcĩ haduha ho, aduha Makayyioohiti aĩ, occa hõllõngaa õõg ngaa maac cĩnnĩ.

¹¹ Nẽẽthĩ, má õõg ngaa maac, aꞌnyĩĩk hiittiõõ hõllõngaa aꞌthũwan eet umwaa tarĩ, hode aꞌnyĩĩk hobodoothĩk maac cĩnnĩ. Nẽ occa hõllõngaa iiggia maac ngaa cĩnnĩ.

¹² Ẽrẽka thõõth umwaa ꞌcĩ õthõõth Makayyioohiti, hĩnĩngĩtĩ ꞌthũan. ꞌGii vẽlẽk ꞌcĩ occa hadĩmani naana, occa haaꞌnyuung ngagiit tilooinit caannĩ. Má hõllõngaa ĩĩn ngaa cunni nuyyioohit cĩ Makayyiookto nẽ ẽlẽm ngaatĩ arũmeennu hĩ nganiita, ma hoogi ĩnõõnnõ.

¹³ Nẽ má aꞌnyak ngaa umwaa maac cĩnnĩ ꞌcĩ hõllõngaa ĩĩn lemmioohit nẽ ẽlẽmĩ maac ngaatĩ arũmẽẽnĩ hĩ ĩnõõnnõ, occa hõllõngaa õõg nẽẽ ĩnõõnnõ.

¹⁴ Maac cunni hode ngaa cunni ꞌcĩ hõllõngaa ĩĩn lemmioohit, ikia ĩĩ tẽlla, hĩnĩngĩtĩ ũꞌthũwanii nganiita. Thõõth icci ꞌcĩ aaꞌnyĩk lõhõlĩ cugguung buúk hĩĩtõ tẽllĩg, hĩcĩ ꞌyioko ẽllẽẽmĩth muumaa cĩ Nyekuci ho.

¹⁵ Nẽẽthĩ, má ũtũngeek maac ꞌcĩ hõllõngaa ĩĩn lemmioohit ngaa cĩnnĩ ho, aꞌnyĩĩk hũtũngeek. Ẽẽtĩ hode ngaa ꞌcĩ ĩĩn lemmioohit, occa hõllõngaa ẽcẽb thooꞌthioha ꞌcĩg aattĩg hoti, hĩnĩngĩtĩ avvaanneet Nyekuci ngagĩĩt haaut ganõõna.

¹⁶ Occa aga nii ngaa hutuno ngaatĩ ẽẽlanĩ maac cunni, hode occa aga nii maac hutuno, ngaatĩ occa ẽẽlanĩĩ ngaa cunni?

¹⁷ Adiim aꞌthuunnu niig hõdẽĩ hõdẽĩ ꞌgõõl baa aarikuung ngagiit Makayyioohiti nẽ aallattiaau hĩ baa avviyyuung ngagiit Nyekuci baa ĩĩcĩ oou. Thõõth caannĩ ꞌcĩ haduhaahi lothippiꞌnya cĩg lemmioohu vẽlẽk hũnnẽẽcõ cieeni.

¹⁸ Má baa ẽttẽẽdĩ ẽlẽ cunni ẽlẽk, aꞌnyĩĩk haala noho. Nẽ má baa nga hẽttẽẽdĩ ẽlẽ, ma nga hetteedi.

¹⁹ Ĩĩn ꞌteediniti cĩ ello hode thõõth ꞌcĩ hõllõngaa etteedini ẽlẽ, thõõth umwa haaga. Thõõth ꞌcĩ aaddi ꞌcĩ hathĩknĩ tilooinit cĩ Nyekuci dioo.

²⁰ Anneek eet vẽlẽk aallattia ꞌgõõlaa ĩbaa aattiyyu baa aũyyuung Nyekuci.

²¹ Ĩĩnĩ baa nii appahaca baa avvaanni Nyekuci? Ma haaꞌnyihi ꞌthĩnĩt hupuppud, nẽẽthĩ nẽẽꞌthẽk, má aga ngaatĩ ammũdaanĩ ꞌgõõl ꞌcĩ occa õõganĩĩ ẽlẽ cunni, õga.

²² Ma baa ẽbẽra Makayyioohiti appahacaaꞌnya, iita ĩĩtõ nẽẽg eet cĩgĩnnĩg ꞌcĩg õõgta. Nẽ ma ẽbẽra nẽẽ eet ꞌcĩg õõgta ẽlẽk, iita ĩĩtõ nẽẽg appahacaaꞌnya cĩg Krĩstõ.

²³ Baa ũtũũwauung Nyekuci ngagiit ẽlẽk, ma nga hau hiiginnu appahacaaꞌnya cĩg eetuk tarĩ.

²⁴ ꞌGotoonoga hĩ ngoonoga, aꞌnyĩĩk eet hõdẽĩ hõdẽĩ haallattia ꞌgõõlaa ꞌcĩ baa avvaanĩ Nyekuci.

Eet ꞌcĩg nga hũꞌthũwattõõ

²⁵ Ẽrẽka thõõth umwaa ꞌcĩ õthõõth Makayyioohiti, hĩnĩngĩtĩ eet ꞌcĩg nga hũꞌthũwattõõ. Nẽẽthĩ, occa haduhaakuung naa ngagiit thõõth ꞌcĩ hammuhi naana. Nẽ occa elemmu thõõth ꞌcĩ haduha naa ho, hĩnĩngĩtĩ ammaannĩkaa Makayyioohiti nganĩĩta.

²⁶ Hĩnĩngĩtĩ thõõth ꞌcĩ abathĩ ꞌcĩ aaĩ ꞌyioko ho, hammuhi occa abũnnaa gẽrrẽẽt ngaatĩ aattiyyu haaga hõllõngaa aꞌthũwaniinnu.

²⁷ Má ũꞌthũwanõ, ma hoogi ngaa. Nẽ má nga ꞌthũaanõ, ma hadiimi haꞌthũannii.

²⁸ Hõllõngaa abathĩ ngaatĩ aꞌthũwaniini, tananga baa nga ꞌthũaanõ ĩĩcĩ oou. Nẽẽthĩ, eeta ꞌcĩg aꞌthũwanni, ammũda hatĩ ꞌcannan ꞌcĩ maka nẽ hadiim hẽẽlannuung naa ngagiit thõõthaa nĩĩca.

²⁹ Nẽ thõõth ꞌcĩ haini naa ho ꞌgotoonoga hĩ ngoonoga, huturig waathinniooha ꞌcĩg nga haattiyyi naag loota nĩnga ho gẽrrẽẽt. Nẽẽthĩ, iꞌthianaanĩ ꞌyioko, aꞌnyĩĩk eet ꞌcĩg aꞌnyak ngaaĩ haauto hĩcĩ hõllõngaa aꞌnyahĩ;

³⁰ aꞌnyĩĩk eet ꞌcĩg alu, haauto hĩcĩ hõllõngaa alu, aꞌnyĩĩk eet cĩg accamanoothĩk, haauto hĩcĩ hõllõngaa accamanoothĩk buúk, aꞌnyĩĩk eet ꞌcĩg ũũt ijjio, haauto hĩcĩ hõllõngaa ũũtĩ;

³¹ aꞌnyĩĩk eet ꞌcĩg adticaniini hẽlẽggĩ cĩg looc nicci, haauto hĩcĩ hõllõngaa adticaniini. Hĩnĩngĩtĩ edecciaa hatĩ lõõcĩ nicciee hĩcĩ ꞌyioko hacĩn naag ko.

³² Hadiimmuung naa ngagiit aaut lõꞌngõõc iittiõõc hõllõngaa apuppuddu. Arrĩĩppan ẽẽtĩ ꞌcĩ nga hũꞌthũwanõõ thõõth cĩ Makayyiookto nẽ arrĩĩppan ꞌgõõl ꞌcĩ occa aaꞌnyĩkĩ nẽẽ Makayyioohit haccamanoothĩk.

³³ Nẽẽthĩ hinnia, arrĩĩppan ẽẽtĩ ꞌcĩ ũꞌthũwanõõ, thooꞌthiok cĩg looc nicci, hĩ ꞌgõõl ꞌcĩ occa aaꞌnyĩkĩ nẽẽ ngaa cĩnnĩ haccamanoothĩk,

³⁴ nẽ eꞌngerri thooꞌthioha ꞌcĩg adiim nẽẽnĩ. Arrĩcana loholeec ꞌcĩ ngayyi ꞌcĩ nga hũꞌthũwanĩ, thooꞌthiok cĩg Makayyiooktak. Aaĩ muhẽẽnĩtĩ cĩnnĩ cĩ ello hĩ cĩ loriio vẽlẽk hĩ Makayyioohit. Nẽẽthĩ hinnianĩ, arrĩcana ngaa ꞌcĩ ũꞌthũwanĩ thooꞌthiok cĩg looc nicci, hĩ ꞌgõõl ꞌcĩ occa aaꞌnyĩkĩ nẽẽ maac cĩnnĩ haccamanoothĩk.

³⁵ Haduha naa thõõth icci, hĩĩ bũnnai cunuung, hiittiõõ hõllõngaa ecebbuung thõng, hátĩ aaut ꞌgõõlaa ꞌcĩ abũnnaa nẽ alayyu Makayyioohit hõdẽĩ.

³⁶ Nẽẽthĩ, má abũraneek ẽẽtĩ bũhẽẽc ꞌcĩ adiim aꞌthũwan nẽẽ gẽrrẽẽt ꞌcĩ ũũppan ngaatĩ occa aꞌthũwanĩ ẽẽtĩ, aꞌnyĩĩk hũꞌthũwan ĩnõõnnõ hĩcĩ adiim nẽẽnĩ. Aitiõõ hõllõngaa ĩĩn ꞌthẽccan.

³⁷ Nẽẽthĩ, abũnnaa ngaatĩ haꞌthũũnnĩ ẽlẽ nẽ hummuhit jurrung ngaatĩ occa hõllõngaa haꞌthũaniini.

³⁸ Abũnnaa ngaatĩ haꞌthũaniini, nẽẽthĩ, mẽẽn ngaatĩ occa hõllõngaa haꞌthũaniini ũdũt.

³⁹ Occa aalla ngaa arũmĩ hĩ maac cĩnnĩ ĩꞌthõng hadaak maac. Nẽẽthĩ hatĩ ooggia nẽẽ hũꞌthũwan ẽẽtĩ ꞌcĩ ĩĩn nuyyioohit cĩ Makayyiookto diooni.

⁴⁰ Nẽẽthĩ hoti ho, muhẽẽttaa caannĩ, hammuhi occa hathihi naa thõõth cĩ Lori cĩ Nyekuci ngaatĩ haĩnnĩ, occa accamanoothĩk ngaa hatĩ aaĩ ẽmmẽn.