1 Korinthia 14 - ꞌBuuk cĩ Thõõth cĩ Nyekuci

ꞌBaaninit ꞌcĩ haduhaanĩ thõõth ꞌcĩ horumwa

¹ Ũnnẽẽc ꞌgõõl cĩ mĩnnaanõ nẽ ũbũratteehu ꞌbaaninit cĩ Lori ꞌcĩ Ẽllẽẽmĩthĩ, ettebehini ꞌbaaninit ꞌcĩ haduhaanĩ thõõth ꞌcĩ hatĩ aku horumwa.

² Hĩnĩngĩtĩ ẽẽtĩ umwaa ꞌcĩ õthõõth ũtũũgaa ꞌcĩ ꞌrĩĩng, hõllõngaa õthõõthõõ hĩ eeta, õthõõthõõ nẽẽ hĩ Nyekuc. Nẽ dĩdĩ, aitiõõ ẽẽtĩ ꞌcĩ athĩhĩ ĩnõõnnõ tõõ, aduha nẽẽ thooꞌthiok ꞌcĩg hõllõngaa agayyi loriiaa cĩnnĩ.

³ Nẽ ẽẽtĩ ꞌcĩ aduha thooꞌthiok ꞌcĩg hatĩ au horumwa, aduhaak nẽẽ eet, hátĩ hokomit ꞌthinneeti, akũtan ĩhõõggõ nẽ amammaayan thõng.

⁴ Ẽẽtĩ ꞌcĩ õthõõth ũtũũgaa cĩrrĩĩng, ẽẽl nẽẽ ẽlẽ cĩnnĩ, nẽẽthĩ, ẽẽtĩ ꞌcĩ aduha thõõth ꞌcĩ hatĩ aku horumwa, ẽẽl nẽẽ lothippit cĩ lemmioohu.

⁵ Hadiimmuung naa ngagiit othoothit thooꞌthiohĩĩ ꞌcĩg ꞌrĩĩng, nẽẽthĩ nẽẽꞌthẽk, hadiimi occa aduhaannu thooꞌthiok cĩg horumwa. Ĩllõõan ẽẽtĩ ꞌcĩ aduha thooꞌthiok cĩg horumwa eet ꞌcĩ õthõõth ũtũũgaa ꞌcĩ ꞌrĩĩng, hatĩ hõllõngaa õkõbaneek eet hĩthĩhĩt, hátĩ hũkũmaneek muhẽẽnĩt cĩ lothippit cĩ lemmioohu.

⁶ Nẽẽthĩ ꞌyioko, ꞌgotoonoga hĩ ngoonoga, má hakuu naa hĩ ngagiit nẽ hõthõõtha thooꞌthiohĩĩ ꞌcĩg ꞌrĩĩng, occa hatĩ habũnna naa hĩ ngagiit hutuno, hatĩ hõllõngaa haꞌnyahaakuung ngagiit terethiinit hode ꞌgẽẽnyĩth hode thõõth ꞌcĩ hatĩ aku horumwa hode thõõth cĩ ꞌlimmaanõ?

⁷ Tananga hadtahĩ loboru hode huruhi bõhõl, occa hatĩ aga ẽẽtĩ umwaa molook iina ꞌcĩ adtaki hode iina ꞌcĩ aruhi ho, hatĩ hõllõngaa agayyi molookwaana ꞌcĩg õrõk ko hõdẽĩ hõdẽĩ?

⁸ Má hõllõngaa adtaki illieeri cĩ luluuo jurrung, occa hatĩ akũmanoothĩk eeta hõõt jora hutuno?

⁹ Nẽ aaĩ noho hĩ ngagiit buúk, hatĩ othooꞌthu utugeetinii ꞌcĩg ꞌrĩĩng. Má aitiõõ ẽẽtĩ ꞌcĩ athĩhĩ thõõth ꞌcĩ othooꞌthu niig ko tõõ, aaĩ hinnia hatĩ hĩcĩ othoothiku ngõõt haaga.

¹⁰ Mẽẽlĩg utugeeti ꞌcĩg ꞌrĩĩng looccaa nĩĩcĩ nẽ abũnnaa nẽẽg vẽlẽk.

¹¹ Nẽẽthĩ, má hõllõngaa hathihi naa thõõth ꞌcĩ õthõõth eet umwaanĩ, hĩĩnĩ hinnia naa eet cĩ looc cĩrrĩĩng hĩ eet tĩho nẽ ĩĩn nẽẽ buúk eet ꞌcĩ looc cĩrrĩĩng hĩ nganĩĩta.

¹² Má adiimmu niig ꞌbaaninit cĩ Lori ꞌcĩ Ẽllẽẽmĩth dĩdĩ, eberria thĩ ꞌbaaninit ꞌcĩ hatĩ ẽẽl lothippit cĩ lemmioohu jurrung.

¹³ Nẽ hĩnĩngĩtĩ thõõth icci, aꞌnyĩĩk eet ꞌcĩ õthõõth thõõthaa ꞌcĩ ꞌrĩĩng halaõ, hátĩ hẽẽl Nyekuci ĩnõõnnõ hõkõbaneek eet thõõth ꞌcĩ õthõõth nẽẽ ho.

¹⁴ Hĩnĩngĩtĩ má halayyi naa ũtũũgaa umwaanĩ, lori caannĩ ꞌcĩ alayyi ho. Nẽẽthĩ hinnia, hõllõngaa haga naa muhẽẽnĩt caannĩ.

¹⁵ Nẽ hatĩ ꞌyioko hĩdĩmana naa hutuno? Halaayyi hatĩ loriiaa caannĩ nẽ hatĩ halaõ muhẽẽttaa caannĩ buúk, hebenni hatĩ loriiaa caannĩ nẽ hẽbẽnõ muhẽẽttaa caannĩ buúk.

¹⁶ ꞌYioko haauto tahana laiittaa cunuung, hatĩ adĩhĩꞌthu niig Nyekuc loriiaa cunuung nẽ hõllõngaa athiknuung nẽẽg ngagiit, occa hatĩ aĩ nẽẽg, “Aamẽn” hutuno?

¹⁷ Horoong occa alayyu niig Nyekuc ꞌgõõlaa ꞌcĩ abũnnaa, nẽẽthĩ hinnia, hõllõngaa ẽẽl laiiniti cunuung ko eet umwa buúk.

¹⁸ Hanneehi naa Nyekuc ĩlaallẽ, hĩnĩngĩtĩ hothoothi naa utugeetinii ĩĩcĩg ꞌrĩĩng hĩllõõanuung ngagiit vẽlẽk.

¹⁹ Nẽẽthĩ, má haaĩ lothippitaa cĩ lemmioohu, occa mẽẽn ngaatĩ hõthõõthĩ thooꞌthiok ꞌtur cĩg ꞌgẽẽnyĩthaak ꞌcĩg athĩhĩ eeta hatĩ hallimani eet ũgĩ, hĩllõõan ngaatĩ occa hõthõõthĩ thooꞌthiok aalibꞌnya õmmõtõ ꞌcĩg hõllõngaa athĩhĩ eeta.

²⁰ ꞌGotoonoga hĩ ngoonoga, ma haꞌnyaku muhẽẽnĩt hĩ lohollia ꞌcĩg hidicẽẽgĩ. Nẽ thõõthaa ꞌcĩ abathĩ, ĩmmĩrĩt aaut hĩ ĩdõlẽẽta nẽẽthĩ, muhẽẽttaa cunuung, aꞌnyahit muhẽẽnĩt hĩ eeta ꞌcĩg obbitẽẽgĩ.

²¹ Õthõõth Makayyioohiti ꞌBuuhaa cĩnnĩ aĩ, “Hadticaniini hatĩ naa eet cĩg looc cĩrrĩĩng ꞌcĩg õthõõth utugeetinii cĩg hõllõngaa aga eeta, hothooꞌthik eet cĩgannĩg. Õthõõthõõ hatĩ nẽẽg hĩ ĩhõõggõ thõõthaa cĩ eet ꞌcĩg ꞌrĩĩng, nẽ aalla eeta cĩgannĩg ko, hõllõngaa athĩkna nganĩĩt noho.”

²² Hõllõngaa ĩĩn thõõth ꞌcĩ õthõõth eeta ꞌcĩg ꞌrĩĩng ko, terethiinit cĩ lemmioohu, ĩĩn cĩ eet ꞌcĩg hõllõngaa ĩĩn lemmiook nẽ ĩĩn thõõth ꞌcĩ adukiaa ꞌcĩ hatĩ aku horumwa cĩ lemmioohu nẽ hõllõngaa ĩĩn cĩ eet ꞌcĩg hõllõngaa ĩĩn lemmiook.

²³ ꞌYioko ꞌthẽk hothoothito eeta laiittaa cunuung thooꞌthiohĩĩ ꞌcĩg ꞌrĩĩng nẽ iita eeta ũgẽẽgĩ ꞌcĩg ꞌrĩĩng hode ꞌcĩg hõllõngaa ĩĩn lothippit cĩ lemmioohu hĩ ngagiit, hõllõngaa hinnia hatĩ ammuk nẽẽg aĩ, adakuung ngagiit maangõnĩ?

²⁴ Nẽẽthĩ ꞌyioko, udukta niig vẽlẽk thooꞌthiok ꞌcĩg hatĩ au horumwa, hatĩ aduknaakuung eeta ꞌcĩg hõllõngaa ĩĩn lemmiook hĩ eet ꞌcĩg ꞌrĩĩng, occa hatĩ au ammũda nẽẽg ngaatĩ ĩĩnnĩ nẽẽg ꞌthẽccanniook nẽ idiimito ꞌgõõl ꞌcĩ ũũhũĩ ꞌthinneeti cĩggĩĩng, hĩnĩngĩtĩ thõõth ꞌcĩ aduhaannu niig ko.

²⁵ Appulana hatĩ nẽẽg thooꞌthiok ꞌcĩg ammiꞌthi ꞌthinneetinii cĩggĩĩng. Nẽẽthĩ hatĩ akatit huruꞌnyia nẽ ĩĩttĩg Nyekuc, “Hagayyia dĩdĩ ngaatĩ aayyi nii hĩ eet iccig.”

Laiinit ꞌcĩ abũnnaa

²⁶ Hõthõõth occa ꞌyioko haĩ ne ꞌgotoonoga hĩ ngoonoga? Má alũteennu niig hõdẽĩ, aꞌnyak eeta hõdẽĩ hõdẽĩ tẽgẽl hode thõõth cĩ ꞌlimmaanõ, hode thõõth cĩ terethiitto, hode ũtũg ꞌcĩ ꞌrĩĩng hode thõõth ꞌcĩ occa õkõbanni. Adiim occa adticanni thooꞌthioha cieeg vẽlẽk, hátĩ haanytĩk lothippit cĩ lemmioohu hittiran.

²⁷ Má õthõõth eet umwaa ũtũgaa ꞌcĩ ꞌrĩĩng, aanytĩk hothoothito eeta ꞌramma hode iyyio, hõdẽĩ hõdẽĩ nẽ õkõbanõõ ẽẽtĩ umwaa thõng.

²⁸ Má aitiõõ ẽẽtĩ ꞌcĩ õkõban thõõth tõõ, aꞌnyĩĩk eet ꞌcĩ õthõõth ko hĩjjaahõ lothippitaa cĩ lemmioohu nẽ õthõõthĩ ẽlẽ cĩnnĩ dioo hĩ Nyekuc.

²⁹ Aanytĩk põrõvẽtaaꞌnya ꞌramma hode iyyio hothoothito nẽ ittiamanit eeta ũgẽẽgĩ thõõth ꞌcĩ adukiaa ho jurrung.

³⁰ Nẽ má aaĩ ẽẽtĩ umwaa ꞌcĩ iccioloongan loota ꞌcĩ aaꞌnyĩk Nyekuci nyeemuut umwa, aꞌnyĩĩk eet ꞌcĩ hatĩ õthõõth ꞌjieena, hĩjjaahõ nẽ ikia õthõõth ꞌcĩ umwa ho.

³¹ Aanytĩk eet hõdẽĩ hõdẽĩ hudukta thooꞌthiok cĩg horumwa, hátĩ illimatta niig vẽlẽk thõõth ꞌcĩ aduha nẽẽg ko hũkũtan ĩhõõggõ.

³² Aggam loriẽẽt cĩg põrõvẽtaaꞌnyanu põrõvẽtaaꞌnya.

³³ Adiim Nyekuci hẽlẽggĩ vẽlẽk hidticattĩ lõꞌngõõc ꞌgõõlaa ꞌcĩ abũnnaa. Ma õmmõtõõ lothippiꞌnya cĩg lemmioohu,

³⁴ occa hõllõngaa elemmiaakĩ ngaaĩ hothoothito lothippitaa cĩ lemmioohu. Occa ijjiaaki nẽ ĩthĩktõ haaga, hĩcĩ aduha nyattalĩ cĩ Mũũꞌtha.

³⁵ Má aaĩ ꞌgii umwaa ꞌcĩ adiim aga nẽẽgĩ, occa ajin maaccwa cĩggĩĩng hatĩ õdõlanit õlõ. Aitiõõ hõllõngaa abũnnaa hatĩ õthõõth ngaa ngaatĩ õmmõtõõnĩ lothippiti cĩ lemmioohu.

³⁶ Iꞌthianaanĩ baa thõõth cĩ Nyekuci hĩ ngagiita? Hode ngagiit baa dioo ꞌcĩg õdõlannuung thõõth cĩ Nyekuci?

³⁷ Má ammuk eet umwaa aĩ hĩĩnĩ põrõvẽtaac hode aꞌnyak ꞌbaaninit cĩ Lori cĩ Ẽllẽẽmĩthĩ, aꞌnyĩĩk haga nẽẽ hĩĩ, thõõth ꞌcĩ hẽhẽẽdakuung naa ngagiit ko, ĩĩn tilooinit cĩ Makayyioohit Yeesu.

³⁸ Má appallaaran nẽẽ thõõth icci, appallaaran hatĩ Makayyioohiti ĩnõõnnõ buúk.

³⁹ Nẽẽthĩ, abũnnaa ꞌgotoonoga hĩ ngoonoga, ĩrrĩcatta ngaatĩ aduhaannu thooꞌthiok cĩg horumwa nẽ ma hedeneeku eet ngaatĩ õthõõthĩ thooꞌthiohĩ cũũmõ cũũmõ.

⁴⁰ Nẽẽthĩ, occa adĩmanni hẽlẽggĩ vẽlẽk ꞌgõõlaa ꞌcĩ aũlan ĩcĩ abũnnaa.