1 Korinthia 16 - ꞌBuuk cĩ Thõõth cĩ Nyekuci

Lũtẽẽnĩt cĩ ꞌrabbẽẽt cĩg eet cĩg Nyekuci

¹ Nẽẽthĩ ꞌyioko, thõõthaa cĩ hoiinit cĩ ꞌrabbẽẽt cĩg eet cĩg Nyekuci, ĩdĩmanit thõõth baa haduhaahi naa lothippiꞌnya cĩg lemmiook cĩg ꞌGalaaꞌthia.

² Lomidikaaꞌnyanĩ vẽlẽk, aꞌnyĩĩk eet hõdẽĩ hõdẽĩ hõrggẽẽnaa cunuung hitiangithit ꞌrabbẽẽt ũgĩ ngadiiha, ꞌrabbẽẽtĩĩ ꞌcĩg aggam ẽẽtĩ dtiicaa cĩnnĩ. Hátĩ ma hikia naana, iittiõõ hatĩ lũtẽẽnĩtĩ umwaa tõõ.

³ Nẽ ma hõdõlana, haaꞌnyihi hatĩ naa eet baag ẽbẽraannu niig waragẽẽt cĩg terethiittak nẽ ĩꞌthooyyu ĩhõõggõ hootti ꞌbaaninit cunuung ꞌJeruꞌthalẽma.

⁴ Má hacini abũnnaa ngaatĩ occa hõkõõĩ naa buúk, hõõkõrra hatĩ hĩ ĩhõõggõ hõdẽĩ.

Thooꞌthiok ꞌcĩg adiim Paaulo

⁵ Hakuu hatĩ hacinnuung ngagiit urutaa ꞌcĩ hõbõdaaĩ looccaa cĩ Maccedoonia, hĩnĩngĩtĩ hadiimi hõkõ nõõ naa ĩĩcĩ Maccedoonia.

⁶ Horoong hatĩ hau harũmĩ nõõ hĩ ngagiit hĩdĩhĩdĩĩc hode hakuu hẽdẽcaahi tagĩĩth nĩĩca, hátĩ iita eelliaangu nganĩĩt hẽẽrõnaa caannĩ ĩĩcĩ hõkõõĩ.

⁷ Hõllõngaa hadiimi naa hacinnuung ngagiit ꞌyioko nẽ hikia hothohoteehuung haaga, hammuhi occa hatĩ hau harũmĩ hĩ ngagiit hĩdĩhĩdĩĩc, hatĩ ẽlẽmĩ Makayyioohiti.

⁸ Nẽẽthĩ, haaĩ hatĩ ꞌtaaũnaa cĩ Eevvetho ĩꞌthõng Karrama cĩ Waathinniook Hẽẽn ꞌTur,

⁹ hĩnĩngĩtĩ ubbuuhothoothĩhaa nganĩĩt hattũũg cobbi cĩ dtiic ꞌcĩ abũnnaa, nẽ aattĩg eeta ꞌcĩg mẽẽlĩg ꞌcĩg abũrra nganĩĩta.

¹⁰ Má õdõlan Timotteeo, iita ũrũmtĩ hĩ ĩnõõnnõ jurrung. Adtican nẽẽ dtiic cĩ Makayyiookto hĩ naana.

¹¹ Ma haaꞌnyiku eet umwa hũtũbũr ĩnõõnnõ. Iꞌthooyyiak ĩnõõnnõ ꞌgõõl lõꞌngõõc, hátĩ hõbõda hĩ nganĩĩta. Hẽrẽ naa ĩnõõnnõ hĩ ꞌgõtõõnõgĩ ũgĩ.

¹² Nẽ ꞌyioko, hĩnĩngĩtĩ thõõth cĩ Appoolo, hadiimi naa hĩꞌthõõakuung ngagiit ĩnõõnnõ hookorria hĩ ꞌgõtõõnõgĩ. Baa aharĩ nẽẽ ngaatĩ akuuni ꞌyioko, nẽẽthĩ, aku hatĩ nẽẽ kõr ꞌcĩ adiim nẽẽnĩ.

¹³ Aaut dĩkĩĩm, okomit lemiittaa cunuung, aanytĩk ꞌthinneeti hokomit.

¹⁴ Idticanit thooꞌthiok vẽlẽk mĩnnaniitta.

¹⁵ Agayyu niig baa atiman eeta cĩg halang cĩ Tẽẽvana, ngaatĩ au ĩĩnnĩ lemmiook ĩĩcĩ oou looccaa cĩ Acaia, nẽ ĩrrĩcatta ngaatĩ adticanõõthĩkĩ lemmiook. Haduhaakuung naa ngagiit ꞌgotoonoga hĩ ngoonoga,

¹⁶ elemit eet ꞌcĩg aattĩg hoti, hĩ eet vẽlẽk ꞌcĩg au arũmoothiku hĩ ngagiit nẽ idticattoou hõdẽĩ.

¹⁷ Baa haccamanoothihi naa gẽrrẽẽt, ngaatĩ õdõlanĩ Tẽẽvana hĩ Vortunaato hĩ Acaiako, hĩnĩngĩtĩ aanyta nẽẽg nganĩĩt hẽlẽggĩ baag aitiõõ hĩ ngagiit tõõ.

¹⁸ Nẽ tarĩ, aanyta haccamanoothĩk gẽrrẽẽt, hĩ baa aaꞌnyuung ngagiit buúk accamattoothĩk. Ĩĩttĩk eet ꞌcĩg aattĩg noho ĩlaallẽ.

¹⁹ Ĩꞌthaayyuung lothippiti cĩ lemmiook ꞌcĩg au ꞌtaaũnnioohĩ cũũmõ cũũmõ ĩĩcĩ looc cĩ Aaꞌthia. Ĩꞌthaayyuung Akwila hĩ Piriciilla gẽrrẽẽt ꞌthaarĩĩ cĩg Makayyiookto, hõdẽĩ hĩ lemmiook ꞌcĩg õmmõtõõ ꞌcieethaa cĩnĩĩng.

²⁰ Ĩꞌthaayyuung ꞌgotoonogu hĩ ngoonogu ꞌcĩg aattĩg ngaati vẽlẽk ngagiita. Ĩꞌthaac ꞌgoonogu taliitta.

²¹ Heheedi naa Paaulo dẽẽdẽ ꞌthaainit icci attiaa caannĩ.

²² Má hõllõngaa ammĩnan eet umwaa Makayyioohit, ĩccĩĩnĩ nẽẽ ẽlẽk. Anneek baaĩ nuun Makayyioohit ijjia!

²³ Aꞌnyĩĩk bũnnai cĩ Makayyioohit Yeesu haau hĩ ngagiita.

²⁴ Aꞌnyĩĩk mĩnnan caannĩ haau hĩ ngagiit vẽlẽk ꞌthaarĩĩ cĩg Yeesu Krĩstõ. Aamẽn.