1 Korinthia 6 - ꞌBuuk cĩ Thõõth cĩ Nyekuci

Lokihẽẽt lothippitaa cĩ lemmioohu

¹ Má aꞌnyaheek lemmioohiti umwaa ꞌgõõnĩ ꞌcĩ ĩĩn lemmioohit liilii ꞌcĩ occa abĩllĩ ĩnõõnnõ lokihooa, occa õkõ abĩllĩ nẽẽ ĩnõõnnõ lokihooa cĩ eet ꞌcĩg hõllõngaa ĩĩn lemmiook, hode occa õkõ abĩllĩ hĩ eet cĩg Nyekuci?

² Hõllõngaa agayyu niig aĩ, ẽttẽẽd hatĩ eeta cĩg Nyekuci thõõth cĩ eet cĩg looc nicci? Nẽ má õõ etteeddu thõõth cĩ looc nicci, occa hõllõngaa uuluyyu ngaatĩ akũmaneeku thooꞌthiok ꞌcĩg kidicig?

³ Hõllõngaa agayyu niig aĩ, hẽttẽẽd hatĩ naag thooꞌthiok cĩg aajĩleetu? Ma aaĩ noho, hũũlũ hatĩ naa ngaatĩ hẽttẽẽdĩ thooꞌthiok cĩg rũgẽt nicci!

⁴ Nẽẽthĩ hoti ho, má aꞌnyaku thooꞌthiok ꞌcĩg aattĩg noho, eberria ꞌgaadĩꞌnya tananga eet ũgĩ haaga hõrggẽẽnaa cĩ lothippit cĩ lemmioohu!

⁵ Haduha naa thõõth icci, hátĩ haggamuung ngagiit ngaaoni. Hiꞌthihi occa ꞌthẽk eet umwa hõrggẽẽnaa cunuung ꞌcĩ ẽggẽẽnyĩth, ꞌcĩ occa ẽttẽẽd thooꞌthiok ꞌcĩg ẽggẽrꞌnyõõnĩ lemmiooha hõrggẽẽnaa cunuung ko?

⁶ Inni hũũhĩ eet umwaa hõrggẽẽnaa cunuung ꞌgõõnĩ ꞌcĩ ĩĩn lemmioohit lokihooa cĩ eet ꞌcĩg hõllõngaa ĩĩn lemmiook ko?

⁷ Nẽ ma õkõõĩ lemmioohiti umwaa ꞌgõõnĩ lokihooa, udhuktaau niig ẽlẽk. Occa mẽẽn ngaatĩ iggoolluung eeta nẽ ẽbẽlattuunga.

⁸ Nẽẽthĩ hinnia, iggoolonnu niig ẽmmẽn nẽ ĩdĩmattu thooꞌthiok ꞌcĩg abathĩ nẽ ĩdĩmatteehu thooꞌthiok iccig lemmiook.

⁹ Hõllõngaa nooyyia agayyu niig aĩ, hõllõngaa hatĩ arigith eeta ꞌcĩg ĩĩn ꞌthẽccanniook habuccieet cĩ Nyekuci? Ma higgoollu eleeti! Aitiõõ hatĩ eeta ꞌcĩg adĩman thooꞌthiok ꞌcĩg ĩĩn ꞌriiring, hode eeta ꞌcĩg ala nyekuꞌnya ꞌcĩg hõllõngaa ĩĩn dĩdĩ, hode eeta ꞌcĩg attik ngaaĩ ꞌcĩg ꞌrĩĩng, hode ꞌwuaangiak ꞌcĩg maacĩg hode eet ꞌcĩg attik ꞌgõõnõgĩ ꞌcĩg maacĩg,

¹⁰ hode igorriaaha hode lobolobbiaaha hode duuttiaha hode oloꞌngiaaha, hõllõngaa aduhun habuccieet cĩ Nyekuci.

¹¹ Baa gõõng aattiyyu niig ũgẽẽgĩ nohota. Nẽẽthĩ ꞌyioko, utuunytuung ngagiit ꞌthaara cĩg Makayyioohit cĩnaac Yeesu Krĩstõ, hĩ ꞌtirrian cĩ Lori cĩ Nyekuci haanytuung ĩĩtõ tẽllĩg nẽ elemuung Nyekuci.

Ũtũbũrĩt thooꞌthiok ꞌcĩg ĩĩn ꞌriiring

¹² Ainnu niig ũgẽẽgĩ, “Occa hadĩman ꞌgii vẽlẽk ꞌcĩ hadiim naaga.” Nẽẽthĩ haduhaakuunga, hõllõngaa abũnnaa hẽlẽggĩ vẽlẽk hĩ ngagĩĩta. Ĩnõõ ꞌcĩ habũrrĩ naa ngaatĩ occa ĩllõõanna ꞌgiimwaa nganĩĩt ko.

¹³ Nẽ tarĩ iittu niig, “Ĩĩn ꞌgẽẽn cĩ heengu nẽ ĩĩ hẽẽng cĩ ꞌgeeno,” nẽẽthĩ, aruk hatĩ Nyekuci ĩhõõggõ ꞌrammaattĩg. Hõllõngaa ĩĩn ẽlẽ ꞌcĩ hadticanĩ thooꞌthiok ꞌcĩg ĩĩn ꞌriiring, nẽẽthĩ, ĩĩn ẽlẽ cĩ Makayyiookto nẽ ĩĩ Makayyioohiti cĩ ello.

¹⁴ ꞌTirriaanaa cĩnnĩ, baa arũgtha Nyekuci Makayyioohit cĩnaac daahĩtha nẽ arũgthanneet hatĩ nẽẽ ngagĩĩt buúk daahĩtha.

¹⁵ Aitiõõ niig hõllõngaa agayyu ngaatĩ ĩĩnnĩ eleeti cugguung dhoorit cĩ ẽlẽ cĩ Krĩstõ? Ĩcca occa hattiha naa ẽlẽ cĩ Krĩstõ nẽ hũrũmeeha hĩ cĩ ꞌwaaꞌngiaktõ? Aitiõõ ũdũt!

¹⁶ Hõllõngaa agayyu niig aĩ, ẽẽtĩ ꞌcĩ arũmeek ẽlẽ cĩnnĩ hĩ ꞌcĩ ꞌwaaꞌngiaktõ, ĩĩtõ nẽẽg ẽlẽ hõdẽẽthõng? Hĩnĩngĩtĩ aduha ꞌBuuhi cĩ Nyekuci aĩ, “Iita ĩĩtõ nẽẽg ꞌrammaattĩg ẽlẽ hõdẽẽthõng.”

¹⁷ Nẽẽthĩ, ẽẽtĩ ꞌcĩ arũm ẽlẽ cĩnnĩ hĩ cĩ Makayyiookto, iita ĩĩtõ lorii cĩnnĩ hĩ cĩ Makayyiookto hõdẽẽthõng.

¹⁸ Iliittia thooꞌthiok ꞌcĩg ĩĩn ꞌriiring. Nẽ ꞌthẽccanẽẽta ũgẽẽgĩ vẽlẽk ꞌcĩg ẽꞌthẽcan ẽẽtĩ, aattĩg ẽllaa cĩnnĩ battaala, nẽẽthĩ, ẽẽtĩ ꞌcĩ adĩman ꞌthẽccan ꞌcĩ attihi ngaaĩ tahatak, adĩman ꞌthẽccan cĩ ẽlẽ cĩnnĩ ẽmmẽn.

¹⁹ Hõllõngaa agayyu niig ngaatĩ ĩĩnnĩ eleeti cugguung ꞌCieeth cĩ Lori ꞌcĩ Ẽllẽẽmĩth ꞌcĩ aaĩ hĩ ngagiit baa aaꞌnyuung Nyekuci? Hõllõngaa ĩĩn eleeti cugguung diooni;

²⁰ baa uuttiannu niig thõng. Nẽẽthĩ hoti ho, itingolli Nyekuc eleetinii cugguung.